Read Moba Sɑn 20 Bible Online

Sɑn 20 - Moba bible

Sɑn 20

¹K *Suifnbɑ *Fuondɑɑl tɑn gɑl, ŋɑɑn k lɑsl dɑɑl sɑn-nyɑpob ni e k suɑ l yuo dɑɑ bɔn, k Mɑgdɑɑlɑ puo Mɑɑli sɑɑn Yiesu kɑɑɔk buol, k lɑ k b bilnt kɑtɑnu kɑɑɔk mɑnŋ mɔb buol ɑ,

²k u ciɑl sɑɑn Siimɔn Piɑl nɑn Yiesu *puolpoweitɔluɑ nbɑ k Yiesu mɑntk luon’ɔ nɑ penŋ, k yet’b ɑ: «B piit Yonmdɑɑnɔ kɑɑɔk nɑ ni wɑɑ, k t k mi bɑɑ bil’ɔ siɑn nbɑ.»

³Ŋɑnn e k Piɑl nɑn Yiesu puolpoweitɔluɑ nɑ nyii k ciɑl sɑɑn kɑɑɔk mɑnŋ buol ni,

⁴k b bɑnle tiin k sɑɑ ŋɑɑn Yiesu puolpoweitɔluɑ nɑ ciɑl pɑɑk Piɑl, k sɑɑ dɔnŋ bɑɑl kɑɑɔk mɑnŋ buol sinsinn,

⁵ŋɑɑn k k kuɑ. U din tibn e k lɑ kɑtinŋ.

⁶K Siimɔn Piɑl tɑn yuɑnt k bɑɑl k kuɑ, k lɑ k kɑtinŋ nɑ duɑ lenŋ,

⁷k biɑ lɑ cincenbik nbɑ k b dɑɑn fin Yiesu yul nɑ, k ŋɑnn fin l biɑnŋ k duɑ l kuukuɑ.

⁸Ŋɑnn e k Yiesu puolpoweitɔluɑ nbɑ din dɔnŋ k bɑɑl nɑ, mun kuɑ k ji lɑ k biɑ tien puo nɑ mɑɑn mɑnŋ yɑdɑ.

⁹(Ŋɑɑn b dɑɑ din k gbɑt lin nbɑ diɑn Yennu lolkpel kɑdɑɑɔk ni nɑ pɑɑk, ɑ l tie k Yiesu n fiil kuun ni.)

¹⁰K Yiesu puolpoweitieb bɑnle mɑnŋ ŋmɑt k kun.

¹¹Ŋɑɑn Mɑɑli din biɑl e sie kɑɑɔk mɑnŋ nɑn-yel po k mɔ, k tɑn tibn k got kɑɑɔk nɑ ni,

¹²k lɑ *mɑlɑkɑɑnbɑ bɑnle, k b liɑ tɑpieni, k yenɔ kɑl siɑn nbɑ po k b dɑɑn bil Yiesu nɑ l yul po, k luɑ nɑ mun kɑl l tɑɑ po.

¹³K b boi’ɔ ɑ: «Puo nɑ, bee k ɑ mɔ?» K u jiin ɑ: «B piit n Yonmdɑɑnɔ e, k n k mi bɑɑ bil’ɔ siɑn.»

¹⁴Wɑɑ yet nnɑ, ŋɑɑn ŋmɑnt lɑ k Yiesu sie, ŋɑɑn k u k mi ɑ Yiesu e nɑ.

¹⁵K Yiesu boi’ɔ: «Puo nɑ, bee k ɑ mɔ? A goli luon ŋmee?» Mɑɑli ŋɑnin din mi ɑ u tie gungounŋ nɑ tuontunnɔ e, k u yet’ɔ ɑ: «Cɑnbɑɑ, l i tie k fin i e i jii’u, fɑn yet’n fɑɑ bil’ɔ siɑn, k n sɑɑn k sɑɑ jii’u.»

¹⁶K Yiesu yet’ɔ ɑ: «Mɑɑli.» K u ŋmɑnt k tokn’ɔ, k jiin’ɔ Suifnbɑ mɑɑn ni ɑ: «Lɑɑbuuni.» (L pɑɑk tie ɑ: «Wɑntuɑ.»)

¹⁷K Yiesu yet’ɔ: «Ji dɑɑ diɑ’n, k mɑɑn n dɑɑ k duo n Bɑɑ buol ni. Ŋɑɑn i sɑɑ n nɑɑ wɑɑs penŋ, k sɑɑ yet’b ɑ, n sɑɑ do wun nbɑ tie n Bɑɑ nɑn i Bɑɑ nɑ penŋ ɑ, wun nbɑ tie n Yennu nɑn i Yennu nɑ.»

¹⁸K Mɑgdɑɑlɑ puo Mɑɑli, ŋmɑt Yiesu puolpoweitieb penŋ k sɑɑ yet’b ɑ: «N lɑ Yonmdɑɑnɔ nɑ wɑɑ,» ŋɑɑn yet’b wɑɑ yet’ɔ lin nbɑ nɑ.

¹⁹Lɑsl dɑɑl mɑnŋ dɑɑjuouk o, k Yiesu puolpoweitieb nɑ tɑn lɑkn lieb k be dieok ni, ŋɑɑn kpɑl gɑnn, k mɑɑn b tiin Suifnbɑ yudɑnm jɑŋmɑɑni e, k tɑn suɑ k Yiesu sie b sinsuuk ni, k fuont’b ɑ: «Mɑnu i be i pɑɑk.»

²⁰Wɑɑ yet nnɑ puolpo e, k u wɑnn’b u niipɑnt ni fɔnɑ nɑn u lokl ni fɔnn nɑ. U puolpoweitieb nbɑ lɑ Yonmdɑɑnɔ mɑnŋ, k b ji mɔk pɑlpienn bonciɑnn.

²¹K Yiesu biɑ ŋɑnm fuont’b ɑ: «Mɑnu i be i pɑɑk. N Bɑɑ nbɑ tun’n biɑnŋ nbɑ nɑ, n mun yɑɑ n tun’i l biɑnŋ e.»

²²L puolpo e k u pebl wɑn b pɑɑk k yet’b ɑ: «Gɑɑt Foŋɑnm mɑn.

²³L i tie k i nyik cɑb suɑ biit, u set lɑ nyikcɑbu biit mɑnŋ pɑɑk ɑ, ŋɑɑn l i tie k i k nyik cɑb suɑ biit, u k lɑ nyikcɑbu.»

²⁴Tɔn, k u puolpoweitɔyenɔ Tuomɑ, wun nbɑ k b din yi’u Jɑɑk nɑ, ŋuɑ din kɑɑ yuo nbɑ k Yiesu bɑɑl b ni nɑ.

²⁵Ŋɑnn e, k u puolpoweitelieb nɑ yet’ɔ ɑ: «T lɑ Yonmdɑɑnɔ.» K Tuomɑ yet’b ɑ: «Min ŋɑnin, l i kii tie k n tɑn lɑ’u nɑn u niipɑnt ni fɔnɑ nɑ, k jii n niibil k tun siɑn nbɑ k b kpɑɑ kpɑi nɑ, k biɑ jii n nuu k tun u lokl nɑ ni i kɑɑ, n kɑn tien yɑdɑ.»

²⁶L dɑɑ ŋɑnniin puolpo e k Yiesu puolpoweitieb nɑ biɑ tɑn lɑkn lieb k be dieok ni, k Tuomɑ ji be b ni. B lek kpɑl gɑnn, ŋɑɑn k Yiesu tɑn bɑɑl sie b sinsuuk ni, k fuont’b ɑ: «Mɑnu i be i pɑɑk,»

²⁷ŋɑɑn yet Tuomɑ ɑ: «Jiin ɑ niibil k tun n niipɑnt ni, ŋɑɑn biɑ tɑnt ɑ nuu k tun n lokl ni, k ji dɑɑ bils, ŋɑɑn tien’n yɑdɑ.»

²⁸K Tuomɑ yet’ɔ ɑ: «Fin e tie n Yonmdɑɑnɔ k biɑ tie n Yennu.»

²⁹K Yiesu boi’ɔ ɑ: «Fɑɑ ji lɑ’n nɑ pɑɑk e k ɑ tien’n yɑdɑ ɑɑ? Bin nbɑ k lɑɑt’n ŋɑɑn tien’n yɑdɑ nɑ, pɑlpienn tie b yɑl e.»

³⁰K Yiesu din tun bɑktnɔunŋ tuonjɑɑnɑ bonciɑnn k pukn u puolpoweitieb penŋ, ŋɑɑn ŋɑnn k diɑn kɑdɑɑɔk nɑ ni.

³¹Ŋɑɑn bɑktnɔunŋ tuonjɑɑnɑ nbɑ diɑn k be nnɑ nɑ, b diɑn ɑ yin tien yɑdɑ nɑn Yiesu e tie *Klistu, Yennu Bijɑ nɑ, ɑ l i tie k i tien yɑdɑ yin lɑ mɑnfuol u sɑnn ni.