Read Moba Sɑn 6 Bible Online

Sɑn 6 - Moba bible

Sɑn 6

¹L puolpo k Yiesu ŋmɑt puot Gɑɑliile mɔkgbenŋl nbɑ k b biɑ yi’l Tiibeliɑt mɔkgbenŋl nɑ puotl.

²K nibulciɑɔnŋ din wɑɑ u puolpo, k mɑɑn b din lɑ u bɑktnɔunŋ tuonjɑɑnɑ nbɑ k u din tuun k te k bɑɑtb pɑɑk nɑ.

³K Yiesu din duo juɑl pɑɑk k sɑɑ kɑl nɑn u *puolpoweitieb.

⁴L yuo k suɑ k Juifnbɑ *yuktgɑltiɑlu jɑɑnm pel nɑ.

⁵Yiesu nbɑ din kɑl mɑnŋ nɑ, k u tɑn got lɑ k nibulciɑɔnŋ bɑɑt u penŋ. K u tɑn boi Fiiliip ɑ: «T sɑɑ lɑ jiet lee k dɑɑ, k dinn niib nɑ kul i?»

⁶U din boi nnɑ mɑnŋ k luon wun bikn Fiiliip e, ŋɑɑn ŋuɑ ŋɑnin ponŋ din mi wɑɑ sɑɑ tun lin nbɑ e wɑɑ.

⁷K Fiiliip jiin ɑ: «T i yɑɑ t dɑɑ pɑɑnu k tul niib nɑ, l sɑɑ fit di nɑn denienbɑ kobi ŋɑnle (200) nɑ wɑɑ, k suɑ kul n fit lɑ wɑɑn.»

⁸K u puolpoweitelieb ni yenɔ nbɑ k b yi u sɑnn Andle, wun nbɑ din tie Siimɔn Piɑl ninjɑ nɑ, yet Yiesu ɑ:

⁹«Bisiɑk e be nnɑ k mɔk pɑɑni ŋɑnŋmu nɑn jɑni ŋɑnle. Ŋɑɑn l sɑɑ tien nlee k jɑnŋ nɑn nibul nɑ kul i?»

¹⁰K Yiesu yet’b ɑ: «Ŋɑɑnt mɑn k niib mɑnŋ n kɑl.» Pɑɑnu din be k mɔk mɔpɑɑɔnŋ lenŋ, k jɑb nɑ din kɑl, k b din tie nɑn tusɑ ŋɑnŋmu nɑ.

¹¹K Yiesu jii pɑɑnu nɑ, k tul Yennu niipuouk, ŋɑɑn te k b tol niib nbɑ kɑl mɑnŋ, k u biɑ jii jɑni nɑ k tien nnɑ, k b kul ɑ din dii k sɑɑ jɑnŋ bɑɑ luon biɑnŋ nbɑ.

¹²Bɑɑ gbuo yuo nbɑ, k u yet u puolpoweitieb ɑ bin lɑkn jiet nbɑ tenn nɑ, ɑ k l dɑɑ biil.

¹³K b lɑkn pɑɑni ŋɑnŋmu bulɑ nbɑ k nibul nɑ dii ŋɑɑn tenn nɑ, k gbien kpɑncubt piik nɑn ŋɑnle.

¹⁴Niib mɑnŋ nbɑ lɑ bɑktnɔunŋ tuonjɑɑnn nbɑ k Yiesu tun nɑ, k b yet ɑ: «Bɑlmɔni e setk, nilɔ nɑ e tie *Yennu sɔkni nbɑ din tɑn sɑɑ bɑɑl tingbounŋ nɑ ni nɑ.»

¹⁵K Yiesu ji bɑnn nɑn b yɑɑ bin suol’ɔ k din’ɔ nɑɑn e. L pɑɑk e te k u nyik’b ŋɑɑn ŋmɑt juɑl pɑɑk u kuukuɑ, k sɑɑ be.

¹⁶Dɑɑjuouk nbɑ tɑn bɑɑl, k Yiesu puolpoweitieb sik sɑɑn mɔkgbenŋl ni,

¹⁷k sɑɑn kuɑ bulgbetl k kɑn sɑɑ, k sɑɑ puotl mɔkgbenŋl nɑ, k tuok Kɑpelnɑunm. L yuo nɑ din tie nyiɑɔk o, k Yiesu dɑɑ k bɑɑl b buol.

¹⁸K wonpɑɑluk tɑn fikt k dɑ nyun nɑ pɑɑk.

¹⁹Yuo nbɑ k u puolpoweitieb kɑn sɑɑn nɑn kiiluomiɑtɑ ŋɑnŋmu ɑmi ŋɑnluob nɑ, k b lɑ Yiesu sonm nyun pɑɑk k tuokt bulgbetl mɑnŋ, k jɑŋmɑɑni ji suol’b.

²⁰K Yiesu yet’b: «I dɑɑ tiin jɑŋmɑɑni mɑn. Min e.»

²¹Ŋɑnn e, k b luon bin jii’u k kuɑn’ɔ bulgbetl nɑ ni, ŋɑɑn k l tɑɑkpɑɑk ni k bulgbetl sie bɑɑ sɑɑ siɑn nbɑ nɑ gbingbɑnn.

²²Lɑɑ yent yuo nbɑ nɑ, niib nbɑ din biɑl mɔk-puotl po nɑ, lɑ nɑn bulgbetyenn kuɑ won be. B mi nɑn Yiesu won k kuɑ bulgbetl nɑn u puolpoweitieb ŋɑɑn k ŋɑnm e won fiil k sɑɑn b kuukuɑ.

²³Bulgbetliɑ biɑ nyii Tiibeliɑt k bɑɑt k pel siɑn nbɑ niib won dii jiet nbɑ k Yonmdɑɑnɔ won tul Yennu niipuouk l pɑɑk nɑ.

²⁴Nibulciɑɔnŋ nɑ nbɑ lɑ nɑn Yiesu kɑɑ lenŋ nɑ, k u puolpoweitieb biɑ kɑɑ nɑ, k b sɑɑn kuɑ bulgbetɑ nɑ ni, k sɑɑn Kɑpelnɑunm, ɑ bin sɑɑ lon’mɔ.

²⁵Niib nɑ nbɑ din puot mɔkgbenŋl mɑnŋ nɑ, k b lɑ Yiesu, k boi’ɔ ɑ: «Cɑnbɑɑ, ɑ bɑɑl nnɑ nlee yuo e?»

²⁶K Yiesu yet’b: «Bɑlmɔni e k n yien’i nɑ, mɑɑ won tul’i jiet k i dii k gbuo nɑ e, ŋɑnn e te k i luon’n mɑnŋ, ŋɑɑn l k tie yɑɑ lɑ n bɑktnɔunŋ tuonjɑɑnɑ nɑ kɑɑ.

²⁷I dɑɑ tuun tuonn jiet nbɑ sɑɑ fit biil pɑɑk, ŋɑɑn ii tuun tuonn jiet nbɑ tien niib mɑnfuol nbɑ kɑɑ gbennu pɑɑk. *Nisɑɑlk Bijɑ sɑɑ tul’i l jebuolu, k mɑɑn u Bɑɑ Yennu dɔk’ɔ u dɔuk k l wɑnn nɑn Bijɑ mɑnŋ mɔk u Bɑɑ yiikuo.»

²⁸Ŋɑnn e k b boi’ɔ ɑ: «T sɑɑ tien nlee k fit tun tuonɑ nbɑ k Yennu luon nɑ?»

²⁹K Yiesu jiin’m ɑ: «Tuonn nɑ e k Yennu luon k yii tuun, ɑ yin tien wun nbɑ k u tun’ɔ nɑ yɑdɑ.»

³⁰K b biɑ boi’ɔ ɑ: «Bɑktnɔunŋ tuonjɑɑnlɑnn po e k ɑ sɑɑ tun k wɑnn’t, k tin lɑ k tien’ɑ yɑdɑ? Tuonlɑnn po e k ɑ sɑɑ tun i?

³¹T yejɑnm nbɑ din be muuk ni yuo nbɑ nɑ, b din tuu di jiet nbɑ k b yi’l mɑnn nɑ, nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ, ɑ: ‹U din tien’m pɑɑnu nbɑ nyi *Yendɔunŋ ni nɑ ɑ bii di.› »

³²K Yiesu yet’b ɑ: «Bɑlmɔni e k n yien’i nɑ, l k tie Muois kɑɑ tul’i pɑɑnu mɑnŋ, ŋɑɑn n Bɑɑ e tie wun nbɑ tul’i mɔmɔnm pɑɑnu nbɑ nyi Yendɔunŋ ni nɑ.

³³Pɑɑnu nbɑ k Yennu jii tien’i mɑnŋ, ŋɑnn e tie wun nbɑ nyii Yendɔunŋ ni k tien tingbounŋ nɑ ŋɑɑtieb mɑnfuol.»

³⁴K b yet’ɔ ɑ: «Cɑnbɑɑ, ii tien’t pɑɑnu nɑ dɑɑl kul.»

³⁵K u yet’b ɑ: «Min e tie mɑnfuol pɑɑnu mɑnŋ. Dɑɑnɔ nbɑ bɑɑl n buol ni, kon kɑn mi k suol l dɑɑnɔ, k wun nbɑ mun tien’n yɑdɑ, nyun-nyuklu kɑn mi k suol’ɔ.

³⁶«Ŋɑɑn n ponŋ yet’i nɑn i lɑ’n ɑ, ŋɑɑn k k tien’n yɑdɑ.

³⁷Wun nbɑ kul k n Bɑɑ mɑnŋ jii’u k tul’n nɑ, sɑɑ bɑɑl n buol ni, k n kɑn mi bel wun nbɑ bɑɑl n buol ni,

³⁸k mɑɑn n nyii Yendɔunŋ ni k sik nɑ mɑɑ n tun wun nbɑ tun’n nɑ yɑnbuɑtuonn e, ŋɑɑn l k tie n mɔnŋ mɔnŋ yɑnbuɑt kɑɑ.

³⁹Wun nbɑ tun’n nɑ lonm tie nnɑ e, ɑ n dɑɑ buont bin nbɑ k u tul’n nɑ nɑn yenɔ kuukuɑ wɑɑ, ŋɑɑn tɑn fiin’m kuun ni tingbounŋ cincɑɑtdɑɑl.

⁴⁰Nnɑ e k n Bɑɑ Yennu luon, ɑ wun nbɑ lɑ u Bijɑ k tien’ɔ yɑdɑ, u sɑɑ lɑ mɑnfuol nbɑ kɑɑ gbennu, k n tɑn sɑɑ fiin’m kuun ni tingbounŋ cincɑɑtdɑɑl.»

⁴¹Ŋɑnn e k *Suifnbɑ mɑnŋ ji buln buln nɑn lieb, ɑ k mɑɑn wɑɑ yɑɑ ɑ ŋuɑ e tie pɑɑnu nbɑ nyii Yendɔunŋ ni nɑ pɑɑk.

⁴²K b boi lieb ɑ: «U k tie Yiesu wun nbɑ tie Suosiɑf bijɑ nɑ kɑɑ nɑ ɑɑ? T mi u bɑɑ nɑn u nɑɑ. Nlee k u yɑɑ ɑ u nyii Yendɔunŋ ni?»

⁴³K Yiesu jiin k yet’b ɑ: «I dɑɑ buln nɑn lieb mɑn.

⁴⁴Suɑ kɑn fit k bɑɑl n buol ni k tien n yuɑ, k l k tie k Bɑɑ mɑnŋ nbɑ tun’n nɑ kɑɑ te k u bɑɑl, k n tɑn sɑɑ fiin l dɑɑnɔ kuun ni tingbounŋ cincɑɑtdɑɑl.

⁴⁵*Yennu sɔkniinbɑ din diɑn ɑ: ‹Yennu sɑɑ tumi suɑ kul.› Bin nbɑ kul gbiintl Bɑɑ mɑnŋ k biɑ gbiɑ, ŋɑnm e sɑɑ bɑɑl n penŋ.

⁴⁶L k tie suɑ mi lɑ Bɑɑ mɑnŋ sie wun nbɑ nyii u buol ni, ŋuɑ kuukuɑ e lɑ’u.

⁴⁷«Bɑlmɔni e k n yien’i nɑ, dɑɑnɔ nbɑ tien’n yɑdɑ, ŋuɑ e mɔk mɑnfuol nbɑ kɑɑ gbennu.

⁴⁸Min e tie mɑnfuol pɑɑnu nɑ.

⁴⁹Yuo nbɑ k i yejɑnm din tuu be muuk ni nɑ, b din tuu di mɑnn mɑnŋ, ŋɑɑn b kpo wɑɑ.

⁵⁰Ŋɑɑn pɑɑnu nbɑ nyi Yendɔunŋ ni nɑ be nnɑ, k wun nbɑ dii’l, u kɑn kpo.

⁵¹Min e tie mɑnfuol pɑɑnu mɑnŋ nbɑ nyii Yendɔunŋ ni nɑ k sik. L i tie k suɑ dii pɑɑnu mɑnŋ, u sii be nɑn yuo nbɑ kɑɑ gbennu. Pɑɑnu nbɑ k n sɑɑ tul tie n gbɑnɑnt e, k n tɑn sɑɑ tul’l ɑ tingbounŋ ŋɑɑtieb n lɑ mɑnfuol.»

⁵²Ŋɑnn e k mɔniɑɔk fiil Suifnbɑ mɑnŋ sinsuuk ni, k b boi b lieb: «Nlee k juɑ nɑ sɑɑ tul’t u gbɑnɑnt k tin di i?»

⁵³K Yiesu yet’b ɑ: «Bɑlmɔni e k n yien’i nɑ, sie k i ŋmɑn Nisɑɑlk Bijɑ gbɑnɑnt, k biɑ nyuu u sɔn. Nnɑ e kɑɑ, i kii mɔk mɑnfuol mɑnŋ i ni.

⁵⁴K dɑɑnɔ nbɑ ŋmɑn n gbɑnɑnt k biɑ nyuu n sɔn, u mɔk mɑnfuol nbɑ kɑɑ gbennu, k n tɑn sɑɑ fiin’ɔ kuun ni tingbounŋ cincɑɑtdɑɑl.

⁵⁵K mɑɑn n gbɑnɑnt tie jiet nɑn bɑlmɔni, k n sɔn mun tie dɑɑn nɑn bɑlmɔni.

⁵⁶Dɑɑnɔ nbɑ ŋmɑn n gbɑnɑnt, k biɑ nyuu n sɔn, ŋuɑ e be n ni, k n mun be u ni.

⁵⁷«Bɑɑ mɑnŋ nbɑ yen mɑnfuol nɑ tun’n, k l pɑɑk k n mun mɔk mɑnfuol, nnɑ e mun, wun nbɑ ŋmɑn n gbɑnɑnt nɑ, n pɑɑk k u sii mɔk mɑnfuol mɑnŋ.

⁵⁸Nɑ e tie pɑɑnu nbɑ nyii Yendɔunŋ ni k sik. L k nɑɑn nɑn lin nbɑ k i yejɑnm din di muuk ni k biɑ kpo nɑ kɑɑ, ŋɑɑn wun nbɑ di pɑɑnu mɑnŋ sii be nɑn yuo nbɑ kɑɑ gbennu.»

⁵⁹Yiesu e din pɑk lin nbɑ nɑ, wɑɑ dɑɑ din be Kɑpelnɑunm, Suifnbɑ jɑɑnti dieok ni, k tumi niib nɑ.

⁶⁰Yiesu puolpoweitieb bonciɑnn nbɑ din gbɑt u wɑnnu mɑnŋ, k b yien b lieb ɑ: «Wɑnnu nɑ pɑɑl bonciɑnn. Ŋmee sɑɑ fit gɑɑl’l i?»

⁶¹Yiesu din bɑnn nɑn u puolpoweitieb nɑ mɔk bunbulmi u wɑnnu mɑnŋ pɑɑk. L pɑɑk, k u boi’b ɑ: «Mɑɑn mɑnŋ kpɑɑ i kpiɑni ee?

⁶²L i tie k i lɑ Nisɑɑlk Bijɑ do Yendɔunŋ ni siɑn nbɑ k u din tuu be nɑ, i ji sii duki nlee?

⁶³Foŋɑnm e tien niib mɑnfuol. Gbɑnɑnt nɑ tie yɑnn e. Mɑɑn nbɑ k n pɑk’i nɑ e tie Foŋɑnm nɑn mɑnfuol.

⁶⁴Ŋɑɑn i siɑb lek k tien’n yɑdɑ.» Yiesu din pɑk’b lin nbɑ nɑ, k mɑɑn u ponŋ mi sinsinn bin nbɑ tɑn kɑn tien’ɔ yɑdɑ, nɑn wun nbɑ mun tɑn sɑɑ kuɑt’ɔ.

⁶⁵K u biɑ ŋɑnm yet ɑ: «L pɑɑk e te k n yien’i ɑ suɑ kɑn fit bɑɑl n buol ni, sie k Bɑɑ mɑnŋ e cɑb’ɔ.»

⁶⁶L yuo nɑ k ji sɑɑ, k u puolpoweitieb bonciɑnn ji din ŋmɑt puol, k ji k tɔki nɑn’ɔ.

⁶⁷Ŋɑnn e k u din boi u tuomiinbɑ *piik nɑn bɑnle nbɑ nɑ ɑ: «K i mun sɑɑ nyik’n ɑɑ?»

⁶⁸K Siimɔn Piɑl jiin yet’ɔ ɑ: «Yonmdɑɑnɔ, k t mun ji sɑɑ nyik’ɑ ŋɑɑn sɑɑn ŋmee buol i? Fin e mɔk mɑɑn nbɑ tien niib mɑnfuol nbɑ kɑɑ gbennu.

⁶⁹T tien’ɑ yɑdɑ wɑɑ k mi nɑn fin e tie Yennu niŋɑnɔ.»

⁷⁰K Yiesu yet’b ɑ: «Yinm jɑb piik nɑn bɑnle nɑ, min kɑɑ lukt’i ni ii? Ŋɑɑn k i ni yenɔ tie *Sɑɑtɑn yuɑ.»

⁷¹(U din yien Suudɑ wun nbɑ tie Siimɔn Iskɑɑliɑɔt bijɑ nɑ po e. Ŋuɑ e din tie u tuomiinbɑ piik nɑn bɑnle nɑ ni yenɔ, ŋɑɑn lek yɑɑ wun kuɑt’ɔ.)