Read Moba Sɑn 11 Bible Online

Sɑn 11 - Moba bible

Sɑn 11

¹Tɔn, jɑsuɑ nnɑ din be Betɑɑni, k u sɑnn yi Lɑɑsɑɑl, k u din tɑn yiɑl. Betɑɑni din tie Mɑɑli nɑn u niipuo Mɑɑlt duo e.

²Mɑɑli e din tie dɑɑnɔ nbɑ but tulɑɑli Yonmdɑɑnɔ Yiesu tɑɑ pɑɑk, ŋɑɑn jii u yut k fiɑl fiɑl nɑ. Ŋuɑ Mɑɑli ninjɑ Lɑɑsɑɑl e din yiɑl. Wɑɑ din tɑn yiɑl nɑ,

³k u niipuob tun *tuomi ɑ wun sɑɑn k sɑɑ yet Yiesu ɑ: «Yonmdɑɑnɔ, ɑ nɑɑsin-yuɑk nbɑ k ɑ mɑntk luon’ɔ nɑ yiɑl e.»

⁴Yiesu nbɑ gbɑt nnɑ yuo nbɑ k u yet u *puolpoweitieb nɑ ɑ: «Lɑɑsɑɑl nbɑ yiɑl nɑ, yiɑlu mɑnŋ k tie u mɑnfuol telk kɑɑ nɑ, ŋɑɑn l tie lin nbɑ k niib sɑɑ dont Yennu sɑnn l pɑɑk e, ɑ Yennu Bijɑ mun n lɑ dontl biɑk.»

⁵Tɔn, Yiesu din luon Mɑɑlt nɑn Mɑɑli nɑn Lɑɑsɑɑl.

⁶Wɑɑ gbɑt ɑ Lɑɑsɑɑl yiɑl nɑ, ŋɑɑn u din tien dɑɑ ŋɑnle k dɑɑ be lenŋ.

⁷L puolpo e k u din tɑn yet u puolpoweitieb nɑ ɑ: «Ŋɑɑnt mɑn k tin ŋmɑt sɑɑn Suude.»

⁸K b yet’ɔ ɑ: «Cɑnbɑɑ, dɑɑ ŋɑnlele nɑ, k *Suifnbɑ yudɑnm nɑ dɑɑn yɑɑ bin jɑɑt’ɑ tɑnɑ, k ɑ biɑ yɑɑ ɑ t ŋmɑt lenŋ ii?»

⁹K Yiesu yet’b ɑ: «Yentu tuu be yendopo mɔkmɔk nɑn yenbɑɑpo e. L i tie k nilɔ sonm yennu ni, u kɑn gbiɑt, k mɑɑn u lɑɑt tingbounŋ nɑ yentu nɑ.

¹⁰Ŋɑɑn u i sonm nyiɑɔk, u gbiɑtl e, k mɑɑn yentu kɑɑ u ni.»

¹¹Yiesu din yet nnɑ e, ŋɑɑn biɑ yet ɑ: «T yuɑk Lɑɑsɑɑl guɑnt e, ŋɑɑn n sɑɑ sɑɑn fiin’ɔ wɑɑ.»

¹²K u puolpoweitieb nɑ yet’ɔ ɑ: «Yonmdɑɑnɔ, l i tie k u guɑnt i e, u sɑɑ lɑ lɑɑfiɑ wɑɑ.»

¹³Yiesu din wɑnt k l tie ɑ Lɑɑsɑɑl kpo e, ŋɑɑn ŋɑnm din mi ɑ u wɑnt ɑ Lɑɑsɑɑl guɑnt e.

¹⁴L pɑɑk din te k u yet’b gbenn ɑ: «Lɑɑsɑɑl kpo wɑɑ,

¹⁵ŋɑɑn i pɑɑk n mɔk pɑlpienn nɑn mɑɑ dɑɑn kɑɑ u buol ni nɑ, k mɑɑn ŋɑnn e sɑɑ te k i ji fit tien’n yɑdɑ. Ŋɑɑnt tin sɑɑn u penŋ mɑn.»

¹⁶K Tuomɑ, wun nbɑ k b yi’u Jɑɑk nɑ, yet u lieb ɑ: «Ŋɑɑnt k t mun n sɑɑn mɑn. L i sii tie kuun, tinm nɑn ŋuɑ n kpo.»

¹⁷Yiesu nbɑ din tɑn bɑɑl lenŋ yuo nbɑ k suɑ bɑɑ pii Lɑɑsɑɑl, l dɑɑ ŋɑnnɑ e nɑ.

¹⁸Betɑɑni din k fɔk nɑn Selusɑɑlenm. L fɔknt din tie nɑn kiiluomiɑtɑ ŋɑntɑ nɑ e.

¹⁹L pɑɑk din tien k Suifnbɑ bonciɑnn din bɑɑl Mɑɑlt nɑn Mɑɑli penŋ, ɑ bin mɑɑn b pɑlɑ, k mɑɑn b ninjɑ nɑ kuun pɑɑk.

²⁰Mɑɑlt nbɑ tɑn gbɑt ɑ Yiesu bɑɑt yuo nbɑ, k u nyii cet’ɔ, ŋɑɑn k Mɑɑli ŋɑnin biɑl be ŋɑɑk ni.

²¹K Mɑɑlt yet Yiesu: «N Yonmdɑɑnɔ, l i tie k ɑ dɑɑn bo be nnɑ nɑ, n ninjɑ nɑ dɑɑn bo kɑn kpo.

²²Ŋɑɑn n mi nɑn mɔtɑɑnɑ, l i tie k ɑ miɑl Yennu lin nbɑ kul po, u sɑɑ tul’ɑ wɑɑ.»

²³K u yet’ɔ: «A ninjɑ sɑɑ fiil kuun ni wɑɑ.»

²⁴K Mɑɑlt jiin’ɔ: «N mi nɑn u tɑn sɑɑ fiil kuun ni *dulnyɑ cincɑɑtdɑɑl, dɑɑl nbɑ k kpienm tɑn sɑɑ fiil kuun ni nɑ.»

²⁵K Yiesu yet’ɔ: «Min e tie kuun fiilu k tie mɑnfuol. Dɑɑnɔ nbɑ tien’n yɑdɑ, ŋuɑ e sii mɔk mɑnfuol, u lek i kpo,

²⁶k dɑɑnɔ kul nbɑ mɔk mɑnfuol k tien’n yɑdɑ, u kɑn mi k kpo. A tien yɑdɑ nɑn lin nbɑ nɑ ɑɑ?»

²⁷K u jiin ɑ: «Cɑnbɑɑ, nnn, n tien yɑdɑ nɑn fin e tie *Klistu nɑ, Yennu Bijɑ nbɑ bɑɑt tingbounŋ nɑ ni nɑ.»

²⁸Mɑɑlt nbɑ yet nnɑ mɑnŋ, ŋɑɑn ŋmɑt k sɑɑ yiin u niipuo Mɑɑli suon nnɑ, k yet’ɔ ɑ: «Wɑntuɑ nɑ be nnɑ wɑɑ, k yi’ɑ.»

²⁹Mɑɑli nbɑ gbɑt nnɑ yuo nbɑ, k u fiil yiɑn yiɑn, k sɑɑn u buol ni.

³⁰K Yiesu din dɑɑ k bɑɑl digbɑnbik mɑnŋ, ŋɑɑn dɑɑ be siɑn nbɑ k Mɑɑlt cet’ɔ nɑ e.

³¹K Suifnbɑ nbɑ be nɑn Mɑɑli ŋɑɑk ni k mɑɑnt u pɑl nɑ, bɑɑ lɑ k u nyii yiɑn yiɑn nɑ, k b mun wei nyii, k mɑɑn b mi ɑ u sɑɑ kɑɑɔk buol e ɑ wun sɑɑ bui kumɔni.

³²Mɑɑli nbɑ bɑɑl Yiesu buol k lɑ’u yuo nbɑ, k u gbɑɑn u tuɑnn, ŋɑɑn yet’ɔ ɑ: «N Yonmdɑɑnɔ, l i tie k ɑ dɑɑn bo be nnɑ nɑ, n ninjɑ nɑ dɑɑn bo kɑn kpo.»

³³K Yiesu lɑ k u mɔ, k Suifnbɑ nbɑ wei’ɔ k bɑɑl nɑ, k b mun mɔ, k ninbɑɑɔk suol’ɔ bonciɑnn, k u kuli u pɑl ni.

³⁴K u boi’b «I pii’u liɑ po e?» K b yet’ɔ: «Yonmdɑɑnɔ, bɑɑt k tɑn got.»

³⁵K Yiesu sikn nyin-nyuut.

³⁶K Suifnbɑ nɑ yet ɑ: «Gotl mɑn, wɑɑ jiɑ luon Lɑɑsɑɑl biɑnŋ nbɑ.»

³⁷K siɑb yɑɑ ɑ: «Dɑɑnɔ nbɑ nyuɑnt juɑnŋ nɑ, u dɑɑn bo kɑn fit te k Lɑɑsɑɑl dɑɑ kpenn ii?»

³⁸K Yiesu pɑl biɑ ŋɑnm biil bonciɑnn, k u bɑɑl kɑɑɔk nɑ buol ni. Kɑɑɔk nɑ din tie tɑnfiɑɔk o, k kɑtɑnu bii l mɔb.

³⁹K Yiesu yet’b ɑ: «Biitl kɑɑɔk mɑnŋ mɑn.» K Mɑɑlt wun nbɑ tie kpiemɔ nɑ niipuo, yet’ɔ ɑ: «N Yonmdɑɑnɔ, l sii pɔi hei, k mɑɑn bɑɑ pii’u, l dɑɑ ŋɑnnɑ e nɑ.»

⁴⁰K Yiesu boi’ɔ: «N bo k yet’ɑ ɑ l i tie k ɑ tien’n yɑdɑ, ɑ sɑɑ lɑ Yennu *yudɑnt ɑɑ?»

⁴¹Ŋɑnn e k b biit kɑɑɔk nɑ. K Yiesu gokt sɑnpɑɑpo, ŋɑɑn yet ɑ: «N Bɑɑ, n tien’ɑ niipuouk nɑn fɑɑ sɑk n miɑlu nɑ.

⁴²N mi nɑn yuo kul ɑ sɑɑk n miɑlu, ŋɑɑn mɑɑ yet nnɑ nɑ, k mɑɑn n luon k nibul nbɑ be nnɑ nɑ n gbɑt k tien yɑdɑ nɑn fin e tun’n.»

⁴³Wɑɑ yet nnɑ mɑnŋ, ŋɑɑn yiin sɑnpɑɑpo wɑɑ ɑ: «Lɑɑsɑɑl, nyimin nɑ.»

⁴⁴K kpiemɔ nɑ nyii, k u tɑɑ nɑn u nii k l fin fin nɑn kɑtinŋ, k cincenn buob u nunm po. K Yiesu yet’b ɑ: «Fintl kɑtinŋ mɑnŋ k ŋɑɑ’u.»

⁴⁵Ŋɑnn e k Suifnbɑ bonciɑnn nbɑ din bɑɑl ɑ bin fuont Mɑɑli nɑ, lɑ lin nbɑ k Yiesu tun, k b tien’ɔ yɑdɑ.

⁴⁶Ŋɑɑn b siɑb sɑɑn Fɑɑliisiɑnnbɑ penŋ, k sɑɑ yet’b lin nbɑ k Yiesu tun.

⁴⁷L pɑɑk k Fɑɑliisiɑnnbɑ mɑnŋ nɑn Yennu jɑɑnti yudɑnm yiin tintɑɑnkɑɑnu, k b tikl, k b boi b lieb ɑ: «T sɑɑ tien nlee? K mɑɑn juɑ mɑnŋ tuun bɑktnɔunŋ tuonjɑɑnɑ bonciɑnn.

⁴⁸T i ŋɑɑn k u ŋɑnmt k tuun nnɑ k puki, suɑ kul sɑɑ tien’ɔ yɑdɑ wɑɑ, k Luonm tieb n bɑɑl k yiel Yennu jɑɑnti ŋɑsɑɑkɑk nɑ, ŋɑɑn biɑ buont t niib.»

⁴⁹K b yenɔ, wun nbɑ yi *Kɑɑyiif, k tie Yennu jɑɑnti yudɑɑnɔ l binn ni nɑ, yet’b ɑ: «Yinm ŋɑnin k mi siɑl.

⁵⁰I k mi nɑn l ŋɑn k niyenɔ kuɑ n gɑɑl niib nɑ kul ɑ pɑɑk k kpo, k gɑl k t niib kul n buont ii?»

⁵¹U din k pɑk lin nbɑ nɑ nɑn u mɔnŋ kɑɑ, ŋɑɑn wɑɑ din tie Yennu jɑɑnti yudɑɑnɔ binn mɑnŋ ni nɑ, k Yennu te k u pɑk bunt buntl, ɑ Yiesu tɑn sɑɑ gɑɑl Suifnbɑ nɑ pɑɑk k kpo,

⁵²k l k tie Suifnbɑ kuukuɑ kɑɑ k u tɑn sɑɑ gɑɑl b pɑɑk k kpo, ŋɑɑn nɑn bin nbɑ kul tie Yennu niib k yɑt be tingbounŋ nɑ ni nɑ e k u sɑɑ gɑɑl b pɑɑk k kpo, ɑ bin tɑɑn nɑn lieb yonm.

⁵³K l dɑɑl mɑnŋ k jii sɑɑ k Suifnbɑ yudɑnm nɑ lol suol ɑ bin kpi Yiesu.

⁵⁴L pɑɑk k u ji din k sonm pɑɑnu ni Suifnbɑ sinsuuk ni, ŋɑɑn k tɑn yɑɑt sɑɑn duo nbɑ k b yi Eflɑiinm, k l kpiɑ nɑn pɑɑnpieonŋ nɑ, k ŋuɑ nɑn u puolpoweitieb ji be lenŋ.

⁵⁵Suifnbɑ *yuktgɑltiɑlu jɑɑnm nbɑ tɑn pel nɑ, k niib bonciɑnn nyii digbɑnɑ k bɑɑl Selusɑɑlenm, ɑ bin sɑɑ mɑnn *mɑlunŋ k ŋɑnm b mɔnŋ.

⁵⁶K niib nɑ din luon Yiesu. Bɑɑ tikl Yennu jɑɑnti ŋɑsɑɑkɑk ni yuo nbɑ, k b boi b lieb ɑ: «I duki nlee? U mɑntk kɑn bɑɑl jɑɑnm nɑ ɑmi?»

⁵⁷K Yennu jɑɑnti yudɑnm nɑn Fɑɑliisiɑnnbɑ nɑ tul mɔb ɑ: «Wun nbɑ mi u buol, wun bɑɑl k tɑn ŋmɑɑ t tɑɑl k tin suol’ɔ.»