Read Moba Luk 5 Bible Online

Luk 5 - Moba bible

Luk 5

¹Dɑsiɑl k Yiesu din sɑɑn sɑɑ sie Genesɑɑlet mɔkgbenŋl gbingbɑnn pɑɑk, k nibulciɑɔnŋ din tut gbin ɑ bin gbiint Yennu mɑɑn.

²K u lɑ bulgbetɑ ŋɑnle din be mɔkgbenŋl mɑnŋ gbingbɑnn, k jɑnsuoltieb din nyik’l ŋɑɑn cɑt sɑɑn ɑ bin wuul b jɑnlɑɑnt.

³K u kuɑ bulgbetl nbɑ tie Siimɔn yɑl ni nɑ, ŋɑɑn miɑl’ɔ ɑ wun cɑt wɑɑn k fɔkt nɑn gbingbɑnn. K Yiesu kɑl bulgbetl nɑ ni, ŋɑɑn wɑnt nibulciɑɔnŋ nɑ Yennu mɑɑn.

⁴Wɑɑ din wɑnn niib k gbenn yuo nbɑ k u biɑ yet Siimɔn ɑ: «Jiln nyun sunsunŋ po k lu i jɑnlɑɑnt k suol jɑni.»

⁵Ŋɑɑn k Siimɔn jiin k yet’ɔ ɑ: «Cɑnbɑɑ, wonn nyiɑɔk munn ɑ, t won yɑbl ɑ t suol jɑni, ŋɑɑn k fit suol siɑl. Tɔn, fɑɑ pɑk lin nbɑ nɑ, ŋɑnn ŋɑnin n sɑɑ lu k got.»

⁶K Siimɔn nɑn u lieb nɑ ji din lu b jɑnlɑɑnt nɑ k suol jɑni bonciɑnn, k b jɑnlɑɑnt ji yɑɑ lin pɑt.

⁷L pɑɑk, k b kɑbnt b lieb bulgbetliel nɑ ni ɑ bin bɑɑl k tɑn sonm’b. Bɑɑ bɑɑl yuo nbɑ k b din donn jɑni k tɑn gbien b bulgbetɑ ŋɑnle kul ɑ, k l din kpiɑk k b ji yɑɑ bin kpii nyun ni.

⁸K Siimɔn Piɑl nbɑ din lɑ lin nbɑ tien nɑ, k u gbɑɑn Yiesu tuɑnn ŋɑɑn yet’ɔ ɑ: «N Yonmdɑɑnɔ, nyikn’min ŋɑɑn kii sɑɑ k mɑɑn n tie biitdɑɑnɔ e,»

⁹k mɑɑn bɑɑ suol jɑni bonciɑnn biɑnŋ nbɑ nɑ, k l bɑkt Siimɔn Piɑl nɑn bin nbɑ din be nɑn’ɔ kul,

¹⁰k l biɑ tie nnɑ e k tul Siimɔn lieb, Sɑɑk nɑn Sɑn nbɑ din tie Sebede wɑɑs nɑ. Ŋɑɑn k Yiesu yet Siimɔn ɑ: «Dɑɑ tiin jɑŋmɑɑni. Lɑɑ jii dinnɑ k sɑɑ, ɑ sɑɑ sɑɑn kii so niib.»

¹¹Ŋɑnn e k b ji din tut b bulgbetɑ mɑnŋ k donn gbingbɑnn, ŋɑɑn nyik b bonɑ kul lenŋ ŋɑɑn wɑɑ Yiesu.

¹²Siɑn yuo k Yiesu din be dosɑu, k gbɑɑtl din be lenŋ k ŋɑɑɔk be u pɑɑk bonciɑnn. Wɑɑ din tɑn lɑ Yiesu yuo nbɑ, k u bɑɑl k gbɑɑn finfɑbl u tuɑnn k miɑl’ɔ ɑ: «N Yonmdɑɑnɔ, l i tie k ɑ luon ɑ sɑɑ fit te k n ŋɑɑɔk nɑ n gbenn.»

¹³K Yiesu tɑnt u nuu ŋɑɑn sii’u k yet’ɔ ɑ: «N luon. A ŋɑɑɔk mɑnŋ n gbenn.» L tɑɑkpɑɑk ni k u ŋɑɑɔk nɑ set gbenn.

¹⁴Ŋɑnn e k Yiesu yet’ɔ ɑ: «Dɑɑ piɑk suɑ mɑɑn nɑ, ŋɑɑn i sɑɑ Yennu mɑnntuɑ buol k jii ɑ mɔnŋ k wɑnn’ɔ, k biɑ mɑnn *mɑlunŋ k tul Yennu nɑn Muois nbɑ din senn k jiin gbɑɑtɑ pɑɑku po nɑ, k suɑ kul n bɑnn nɑn ɑ ŋɑɑɔk mɑnŋ set gbenn ɑ.»

¹⁵Ŋɑɑn Yiesu sɑnn set din duo bonciɑnn k gɑl sinsinn yuo nɑ, k nibulciɑɔnŋ din lɑkn u buol ɑ bii gbiintl u mɑɑn k biɑ lɑ pɑɑku b yiɑli pɑɑk.

¹⁶Ŋɑɑn u din tuu tun nyi k sɑɑ muuk ni k sɑɑ mei Yennu.

¹⁷Siɑn yuo, Yiesu din tumi niib k Fɑɑliisiɑnnbɑ nɑn *senniwɑntieb mun din nyii Gɑɑliile doi kul ni, nɑn Suude doi kul ni, nɑn Selusɑɑlenm, k bɑɑl Yiesu buol k kɑl. L yuo k Yonmdɑɑnɔ Yennu pɑnŋ din be Yiesu ni ɑ wun te k niib n pɑɑk.

¹⁸K nisiɑb din tɑn bɑɑt k jii gbɑnɑnkpienn dɑɑnɔ liɑnŋ pɑɑk, k b din kol ɑ bin jii’u k kuɑ nɑn’ɔ ŋɑɑk mɑnŋ ni k bil’ɔ Yiesu tuɑnn,

¹⁹ŋɑɑn b din k lɑ yiɑl nbɑ sɑɑ kuɑ, k mɑɑn niib din yɑbt bonciɑnn. L pɑɑk k b din jii’u k duo nɑn’ɔ mɔpinn pɑɑk, k cuɑ luot mɔpinn yul pɑɑk, k sikn’ɔ nɑn liɑnŋ nɑ k tɑn bil’ɔ Yiesu tuɑnn, niib nɑ sinsuuk ni.

²⁰Yiesu nbɑ din lɑ b yɑdɑ nbɑ tie bɑnnu nbɑ nɑ, k u yet juɑ nɑ ɑ: «N yuɑk, n nyik cɑb ɑ biit ɑ.»

²¹K *senniwɑntieb nɑn Fɑɑliisiɑnnbɑ nɑ ji din duki b pɑlɑ ni ɑ: «Nilɑnɔpo e mun piɑk nnɑ k piɑk biil Yennu? Ŋmee dɑɑ sɑɑ fit nyik cɑb nilɔ biit, k l k tie Yennu kuukuɑ kɑɑ?»

²²Yiesu ŋɑnin din mi bɑɑ duki biɑnŋ nbɑ, k u boi’b ɑ: «Bee k i duki nnɑ i pɑlɑ ni?

²³Mi i yet ɑ: ‹N nyik cɑb ɑ biit,› ɑmi mi i yet ɑ: ‹Fiit kii sonm,› mɑɑn munle nɑ sinsuuk ni lɑnn po e pɑɑl i?

²⁴Ŋɑɑn n luon k yin bɑnn nɑn *Nisɑɑlk Bijɑ mɔk yiikuo tingbounŋ nɑ ni k sɑɑ nyik cɑb niib b biit.» Ŋɑnn e k u yet gbɑnɑnkpienn dɑɑnɔ nɑ ɑ: «Fin, fiit k jii ɑ liɑnŋ kii kun ɑ ŋɑɑk ni.»

²⁵L tɑɑkpɑɑk ni k juɑ mɑnŋ din fiil k set b nunm po, k jii u liɑnŋ mɑnŋ, k kun. Wɑɑ sɑɑ nɑ k u piɑk dont Yennu.

²⁶K l yɑɑl ŋɑɑn lit b kul ɑ, k b piɑk dont Yennu k yien ɑ: «Dinnɑ t jiɑ lɑ *dulnyɑ.»

²⁷L puolpo e k Yiesu din nyii ŋɑɑk mɑnŋ ni k sɑɑ, k sɑɑ lɑ *lɑnpogɑɑltuɑ, k u sɑnn din tie Liefi, k u kɑl u tuonn pɑɑk lɑnpogɑɑldieok ni, k Yiesu yet’ɔ ɑ: «Fiit kii wɑɑ’n.»

²⁸K u nyik u bonɑ kul ŋɑɑn fiil k wɑɑ’u.

²⁹Ŋɑnn e k u tɑn tien jɑɑngbenŋl u ŋɑɑk ni k tul Yiesu, k *lɑnpogɑɑltieb nɑn niib bonciɑnn din bɑɑl k lɑkn di nɑn’m.

³⁰K Fɑɑliisiɑnnbɑ siɑb nɑn b *senniwɑntieb din bɑɑl k tɑn buln nɑn Yiesu *puolpoweitieb k boi’b ɑ: «Bee k i di k nyu nɑn lɑnpogɑɑltieb nɑn biitdɑnm i?»

³¹K Yiesu din jiɑnt k yet’b ɑ: «Bin nbɑ mɔk lɑɑfiɑ k luon tebtuɑ, ŋɑɑn bin nbɑ yiɑl luon’ɔ.

³²N k bɑɑl ɑ n yet bin nbɑ be binbenŋɑnŋ ni kɑɑ ɑ bin mɔ kuɑŋɑɑn k lebt binbenŋ, ŋɑɑn n bɑɑl mɑɑ n yet biitdɑnm e ɑ bin mɔ kuɑŋɑɑn k lebt binbenŋ.»

³³Ŋɑnn e k nisiɑb din yet Yiesu ɑ: «Sɑn puolpoweitieb tun loln mɔi k mei Yennu, k t puolpoweitieb mun tie nnɑ, ŋɑɑn ɑ puolpoweitieb ŋɑnin di k nyu.»

³⁴K u jiin k boi’b ɑ: «Puociɑnu i i be, suɑ sɑɑ fit k te k sɑɑnm n lol mɔi yuo nbɑ k puoyuokl sɔlɔ dɑɑ be b buol ni wɑɑ ɑɑ? Aɑi.

³⁵Ŋɑɑn yuo sɑɑ bɑɑl k b tɑn sɑɑ nyinn puoyuokl sɔlɔ nɑ b buol, k l yuo mɑnŋ e k b sɑɑ lol mɔi.»

³⁶K Yiesu din yin’m bɑljouk biɑk ɑ: «Suɑ kɑn pɑt tɑpɑɑnn cɑbl k lik tɑkpel[6]. L i tie k u tien nnɑ i e, u sɑɑ biil tɑpɑɑnn mɑnŋ, ŋɑɑn cɑbpɑɑnn nɑn tɑkpel mɑnŋ biɑ lek kii jɑn.

³⁷Nnɑ e mun k suɑ kɑn jii dɑpɑɑnin k liɑk dɑlenkpel[7] ni. L i tie k u tien nnɑ i e, k dɑpɑɑnin nɑ tɑn mɔ yuo nbɑ, l sɑɑ yiel dɑlenkpel nɑ e, k dɑɑn mɑnŋ n muɑn yɑnn, k *linlenn nɑ mun n yiel.

³⁸Sie k ɑ jii dɑpɑɑnin k liɑk linlenpɑɑnn ni.

³⁹Tɔn, l i tie k wun nbɑ nyu dɑkpel i e, u i lɑ dɑpɑɑnin, u k fɑɑt’l, u sɑɑ yet ɑ: ‹Dɑkpel e mɑn.› »