Read Moba Luk 9 Bible Online

Luk 9 - Moba bible

Luk 9

¹L puolpo k Yiesu din tɑn yiin u tuomiinbɑ *piik nɑn bɑnle nɑ k lɑkn’m, k tul’b pɑnŋ nɑn yiikuo nbɑ k b sii nyint nɑlnbiit nbɑ kul be niib ni, kii biɑ kii te k bɑɑtb i pɑɑkt,

²k ji din te k b yɑt ɑ bii lin kii muɑntl Yennu nɑɑn po, k biɑ te k bɑɑtb i pɑɑkt.

³K u yet’b ɑ: «I dɑɑ jikt siɑl k sɑɑ nɑn’n. I dɑɑ diɑ pɑti, ɑmi pɑkɑ, ɑmi pɑɑnu, ɑmi likli, ɑmi liɑtfɔkt ŋɑnlele.

⁴Ŋɑɑk nbɑ k i sɑɑ kuɑ, yin biɑl lenŋ nɑn yɑɑ tɑn sɑɑ nyi duo mɑnŋ ni.

⁵Siɑn nbɑ kul k niib k tuok’i nɑn pɑlpienn, yin pit i tɑɑpɑnt ni tɑnt bil l duo ni yuo nbɑ k i nyi lenŋ, k l sii tie *siɑlɑ nbɑ wɑnt nɑn b mɔk biit.»

⁶Ŋɑnn e k u *puolpoweitieb nɑ din nyii k lin digbɑnɑ ni k muɑntl Yennu lɑbɑmɑnn, k biɑ te k bɑɑtb pɑɑk l digbɑnɑ kul ni.

⁷K Gɑɑliile kpɑnbɑl *Heluod din tɑn gbɑt lɑbɑɑl nbɑ din tun nɑ kul, k l ŋmɑt u yɑn ni, k mɑɑn yenm din yɑɑ ɑ Sɑn e fiil kuun ni,

⁸k lieb yɑɑ ɑ yɑɑyuo ni sɔkni Elii e dɔkt, k lieb mun yɑɑ ɑ yɑɑyuo ni sɔkniinbɑ yenɔ e fiil kuun ni,

⁹ŋɑɑn k Heluod yet ɑ: «N dɑɑn te k b pot Sɑn yul ɑ, ŋɑɑn ŋmee k n jin gbiɑ u po nɑ mun i?» K u ji din kol l yuo nɑ ɑ wun lɑ Yiesu.

¹⁰Tuomiinbɑ piik nɑn bɑnle mɑnŋ nbɑ din tɑn jen k yet Yiesu lin nbɑ k b dɑɑn sɑɑn sɑɑ tun. K u ji din jii’b k b sɑɑn dosɑu nbɑ k b yi Betsɑidɑ, b kuukuɑ.

¹¹Ŋɑɑn nibul nɑ nbɑ din gbɑt nnɑ mɑnŋ, k b wei Yiesu k sɑɑn, k u tuok’b nɑn pɑlpienn, k wɑnn’b Yennu nɑɑn po, k biɑ te k bin nbɑ luon pɑɑku nɑ pɑɑk.

¹²Yuo nbɑ k yennu din tɑn mɑɑkt nɑ, k u tuomiinbɑ *piik nɑn bɑnle nɑ bɑɑl u buol k tɑn yet’ɔ ɑ: «Ŋɑɑnt k nibul nɑ n sɑɑn doi nɑn digbɑnbis nbɑ kpiɑ nɑ ni k lɑ jiet nɑn dunduɑnbuol, k mɑɑn nnɑ nɑ tie muuk ni e.»

¹³K u jiin yet’b ɑ: «I mɔnŋ n tul’b jiet k bin di.» K b yet’ɔ ɑ: «T k mɔk siɑl k pukn pɑɑni ŋɑnŋmu nɑn jɑni ŋɑnle nɑ po, k t nɔk sɑɑ sɑɑn dɑɑ jiet k tɑn dinn nibul nɑ kul ɑmi ii?»

¹⁴(Jɑb nbɑ din be lenŋ nɑ din tie nɑn tusɑ ŋɑnŋmu nɑ.) K Yiesu yet u puolpoweitieb ɑ: «Ŋɑɑnt k niib nɑ n bɔkt kɑl piinŋmuŋmu.»

¹⁵K u puolpoweitieb ŋɑɑn k b kul bɔkt kɑl kɑl.

¹⁶K u jii pɑɑni ŋɑnŋmu nɑn jɑni ŋɑnle nɑ, ŋɑɑn yɑɑt got sɑnpɑɑpo, k tul Yennu niipuouk jiet nɑ pɑɑk, k ji din ŋmit ŋmit k tul u puolpoweitieb nɑ ɑ bii tuol nibul nɑ,

¹⁷k b kul dii k jɑnŋ. K u puolpoweitieb lɑkn jiet nbɑ k niib nɑ dii k tɑn tenn nɑ, k l gbie kpɑncubt piik nɑn ŋɑnle.

¹⁸Dɑsiɑl k Yiesu din mei Yennu u kuukuɑ, k u puolpoweitieb din tɑn bɑɑl u buol ni l yuo nɑ, k u boi’b ɑ: «Nibul nɑ yɑɑ ɑ n tie ŋmee?»

¹⁹K b jiin k yet’ɔ ɑ: «Yenm yɑɑ ɑ ɑ tie Sɑn wun nbɑ din wuul niib Yennu nyunwulu nɑ e, k lieb mun yɑɑ ɑ ɑ tie Elii, k siɑb mun yɑɑ ɑ yɑɑyuo ni sɔkniinbɑ yenɔ e tɑn fiil kuun ni.»

²⁰K u boi’b ɑ: «K yinm ŋɑnin yɑɑ ɑ n tie ŋmee?» K Piɑl jiin k yet’ɔ ɑ: «Fin e tie Yennu *Klistu nɑ.»

²¹Ŋɑnn e k Yiesu yet’b nɑn ninmɔnn ɑ b dɑɑ yien suɑ lɑbɑɑl mɑnŋ,

²²k biɑ yet’b ɑ: «L kpɑɑ tɑlɑs nɑn *Nisɑɑlk Bijɑ n di fɑlɑ bonciɑnn, k t tinŋ ni sɑɑkɑb nɑn Yennu mɑnntieb yudɑnm nɑn *senniwɑntieb sɑɑ yet’ɔ, k biɑ kpi’u wɑɑ, ŋɑɑn l dɑɑ ŋɑntɑ dɑɑl k u sɑɑ fiil kuun ni.»

²³Ŋɑnn e k u yet b kul ɑ: «Wun nbɑ i luon wun wei’n, sie k u yit u mɔnŋ sɑlk k jii u kuun dɑpunpunn dɑɑl kul kii wɑɑ’n,

²⁴k mɑɑn wun nbɑ luon wun kɔn u mɑnfuol pɑɑk, ŋuɑ e tɑn sɑɑ kɔnŋ’l, ŋɑɑn wun nbɑ yit u mɔnŋ sɑlk n pɑɑk, ŋuɑ e tɑn sɑɑ lɑ u mɑnfuol nɑn bɑlmɔni.

²⁵Nilɔ i lɑ tingbounŋ nɑ mɔktuk kul, ŋɑɑn biil u mɔnŋ binbenŋ k kɔnŋ u mɑnfuol, nyɔlɑnt po e k u sɑɑ lɑ?

²⁶Wun nbɑ tiin fei k jiin min nɑn n wɑnnu nɑ po, Nisɑɑlk Bijɑ i tɑnŋ i jen nɑn u *yudɑnt, nɑn u Bɑɑ yudɑnt nɑn u *mɑlɑkɑɑnbɑ yudɑnt, l yuo mɑnŋ u tɑn sɑɑ tin’ɔ fei mun.

²⁷Bɑlmɔni e k n yɑɑ n yien’i nɑ, siɑb be nnɑ k dɑɑ kɑn kpo sie k b tɑn lɑ Yennu nɑɑn sinsinn.»

²⁸Yiesu nbɑ din pɑk nnɑ k gbenn yuo nbɑ, l puolpo e k l tien nɑn dɑɑ ŋɑnniin nɑ, k u jii Piɑl nɑn Sɑn nɑn Sɑɑk, k duo nɑn’m juɑl pɑɑk ɑ bin sɑɑ miɑl Yennu.

²⁹Wɑɑ din mei Yennu nɑ k u nunm po tɑn kpint, k u tiɑt penn k nyilk.

³⁰L yuo nɑ k jɑb bɑnle nnɑ lekt lenŋ. L din tie Muois nɑn Elii e,

³¹k b tiɑt nɑn b gbɑnɑnt nyili. B din piɑk nɑn Yiesu k jikt sɑɑ bɑnnu nbɑ k u sɑɑ kpo Selusɑɑlenm k tun u tuonn k gbenn.

³²Guɑn din suol Piɑl nɑn u lieb bonciɑnn, k b guɑn k tɑn kpil yelk k fiil, k lɑ k yentsɑɑkɑl yent k lint Yiesu, k b biɑ lɑ jɑb bɑnle nbɑ din sie u buol nnɑ.

³³Jɑb mɑnŋ nbɑ din tɑn nyikt Yiesu nɑ, k Piɑl yet’ɔ ɑ: «Cɑnbɑɑ, l ŋɑn nɑn tii be nnɑ nɑ. T sɑɑ fɑɑ lɑnbont ŋɑntɑ e, k yenn i tie ɑ yɑl, k liel i tie Muois yɑl, k liel mun i tie Elii yɑl.» Piɑl nbɑ din piɑk lin nbɑ mɑnŋ, u din gbiɑ ɑ u piɑk e.

³⁴Wɑɑ din dɑɑ piɑk nnɑ mɑnŋ, k sɑnpɑgbɑnn dɔkt k tɑn piin’m, k jɑŋmɑɑni din suol u puolpoweitieb nɑ nɑn sɑnpɑgbɑnn nbɑ dɔkt k piin’m nɑ.

³⁵K b din gbɑt kunkɔl sɑnpɑgbɑnn nɑ ni, k l yet ɑ: «N Bijɑ wun nbɑ k n lukt’ɔ e nɑ. Ii sɑɑk u mɔb mɑn.»

³⁶Kunkɔl nɑ nbɑ din pɑk gbenn yuo nbɑ, k b ji lɑ k Yiesu kuɑ e biɑl sie. L puolpo e k b ji din biɑl ŋmin k jikt sɑɑ lin nbɑ k b lɑ nɑ po, ŋɑɑn k k kumi suɑ lɑbɑɑl mɑnŋ l yuo nɑ.

³⁷L din tɑn yent k Yiesu nɑn u puolpoweitieb nyii juɑl nɑ pɑɑk k sik, k nibulciɑɔnŋ din tuok’ɔ.

³⁸K jɑsuɑ din be nibul nɑ ni, k din tɑn tiɑn yiin Yiesu ɑ: «Wɑntuɑ, n bɑln’mɑ e, tɑn gotl n bijɑ nɑ, k mɑɑn ŋuɑ e kpɑn tie n biyenml,

³⁹k nɑlnbiiuk tuu te k wun kpil yikn k lu’u, k u tɑbt, k mɔsɑnkunkuounŋ nyi u mɔb ni, k u dint’ɔ wɑhɑlɑ k l gbiɑ’u k tuu tɑn wolk’ɔ wɑɑnm-nnɑ, ŋɑɑn k k nyikt’ɔ.

⁴⁰N bɑln ɑ puolpoweitieb ɑ bin nyinn nɑlnbiiuk mɑnŋ, k b gbɑl.»

⁴¹K Yiesu jiin k yet’b ɑ: «Yinm biitdɑnm, yinm nbɑ kɑɑ yɑdɑ. N sɑɑ wei nɑn’i nlee k di suklu nɑn’i mɑntk i?» K u biɑ yet juɑ mɑnŋ ɑ: «Bɑɑt nɑn ɑ bijɑ nɑ.»

⁴²K bik nɑ nbɑ din bɑɑt Yiesu buol ni yuo nbɑ k nɑlnbiiuk nɑ libl’ɔ nɑn tinŋ gbɑb, k u bɑɑ duɑ k tɑbt. Ŋɑɑn k Yiesu tiɑn nɑlnbiiuk nɑ pɑɑk, k te k bik nɑ pɑɑk, k jii’u k tul’ɔ u bɑɑ.

⁴³Ŋɑnn e k l yɑɑl lit niib nɑ kul nɑn Yennu nbɑ mɔk pɑnŋ biɑnŋ nbɑ nɑ. L dɑɑ din bɑkt nibul nɑ nɑn wɑɑ tuun biɑnŋ nbɑ kul nɑ pɑɑk, k Yiesu ŋmɑt yet u puolpoweitieb nɑ ɑ

⁴⁴«Luotl i tubɑ mɑn k gbɑt fɑnu lin nbɑ k n yɑɑ n pɑk k tul’i nɑ. B tɑn sɑɑ jii Nisɑɑlk Bijɑ k kubn’ɔ niib nuu ni.»

⁴⁵Ŋɑɑn b lek din k bɑnn l pɑɑk, k mɑɑn siɑl din dɔkn b yɑn e, ɑ b dɑɑ bɑnt, k b biɑ tiin jɑŋmɑɑni nɑn bin boi Yiesu l mɑɑn pɑɑk.

⁴⁶L puolpo e k mɔniɑɔk din tɑn bɑɑl Yiesu puolpoweitieb nɑ sinsuuk ni, k b noi ɑ bin lɑɑn ŋmee tie nijɑɑnn b sinsuuk ni.

⁴⁷K Yiesu bɑnn bɑɑ duki biɑnŋ nbɑ. L pɑɑk k u jii bik nnɑ k senn’ɔ u nunm ni,

⁴⁸ŋɑɑn yet’b ɑ: «Wun nbɑ gɑɑl bik nbɑ nɑ n sɑnn pɑɑk, u gɑɑl min e, k wun nbɑ mun sɑk k gɑɑl’n, u gɑɑl wun nbɑ tun’n nɑ e mun biɑk. K mɑɑn wun nbɑ tie tɑlk i ni, ŋuɑ e tie nijɑɑnn k gɑl i kul ɑ.»

⁴⁹Ŋɑnn e k Sɑn din yet’ɔ ɑ: «Cɑnbɑɑ, t dɑɑn lɑ k jɑsuɑ mun tɑɑn ɑ sɑnn k nyint nɑlnbiit niib ni, k t yet’ɔ ɑ wun nyik, k mɑɑn u k tie t ni yenɔ.»

⁵⁰K Yiesu jiin k yet’ɔ ɑ: «I dɑɑ tɑb’ɔ mɑn, k mɑɑn wun nbɑ kul k kɔn nɑn’i ni, u sie i puol e.»

⁵¹Tɔn, yuo nbɑ k l din tɑn pel nɑn Yiesu n do *Yendɔunŋ ni, k u din tɑn fɑɑ pɑl k suol sɔnu ɑ wun sɑɑn Selusɑɑlenm,

⁵²k u tun tuomiinbɑ ɑ bin gɑl *Sɑɑmɑɑli niib digbɑnbik nbɑ be liik ɑ bin tien siil nɑn u bɑɑlu,

⁵³ŋɑɑn lenŋ niib din k luon bin gɑɑl’ɔ, k mɑɑn b din mi nɑn u sɑɑ Selusɑɑlenm e.

⁵⁴K u puolpoweitieb Sɑɑk nɑn Sɑn nbɑ gbɑt nnɑ mɑnŋ k b boi’ɔ ɑ: «Yonmdɑɑnɔ, ɑ luon k t te k muu n nyi sɑnpɑɑpo k sik di biil’b ii?»

⁵⁵Ŋɑɑn Yiesu jiɑnt gɑɑl jɑt b pɑɑk ɑ bin nyik ɑ, [k yet ɑ: «I k mi siek nbɑ te k i mɔk l dudukt.

⁵⁶K mɑɑn Nisɑɑlk Bijɑ k bɑɑl ɑ wun buon niib sei kɑɑ, ŋɑɑn u bɑɑl ɑ wun fiel’b e,»] k b nyik, ŋɑɑn sɑɑn digbɑnliel po.

⁵⁷Yuo nbɑ k b din sɑɑ mɑnŋ k jɑsuɑ tɑn yet Yiesu ɑ: «N sɑɑ wei’ɑ siɑn nbɑ kul po k ɑ sɑɑ.»

⁵⁸K Yiesu yet’ɔ ɑ: «Lunlonɑ mɔk fɔli, k nuɑni mun biɑ mɔk tiɑt, ŋɑɑn Nisɑɑlk Bijɑ k mɔk dunduɑnbuol.»

⁵⁹K u biɑ tɑn yet jɑluɑ ɑ: «I wɑɑ’n.» K juɑ mɑnŋ yet’ɔ ɑ: «N Yonmdɑɑnɔ, ŋɑɑnt k n sɑɑn k sɑɑ pii n bɑɑ sinsinn ɑ.»

⁶⁰K Yiesu jiin yet’ɔ ɑ: «Ŋɑɑnt k kpienm i pii b kpienlieb. Fin, i sɑɑ wɑɑ, kii sɑi muɑntl niib Yennu nɑɑn po.»

⁶¹K luɑ mun yet’ɔ ɑ: «N Yonmdɑɑnɔ, n sɑɑ wei’ɑ wɑɑ, ŋɑɑn ŋɑɑnt k n kun k sɑɑ cɑb n ŋɑɑtieb sinsinn ɑ k ji fit wei’ɑ.»

⁶²K Yiesu yet’ɔ ɑ: «Wun nbɑ diɑ nɑɑsɔk k ko ŋɑɑn goli puolpo, l dɑɑnɔ k ŋɑn nɑn Yennu nɑɑn tuontumu.»