Read Moba Sɑn 18 Bible Online

Sɑn 18 - Moba bible

Sɑn 18

¹Yiesu nbɑ din pɑk k gbenn nɑ puolpo, k ŋuɑ nɑn u *puolpoweitieb yɑɑt sɑɑ, k sɑɑ puot kpenu nbɑ k b yi Seedlɔn nɑ. Gungounŋ nnɑ din be lenŋ, k b din be gungounŋ mɑnŋ ni.

²Tɔn, Suudɑ wun nbɑ kuɑt Yiesu nɑ din tuu mi gungounŋ mɑnŋ buol, k mɑɑn yuo kul Yiesu din tuu sɑɑ nɑn u puolpoweitieb lenŋ e.

³Ŋɑnn e k Suudɑ tɑn bɑɑl gungounŋ mɑnŋ ni nɑn sejenm bonciɑnn, nɑn Yennu jɑɑnti yudɑnm nɑn Fɑɑliisiɑnnbɑ tuontunnɑ, k b din diɑ jɑtiɑt nɑn fitɑ nɑn mulɑnbɑɑbi.

⁴Yiesu ŋɑnin din mi bonsiɑl kul nbɑ yɑɑ lin tien’ɔ, ŋɑnn e k u nyii tuɑnn, k boi’b ɑ: «I luon ŋmee?»

⁵K b jiin ɑ: «Yiesu nbɑ tie Nɑɑsɑɑlet nilɔ nɑ.» K u yet’b ɑ: «Min e nɑ.» K Suudɑ, wun nbɑ nyii u puol nɑ, k u sie lenŋ nɑn’m.

⁶Yiesu nbɑ ŋɑnin yɑɑ ɑ: «Min e nɑ» yuo nbɑ, k b ji ŋmɑt potuntunɑ, k bɑɑ bɑɑ tinŋ ni.

⁷K Yiesu ŋɑnm boi’b ɑ: «I luon ŋmee?» K b biɑ yɑɑ ɑ: «Yiesu nbɑ tie Nɑɑsɑɑlet nilɔ nɑ.»

⁸K Yiesu yet’b ɑ: «N ponŋ yet’i ɑ min e nɑ. L i tie k i luon’n i e, yin ŋɑɑn k bin nbɑ be nnɑ nɑ k bin yɑɑt ɑ.»

⁹Nnɑ e k lin nbɑ k u yet ɑ: «Fɑɑ tul’n bin nbɑ kul nɑ, b suɑ k bot,» k lin fit tien mɔni.

¹⁰L yuo mɑnŋ k Siimɔn Piɑl din diɑ juk-bɑnjiɑk k nuɑt, k cuɑ Yennu jɑɑnti yudɑɑnɔ tuontunnɔ niidiitu po tubl k pot. Tuontunnɔ mɑnŋ sɑnn din yi Mɑɑlkus.

¹¹K Yiesu yet Piɑl ɑ: «Jiin ɑ juk-bɑnjiɑk mɑnŋ k jiin nuɑn. A duki nɑn wɑhɑlɑ *kɔp nbɑ k n Bɑɑ tul’n nɑ, n kɑn nyu lenŋ ii?»

¹²Ŋɑnn e jik k sejenm nɑn b yudɑɑnɔ nɑn *Suifnbɑ yudɑnm tuontunnɑ nɑ suol Yiesu, k lol’ɔ,

¹³k jii’u k dɑɑ sɑɑn nɑn’ɔ Ann buol sinsinn. Ann din tie *Kɑɑyiif diɑnjuɑ e, k Kɑɑyiif din tie Yennu jɑɑnti yudɑɑnɔ e l binn ni.

¹⁴Kɑɑyiif mɑnŋ e dɑɑn yet Suifnbɑ yudɑnm ɑ l i tie k niyenɔ kuɑ gɑɑl niib kul pɑɑk k kpo, l sɔ.

¹⁵Bɑɑ din sɑɑn nɑn Yiesu yuo nbɑ, k Siimɔn Piɑl nɑn Yiesu puolpoweitɔluɑ wɑɑ. K puolpoweituɑ mɑnŋ din tie suɑ nbɑ k Yennu jɑɑnti yudɑɑnɔ mi’u e. L pɑɑk, k u din fit kuɑ Yennu jɑɑnti yudɑɑnɔ nɑ ŋɑɑdundounŋ ni, siɑn nbɑ k Yiesu be nɑ.

¹⁶Ŋɑɑn k Piɑl ŋɑnin biɑl sie nɑn-yel po yɑnŋl tɑnmɔb ni, k puolpoweitɔluɑ mɑnŋ nbɑ k Yennu jɑɑnti yudɑɑnɔ din mi’u nɑ, k u ŋmɑt yɑnŋl tɑnmɔb nɑ ni, k pɑk nɑn sɑpɑɑmɔ nbɑ guu tɑnmɔb nɑ, k kuɑn Piɑl dundounŋ ni.

¹⁷K sɑpɑɑmɔ mɑnŋ boi Piɑl: «A k tie juɑ nɑ puolpoweitɔyenɔ kɑɑ ɑɑ?» K Piɑl jiin’ɔ ɑ: «Aɑi. N k tie u puolpoweitɔyenɔ kɑɑ.»

¹⁸Wɑɑt din be l yuo, k tuontunnɑ nɑ nɑn sejenm nɑ juo sɑnkuɑnɑ muu, k sie k nɑni, k Piɑl tɑn sɑɑn tɑɑn’m k b nɑni.

¹⁹Ŋɑnn e k Yennu jɑɑnti yudɑɑnɔ nɑ boi Yiesu u puolpoweitieb nɑn u wɑnnu nɑ po.

²⁰K Yiesu jiin yet’ɔ ɑ: «N ponŋ tuu piɑk yienin ni k tien suɑ kul. Yuo kul n tuu wɑnt niib Yennu mɑɑn Suifnbɑ jɑɑnti diet ni nɑn Yennu jɑɑnti ŋɑsɑɑkɑk ni, siɑn nbɑ k Suifnbɑ kul tuu bɑɑt lɑknt nɑ. N k pɑk siɑl wuol ni.

²¹Bee tien k ɑ boi’n nnɑ? Boin bin nbɑ gbɑt lin nbɑ k n tuu yien’m nɑ. Ŋɑnm mi mɑɑ tuu yien lin nbɑ.»

²²Yiesu nbɑ yet nnɑ mɑnŋ, k sejenm nɑ yenɔ peb’ɔ tɑnpɑk, ŋɑɑn boi’ɔ ɑ: «Nnɑ e k ɑ sɑɑ pɑk jiin Yennu jɑɑnti yudɑɑnɔ?»

²³K Yiesu yet’ɔ: «Mi i pɑk bonbisiɑl i e, fɑn yet suɑ kul lɑɑ tie lin nbɑ. Ŋɑɑn mi i pɑk lin nbɑ tokn i e, bee tien k ɑ ji peb’n i?»

²⁴L yuo e k Ann te k b jii Yiesu k sɑɑn nɑn’ɔ Kɑɑyiif wun nbɑ tie Yennu jɑɑnti yudɑɑnɔ nɑ penŋ, k Yiesu biɑ lek dɑɑ lol nɑn ŋmiit.

²⁵Piɑl nbɑ din sie k nɑni muu nɑ, lenŋ mɑnŋ k b boi’ɔ ɑ: «A k tie u puolpoweitɔyenɔ kɑɑ ɑɑ?» K Piɑl noi, k yet’b ɑ: «Aɑi, n k tie u puolpoweitɔyenɔ kɑɑ.»

²⁶K Yennu jɑɑnti yudɑɑnɔ tuontun-yenɔ nbɑ k u ninjɑ tie wun nbɑ k Piɑl cuɑ u tubl k pot nɑ, k u boi’ɔ ɑ: «N k lɑ’ɑ nɑn Yiesu, gungounŋ nɑ ni ii?»

²⁷K Piɑl biɑ noi. L tɑɑkpɑɑk ni nɑ k kojouk bui.

²⁸L puolpo k Suifnbɑ yudɑnm nyii nɑn Yiesu Kɑɑyiif ŋɑɑk ni k sɑɑn nɑn’ɔ Luonmtieb kpɑnbɑl ŋɑɑk ni. L din tie sɑn-nyɑpob ni e. Ŋɑɑn Suifnbɑ yudɑnm mɑnŋ k luon bin kuɑ ŋɑɑk mɑnŋ ni k mɑɑn b din k luon bin kuɑn b mɔnŋ jɑknt ni ɑ bin fit k di *yuktgɑltiɑlu jɑɑnm jiet.

²⁹L pɑɑk k *Piilɑɑt nyii nɑn-yel k tuok’b, k boi’b ɑ: «I tɑɑl juɑ nɑ biɑ pɑɑk e?»

³⁰K b yɑɑ ɑ: «Wuu bo i kii tun bonbiil, t bo kɑn bɑɑl nɑn’ɔ ɑ buol nnɑ.»

³¹K Piilɑɑt yet’b: «I mɔnŋ mɔnŋ n jii’u k bu nɑn’ɔ i *senni nbɑ wɑnt biɑnŋ nbɑ.» K Suifnbɑ yudɑnm mɑnŋ yɑɑ ɑ: «T k mɔk yiikuo nɑn tin kpi nilɔ.»

³²L din set tɑn tie nnɑ e, ɑ Yiesu nbɑ din yɑɑ ɑ kubuolu nbɑ k u tɑn sɑɑ kpo nɑ, n ji fit gbie.

³³K Piilɑɑt ŋmɑt k kuɑ ŋɑɑk nɑ ni, ŋɑɑn yiin Yiesu, k boi’ɔ ɑ: «A tie Suifnbɑ Kpɑnbɑl ee?»

³⁴K Yiesu jiin k boi’ɔ ɑ: «Fin e dɑɑ boi’n buboit nɑ ɑmi siɑb e yet’ɑ n po oo?»

³⁵K Piilɑɑt yet’ɔ: «N mun tie Suifnbɑ buolu ni nilɔ ee? A mɔnŋ mɔnŋ niib nɑn Yennu jɑɑnti yudɑnm e jii’ɑ k tɑn tul’n. A jiɑ biil bee?»

³⁶K Yiesu yet’ɔ ɑ: «N nɑɑn k tie tingbounŋ nɑ ni yɑl kɑɑ. N nɑɑn i bo i tie tingbounŋ nnɑ yɑl i e, n sejenm bo sɑɑ kɔn n pɑɑk, k Suifnbɑ yudɑnm bo kɑn suol’n. Aɑi, n nɑɑn k tie tingbounŋ nnɑ nɑɑn.»

³⁷K Piilɑɑt boi’ɔ ɑ: «A set tie Kpɑnbɑl e ŋɑnin ii?» K Yiesu jiin ɑ: «Nnn, fin e yien ɑ n tie Kpɑnbɑl. B din mɑl’n ɑ n wɑnn niib bɑlmɔni e. K l pɑɑk e, k n din bɑɑl *dulnyɑ nɑ ni k suɑ kul nbɑ wɑɑ bɑlmɔni mɑnŋ gbiɑ n mɑɑn.»

³⁸K Piilɑɑt boi’ɔ ɑ: «Bɑlmɔni tie bee?» Wɑɑ yet nnɑ puolpo k u ŋmɑt nyii nɑn-yel Suifnbɑ yudɑnm nɑ buol k yet’b ɑ: «N k lɑ juɑ nɑ biit k sɑɑ biil’ɔ.

³⁹Ŋɑɑn i mɔk siɑl k tuu tie binn kul ni, k n tuu nyinn dɑnsɑlyenɔ *yuktgɑltiɑlu jɑɑnm yuo k tul’i. I luon k n nyinn Suifnbɑ Kpɑnbɑl nɑ k tul’i ni ii?»

⁴⁰K b tiɑn tintiɑni k yɑɑ ɑ: «T k luon juɑ nɑ kɑɑ. T luon Bɑɑlɑɑbɑɑs e, k ɑ nyinn’ɔ k tul’t.» Ŋɑɑn k Bɑɑlɑɑbɑɑs mɑnŋ din tie fɑt-tuɑ e.