Read Moba Sɑn 2 Bible Online

Sɑn 2 - Moba bible

Sɑn 2

¹L dɑɑ ŋɑntɑ dɑɑl, k puokuɑnu jɑɑnm be Kɑɑnɑ duo ni, Gɑɑliile tinŋ ni. K Yiesu nɑɑ din be lenŋ,

²k b biɑ yiin Yiesu nɑn u *puolpoweitieb, k b mun din be.

³Tɔn, dɑmunŋ nbɑ k b tuu nyu nɑ, k l tɑn gbenn, k Yiesu nɑɑ bɑɑl yet Yiesu ɑ: «Dɑmunŋ nɑ gbenn ɑ.»

⁴K Yiesu yet’ɔ ɑ: «N nɑɑ, bee te k ɑ wɑnt’n mɑɑ sɑɑ tun lin nbɑ. N yuo e dɑɑ k bɑɑl.»

⁵Ŋɑnn e k u nɑɑ mɑnŋ yet tuontunnɑ nɑ ɑ: «Lin nbɑ k u yet’i ɑ i tun, yin tun nnɑ.»

⁶Tɔn, k bui ŋɑnluob nnɑ din sie lenŋ, lin nbɑ k *Suifnbɑ tie nyun lenŋ k nit nɑn b jɑɑnti kɑɑl nbɑ wɑnt biɑnŋ nbɑ, k l bui din fit kuɑ nɑn liitɑ kobik kobik nɑ.

⁷K Yiesu yet tuontunnɑ nɑ ɑ: «Gbient bui nɑ nɑn nyun.» K b gbien nɑn mɔgbɑnɑ wɑɑ.

⁸K u ji yet’b: «Fint mɑn nyun mɑnŋ, k sɑɑn tul jɑɑnm nɑ sɑɑkuɑ.» K b finn k sɑɑn tul’ɔ,

⁹k u gɑɑl lenm nyun nbɑ kpɑnt dɑmunŋ nɑ, k k mi dɑmunŋ nɑ nbɑ nyii siɑn, ŋɑɑn tuontunnɑ nbɑ dul nyun bui nɑ ni ŋɑnin mi. Ŋɑnn e k sɑɑkuɑ nɑ yiin puo nɑ sɔlɔ

¹⁰k yet’ɔ ɑ: «Suɑ kul tuu tol dɑmɑnm sinsinn e wɑɑ. L i tie k b tɑn nyuu k yib ɑ, wun ji tol lin nbɑ k mɑn fɑnu nɑ, ŋɑɑn k yinm ŋɑnin ŋmin ɑ, k ji tɑn juont tuol dɑmunŋ nbɑ mɑn k gɑl siɑl kul nɑ.»

¹¹Tɔn, Yiesu nbɑ din tun bɑktnɔunŋ tuonjɑɑnn mɑnŋ Kɑɑnɑ nbɑ be Gɑɑliile tinŋ ni nɑ, ŋɑnn e din tie u sinsinn nyinn, k l wɑnn niib wɑɑ mɔk *yudɑnt biɑnŋ nbɑ, k u puolpoweitieb nɑ tien’ɔ yɑdɑ l pɑɑk.

¹²L puolpo k Yiesu nɑn u nɑɑ nɑn u ninjɑnm nɑn u puolpoweitieb sik Kɑpelnɑunm, k sɑɑ be lenŋ nɑn dɑɑ ŋɑnle nnɑ nɑ.

¹³Ŋɑnn e k Islɑɑeltieb *yuktgɑltiɑlu jɑɑnm tɑn pel, k Yiesu sɑɑn Selusɑɑlenm.

¹⁴Wɑɑ bɑɑl Selusɑɑlenm yuo nbɑ, k u kuɑ Yennu jɑɑnti ŋɑsɑɑkɑk ni, k sɑɑ lɑ niib k b kɔi nei nɑn pei nɑn ŋmɑnɑ k lieb biɑ kɑl kpentl likli.

¹⁵K u jii ŋmiit k piɑn gbɑnn, k bel niib nɑn b bonkobt nɑ kul ɑ, k nyinn’b Yennu jɑɑnti ŋɑsɑɑkɑk mɑnŋ ni, ŋɑɑn tut tut lik-kpentɑ nɑ tiebulɑ k lu, k likli nɑ yɑt bɑɑ bɑɑ,

¹⁶ŋɑɑn biɑ yet bin nbɑ kɔi ŋmɑnɑ nɑ, ɑ bin nyinn ŋmɑnɑ mɑnŋ, ŋɑɑn biɑ yet’b ɑ: «I dɑɑ tie n Bɑɑ ŋɑɑk kpinkpent buol.»

¹⁷L yuo nɑ k u puolpoweitieb ji tiɑl Yennu lolkpel kɑdɑɑɔk nbɑ yet biɑnŋ nbɑ nɑ ɑ: «N Yennu, n lonm nbɑ k n mɔk k jiin ɑ ŋɑɑk po di n pɑl ni nɑn muu nɑ e.»

¹⁸Ŋɑnn e k Suifnbɑ yudɑnm boi Yiesu ɑ: «A sɑɑ tun *nyinn lɑnn po e k wɑnn’t ɑ ɑ mɔk yiikuo k tun fɑɑ tun lin nbɑ nɑ?»

¹⁹K Yiesu jiin ɑ: «Tɔn, i yiel Yennu jɑɑnti ŋɑsɑɑkɑk nɑ, ŋɑɑn dɑɑ ŋɑntɑ sinsuuk ni n sɑɑ mɑɑ’l kɑɑl.»

²⁰K b yet ɑ: «Wɑɑ. T jii binɑ piinnɑ nɑn ŋɑnluob o k mɑɑ Yennu jɑɑnti ŋɑsɑɑkɑk nɑ, ŋɑɑn k fin tɑn yɑɑ ɑ sɑɑ jii dɑɑ ŋɑntɑ kuukuɑ e k mɑɑ ɑɑ?»

²¹Ŋɑɑn Yennu jɑɑnti ŋɑsɑɑkɑk nbɑ k Yiesu din pɑk l po nɑ, din tie u mɔnŋ mɔnŋ gbɑnɑnt e.

²²Yennu nbɑ din fiin’ɔ kuun ni nɑ puolpo e, k u puolpoweitieb tiɑl lin nbɑ k u yet nɑ. K b tien yɑdɑ nɑn lin nbɑ diɑn Yennu lolkpel kɑdɑɑɔk ni nɑn lin nbɑ k Yiesu pɑk nɑ.

²³Yiesu nbɑ din be Selusɑɑlenm *yuktgɑltiɑlu jɑɑnm mɑnŋ yuo nɑ, k niib bonciɑnn din lɑ bɑktnɔunŋ tuonjɑɑnɑ nbɑ k u tun nɑ k tien’ɔ yɑdɑ,

²⁴ŋɑɑn Yiesu din k jii u mɔnŋ k cɑb’b, k mɑɑn u din mi suɑ kul nbɑ tie wun nbɑ.

²⁵U din k luon suɑ n wɑnn’ɔ nifosɑɑlk po, k mɑɑn u din mi lin nbɑ be niib pɑlɑ ni nɑ.