Read Moba Sɑn 10 Bible Online

Sɑn 10 - Moba bible

Sɑn 10

¹K Yiesu biɑ yet’b ɑ: «Bɑlmɔni e k n yien’i nɑ, nilɔ nbɑ k tɔkn peluok tɑnmɔb k kuɑ, ŋɑɑn duo juonn k kuɑ, l dɑɑnɔ e tie nɑn-yukɔ nɑn fɑt-tuɑ.

²Ŋɑɑn nilɔ nbɑ tɔkn peluok nɑ tɑnmɔb k kuɑ, l dɑɑnɔ e tie pei mɑnŋ kpɑɑlk.

³U i tɑnŋ i bɑɑt ɑ wun kuɑ, tɑnmɔguulɔ nɑ sɑɑ luot e, wun kuɑ, k u yi u mɔnŋ mɔnŋ pei nɑ sɑnɑ, k b gbiɑ u mɔb, k u nyint’b.

⁴U i nyinn u mɔnŋ pei kul yuo nbɑ, u tuu gɑl b tuɑnn e, k b wɑɑ u puol, k mɑɑn b mi u kunkɔl.

⁵Ŋɑɑn b kɑn wei sɑɑmɔ ŋɑnin. B sɑɑ ciɑl, k mɑɑn b k mi u kunkɔl.»

⁶Yiesu din puɑ’b kpɑnjɑn nɑ, ŋɑɑn k b k bɑnn l pɑɑk.

⁷L pɑɑk, k u biɑ ŋɑnm k yet’b ɑ: «Bɑlmɔni e k n yien’i nɑ, min e tie peluok nɑ tɑnmɔb.

⁸Bin nbɑ kul liit’n k bɑɑl nɑ tie nɑn-yukb e nɑn fɑt-tieb, ŋɑɑn pei nɑ k gbiɑ b mɔb.

⁹Min e tie tɑnmɔb nɑ, k dɑɑnɔ nbɑ wei’n k kuɑ, ŋuɑ e sɑɑ lɑ fielu, k sii tun gɑɑl kuɑ, k ŋmɑt nyi, k lɑɑt jeŋɑnt.

¹⁰Nɑn-yukɔ bɑɑt ɑ wun jɑn k kpi k biil kuukuɑ e. Min e bɑɑl ɑ niib n lɑ mɑnfuol nbɑ tie mɑnfuol nɑn bɑlmɔni.

¹¹«Min e tie pekpɑɑŋɑnŋ, k pekpɑɑŋɑnŋ e kpenn u pei pɑɑk.

¹²Ŋɑɑn wun nbɑ kpɑɑl pei likli pɑɑk, ŋɑɑn k k tie pekpɑɑlk nɑn mɔni, k biɑ k yen pei nɑ, l i tie k u lɑ k *kinkɑtl tɑn bɑɑt yuo nbɑ, sie k u ciɑl ŋɑɑn nyik pei nɑ, k kinkɑtl n ji bɑɑl k suol’b, k pelei nɑ n yɑt.

¹³U tuu ciɑl e, k mɑɑn u kpɑɑl pei nɑ likli pɑɑk e, k u bɑkɑ kɑɑ pei nɑ ni.

¹⁴Min e tie pekpɑɑŋɑnŋ. N Bɑɑ nbɑ mi’n, k n mun mi’u nɑ, l mun biɑ tie nnɑ e k n mi n pei, k b mun mi’n, k n sɑɑ yit n mɑnfuol sɑlk b pɑɑk.

¹⁶Pelei be k tie n yɑb, ŋɑɑn ŋɑnm k tie peluok mɑnŋ ni yɑb. Sie k n bɑɑl nɑn ŋɑnm mun biɑk, k b sɑɑ gbɑt n kunkɔl, k b kul ji sii tie pebuolyenŋ, k mɔk pekpɑɑyenŋ kuɑ.

¹⁷«Ŋɑnn e k n Bɑɑ luon’n, k mɑɑn n yɑɑ n nyinn n mɑnfuol, k l puolpo k n biɑ sɑɑ ŋɑnm lɑ n mɑnfuol mɑnŋ.

¹⁸Suɑ kɑɑ k sɑɑ nyinn n mɑnfuol mɑnŋ, ŋɑɑn n mɔnŋ mɔnŋ e yɑɑ n nyinn’l, k mɑɑn n mɔk yiikuo k sɑɑ nyinn’l, k biɑ mɔk yiikuo k tɑn sɑɑ lɑ’l. Nnɑ e k n Bɑɑ yet’n ɑ n tun.»

¹⁹Wɑɑ yet nnɑ yuo nbɑ, k *Suifnbɑ yudɑnm biɑ ŋɑnm bɔkt,

²⁰k b bonciɑnn yɑɑ ɑ: «Nɑlnbiiuk be u ni, k wɑɑtuk biɑ mɔk’ɔ. Bee tien k i gbiintl u mɑɑn i?»

²¹K lieb mun yɑɑ ɑ: «Nilɔ nbɑ k nɑlnbiiuk be u ni nɑ kii piɑk nnɑ. Nɑlnbiiuk sɑɑ fit nyuɑnt juɑnŋ ii?»

²²L puolpo e wɑɑ k b tɑn mɔk b jɑɑnm nbɑ k b tien Yennu niipuouk b jɑɑnti ŋɑsɑɑkɑk nbɑ be Selusɑɑlenm nɑ pɑɑk nɑ. Jɑɑnm mɑnŋ din be Selusɑɑlenm e. L yuo din tie wonfufuk yuo e,

²³k Yiesu din sonm lin bɑlntl nbɑ k b yi’l Sɑɑlomɔn bɑlntl nɑ ni, k l din be Yennu jɑɑnti ŋɑsɑɑkɑk ni.

²⁴K Suifnbɑ yudɑnm din bɑɑl k tikl k lint’ɔ, ŋɑɑn boi’ɔ ɑ: «A yɑɑ lin wei nlee wɑɑ, k tin tɑn bɑnn nɑn ɑ tie *Klistu? L i tie k ɑ tie ŋuɑ i e, fɑn yet’t bɑlmɔni.»

²⁵K Yiesu jiin’m ɑ: «N ponŋ dɑɑn yet’i wɑɑ, ŋɑɑn k i k tien’n yɑdɑ. Tuonɑ nbɑ k n tuun nɑn n Bɑɑ yiikuo nɑ ni, ŋɑnn i wɑnt mɑɑ tie wun nbɑ.

²⁶I k tien’n yɑdɑ, k mɑɑn yɑɑ k tie n pei nɑ pɑɑk.

²⁷N pei gbiintl n kunkɔl, k n mi’b, k b wɑɑ’n,

²⁸k n tien’m mɑnfuol nbɑ kɑɑ gbennu, k b kɑn mi k kpo, k suɑ biɑ kɑɑ k sɑɑ fit fɑt’b n nuu ni.

²⁹N Bɑɑ nbɑ jii’b k tien’m n nuu ni nɑ, ŋuɑ e cie suɑ kul k suɑ kɑɑ k sɑɑ fit fɑt’b n Bɑɑ mɑnŋ nuu ni.

³⁰Min nɑn n Bɑɑ mɑnŋ tie yonm e.»

³¹L yuo nɑ k Suifnbɑ yudɑnm nɑ tɔki tɑnɑ biɑk, ɑ bin jɑɑt’ɔ k kpi’u.

³²K Yiesu yet’b ɑ: «I ponŋ lɑ k n tun tuonŋɑnɑ bonciɑnn, nbɑ k n Bɑɑ yɑɑ ɑ n tun nɑ, k tuonŋɑnɑ mɑnŋ ni, lɑnn pɑɑk e te k i ji yɑɑ i jɑɑt’n tɑnɑ ɑ?»

³³K b jiin k yet’ɔ ɑ: «T k luon k tin jɑɑt’ɑ tɑnɑ tuonŋɑnsiɑl pɑɑk kɑɑ, ŋɑɑn fɑɑ piɑk k biil Yennu nɑ pɑɑk. A kpɑn tie nilɔ e, ŋɑɑn yi ɑ mɔnŋ Yennu.»

³⁴K Yiesu jiin boi’b ɑ: «L k diɑn i *senni ni ɑ Yennu yet ɑ: ‹I tie yenni ee?

³⁵(k t mi nɑn Yennu kɑn fɑɑl fɑɑk fɑb ɑ, k mɑɑn Yennu yi bin nbɑ k u tul’b u mɑɑn nɑ yenni e).›

³⁶Ŋɑɑn min ŋɑnin, Yennu lukt’n k tun’n tingbounŋ nɑ ni, k nlee k i sɑɑ fit yet ɑ n piɑk biil Yennu e mɑɑ yet ɑ n tie Yennu Bijɑ e nɑ?

³⁷L i tie k n k tuun n Bɑɑ nɑ tuonɑ i e, ŋɑnn i dɑɑ tie’n yɑdɑ.

³⁸Ŋɑɑn l i tie k n tuun ŋuɑ Yennu tuonɑ mɑnŋ i e, l i lek i tie k i k tien’n yɑdɑ, ŋɑɑn yin tien n tuonɑ mɑnŋ yɑdɑ. Ŋɑnn e, k i sɑɑ bɑnn nɑn bɑlmɔni nɑn n Bɑɑ be n ni, k n mun biɑ be u ni.»

³⁹Ŋɑnn e k Suifnbɑ nɑ tɑn yɑɑ bin suol’ɔ biɑk, k u buut nyii,

⁴⁰k ŋmɑt puot *Suulden kpenpuotl, k sɑɑ be siɑn nbɑ k Sɑn din tuu wuul niib Yennu nyunwulu nɑ.

⁴¹K niib bonciɑnn din bɑɑl Yiesu penŋ, k din piɑk nɑn b lieb ɑ: «Sɑn ŋɑnin din k tun bɑktnɔunŋ tuonjɑɑnsiɑl, ŋɑɑn lin nbɑ kul k u din piɑk k jikt sɑɑ juɑ mɑnŋ po, l tie bɑlmɔni e.»

⁴²K niib bonciɑnn din tien Yiesu yɑdɑ lenŋ.