Read Moba Luk 3 Bible Online

Luk 3 - Moba bible

Luk 3

¹Yuo nbɑ k kpɑnbɑlɑ yudɑɑnɔ Tiibel Sesɑɑl din dii nɑɑn binɑ piik nɑn ŋɑnŋmu, Pɔns *Piilɑɑt mun din tie Suude yudɑɑnɔ. *Heluod mun din tie Gɑɑliile kpɑnbɑl, k u ninjɑ Fiiliip mun din tie Ituule nɑn Tlɑɑkoniit kpɑnbɑl. Liisɑniɑs din tie Abiilenn kpɑnbɑl.

²* Ann nɑn *Kɑɑyiif mun din tie Yennu mɑnntieb yudɑnm. L yuo nɑ k Yennu din jii u mɑɑn k tul Sɑn nbɑ tie Sɑɑkɑɑli bik nɑ, k u din be muuk ni.

³Ŋɑnn e k Sɑn din tuu lin *Suulden kpenu po kul, k muɑntl k tien niib ɑ bin mɔ kuɑŋɑɑn k lebt binbenŋ k wun wul’b Yennu nyunwulu k Yennu n nyik cɑb b biit.

⁴Lin nbɑ nɑ tie nɑn *Yennu sɔkni Esɑɑyi nbɑ din diɑn u kɑdɑɑɔk ni biɑnŋ nbɑ nɑ ɑ «Nisuɑ tɑn sii be muuk ni k huot k yɑɑ ɑ: ‹Ŋɑnmt mɑn Yonmdɑɑnɔ bɑɑlu sɔnu k tul’ɔ, ŋɑɑn ŋɑnm u sɔni k lii tuok.

⁵Bɑɑt kul sɑɑ gbie k nɑɑ; juɑt nɑn kunkonɑ kul sɑɑ bit k nɑɑ. Sɔnu nbɑ ŋmɑl siɑn nbɑ buol, l sɑɑ sont fɑnu; sɔnbuotɑ sɑɑ piin k lɑt nɑɑ,

⁶k tingbounŋ niib kul sɑɑ lɑ biɑnŋ nbɑ k Yennu sɑɑ fiel’b nɑ.› »

⁷Niib bonciɑnn din bɑɑl Sɑn buol ɑ wun wul’b Yennu nyunwulu, k u yet’b ɑ: «Yinm wɑɑlɑbli nɑ. Ŋmee kpɑɑn’i ɑ i tin k nyi Yennu wutuol nbɑ yɑɑ lin bɑɑl i pɑɑk nɑ ni?

⁸Ii tuun mɑn lin nbɑ sɑɑ wɑnn nɑn i set mɔ kuɑŋɑɑn k lebt binbenŋ. I dɑɑ yien i pɑlɑ ni nɑn Ablɑɑhɑɑnm tie i yejɑ. N yien’i e, Yennu sɑɑ fit k fiin tɑnɑ nbɑ nɑ k lin kpɑnt Ablɑɑhɑɑnm yɑɑbuonɑ.

⁹Pɑjɑl ponŋ tien siil ɑ, ɑ wun cuɑ tiini nɑn b jiinɑ, k tiik kul nbɑ k luon luɑnŋɑnɑ, b sɑɑ cuɑ’l e k lu’l muu ni.»

¹⁰K nibulciɑɔnŋ mɑnŋ din boi’ɔ ɑ: «K t ji sɑɑ tien nlee?»

¹¹K u jiin yet’b ɑ: «Wun nbɑ mɔk liɑtfɔkt ŋɑnle, sie k wun pɑɑt yenn k tul wun nbɑ k mɔk, k wun nbɑ mɔk jiet, sie k wun wɑt tul wun nbɑ k mɔk.»

¹²Ŋɑnn e k lɑnpogɑɑltesiɑb mun din bɑɑl ɑ wun wul’b Yennu nyunwulu, ŋɑɑn boi’ɔ ɑ: «Cɑnbɑɑ, tinm sɑɑ tien nlee?»

¹³K u yet’b ɑ: «I dɑɑ gɑɑn likli k gɑɑl bɑɑ senn’i *senni biɑnŋ nbɑ.»

¹⁴L puolpo k sejesiɑb mun boi’ɔ ɑ: «K tinm mun, t sɑɑ tien nlee?» K u yet’b ɑ: «I dɑɑ muksl suɑ k gɑɑn siɑl i ɑmi k fɑ fɑɑk niib po. Ii mɔk pɑlpienn i pɑɑɔk nbɑ k i gɑɑn nɑ pɑɑk.»

¹⁵Tɔn, k niib nbɑ din guu *Klistu bɑɑlu nɑ, ji din piin k boi b mɔnŋ, ɑ pɑsiɑl Sɑn sii tie Klistu e.

¹⁶L yuo mɑnŋ k Sɑn yet b kul ɑ: «Min ŋɑnin wuul’i Yennu wulu nɑn nyun e, ŋɑɑn wun nbɑ cie’n bɑɑt. N ponŋ k ŋɑn nɑn k n lot u tɑɑsɑɑŋmi. Ŋuɑ e tɑn sɑɑ jii Foŋɑnm nɑn muu k wul’i Yennu wulu.

¹⁷U diɑ u dilenn ŋmɑni ɑ wun lenn bonŋɑnn, k nyinn dibin k wuun u buɑl ni, ŋɑɑn juo founŋ nɑ muu nbɑ kɑn mi k kpien nɑ ni.»

¹⁸Sɑn nbɑ din muɑntl lɑbɑmɑnn mɑnŋ k tien niib nɑ, k u pɑk mɑɑn bonciɑnn k kpɑɑn’m,

¹⁹ŋɑɑn k biɑ din tɑɑl kpɑnbɑl Heluod, k mɑɑn u din fɑt u mɔnŋ ninjɑ ŋɑɑpuo Heluodiɑd k kuɑn’ɔ wɑɑ, k biɑ tun biit bonciɑnn.

²⁰L puolpo e, k Heluod din tɑn tun bonbiil mɑntk k biɑ pukn l pɑɑk, k kuɑn Sɑn dɑnsɑlk.

²¹Yuo nbɑ k Sɑn din wul niib kul Yennu nyunwulu nɑ, k Yiesu tɑn bɑɑl u buol k u wul’ɔ Yennu nyunwulu mun. Lenŋ mɑnŋ e k Yiesu din mei Yennu, k sɑnpɑɑpo tɑn luot,

²²k Foŋɑnm sik u pɑɑk nɑn gbɑnɑnt nbɑ nɑɑn nɑn ŋmɑnn nɑ, k kunkɔl nyii sɑnpɑɑpo k yet ɑ: «Fin e tie n Bilonkɑk. Fin e k n nunm gbuo.»

²³Yuo nbɑ k Yiesu din piin u tuonn nɑ, k u din mɔk nɑn binɑ piintɑ nɑ. Niib din duki nɑn u tie Suosiɑf bijɑ e, k Suosiɑf bɑɑ din tie Heli,

²⁴k Heli bɑɑ din tie Mɑɑtɑ, k Mɑɑtɑ bɑɑ din tie Liefi, k Liefi bɑɑ din tie Melki, k Melki bɑɑ din tie Sɑɑnɑi, k Sɑɑnɑi bɑɑ din tie Suosiɑf,

²⁵k Suosiɑf bɑɑ din tie Mɑɑtɑɑtiɑs, k Mɑɑtɑɑtiɑs bɑɑ din tie Amos, k Amos bɑɑ din tie Nɑɑhunm, k Nɑɑhunm bɑɑ din tie Esli, k Esli bɑɑ din tie Nɑɑkɑi,

²⁶k Nɑɑkɑi bɑɑ din tie Mɑɑt, k Mɑɑt bɑɑ din tie Mɑɑtɑɑtiɑs, k Mɑɑtɑɑtiɑs bɑɑ din tie Semeɑn, k Semeɑn bɑɑ din tie Suosek, k Suosek bɑɑ din tie Juodɑ,

²⁷k Juodɑ bɑɑ din tie Suɑnɑn, k Suɑnɑn bɑɑ din tie Lesɑ, k Lesɑ bɑɑ din tie Solobɑɑbel, k Solobɑɑbel bɑɑ din tie Sɑɑlɑɑtiel, k Sɑɑlɑɑtiel bɑɑ din tie Neli,

²⁸k Neli bɑɑ din tie Melki, k Melki bɑɑ din tie Adi, k Adi bɑɑ din tie Kuosɑɑnm, k Kuosɑɑnm bɑɑ din tie Elmɑɑdɑnm, k Elmɑɑdɑnm bɑɑ din tie El,

²⁹k El bɑɑ din tie Yiesu, k Yiesu bɑɑ din tie Eliesel, k Eliesel bɑɑ din tie Suoliinm, k Suoliinm bɑɑ din tie Mɑɑtɑ, k Mɑɑtɑ bɑɑ din tie Liefi,

³⁰k Liefi bɑɑ din tie Siimeɔn, k Siimeɔn bɑɑ din tie Suudɑ, k Suudɑ bɑɑ din tie Suosiɑf, k Suosiɑf bɑɑ din tie Suonɑɑnm, k Suonɑɑnm bɑɑ din tie Eliiɑkiinm,

³¹k Eliiɑkiinm bɑɑ din tie Meleɑ, k Meleɑ bɑɑ din tie Menɑ, k Menɑ bɑɑ din tie Mɑɑtɑɑtɑ, k Mɑɑtɑɑtɑ bɑɑ din tie Nɑɑtɑn, k Nɑɑtɑn bɑɑ din tie Dɑɑfiid,

³²k Dɑɑfiid bɑɑ din tie Jese, k Jese bɑɑ din tie Suobet, k Suobet bɑɑ din tie Buos, k Buos bɑɑ din tie Sɑɑlɑ, k Sɑɑlɑ bɑɑ din tie Nɑɑsɔn,

³³k Nɑɑsɔn bɑɑ din tie Amiinɑɑdɑɑb, k Amiinɑɑdɑɑb bɑɑ din tie Admin, k Admin bɑɑ din tie Alni, k Alni bɑɑ din tie Eslɔnm, k Eslɔnm bɑɑ din tie Fɑɑles, k Fɑɑles bɑɑ din tie Suudɑ,

³⁴k Suudɑ bɑɑ din tie Sɑɑkɔb, k Sɑɑkɔb bɑɑ din tie Isɑɑk, k Isɑɑk bɑɑ din tɑn tie Ablɑɑhɑɑnm, k Ablɑɑhɑɑnm bɑɑ din tie Telɑ, k Telɑ bɑɑ din tie Nɑɑkɔl,

³⁵k Nɑɑkɔl bɑɑ din tie Seluk, k Seluk bɑɑ din tie Lɑɑgo, k Lɑɑgo bɑɑ din tie Fɑɑlek, k Fɑɑlek bɑɑ din tie Ebel, k Ebel bɑɑ din tie Sɑɑlɑ,

³⁶k Sɑɑlɑ bɑɑ din tie Kɑinɑɑnm, k Kɑinɑɑnm, bɑɑ din tie Alfɑɑksɑɑt, k Alfɑɑksɑɑt bɑɑ din tie Senm, k Senm bɑɑ din tie Noe, k Noe bɑɑ din tie Lɑɑmek,

³⁷k Lɑɑmek bɑɑ din tie Mɑɑtuusɑɑlɑ, k Mɑɑtuusɑɑlɑ bɑɑ din tie Henɔk, k Henɔk bɑɑ din tie Jɑɑlet, k Jɑɑlet bɑɑ din tie Mɑɑleliɑl, k Mɑɑleliɑl bɑɑ din tie Kɑinɑn,

³⁸k Kɑinɑn bɑɑ din tie Enos, k Enos bɑɑ din tie Set, k Set bɑɑ din tie Adɑn[2], k Adɑn bɑɑ din tie Yennu.