Read Moba Luk 6 Bible Online

Luk 6 - Moba bible

Luk 6

¹Tɔn, fuondɑsiɑl k Yiesu din gɑɑl dii kpɑɑnt ni, k u *puolpoweitieb nɑ din sonm kɔni dikɑlɑ k pini k ŋmɑn.

²K Fɑɑliisiɑnnbɑ siɑb din boi’b ɑ: «Bee k i tuun lin nbɑ k t *senni wɑnt nɑn t dɑɑ tuun *Fuondɑɑl i?»

³K Yiesu jiin k boi’b ɑ: «I k mi lii Yennu lolkpel kɑdɑɑɔk ni Dɑɑfiid nbɑ din tun biɑnŋ nbɑ yuo nbɑ k kon din mɔk ŋuɑ nɑn u juɑmu nɑ ɑɑ?

⁴U din kuɑ Yennu ŋɑɑk ni k sɑɑ jii pɑɑnu nbɑ k b din tuu senn k l tie Yennu yɑl nɑ, k biɑ tul u juɑmu nɑ. K senni nɑ din k cɑb nɑn suɑ n di pɑɑnu mɑnŋ sie mɑnntieb kuukuɑ e.»

⁵K Yiesu biɑ yet’b ɑ: «*Nisɑɑlk Bijɑ e yen Fuondɑɑl.»

⁶Fuondɑliel k Yiesu din kuɑ *Suifnbɑ jɑɑnti dieok ni k tul niib wɑnnu, k jɑsuɑ din be lenŋ k u niidiitu kpo k guon.

⁷K *senniwɑntieb nɑn Fɑɑliisiɑnnbɑ siɑb mun din be lenŋ, k goli Yiesu ɑ bin lɑɑn u sɑɑ te k wun pɑɑk Fuondɑɑl ii? K mɑɑn b din luon bin lɑ lin nbɑ k b sɑɑ tɑɑl’ɔ l po.

⁸Ŋɑɑn Yiesu din mi b dudukt ni, k yet juɑ nbɑ k u nuu kpo nɑ ɑ: «Fiit k set suɑ kul tuɑnn po.» K juɑ mɑnŋ fiil k set.

⁹K Yiesu yet’b ɑ: «N boi’i e, t senni sɑk ɑ t tun lɑnn e? T tun bonŋɑnn Fuondɑɑl ɑmi t tun bonbiil i? T fit fɑt nilɔ mɑnfuol ɑmi tin kpi’u u?»

¹⁰Ŋɑnn e k u got lint niib mɑnŋ kul ɑ, ŋɑɑn yet niikpienn dɑɑnɔ mɑnŋ, «Tɑntl ɑ nuu mɑnŋ.» K u tɑnt, k u nuu mɑnŋ nɑɑt.

¹¹K *senniwɑntieb nɑn Fɑɑliisiɑnnbɑ nɑ ji din yɑɑ bin put nɑn wutuol, k b ji piin k piɑk yien lieb bɑɑ sɑɑ tien Yiesu biɑnŋ nbɑ.

¹²L puolpo k Yiesu duo juɑl pɑɑk ɑ wun sɑɑ miɑl Yennu, k din sɑɑ mei Yennu nyiɑɔk nɑn lɑɑ tɑn yent.

¹³K sɑn-nyiɑɔk ni k u din yiin u puolpoweitieb k tɑn lukt piik nɑn bɑnle k yi’b tuomiinbɑ.

¹⁴U din gɑnn Siimɔn (wun nbɑ k u din pul’ɔ Piɑl nɑ) nɑn Siimɔn ninjɑ Andle, nɑn Sɑɑk nɑn Sɑn, nɑn Fiiliip nɑn Bɑɑltelemi,

¹⁵nɑn Mɑɑtieo nɑn Tuomɑ, nɑn Sɑɑk nbɑ din tie Alfe bijɑ nɑ, nɑn Siimɔn (wun nbɑ din luon k Suifnbɑ ii yen b mɔnŋ nɑ),

¹⁶nɑn Suudɑ nbɑ din tie Sɑɑk bik, nɑn Suudɑ Iskɑɑliɑɔt (wun nbɑ din tɑn nyii Yiesu puol nɑ).

¹⁷Yiesu nbɑ din nyii juɑl nɑ pɑɑk k sik nɑn’m yuo nbɑ, k u din sɑɑn set pɑɑnu ni, k u puolpo juɑmu lɑkn bonciɑnn, k niib bonciɑnn mun dɔnŋ nyii Suude po nɑn Selusɑɑlenm nɑn Tiil nɑn Siidɔn nbɑ kpiɑ mɔkgbenŋl nɑ,

¹⁸k din bɑɑl ɑ bin tɑn gbiint u mɑɑn, k biɑ luon wun te k bin pɑɑk. Bin nbɑ k nɑlnbiit dɑɑmi’b mun din bɑɑl k u te k b pɑɑk.

¹⁹K suɑ kul luon wun sii’u, k mɑɑn pɑnŋ din nyi u ni k te k suɑ kul pɑɑkt.

²⁰L yuo nɑ k Yiesu got u puolpoweitieb ŋɑɑn yet ɑ «Yinm nɑndɑnm, pɑlpienn tie i yɑl e, k mɑɑn Yennu nɑɑn tie i yɑl e.

²¹Yinm nbɑ k kon mɔk’i mɔtɑɑnɑ, pɑlpienn tie i yɑl e, k mɑɑn i tɑn sɑɑ gbuo. Yinm nbɑ mɔ mɔtɑɑnɑ, pɑlpienn tie i yɑl e, k mɑɑn i tɑn sii lɑɑ.

²²«Niib i nɑn’i k bɔktl’i k suki’i k biil i sɑnɑ, k mɑɑn yɑɑ wɑɑ Nisɑɑlk Bijɑ nɑ pɑɑk, pɑlpienn tie i yɑl e.

²³Ii yikn mɑn kii kpɑnm nɑn pɑlpienn mɑn l dɑɑl, k mɑɑn i nyuɑt tɑn sii yɑb *Yendɔunŋ ni. B yejɑnm mun din tie *Yennu sɔkniinbɑ nnɑ e.

²⁴«Yinm mɔktɑ, l tɑn sii bi i pɑɑk, k mɑɑn i dɔnŋ lɑ i yɑnbuɑbonɑ wɑɑ.

²⁵«Yinm nbɑ gbuo mɔtɑɑnɑ, l tɑn sii bi i pɑɑk, k mɑɑn kon tɑn sɑɑ gbɑt’i. Yinm nbɑ lɑɑ mɔtɑɑnɑ, l tɑn sii bi i pɑɑk, k mɑɑn i tɑn sii fɑbn k mɔ.»

²⁶«L tɑn sii bi i pɑɑk yuo nbɑ k niib kul piɑk’i k mɑɑn b yejɑnm mun din tie nnɑ e k tien fɑɑk sɔkniinbɑ.»

²⁷«Yinm nbɑ gbiintl n mɑɑn nɑ, n yien’i e, ii mɔk lonm nɑn i dɑtɑi mɑn, kii tuun lin nbɑ ŋɑn kii tien bin nbɑ nɑn’i.

²⁸Bin nbɑ polntl’i mɔpolɑ, yin yɑt yetŋɑnm b pɑɑk. Bin nbɑ sɑlkt’i, ii mei Yennu kii tien’m.

²⁹Wun nbɑ peb ɑ tɑnpɑk, fɑn ŋmɑnt liel po mun k wun peb. Wun nbɑ jii ɑ liɑtfuouk nbɑ tie gbɑktl, fɑn sɑk k wun gɑɑl ɑ suot mun biɑk.

³⁰Wun nbɑ kul miɑl’ɑ siɑl, fɑn tul’ɔ. Wun nbɑ fɑt ɑ bonɑ, ɑ ji dɑɑ wɑɑ gɑɑn.

³¹Biɑnŋ nbɑ k i luon niib ii tuun kii tien’i nɑ, ii mun ii tuun nnɑ kii tien i lieb.

³²«L i tie k i luon bin nbɑ luon’i nɑ kuukuɑ i e, nlee k i sii guu nyuɑt i? Biit dɑnm mun luon bin nbɑ luon’m nɑ.

³³L i tie k i tuun bonŋɑnn k tien bin nbɑ tuun bonŋɑnn k tien’i nɑ, nlee k i sii guu nyuɑt i? Biit dɑnm mun tuun lin nbɑ nɑ.

³⁴L i tie k i kpentl k tien bin nbɑ k i dɑɑn nɑn b sɑɑ jiin ɑ, nlee k i sii guu nyuɑt i? Biit dɑnm mun kpentl nnɑ, k tien b lieb k biɑ tuu tɑn gɑɑl b bont biɑnŋ jinŋ.

³⁵«L pɑɑk, ii mɔk lonm nɑn i dɑtɑi mɑn, kii tuun bonŋɑnn kii tien’m, kii biɑ kii kpentl kii tien’m k dɑɑ dɑɑn nɑn b sɑɑ jiin ɑ. Nnɑ e k i nyuɑt sii yɑb k i biɑ sii tie Yennu wɑɑs, k mɑɑn ŋuɑ e tuun bonŋɑnn k tien bin nbɑ k tien’ɔ niipuouk, nɑn biitdɑnm.

³⁶Ii mɔk ninbɑtinu mɑn nɑn i Bɑɑ Yennu nbɑ mɔk ninbɑtinu biɑnŋ nbɑ nɑ.

³⁷«I dɑɑ kpɑɑn lieb biit nbɑ k i sɑɑ fit tɑɑl’b l pɑɑk, k Yennu mun dɑɑ tɑɑl’i ni. Dɑɑ piɑk nilɔ biil k gbent’ɔ, k Yennu kɑn biil k gben’ɑ ni. Nyikn cɑb niib k Yennu sɑɑ nyik cɑb’ɑ mun.

³⁸Ii tien niib mɑn, k Yennu mun sii tien’i. Yennu sɑɑ cɑɑt bonŋɑnn nɑn ŋmɑnbɑnŋ nbɑ gbie nɑn mɔgbɑnɑ k tul’i k mɑɑn Yennu sɑɑ cɑɑt k tul’i biɑnŋ nbɑ k i cɑɑtl k tien i lieb nɑ e.»

³⁹L puolpo k Yiesu din yin’m bɑljouk ɑ: «Juɑnŋ sɑɑ fit dɑɑl u luɑ wɑɑ? Aɑi, b kul tɑn sɑɑ bɑɑ buotuk ni wɑɑ.

⁴⁰Tumiituɑ k gɑl u wɑntuɑ, k tumiituɑ mun i bɑnn gbenn, ŋuɑ nɑn u wɑntuɑ sii jɑn e.

⁴¹«Bee k ɑ goli lɑɑt muɑnu nbɑ be *ɑ luɑ ninbinn ni, ŋɑɑn k k lɑ jɑɑntɑlk nbɑ be ɑ mɔnŋ mɔnŋ ninbinn ni?

⁴²Nlee k ɑ sɑɑ yet ɑ luɑ ɑ: ‹N yuɑk, ŋɑɑnt k n nyinn muɑnu nbɑ be ɑ ninbinn ni,› ŋɑɑn k k lɑɑt jɑɑntɑlk nbɑ be ɑ mɔnŋ ninbinn ni? Fin, kpinkpɑnni dɑɑnɔ nɑ, nyint jɑɑntɑlk nbɑ be ɑ ninbinn ni nɑ sinsinn, k ji fit lɑ fɑnu k nyinn muɑnu nbɑ be ɑ luɑ ninbinn ni nɑ.

⁴³«Tiŋɑnŋ k luon luɑnbiit, k tibiiuk mun k luon luɑnŋɑnɑ.

⁴⁴Tiik luɑnɑ ni e k b bɑnt’ɔ. B k lɑɑt luɑnɑ nbɑ k b yi *fiig kunkonŋ pɑɑk k pɔ, k biɑ k lɑɑt *lɑɑsen penn pɑɑk k pɔ.

⁴⁵Niŋɑnɔ e tuun bonŋɑnn k mɑɑn u pɑl ni gbie nɑn bonŋɑnn mɑnŋ, k nibiiuk mun tuun bonbiil k mɑɑn u pɑl ni gbie nɑn bonbiil mɑnŋ. Lin nbɑ be nilɔ pɑl ni, ŋɑnn e nyi u mɔb ni.

⁴⁶«Bee k i yi’n Yonmdɑɑnɔ Yonmdɑɑnɔ ŋɑɑn k k tuun mɑɑ wɑnn’i biɑnŋ nbɑ?

⁴⁷Wun nbɑ kul bɑɑt n buol k gbiintl n mɑɑn k sɑɑk k tuun l biɑnŋ, n sɑɑ wɑnn’i wɑɑ nɑɑn wun nbɑ.

⁴⁸U nɑɑn nɑn juɑ nbɑ din mɑɑ u ŋɑɑk nɑ e. Sinsinn u din gbiil fiɑkl k l sunŋ, k sɑɑ tuu tɑnpiiuk, k ji fɔkn fiɑkl mɑnŋ l pɑɑk. L puolpo k sɑɑk tɑn bɑɑ bonciɑnn, k kpenu gbie nɑn nyunmɔnn k sɑɑ duo k liɑt ŋɑɑk mɑnŋ, ŋɑɑn k l k bɑɑ, k mɑɑn u din mɑɑ’l bonŋɑnn e.

⁴⁹Ŋɑɑn wun nbɑ gbiintl n mɑɑn ŋɑɑn k k tuun l biɑnŋ, u nɑɑn nɑn juɑ nbɑ mun din mɑɑ u ŋɑɑk tɑnbiini ni, ŋɑɑn k k gbiil fiɑkl nɑ e, k nyunmɔnn din tɑn gbie k sɑɑ duo k yil ŋɑɑk mɑnŋ, k l bɑɑ yiɑn ɑ k nɑn siɑl ɑ k tenn.»