Read Moba Luk 7 Bible Online

Luk 7 - Moba bible

Luk 7

¹Yiesu nbɑ din wɑnn niib lin nbɑ nɑ kul k gbenn nɑ, k u ji din gɑl sɑɑn Kɑpelnɑunm.

²K Luonm tinŋ sejenm yudɑɑnsuɑ din be lenŋ k mɔk dɑɑblonkɑk, k yiɑlu din suol’ɔ k u pel kuun ɑ.

³L yuo mɑnŋ k sejenm yudɑɑnɔ nɑ gbɑt Yiesu po k tun *Suifnbɑ sɑɑkɑb u buol ni ɑ bin sɑɑn k sɑɑ bɑln’mɔ k wun bɑɑl k tɑn te k u dɑɑbl nɑ n pɑɑk.

⁴K b din sɑɑn Yiesu buol k sɑɑ bɑln’mɔ bonciɑnn k yet’ɔ ɑ: «Juɑ mɑnŋ jɑnŋ nɑn fɑn sonm’ɔ wɑɑ,

⁵k mɑɑn u luon t niib k biɑ te k b mɑɑ tinm Suifnbɑ jɑɑnti dieok k tul’t ɑ.»

⁶Ŋɑnn e k Yiesu din wei’b sɑɑn. Wɑɑ din sɑɑ pel ŋɑɑk mɑnŋ yuo nbɑ, k sejenm yudɑɑnɔ mɑnŋ din tun u yuɑsnbɑ k yet’b ɑ bin yet Yiesu nnɑ ɑ: «N Yonmdɑɑnɔ, dɑɑ bɑknt ɑ mɔnŋ k bɑɑt, k mɑɑn n k ŋɑn nɑn fɑn bɑɑl kuɑ n ŋɑɑk ni.

⁷Ŋɑnn e k n bo dukn nɑn n k ŋɑn nɑn k n nɑkn ɑ buol. Ŋɑɑn fɑn lek tul mɔb k n dɑɑbl sɑɑ pɑɑk ɑ.

⁸K mɑɑn n mɔk bin nbɑ gɑl’n k yen’n, k n mun diɑ sejenm k yen’m, k fit yien yenɔ ɑ: ‹Bɑɑt,› k u bɑɑt, k yien luɑ ɑ: ‹Sɑɑnt,› k u sɑɑ, k biɑ yien n dɑɑbl: ‹Tient nnɑ,› k u tie.»

⁹Yiesu nbɑ din gbɑt lin nbɑ nɑ, k l yɑɑl lit’ɔ, k u jiɑnt k got nibulciɑɔnŋ nbɑ wɑɑ u puolpo nɑ k yet’b ɑ: «N yien’i e, n dɑɑ k mi lɑ yɑdɑ nɑ buolu nɑ, nɑn Islɑɑeltieb sinsuuk ni wɑɑ.»

¹⁰L yuo mɑnŋ e k tuomiinbɑ din ŋmɑt k sɑɑn sejenm yudɑɑnɔ mɑnŋ ŋɑɑk ni k sɑɑ bɑɑl suɑ dɑɑbl mɑnŋ pɑɑk ɑ.

¹¹L din yent e k Yiesu din sɑɑ duo nbɑ k b yi Nɑen nɑ, k u *puolpoweitieb nɑn nibulciɑɔnŋ din wɑɑ’u.

¹²Wɑɑ din sɑɑ bɑɑl duo mɑnŋ tɑnmɔb ni yuo nbɑ, k u lɑ k b nyi duo mɑnŋ ni k jii kuun ɑ bin sɑɑn pii. Kpiemɔ mɑnŋ nɑɑ din tie pɑkuɑk e, k ŋuɑ e din tie u bijɑyenml k nibulciɑɔnŋ din ciɑnt pɑkuɑk mɑnŋ.

¹³Yiesu nbɑ din lɑ pɑkuɑk nɑ, k ninbɑɑɔk suol’ɔ, k u yet’ɔ ɑ: «Dɑɑ mɔ,»

¹⁴ŋɑɑn sɑɑn sii kuun liɑnŋ nɑ, k bin nbɑ jii’u nɑ set. K Yiesu yet ɑ: «Ŋɑɑjuɑ, n yien’ɑ e, fiit.»

¹⁵K bik nbɑ kpo mɑnŋ nɑ fiil k kɑl k piin k piɑk. K Yiesu din jii’u k kubn’ɔ u nɑɑ.

¹⁶K jɑŋmɑɑni ji din suol niib kul nbɑ be lenŋ nɑ, k b din dont Yennu sɑnn k yien lieb ɑ: «*Yennu sɔkniijɑɑnn be t sinsuuk ni,» k biɑ yien b lieb ɑ: «Yennu sik, ɑ wun sonm u niib.»

¹⁷K Yiesu lɑbɑɑl nɑ din yɑt Suude tinŋ nɑn digbɑnkpini kpini nbɑ kpiɑ lenŋ mɑnŋ kul ɑ.

¹⁸L puolpo e k Sɑn puolpoweitieb din sɑɑn k sɑɑ yet’ɔ l lɑbɑɑl kul, k u tɑn yiin u puolpoweitieb bɑnle b ni,

¹⁹k tun’m Yonmdɑɑnɔ buol, ɑ bin sɑɑ boi’ɔ ɑ: «Fin e tie wun nbɑ yɑɑ wun tɑn bɑɑl nɑ ɑmi tii dɑɑ kii guu luɑ?»

²⁰Yuo nbɑ k b din bɑɑl Yiesu penŋ nɑ, k b yet’ɔ ɑ: «Sɑn, wun nbɑ wuul niib Yennu nyunwulu nɑ tun’t ɑ penŋ ɑ t tɑn boi’ɑ k lɑɑn fin e tie wun nbɑ yɑɑ wun tɑn bɑɑl nɑ ɑmi tii dɑɑ kii guu luɑ?»

²¹L yuo l yuo nɑ k Yiesu din te k bɑɑtb nɑn yiɑlpɑɑli dɑnm bonciɑnn pɑɑk, k nyinn nɑlnbiit siɑb ni, k nyuɑnt juɑni bonciɑnn.

²²Ŋɑnn e k Yiesu jiin k yet Sɑn tuomiinbɑ nɑ: «Ii ŋmɑt mɑn k sɑɑ yet Sɑn lin nbɑ k i lɑ k biɑ gbɑt nɑ, ɑ i lɑ k juɑni nyuɑntl, k wɔbi tɑɑ nɑɑtl k b sonm, k gbɑɑtɑ ŋɑɑt gbent, k tuukpɑɑ ji gbiɑ, k kpienm fi kuun ni, k tɑlɑs-dɑnm gbiintl lɑbɑmɑnn muɑnti.

²³Pɑlpienn tie wun nbɑ kɑn nyi u yɑdɑ ni nɑ yɑl e.»

²⁴Sɑn tuomiinbɑ nbɑ din ŋmɑt nɑ puolpo e k Yiesu ji din piin k boi niib mɑnŋ buboit k jikt sɑɑ Sɑn po ɑ: «Yɑɑ dɑɑn sɑɑn muuk ni nɑ, i dɑɑn duki nɑn i sɑɑ sɑɑ lɑ bee? I dɑɑn mi ɑ i sɑɑ lɑ muuk nbɑ k wounŋ dɑnm nɑ ee?

²⁵Nnɑ i kɑɑ, i mɑntk jiɑ dɑɑn sɑɑn ɑ i sɑɑ lɑ bee? Nilɔ k u liɑ tɑŋɑnt ɑmi ii? Nnɑlɑ, niib nbɑ liɑ tɑŋɑnt k be b yɑmɑ ni nɑ be kpɑnbɑlɑ ŋei ni e.

²⁶I dɑɑn sɑɑn muuk nɑ ni ɑ i sɑɑ lɑ bee? Yennu sɔkni ɑmi ii? Bɑlmɔni e k n yien’i, Sɑn ŋɑnin gɑl sɔkni wɑɑ.

²⁷Ŋuɑ po e k b din diɑn Yennu lolkpel kɑdɑɑɔk ni ɑ: ‹Nnɑlɑ, n sɑɑ tun n *tuomi ɑ tuɑnn po, wun nbɑ sɑɑ gɑl k ŋɑnm ɑ bɑɑlu sɔnu.› »

²⁸K Yiesu biɑ din yet’b ɑ: «N yien’i e, b dɑɑ k mi mɑl suɑ k u cie Sɑn, ŋɑɑn wun nbɑ juont tɑlk Yennu nɑɑn ni cie’u.»

²⁹(Niib kul nɑn *lɑnpogɑɑltieb din gbiintl Sɑn mɑɑn k bɑɑ din ŋɑɑn k Sɑn wul’b Yennu nyunwulu nɑ, din wɑnn nɑn b sɑk ɑ Yennu e ŋɑn.

³⁰ŋɑɑn k Fɑɑliisiɑnnbɑ nɑn *senniwɑntieb din k gɑɑl lin nbɑ k Yennu lol tul’b, k mɑɑn b din k sɑk ɑ Sɑn n wul’b Yennu nyunwulu.)

³¹K Yiesu biɑ yet’b ɑ: «Mɔtɑɑnɑ nigbounŋ nɑ, n sɑɑ bikn’m nɑn bee? B nɑɑn nɑn bee?

³²B nɑɑn nɑn wɑɑs nbɑ tuu tikl k kɑl dɑɑk ni k tiɑn lieb pɑɑk nɑ e ɑ: ‹T pieb yeli k tien’i, ŋɑɑn k i k wɑɑ. T yiin kuyɑni k tien’i, ŋɑɑn k i k mɔ fɑbn.›

³³K mɑɑn Sɑn din bɑɑl k k di pɑɑnu, k biɑ k nyu dɑmunŋ, ŋɑɑn k i yɑɑ ɑ u mɔk nɑlnbiiuk,

³⁴k *Nisɑɑlk Bijɑ mun tɑn bɑɑl k di k nyu, ŋɑɑn k i yɑɑ ɑ: ‹Gotl mɑn, u tie podɑɑnɔ nɑn dɑnyuuluk o. U biɑ tie lɑnpogɑɑltieb nɑn biitdɑnm yuɑk e.›

³⁵Tɔn, bin nbɑ kul gɑɑl Yennu yɑn tuu yɑɑ ɑ l ŋɑn.»

³⁶K Fɑɑliisiɑnsuɑ din be, k din tɑn yiin Yiesu ɑ wun bɑɑl k di jiet u ŋɑɑk ni, k Yiesu din sɑɑn juɑ nɑ ŋɑɑk ni, k b sɑɑ lɑkn kɑl k dii.

³⁷K puosuɑ mun din be duo mɑnŋ ni k tie puocunconn, k wɑɑ tɑn gbɑt ɑ Yiesu di jiet ŋɑɑk mɑnŋ ni, k u bɑɑl nɑn sɑlenŋɑnn nbɑ gbie nɑn tulɑɑli,

³⁸k din set Yiesu puol, u tɑɑ buol, ŋɑɑn mɔ, k u nyin-nyuut bɑɑ Yiesu tɑɑ pɑɑk k tɑn mɑɑk, k u din tɑn jii u yut k fiɑn Yiesu tɑɑ, k puul lol u tɑɑ, k tɑn but tulɑɑli nɑ u tɑɑ pɑɑk.

³⁹K Fɑɑliisiɑnjuɑ nbɑ yiin Yiesu nɑ din lɑ lin nbɑ nɑ, k u dukn u pɑl ni ɑ: «Juɑ nɑ i bo i tie Yennu sɔkni e nɑn bɑlmɔni, u bo sɑɑ bɑnn puo nbɑ sii’u nɑ nbɑ tie wun nbɑ. U bo sɑɑ bɑnn nɑn u tie biitdɑɑnɔ wɑɑ.»

⁴⁰Ŋɑnn e k Yiesu yet Fɑɑliisiɑnjuɑ mɑnŋ ɑ: «Siimɔn, n mɔk mɔbonsiɑl k yɑɑ n yet’ɑ.» K Siimɔn jiin k yet’ɔ ɑ: «Cɑnbɑɑ, yetl’n.»

⁴¹K Yiesu yet’ɔ ɑ: «Jɑb bɑnle din be k mɔk lik-kpent-tuɑ pɑnn. Yenɔ din mɔk u pɑnn denienbɑ kobi ŋɑnŋmu (500), k luɑ nɑ mun din mɔk u pɑnn denienbɑ piiŋmu (50).

⁴²B bɑnle mɑnŋ suɑ din k fit pɑ. Ŋɑnn e k u din cɑb b kul ɑ, ɑ bii sɑɑ. Tɔn, ɑ duki nɑn ŋmee mɑntk sii luon lik-kpent-tuɑ mɑnŋ i?»

⁴³K Siimɔn jiin k yet’ɔ ɑ: «N dukn nɑn l sii tie wun nbɑ k u cɑb’ɔ k u pɑnn yɑb nɑ e.» K Yiesu yet’ɔ ɑ: «A mɔk mɔni,»

⁴⁴k din jiɑnt got puo nɑ, ŋɑɑn yet Siimɔn, «A lɑ puo nɑ wɑɑ? N kuɑ ɑ ŋɑɑk nnɑ, k ɑ k tul’n nyun k n fobt n tɑɑ, ŋɑɑn puo mɑnŋ ŋɑnin fobt n tɑɑ nɑn u nyin-nyuut, k biɑ jii u yut k fiɑl’n.

⁴⁵Fin ŋɑnin k puul wɔbn, ŋɑɑn ŋuɑ ŋɑnin k nyik n tɑɑ bɑlmu mɑɑ bɑɑl yuo nbɑ nɑ wɑɑ teee nɑn mɔtɑɑnɑ.

⁴⁶A biɑ lek k suɑl n yut nɑn kpɑn, ŋɑɑn puo mɑnŋ biɑ jii tulɑɑli k suɑl n tɑɑ.

⁴⁷L pɑɑk, n yien’ɑ e, wɑɑ luon’n bonciɑnn nɑ pɑɑk e wɑnt nɑn u lɑ nyikcɑbu u biit nbɑ yɑb nɑ pɑɑk, ŋɑɑn wun nbɑ lɑ nyikcɑbu u biit nbɑ k yɑb nɑ pɑɑk nɑ, mun luon’n wɑɑnm-nnɑ e.»

⁴⁸Ŋɑnn e k Yiesu jiɑnt k yet puo nɑ ɑ: «N nyik ɑ biit k cɑb’ɑ wɑɑ.»

⁴⁹K nilieb nbɑ kɑl k di nɑ ji din piin yien b lieb ɑ: «Juɑ nɑ tie ŋmee k sɑɑ fit nyik cɑb nilɔ u biit i?»

⁵⁰K Yiesu yet puo nɑ: «A yɑdɑ nɑ pɑɑk, ɑ lɑ fielu wɑɑ. L pɑɑk, i sɑɑ nɑn mɑnu.»