Read Moba Sɑn 3 Bible Online

Sɑn 3 - Moba bible

Sɑn 3

¹Jɑsuɑ nnɑ din be k u sɑnn yi Niikodenm. U din tie *Suifnbɑ yudɑɑnɔ e, k biɑ din tie Fɑɑliisiɑnnbɑ ni yenɔ,

²k nyɑsiɑɔk k u tɑn bɑɑl Yiesu buol ni, k yet’ɔ ɑ: «Wɑntuɑ, t mi nɑn Yennu tun’ɑ ɑ ɑ tɑn tumi’t e, k mɑɑn suɑ kɑn fit tun bɑktnɔunŋ tuonjɑɑnɑ nbɑ k ɑ tuun nɑ buolu, l i tie k Yennu k be nɑn’ɔ i kɑɑ.»

³K Yiesu yet’ɔ ɑ: «Bɑlmɔni e k n yien’ɑ nɑ, suɑ kɑn fit k kuɑ Yennu nɑɑn ni, l i kii tie k b ŋɑnm mɑl’ɔ i kɑɑ.»

⁴K Niikodenm boi’ɔ ɑ: «Nlee k b sɑɑ fit k ŋɑnm mɑl nilɔ nbɑ tie nikpel i? K mɑɑn u ji kɑn fit k ŋmɑt kuɑ u nɑɑ puol ni, k wun ŋɑnm mɑl’ɔ.»

⁵K Yiesu yet’ɔ ɑ: «Bɑlmɔni e k n yien’ɑ, suɑ kɑn fit kuɑ Yennu nɑɑn ni, sie k b mɑl’ɔ nyun nɑn Foŋɑnm ni.

⁶Nisɑɑlk mɑɑl nisɑɑlk, ŋɑɑn Foŋɑnm nɑ ŋɑnin mɑɑl Foŋɑnm yuɑ e.

⁷L pɑɑk, ɑ dɑɑ te k l tie’ɑ bɑktnɔunŋ nɑn mɑɑ yɑɑ ɑ: ‹Sie k b ŋɑnm mɑl i kul nɑ.›

⁸Wounŋ dɑ wɑɑ luon siɑn e. A gbiɑ k u dɑ e, ŋɑɑn ɑ k mi wɑɑ nyi siɑn, k biɑ k mi wɑɑ sɑɑ siɑn. L mun biɑ tie nnɑ e k tul suɑ kul nbɑ k Foŋɑnm mɑl’ɔ nɑ.»

⁹K Niikodenm boi’ɔ ɑ: «Nlee k l sɑɑ fit tien nnɑ?»

¹⁰K Yiesu jiin’ɔ ɑ: «A tie Islɑɑeltieb wɑntieb yudɑɑnɔ, ŋɑɑn tɑn k gbɑt lin nbɑ nɑ pɑɑk ii?

¹¹Bɑlmɔni e k n yɑɑ n yet’ɑ, t piɑk lin nbɑ k t mi l po nɑ, k t muɑnt lin nbɑ k t lɑ nɑ, ŋɑɑn k i k gɑɑn t mɑɑn.

¹²L i tie k i k tien’n yɑdɑ, nɑn mɑɑ yet’i tingbounŋ nɑ bonɑ po nɑ, nlee k i ji sɑɑ tien’n yɑdɑ, l i tie k n yet’i *Yendɔunŋ ni bonɑ po?

¹³Suɑ kɑɑ k duo Yendɔunŋ ni sie *Nisɑɑlk Bijɑ nbɑ nyii Yendɔunŋ ni nɑ.»

¹⁴Muois nbɑ din be muuk ni k fin kut wɑɑɔk k donn’ɔ dɑɑɔk pɑɑk nɑ, l mun biɑ tie nnɑ e k b tɑn sɑɑ jii Nisɑɑlk Bijɑ nɑ, k donn’ɔ sɑnpɑɑpo,

¹⁵k bin nbɑ kul tien’ɔ yɑdɑ nɑ, sɑɑ lɑ mɑnfuol nbɑ kɑɑ gbennu.

¹⁶K mɑɑn Yennu mɑntk din luon tingbounŋ nɑ niib bonciɑnn. L pɑɑk, k u tul’b u Bijɑyenml, k wun nbɑ tien u Bijɑ mɑnŋ yɑdɑ u tɑn kɑn kpo, ŋɑɑn u sii mɔk mɑnfuol nbɑ kɑɑ gbennu,

¹⁷k mɑɑn Yennu nbɑ din tun u Bijɑ tingbounŋ nɑ ni, u din k tun’ɔ ɑ wun tɑn bu tingbounŋ nɑ niib buut k biil’b kɑɑ, ŋɑɑn u din yɑɑ wun fiel’b u Bijɑ mɑnŋ ni e.

¹⁸K dɑɑnɔ nbɑ tie Yennu Bijɑ mɑnŋ yɑdɑ, Yennu kɑn bu u buut k biil’ɔ, ŋɑɑn wun nbɑ k tie’u yɑdɑ, Yennu ponŋ bu u yɑɑ buut k biil’ɔ wɑɑ, k mɑɑn u k tien ŋuɑ Yennu Bijɑyenml mɑnŋ yɑdɑ.

¹⁹Lin nbɑ pɑɑk te k Yennu bu b buut k biil’b mɑnŋ tie nnɑ e: yentu din bɑɑl tingbounŋ nɑ ni ŋɑɑn k niib luon bunbɔnn k gɑl yentu mɑnŋ, k mɑɑn bɑɑ tuun biit nɑ pɑɑk.

²⁰Dɑɑnɔ kul nbɑ tuun bonbiil, u nɑn yentu mɑnŋ e, k k luon wuu nɑki’ɔ, k mɑɑn u k luon u biit nɑ n tɑn nyi pɑɑnu.

²¹Ŋɑɑn wun nbɑ wɑɑ Yennu bɑlmɔni k biɑ tuun l biɑnŋ, ŋuɑ e bɑɑt yentu mɑnŋ buol, ɑ suɑ kul n bɑnn nɑn u tuonɑ kul, Yennu be l ni.

²²L puolpo e k Yiesu nɑn u *puolpoweitieb din nyii lenŋ k sɑɑn Suude siɑl po, k sɑɑ be lenŋ nɑn dɑɑ ŋɑnŋɑ nnɑ, k u din wuul niib Yennu nyunwulu.

²³L yuo nɑ k suɑ k Sɑn din wuul niib Yennu nyunwulu Ainɔn duo ni k l k fɔk nɑn Sɑɑliim[3] k mɑɑn nyun din yɑb lenŋ. Niib din bɑɑt u buol ni k u wuul’b Yennu nyunwulu.

²⁴(L yuo nɑ k suɑ b dɑɑ din k kuɑn Sɑn dɑnsɑlk ni.)

²⁵Ŋɑnn e k mɔniɑɔk tɑn fiil Sɑn mɑnŋ puolpoweitieb nɑn Suifsuɑ nnɑ sinsuuk ni k jikt sɑɑ Suifnbɑ nbɑ tuu nit b nii nɑn b jɑɑnti nbɑ tie biɑnŋ nbɑ nɑ po.

²⁶K b sɑɑn Sɑn buol ni k sɑɑ yet’ɔ: «Cɑnbɑɑ, wun nbɑ dɑɑn be nɑn’ɑ *Suulden kpenpuotl, k ɑ dɑɑ wɑnn’t u po nɑ, tɔn, u ji wuul niib Yennu nyunwulu k suɑ kul sɑɑ u buol ni.»

²⁷K Sɑn yet’b ɑ: «Nilɔ kɑn fit lɑ siɑl, l i kii tie k Yennu cɑb’ɔ.

²⁸I mɔnŋ gbɑt k n yet mɑɑ min kɑɑ tie *Klistu, ŋɑɑn Yennu tun’n u tuɑnn.

²⁹Puosɔlɔ e tie wun nbɑ yen puoyuokl nɑ. Wun nbɑ tie puosɔlɔ nɑ yuɑk tuu be u buol k gbiin u mɑɑn k mɔk pɑlpienn nɑn wun gbɑt puosɔlɔ nɑ kunkɔl. Pɑlpienn mɑnŋ tie n yɑl k yɑb bonciɑnn k siɑl ji k tenn.

³⁰L kpɑɑ tɑlɑs nɑn ŋuɑ Klistu ii yɑbtl, ŋɑɑn k min ii wɑɑbt.»

³¹Wun nbɑ nyii sɑnpɑɑpo, ŋuɑ e cie suɑ kul ɑ; wun nbɑ nyii tingbounŋ nɑ ni tie tingbounŋ nɑ nilɔ, k biɑ piɑk tingbounŋ bonɑ nɑ po. Wun nbɑ nyii Yendɔunŋ ni, ŋuɑ e cie suɑ kul.

³²U yien niib lin nbɑ k u lɑ k biɑ gbɑt, ŋɑɑn suɑ k gɑɑl u mɑɑn.

³³Wun nbɑ gɑɑl u mɑɑn mɑnŋ, l wɑnt nɑn ŋuɑ e sɑɑk nɑn Yennu mɑɑn mɑnŋ tie bɑlmɔni.

³⁴Wun nbɑ k Yennu tun’ɔ nɑ, u piɑk Yennu mɑɑn e, k mɑɑn Yennu tul’ɔ Foŋɑnm nbɑ yɑb k kɑɑ biknu.

³⁵Bɑɑ luon u Bijɑ, k kubn bonɑ kul u nuu ni.

³⁶Dɑɑnɔ nbɑ tien Bijɑ mɑnŋ yɑdɑ mɔk mɑnfuol nbɑ kɑɑ gbennu, ŋɑɑn dɑɑnɔ nbɑ yet Bijɑ mɑnŋ, Yennu wutuol be u pɑɑk k u kɑn lɑ mɑnfuol mɑnŋ.