Read Moba Sɑn 19 Bible Online

Sɑn 19 - Moba bible

Sɑn 19

¹L yuo nɑ k *Piilɑɑt te k b buo Yiesu gbɑnn.

²K sejenm nɑ luu kunkoni foklk k yiln’mɔ, ŋɑɑn lɑnn’ɔ bɑɑnmunŋ nnɑ,

³k nyi bɑɑt k gbɑɑ u tuɑnn, k yien ɑ: «*Suifnbɑ Kpɑnbɑl, t fuont’ɑ,» ŋɑɑn pebt’ɔ tɑnpɑki.

⁴Ŋɑnn e k Piilɑɑt biɑ ŋɑnm k dɑɑ nyii nɑn-yel k yet yudɑnm nɑ: «Gotl mɑn, n bɑɑt nɑn’ɔ i buol, k yin bɑnn nɑn n k lɑ u biit.»

⁵Ŋɑnn e, k Yiesu bɑɑl nɑn-yel po, k yil kunkoni foklk nɑ nɑn bɑɑnmunŋ nɑ, k Piilɑɑt yet’b ɑ: «Gotl mɑn, juɑ mɑnŋ e nɑ.»

⁶Yennu jɑɑnti yudɑnm nɑn b sejenm nbɑ lɑ’u nɑ, k b tiɑn tintiɑni, k yɑɑ ɑ: «Kpɑɑn’mɔ dɑpunpunn pɑɑk. Kpɑɑn’mɔ dɑpunpunn pɑɑk.» K Piilɑɑt yet’b ɑ: «Yinm jii’mɔ mɑn k kpɑɑ’u dɑpunpunn pɑɑk i mɔnŋ, k mɑɑn min k lɑ u biit.»

⁷K Suifnbɑ yudɑnm nɑ jiin yɑɑ ɑ: «T mɔk sensɑu, k *senni mɑnŋ wɑnt nɑn u kpɑn lek tie wun kpo e, k mɑɑn u yɑɑ ɑ u tie Yennu Bijɑ e.»

⁸Piilɑɑt nbɑ din gbɑt nnɑ, k jɑŋmɑɑni biɑ ŋɑnm suol’ɔ bonciɑnn,

⁹k u ŋmɑt kuɑ ŋɑɑn yiin Yiesu, k tɑn boi’ɔ ɑ: «A nyii lee?» Ŋɑɑn Yiesu din k jiin’ɔ siɑl.

¹⁰Ŋɑnn e, k Piilɑɑt boi’ɔ ɑ: «A kɑn pɑk jiin’n ii? A k mi nɑn n mɔk yiikuo k sɑɑ ŋɑɑ’ɑ, k biɑ mɔk yiikuo k sɑɑ kpɑɑ’ɑ dɑpunpunn pɑɑk ii?»

¹¹K Yiesu ji jiin’ɔ ɑ: «Yennu i bo i kii cɑb’ɑ yiikuo, ɑ bo kii mɔk n yiikuo. L pɑɑk, dɑɑnɔ nbɑ suol’n k jiin kubn’ɑ nɑ, u biit yɑb bonciɑnn k gɑl ɑ yɑl ɑ.»

¹²L yuo k ji sɑɑ, Piilɑɑt din yiɑb luon wun ŋɑɑ Yiesu, ŋɑɑn k Suifnbɑ yudɑnm nɑ yɑki kpɑyɑkt k yɑɑ ɑ: «L i tie k ɑ ŋɑɑ’u, ŋɑnn ɑ ji k tie Luonm kpɑnbɑlɑ yudɑɑnɔ Sesɑɑl yuɑk kɑɑ, k mɑɑn dɑɑnɔ nbɑ pul u mɔnŋ Kpɑnbɑl, u tie kpɑnbɑlɑ yudɑɑnɔ nɑ dɑtɑɑk e.»

¹³Piilɑɑt nbɑ gbɑt nnɑ, k u nyii nɑn Yiesu nɑn-yel po, k kɑl u buut kɑɑnu pɑɑk, k b yi’l Binbintl. (Suifnbɑ mɑɑn ni, b yi’l Gɑɑbɑɑtɑ nɑ.)

¹⁴L din tie yensuuk po e, k l sɑɑ yent k *yuktgɑltiɑlu jɑɑnm n di. K Piilɑɑt yet Suifnbɑ yudɑnm nɑ ɑ: «I Kpɑnbɑl i nɑ.»

¹⁵K b yɑki kpɑyɑkt k yɑɑ ɑ: «Kpin’mɔ. Kpin’mɔ. Kpɑɑn’mɔ dɑpunpunn pɑɑk.» K Piilɑɑt boi’b: «I luon k n kpɑɑ i Kpɑnbɑl dɑpunpunn pɑɑk ii?» K Yennu jɑɑnti yudɑnm nɑ jiin ɑ: «T k mɔk kpɑnbɑlsuɑ sie Luonm kpɑnbɑlɑ yudɑɑnɔ Sesɑɑl kuukuɑ.»

¹⁶K Piilɑɑt ji cɑb ɑ bin kpɑɑ Yiesu dɑpunpunn pɑɑk. Ŋɑnn e k sejenm ji gɑɑl Yiesu,

¹⁷k u jii u tiɑɔnŋ kuun dɑpunpunn k nyii duo nɑ kpinŋ, k sɑɑn siɑn nbɑ k b yi’l «Yukpɑbuk» nɑ. (Suifnbɑ mɑɑn ni, b yi ŋɑnn e «Golgotɑ» nɑ.)

¹⁸Lenŋ e k b kpɑɑ’u dɑpunpunn pɑɑk, k biɑ kpɑɑ niib bɑnle dɑpunpunɑ pɑɑk k pukn Yiesu po, k yenɔ be u ciɑnu k luɑ mun be u ciɑnu, ŋɑɑn k Yiesu be sinsuuk ni.

¹⁹K Piilɑɑt diɑn diɑni k b tɑbn Yiesu dɑpunpunn nɑ yul pɑɑk, k l yɑɑ ɑ: «Nɑɑsɑɑlet nilɔ Yiesu wun nbɑ tie Suifnbɑ Kpɑnbɑl i nɑ.»

²⁰K Suifnbɑ bonciɑnn din lii diɑni mɑnŋ ɑ, k mɑɑn siɑn nbɑ k b din kpɑɑ Yiesu dɑpunpunn pɑɑk nɑ, l din k fɔk nɑn Selusɑɑlenm. Diɑni nɑ, l din diɑn Suifnbɑ nɑn Luonm tieb nɑn Glek tieb mɑɑn ni e.

²¹Ŋɑnn e k Suifnbɑ Yennu jɑɑnti yudɑnm sɑɑn k yet Piilɑɑt ɑ: «Dɑɑ dɑ ɑ: ‹Suifnbɑ Kpɑnbɑl i nɑ,› ŋɑɑn diɑnt ɑ: ‹Juɑ nɑ yɑɑ ɑ u tie Suifnbɑ Kpɑnbɑl e.› »

²²K Piilɑɑt jiin ɑ: «Mɑɑ sɑt diɑn lin nbɑ, n diɑn e.»

²³Sejenm nbɑ kpɑɑ Yiesu nɑ puolpo e, k b jii u tiɑt k cent’l tɑɑl munnɑ, k sejenm nɑ kul din gɑɑl tol. L puolpo e biɑk k b jii u liɑtfuouk, lin nbɑ k b luu’l bonmunn, k l k mɔk nyɑlmu nɑ,

²⁴k b yet b lieb ɑ: «I dɑɑ pɑt. Ŋɑɑnt k t tɔ tiɑtiɑ k lɑɑn wun nbɑ sɑɑ yent’l.» L din tien nnɑ, ɑ Yennu lolkpel kɑdɑɑɔk nbɑ din yet nnɑ, lin ji fit gbie ɑ: «B cent n tiɑt, k biɑ tɔ tiɑtiɑ n liɑtfuouk pɑɑk.» Nnɑ e k sejenm nɑ set din tun.

²⁵K Yiesu nɑɑ din sie kpiɑ u dɑpunpunn nɑ, ŋuɑ nɑn u niipuo, k b yi’u Mɑɑli wun nbɑ tie Klopɑs ŋɑɑpuo, nɑn Mɑgdɑɑlɑ puo Mɑɑli, k b lɑkn sie lenŋ.

²⁶K Yiesu lɑ u nɑɑ, k biɑ lɑ u *puolpoweituɑ nbɑ k u mɑntk luon’ɔ nɑ, k u mun sie lenŋ, k Yiesu yet u nɑɑ ɑ: «N nɑɑ, ɑ bijɑ i nɑ jik,»

²⁷k biɑ yet u puolpoweituɑ mɑnŋ ɑ: «A mun, ɑ nɑɑ i nɑ jik.» Lɑɑ din nyii l yuo nɑ k u puolpoweituɑ nɑ ji din jii Yiesu nɑɑ k kun nɑn’ɔ u ŋɑɑk ni.

²⁸L puolpo e, Yiesu din mi nɑn bonsiɑl kul nbɑ k u din tuun nɑ, l ji gbenn ɑ, k u yet ɑ: «Nyun-nyuklu mɔk’n,» ɑ lin gbien lin nbɑ diɑn Yennu lolkpel kɑdɑɑɔk ni nɑ.

²⁹Ŋmɑnŋ din sie nɑn dɑmiituk lenŋ, k b jii sɑɑpo k tun dɑmiituk mɑnŋ ni, k jii tiik nbɑ k b yi iisɔp nɑ dɑɑɔk k fin sɑɑpo nɑ, k tien u mɔb ni,

³⁰k u fuɑnt k nɑk, k yet ɑ: «L gbenn ɑ,» ŋɑɑn tibn k jii u siek k tul Yennu ŋɑɑn kpo.

³¹L din tie ɑlsumɑ dɑɑl e, k Suifnbɑ din k luon niib nɑ i be dɑpunpunɑ pɑɑk *Fuondɑɑl, k mɑɑn Fuondɑɑl mɑnŋ din tie dɑjɑɑnn e. Ŋɑnn e k b din boi Piilɑɑt ɑ wun cɑb’b k bin kɔnn kɔnn b tɑɑ k kpɑɑt’b.

³²L pɑɑk, k sejenm nɑ sɑɑn k sɑɑ kɔnn bin nbɑ k b libn kpɑɑ’b nɑn Yiesu nɑ tɑɑ,

³³ŋɑɑn bɑɑ bɑɑl Yiesu buol ni, k suɑ k u ponŋ kpo nɑ, b din k kɔnn u tɑɑ.

³⁴Ŋɑɑn k sejenm yenɔ jii kpɑnn k ŋmuu Yiesu lokl ni. L tɑɑkpɑɑk ni k sɔn nɑn nyun ji nyi.

³⁵Wun nbɑ diɑn lin nbɑ nɑ tie *siɑlɑ e k u *siɑlɑ tie mɔni, k u mun mi nɑn u piɑk mɔni e ɑ yin mun tien yɑdɑ.

³⁶Lin nbɑ nɑ kul din tien ɑ lin nbɑ diɑn Yennu lolkpel kɑdɑɑɔk ni n gbie ɑ: «B kɑn yiel u kpɑbɑ nɑn yenn kuɑ wɑɑ.»

³⁷K l biɑ diɑn Yennu lolkpel kɑdɑɑɔk ni ɑ: «Niib tɑn sii goli bɑɑ ŋmuu wun nbɑ kpɑnn nɑ.»

³⁸L puolpo e k Suosiɑf, wun nbɑ tie Aliimɑɑte nilɔ nɑ, sɑɑn Piilɑɑt buol ni, k sɑɑ miɑl’ɔ Yiesu gbɑnɑnt. Suosiɑf din tie Yiesu puolpoweituɑ e, ŋɑɑn u din wɑɑ’u wuol ni e, k mɑɑn u din tiin Suifnbɑ yudɑnm e jɑŋmɑɑni. K Piilɑɑt cɑb’ɔ, k u sɑɑn k sɑɑ kpɑɑt Yiesu k jii’u.

³⁹K Niikodenm mun bɑɑl, wun nbɑ din ponŋ mi k bɑɑl Yiesu penŋ nyiɑɔk nɑ, k diɑ tulɑɑli k l tie nɑn cilu piintɑ nɑ. (B din jii bonsiɑl nbɑ k b yi’l miil nɑn bonsiɑl nbɑ k b yi’l ɑlos k ŋmɑt k tien tulɑɑli mɑnŋ.)

⁴⁰Ŋɑnn e, k b jii Yiesu k pɔbn’ɔ cincenŋɑnɑ ni nɑn tulɑɑli nɑ, nɑn Suifnbɑ kupiinu kɑɑl nbɑ tie biɑnŋ nbɑ nɑ.

⁴¹Bɑɑ din kpɑɑ Yiesu siɑn nbɑ nɑ, kpɑɑb din be lenŋ, k kɑpɑɑɔnŋ ponŋ be lenŋ, k b dɑɑ din k pii suɑ kɑɑɔk mɑnŋ ni.

⁴²Suifnbɑ Fuondɑɑl nbɑ pel nɑ, k kɑɑɔk nɑ biɑ k fɔk nɑ, k b bil Yiesu lenŋ.