Read Moba Sɑn 12 Bible Online

Sɑn 12 - Moba bible

Sɑn 12

¹Tɔn, dɑɑ ŋɑnluob din tɑn biɑl nɑn *yuktgɑltiɑlu jɑɑnm n di, k Yiesu bɑɑl Betɑɑni, duo nbɑ k Lɑɑsɑɑl be nɑ. Ŋuɑ e k Yiesu din fiin’ɔ kuun ni nɑ.

²Lenŋ e k b din tien jiet, k Mɑɑlt jii k tul’b, k Lɑɑsɑɑl din tie b ni yenɔ nbɑ din kɑl k di nɑn’m.

³K Mɑɑli jii tulɑɑli liitjinn, lin nbɑ yɑɑ dɑɑɔk pɑɑl bonciɑnn. B din jii fɑɑt nbɑ k b yi’l nɑlt e k tien tulɑɑli mɑnŋ, k u jii’l k but Yiesu tɑɑ pɑɑk, ŋɑɑn suol u mɔnŋ yut k fiɑl fiɑl, k ŋɑɑk nɑ ji nubl nɑn tulɑɑli nɑ gbinm.

⁴K Yiesu *puolpoweitɔyenɔ, wun nbɑ k b yi’u Suudɑ Iskɑɑliɑɔt, (ŋuɑ e din tie wun nbɑ yɑɑ wun tɑn kuɑt Yiesu nɑ,) k u yet ɑ:

⁵«Bee tien k b bo k kɔi tulɑɑli mɑnŋ denienbɑ kobi ŋɑntɑ (300) k jii l likli k tul tɑlɑs-dɑnm i?»

⁶Wɑɑ din yet nnɑ mɑnŋ, l din k tie ɑ u bɑkɑ be tɑlɑs-dɑnm nɑ ni kɑɑ, ŋɑɑn u din tie nɑn-yukɔ e. ŋuɑ e din tie wun nbɑ diɑ likli pɑkl k tuu jɑɑn.

⁷K Yiesu yet’ɔ ɑ: «Ŋɑɑnt’ɔ. U tien nnɑ k l tie n kuun siil tienu e.

⁸Tɑlɑs-dɑnm e sii tun be nɑn’i yuo kul ɑ, ŋɑɑn min ŋɑnin kii tun be nnɑ kɑɑ.»

⁹Ŋɑnn e k *Suifnbɑ bonciɑnn gbɑt ɑ Yiesu be Betɑɑni, k b sɑɑn lenŋ. B din k sɑɑn Yiesu pɑɑk kuukuɑ kɑɑ, ŋɑɑn b din luon k bin sɑɑ lɑ Lɑɑsɑɑl e mun, wun nbɑ k Yiesu fiin’ɔ kuun ni nɑ.

¹⁰L pɑɑk e tien k Yennu jɑɑnti yudɑnm din loln lolɑ ɑ bin kpi Lɑɑsɑɑl mun biɑk,

¹¹k mɑɑn u kuun fiilu pɑɑk e k *Suifnbɑ bonciɑnn din nyik Yennu jɑɑnti yudɑnm mɑnŋ, ŋɑɑn wei Yiesu k tien’ɔ yɑdɑ.

¹²L yent sɑn-nyiɑɔk o k nibulciɑɔnŋ nbɑ bɑɑl Selusɑɑlenm ɑ bin di *yuktgɑltiɑlu jɑɑnm nɑ gbɑt ɑ Yiesu bɑɑt.

¹³K b ji ŋɑt biɑbfɑɑt k cet ɑ bin tuok’ɔ, k yikn wuyikni sɑnpɑɑpo wɑɑ k yɑɑ ɑ: «Hosɑnɑ, Yennu yetŋɑnm ii be dɑɑnɔ nbɑ bɑɑt nɑn Yonmdɑɑnɔ Yennu sɑnn ni nɑ pɑɑk. Yennu n yɑt u yetŋɑnm Islɑɑeltieb Kpɑnbɑl pɑɑk.»

¹⁴K Yiesu din lɑ bonbik e k jɑk k bɑɑt, nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ

¹⁵ɑ: «*Siiɔn duo tieb, i dɑɑ tiin jɑŋmɑɑni. Gotl mɑn, i Kpɑnbɑl e jɑk bonbik k bɑɑt nɑ.»

¹⁶K u puolpoweitieb din dɑɑ k bɑnn lin nbɑ nɑ pɑɑk l yuo mɑnŋ. Ŋɑɑn Yiesu nbɑ din tɑn lɑ dontl nɑ, l yuo e k b ji din tiɑl nɑn lin nbɑ nɑ diɑn Yennu lolkpel kɑdɑɑɔk ni k jikt sɑɑ u po e, k biɑ tiɑl nɑn niib nɑ mun set din tien’ɔ nnɑ e.

¹⁷Nibulciɑɔnŋ nbɑ din be nɑn Yiesu yuo nbɑ k u yiin Lɑɑsɑɑl ɑ wun nyi kɑɑɔk ni ŋɑɑn fiin’ɔ kuun ni nɑ, k din muɑntl lin nbɑ k b lɑ nɑ.

¹⁸L pɑɑk e te k niib bonciɑnn din cet’ɔ, k mɑɑn bɑɑ gbɑt k u tun bɑktnɔunŋ tuonjɑɑnn mɑnŋ nɑ pɑɑk.

¹⁹Ŋɑnn e k Fɑɑliisiɑnnbɑ nɑ yien b lieb ɑ: «Gotl mɑn. T ji kɑn fit tun siɑl. I k lɑ ɑɑ? Tingbounŋ nɑ niib kul ɑ wɑɑ’u e.»

²⁰Niib nbɑ din sɑɑn Selusɑɑlenm ɑ bin sɑɑ di *yuktgɑltiɑlu jɑɑnm nɑ, k Glek siɑb din be b ni,

²¹k b tɑn sɑɑn Fiiliip penŋ, wun nbɑ nyii Betsɑidɑ nbɑ be Gɑɑliile tinŋ ni nɑ, k b yet’ɔ ɑ: «Cɑnbɑɑ, t luon k t lɑ Yiesu.»

²²K Fiiliip sɑɑn k sɑɑ yet Andle, k Andle nɑn Fiiliip ji sɑɑn k yet Yiesu.

²³K Yiesu yet’b ɑ: «Yuo nbɑ k Yennu sɑɑ donn *Nisɑɑlk Bijɑ nɑ sɑnpɑɑpo nɑ bɑɑl nɑ.

²⁴Bɑlmɔni e k n yien’i nɑ, l i tie k b k bul dibinn tinŋ ni, l kɑn kpo. L sii tie dibin-yenml e. Ŋɑɑn l i tie k b bul’l k l kpo, l sɑɑ pɑ e k nɑn dii bonciɑnn.

²⁵Dɑɑnɔ nbɑ deki u mɑnfuol tɑn sɑɑ kɔnŋ’l e, ŋɑɑn wun nbɑ yit u mɑnfuol sɑlk tingbounŋ nɑ ni, u sii diɑ’l k l tɑn sii tie mɑnfuol nbɑ kɑɑ gbennu e.

²⁶Dɑɑnɔ nbɑ luon wuu tuun n tuonn, sie k u wɑɑ’n, k mɑɑ tɑn sii be siɑn nbɑ, k n tuontunnɔ mun tɑn sii be lenŋ. N Bɑɑ sɑɑ donn dɑɑnɔ nbɑ tuun n tuonn.»

²⁷Ŋɑnn e k Yiesu yet ɑ: «N mɔk pɑlbiil bonciɑnn. N sɑɑ pɑk bee? N sɑɑ yet ɑ: ‹N Bɑɑ, nyint’n lin nbɑ bɑɑt n pɑɑk nɑ ni ɑmi ii?› Aɑi, k mɑɑn ŋɑnn e te k n bɑɑl tingbounŋ nɑ ni k di fɑlɑ mɑnŋ.

²⁸N Bɑɑ, ŋɑɑnt k ɑ sɑnn n lɑ dontl.» Ŋɑnn e k kunkɔl pɑk sɑnpɑɑpo ɑ: «N sɑnn ponŋ lɑ dontl ɑ, k biɑ sɑɑ ŋɑnm lɑ dontl k pukn.»

²⁹Niib bonciɑnn nbɑ din sie lenŋ nɑ din gbɑt kunkɔl mɑnŋ, k b yɑɑ ɑ: «L tie sɑtiɑni e,» k siɑb yɑɑ ɑ: «*Mɑlɑkɑ e piɑk nɑn’ɔ.»

³⁰Ŋɑɑn k Yiesu yet’b ɑ: «L k tie n mɔnŋ mɔnŋ pɑɑk kɑɑ k kunkɔl mɑnŋ pɑk nɑ, ŋɑɑn l tie i tiɑɔnŋ pɑɑk e.

³¹Yuo nbɑ k Yennu yɑɑ wun tɑn bu tingbounŋ nɑ ŋɑɑtieb buut nɑ, l yuo bɑɑt, k u biɑ sɑɑ bel wun nbɑ tie tingbounŋ nɑ bɑt.

³²B i tɑnŋ i jii’n k donn’n sɑnpɑɑpo yuo nbɑ, n sɑɑ te k niib kul n bɑɑl n buol.»

³³U mɑɑn nɑ din wɑnt wɑɑ tɑn sɑɑ kpo biɑnŋ nbɑ e.

³⁴K nibul nɑ yet’ɔ ɑ: «T *senni ni wɑnt’t ɑ *Klistu nɑ sii mɔk mɑnfuol nbɑ kɑɑ gbennu. Nlee k ɑ yet ɑ b sɑɑ jii Nisɑɑlk Bijɑ nɑ k donn’ɔ? Ŋmee tie Nisɑɑlk Bijɑ mɑnŋ i?»

³⁵K u jiin yet’b ɑ: «Yentu nɑ sii be i buol wɑɑnm-nnɑ e. L pɑɑk, ii sonm mɑn yentu mɑnŋ ni, lɑɑ dɑɑ be nɑ, k bunbɔnn dɑɑ bɑɑt’i, k mɑɑn wun nbɑ sonm bunbɔnn ni, u k mi wɑɑ sɑɑ siɑn nbɑ po.

³⁶Tient yentu nɑ yɑdɑ mɑn, lɑɑ dɑɑ be i sinsuuk ni nɑ k kpɑnt yentu wɑɑs e.» Yiesu nbɑ din yet nnɑ mɑnŋ puolpo e, ŋɑɑn k u nyii niib nɑ ni, k sɑɑn bɔl.

³⁷U lek din tun bɑktnɔunŋ tuonjɑɑnɑ bonciɑnn b nunm ni, ŋɑɑn b din k tien’ɔ yɑdɑ,

³⁸ɑ *Yennu sɔkni Esɑɑyi mɑɑn nɑ n ji fit gbie nɑn lɑɑ yɑɑ ɑ: «Yonmdɑɑnɔ, ŋmee gɑɑl t mɑɑn i? ŋmee k Yennu jii u pɑnŋ k fiit wɑnn’ɔ?»

³⁹B din k fit tien yɑdɑ, k mɑɑn Esɑɑyi biɑ din yet ɑ:

⁴⁰«Yennu e tien’m juɑni, k biɑ te k b gbɑl bɑnnu, ɑ k b ninbinɑ dɑɑ lɑɑt, k b yɑn ni dɑɑ bɑnt l pɑɑk, k b dɑɑ fit bɑɑt n buol ni, k mɑn teb’b.»

⁴¹Esɑɑyi din yet nnɑ, k mɑɑn u din lɑ Yiesu *yudɑnt e, k din piɑk u po.

⁴²Ŋɑɑn k Suifnbɑ yudɑnm bonciɑnn gbɑɑ din tien Yiesu yɑdɑ, ŋɑɑn b k nyinn b mɔnŋ pɑɑnu ni ɑ b tien’ɔ yɑdɑ, k mɑɑn b tiin jɑŋmɑɑni ɑ Fɑɑliisiɑnnbɑ nɑ sɑɑ nyinn’b Suifnbɑ jɑɑnti dieok ni,

⁴³k mɑɑn b din luon niib n pɑk’b e, k gɑl Yennu n pɑk’b.

⁴⁴Ŋɑnn e k Yiesu tɑn pɑk sɑnpɑɑpo wɑɑ ɑ: «Dɑɑnɔ nbɑ tien’n yɑdɑ, u k tien min kuukuɑ kɑɑ yɑdɑ, ŋɑɑn u mun tien wun nbɑ tun’n nɑ e yɑdɑ.

⁴⁵Wun nbɑ lɑɑt’n, u lɑɑt wun nbɑ tun’n nɑ e mun.

⁴⁶N bɑɑl tingbounŋ ni nɑ mɑɑ mii tei yentl niib e, k dɑɑnɔ nbɑ tien’n yɑdɑ, u kɑn biɑl bunbɔnn ni.

⁴⁷K biɑ jen ɑ, wun nbɑ gbɑt n mɑɑn nɑ, ŋɑɑn k k sɑk, min kɑɑ sɑɑ bu u buut k biil’ɔ, k mɑɑn n k bɑɑl tingbounŋ nɑ ni mɑɑ n tɑn bu u buut k biil’ɔ kɑɑ, ŋɑɑn n bɑɑl mɑɑ n tɑn fiel *dulnyɑ e.

⁴⁸K wun nbɑ yien’n k k sɑɑk n mɑɑn nɑ, lenŋ e k u sɑɑ lɑ lin nbɑ sɑɑ bu k biil’ɔ. Mɑɑn nbɑ k n pɑk nɑ tɑn sɑɑ bu nɑn’ɔ dulnyɑ cincɑɑtdɑɑl.

⁴⁹N k piɑk nɑn n tiɑɔnŋ yiikuo kɑɑ, ŋɑɑn n Bɑɑ nbɑ tun’n nɑ yet’n mɑɑ sɑɑ pɑk lin nbɑ nɑn mɑɑ sɑɑ wɑnn lin nbɑ.

⁵⁰N mi nɑn lin nbɑ k u wɑnn’n tien niib mɑnfuol nbɑ kɑɑ gbennu e. Ŋɑnn, lin nbɑ k n piɑk nɑ, l tie lin nbɑ k n Bɑɑ wɑnn’n e.»