Read Moba Luk 4 Bible Online

Luk 4 - Moba bible

Luk 4

¹L yuo nɑ k Yiesu din nyii *Suulden kpenu po, k gbie nɑn Foŋɑnm, k Foŋɑnm mɑnŋ sɑɑn nɑn’ɔ k u kuɑ muuk ni,

²k lenŋ e k *Sɑɑtɑn din sɑɑ jɑnm’ɔ dɑɑ piinnɑ. K u k dii siɑl i yuo mɑnŋ ni, k l yuo nɑ dɑɑ tɑn gɑl k kon ji din suol’ɔ.

³K Sɑɑtɑn yet’ɔ ɑ: «L i tie k ɑ set tie Yennu Bijɑ i e, fɑn yet tɑnn nɑ k lin kpɑnt pɑɑnu.»

⁴K Yiesu jiin k yet’ɔ ɑ: «L diɑn Yennu lolkpel kɑdɑɑɔk ni ɑ: ‹Pɑɑnu kuukuɑ kɑɑ te k nilɔ be.› »

⁵L puolpo e k Sɑɑtɑn ji din jii’u k duo nɑn’ɔ sɑnpɑɑpo k sɑɑ wɑnn’ɔ tingbounŋ yent kul kul l tɑɑkpɑɑk ni,

⁶ŋɑɑn yet’ɔ ɑ: «N sɑɑ tul’ɑ yiikuo l kul pɑɑk nɑn l mɔktuk kul, k mɑɑn b tul’n ɑ, k n mun sɑɑ fit tul wun nbɑ k n luon.

⁷Ŋɑnn, l i tie k ɑ gbɑɑn k jiɑnt’n, l kul sii tie ɑ yɑl e.»

⁸K Yiesu jiin k yet’ɔ ɑ: «L diɑn Yennu lolkpel kɑdɑɑɔk ni ɑ: ‹Nilɔ i jiɑntl Yonmdɑɑnɔ Yennu kuukuɑ e, kii biɑ kii tuun kii tien ŋuɑ kuukuɑ.› »

⁹Ŋɑnn e k Sɑɑtɑn biɑ jii’u k sɑɑn nɑn’ɔ Selusɑɑlenm, k sɑɑ donn’ɔ Yennu jɑɑnti ŋɑsɑɑkɑk mɔpinyelk pɑɑk, ŋɑɑn yet’ɔ ɑ: «L i tie k ɑ tie Yennu Bijɑ i e, fɑn yukl mɔb nnɑ nɑ,

¹⁰k mɑɑn l diɑn Yennu lolkpel kɑdɑɑɔk ni ɑ: ‹U sɑɑ te k u *mɑlɑkɑɑnbɑ i guu’ɑ.›

¹¹L biɑ diɑn ɑ: ‹B sii diɑ’ɑ nɑn b nii k ɑ tɑɑl dɑɑ fɑɑ tɑnn k ɑ lɑɑt dɑnŋ.› »

¹²K Yiesu jiin k yet’ɔ ɑ: «L yet Yennu kɑdɑɑɔk ni ɑ: ‹A dɑɑ biki Yonmdɑɑnɔ Yennu.› »

¹³K Sɑɑtɑn nbɑ din jɑnm Yiesu k tɑn guo nɑ, k u dɑɑ nyik’ɔ sie yuo nbɑ k u ji tɑn sɑɑ lɑ yɑɑk.

¹⁴K Yiesu din gbie nɑn Foŋɑnm pɑnŋ k tɑn ŋmɑt sɑɑn Gɑɑliile. K b din muɑnt u lɑbɑɑl k l yɑt tinŋ mɑnŋ kul kul po.

¹⁵K u din wɑnt’b Yennu mɑɑn b *Suifnbɑ jɑɑnti diet ni, k niib kul piɑk’ɔ.

¹⁶L puolpo e k Yiesu din sɑɑn Nɑɑsɑɑlet, siɑn nbɑ k b din wubi’ɔ. K *Fuondɑɑl k u din tɑn kuɑ Suifnbɑ jɑɑnti dieok ni nɑn wɑɑ ponŋ din tuu kuɑ biɑnŋ nbɑ nɑ, k tɑn fiil ɑ wun lii Yennu lolkpel kɑdɑɑɔk.

¹⁷K b jii kɑdɑɑɔk nbɑ k *Yennu sɔkni Esɑɑyi din diɑn nɑ k tul’ɔ, k u pint[3] kɑdɑɑɔk nɑ k lɑ siɑn nbɑ k l diɑn k yet ɑ

¹⁸«Yonmdɑɑnɔ Siek be n ni, k u lukt’n ɑ n muɑnt lɑbɑmɑnn k tul nɑndɑnm nɑ. U tun’n ɑ n tɑn yet yonmi ɑ n sɑɑ nyinn’b yɑnn, k biɑ yet juɑni ɑ b sɑɑ nyuɑnt ɑ, k biɑ fɑt bin nbɑ be fɑlɑ ni k lu’b yɑnn,

¹⁹k biɑ muɑnt ɑ l jɑnŋ nɑn Yonmdɑɑnɔ n fiel u niib ɑ.»

²⁰Yiesu nbɑ lii gbenn yuo nbɑ k u pin kɑdɑɑɔk nɑ k jiin tul Suifnbɑ jɑɑnti dieok tuontunnɔ, ŋɑɑn kɑl. K niib kul nbɑ be dieok nɑ ni ji din goli’ɔ.

²¹K u piin piɑk k tien’m ɑ: «Mɑɑn nbɑ k n lii Yennu lolkpel kɑdɑɑɔk ni nɑ, l tɑn tien bɑlmɔni dinnɑ, yuo nbɑ k l bɑɑ i tubɑ ni nɑ.»

²²K b kul ji din piɑk’ɔ, k l bɑkt’b nɑn mɑɑn nbɑ k u pɑk nɑ, k b ji boi b lieb ɑ: «Suosiɑf bijɑ nɑ kɑɑ nɑ ɑɑ?»

²³L yuo nɑ k u yet’b ɑ: «Bilsuk kɑɑ nɑn i tɑn sɑɑ yet’n bɑljouk nɑ e ɑ: ‹Fin tebtuɑ, tebn ɑ mɔnŋ mɔnŋ,› k i biɑ tɑn sɑɑ yet’n ɑ: ‹Tient bɑktnɔunŋ tuonjɑɑnɑ duo nɑ nɑn tɑɑ gbɑt nɑn fɑɑ dɑɑn tun Kɑpelnɑunm nɑ.›

²⁴Bɑlmɔni e k n yien’i nɑ, niib k cɔln Yennu sɔkni u mɔnŋ mɔnŋ duo ni.

²⁵Bɑlmɔni e, pɑkɔi bonciɑnn din be Islɑɑel tinŋ ni, yuo nbɑ k Elii dɑɑ din be nɑ. L yuo mɑnŋ, sɑɑk din k bɑɑ binɑ ŋɑntɑ nɑn ŋmɑɑli ŋɑnluob, k kon din tɑn bɑɑ bonciɑnn tinŋ mɑnŋ ni kul,

²⁶ŋɑɑn Yennu din k tun Elii suɑ buol fɑb ɑ, tinŋ mɑnŋ ni. U din tun’ɔ pɑkuɑk nbɑ din be Sɑɑleptɑ nbɑ be Siidɔn tinŋ ni nɑ buol e.

²⁷Yuo nbɑ k Eliise[4] dɑɑ din be nɑ, gbɑɑtɑ bonciɑnn din be Islɑɑel tinŋ ni, ŋɑɑn b suɑ din k lɑ pɑɑku tinŋ mɑnŋ ni. Nɑɑmɑn[5] nbɑ din tie Siili juɑ nɑ, ŋuɑ kuukuɑ e din lɑ pɑɑku.»

²⁸K niib kul nbɑ din be Suifnbɑ jɑɑnti dieok mɑnŋ ni nbɑ gbɑt Yiesu mɑɑn mɑnŋ nɑ, k b ji din donn wutuol bonciɑnn u pɑɑk.

²⁹K b fiil bel’ɔ k nyinn’ɔ duo nɑ ni, k sɑɑ donn’ɔ kunkonn nbɑ k b din mɑɑ b duo nɑ pɑɑk, ɑ bin lu’u bɑɑɔk ni,

³⁰ŋɑɑn k u buut b ni k yɑɑt.

³¹L puolpo k Yiesu din sik Kɑpelnɑunm nbɑ be Gɑɑliile tinŋ ni. Fuondɑɑl k u din tumi niib.

³²Wɑɑ din wɑnt’b bɑnnu nbɑ din bɑkt’b, k mɑɑn u din piɑk nɑn yiikuo.

³³K jɑsuɑ nbɑ k nɑlnbiiuk be u ni nɑ din be Suifnbɑ jɑɑnti dieok nɑ ni k tiɑn sɑnpɑɑpo ɑ

³⁴«Fin Yiesu nbɑ tie Nɑɑsɑɑlet nilɔ nɑ, tinm nɑn fin, nlee mɑntk i? A bɑɑl ɑ ɑ tɑn biil’t ee? N mi fɑɑ tie wun nbɑ. A tie Yennu niŋɑnɔ nɑ e.»

³⁵K Yiesu din yɑki nɑn nɑlnbiiuk mɑnŋ ɑ: «Ŋminin fuut, ŋɑɑn nyi juɑ mɑnŋ ni.» K nɑlnbiiuk nɑ lu juɑ nɑ tinŋ ni b nunm ni, k nyii u ni, ŋɑɑn k k tien’ɔ dɑnŋ.

³⁶K l din tien suɑ kul yɑɑl-lituk, k b boi b lieb ɑ: «Mɑbuol bee nɑ? U mɔk yiikuo nɑn pɑnŋ k tien nɑlnbiit mɔb, k b nyi niib ni.»

³⁷L pɑɑk, k b din muɑnt Yiesu sɑnn tinŋ mɑnŋ ni kul.

³⁸L yuo nɑ k Yiesu din nyii Suifnbɑ jɑɑnti dieok nɑ ni k sɑɑn Siimɔn ŋɑɑk. K b sɑɑ lɑ Siimɔn diɑnpuok k u yiɑl k u gbɑnɑnt ton bonciɑnn, k b bɑln Yiesu, puo nɑ po.

³⁹K Yiesu buɑn k got’ɔ, ŋɑɑn yɑki nɑn yiɑlu nɑ, k l gbenn, k puo nɑ fiil yiɑn ɑ k tien’m sɑɑɔnŋ.

⁴⁰Yuo nbɑ k yennu din tɑn bɑɑ, k bin nbɑ kul mɔk bɑɑtb b ŋei ni din jii’b k bɑɑl nɑn’m Yiesu buol, k b din yiɑl yiɑlbuolu buolu, k u yii u nii bɑɑtb nɑ kul pɑɑk yenɔ yenɔ k te k b pɑɑk.

⁴¹Nɑlnbiit bonciɑnn din nyii niib ni. Bɑɑ nyii yuo nbɑ k b tiɑn sɑnpɑɑpo k yien ɑ: «A tie Yennu Bijɑ e.» Ŋɑɑn Yiesu din k cɑb’b k b pɑk jik, k mɑɑn b mi nɑn u tie *Klistu e.

⁴²Lɑɑ din yent k Yiesu nyii duo nɑ ni k sɑɑn muuk ni, k niib nɑ din tɑn lin luon’ɔ k sɑɑ lɑ’u. Bɑɑ din tɑn lɑ’u yuo nbɑ k b ji guɑl’ɔ ɑ u dɑɑ yɑɑtl ŋɑɑn nyikt’b.

⁴³Ŋɑɑn k u yet’b ɑ: «Sie k n sɑɑn digbɑnliɑ biɑk kii sɑɑ i muɑntl Yennu nɑɑn lɑbɑmɑnn po, k mɑɑn l pɑɑk e te k Yennu tun’n.»

⁴⁴Ŋɑnn e k u din lin Suude digbɑnɑ k kuɑ Suifnbɑ jɑɑnti diet ni k wɑnt niib mɑɑn mɑnŋ.