Read Moba Sɑn 7 Bible Online

Sɑn 7 - Moba bible

Sɑn 7

¹L kul nɑ puolpo e k Yiesu ji din be Gɑɑliile tinŋ ni, ŋɑɑn lin lenŋ digbɑnɑ ni. U din k luon wuu lin Suude tinŋ ni, k mɑɑn *Suifnbɑ yudɑnm din luon bin kpi’u.

²Suifnbɑ jɑɑnm nbɑ k b yi’l lɑnbont jɑɑnm[5] nɑ tɑn pel.

³K Yiesu ninjɑnm yet’ɔ ɑ: «Nyikn nnɑ, ŋɑɑn sɑɑn Suude tinŋ ni, k ɑ *puolpoweitieb n lɑ tuonɑ nbɑ k ɑ tuun nɑ.

⁴L i tie k suɑ luon wun wɑnn niib wɑɑ tie wun nbɑ, l k ŋɑn k wun bɔl tuonɑ nbɑ k u tuun. K mɑɑn fɑɑ tuun tuonɑ mɑnŋ nɑ, l ŋɑn fɑn wɑnn niib tuonɑ mɑnŋ pɑɑnu ni.»

⁵(U ninjɑnm nɑ lek din k tien’ɔ yɑdɑ.)

⁶K Yiesu jiin’m ɑ: «N yuo dɑɑ k bɑɑl, ŋɑɑn yinm ŋɑnin sɑɑ fit sɑɑn yuo nbɑ kul k i luon.

⁷Tingbounŋ nɑ ŋɑɑtieb kɑn fit nɑn’i, ŋɑɑn min ŋɑnin b nɑn’n, k mɑɑn n yien’m nɑn b tuonɑ bi.

⁸Tɔn, yinm i sɑɑ jɑɑnm mɑnŋ, ŋɑɑn min ŋɑnin dɑɑ k sɑɑ, k mɑɑn n sinsɑɑn-yuo dɑɑ k bɑɑl.»

⁹Wɑɑ wɑnn’b nnɑ k gbenn yuo nbɑ, k u biɑl Gɑɑliile.

¹⁰Yiesu ninjɑnm nɑ nbɑ din sɑɑn jɑɑnm nɑ, k l puolpo k Yiesu mun tɑn wei k sɑɑn. U din k sɑɑn pieee pieee kɑɑ, ŋɑɑn u din bɔl e k sɑɑn.

¹¹K Suifnbɑ yudɑnm din lin k luon’ɔ jɑɑnm mɑnŋ ni, k boi niib ɑ: «U be lee?»

¹²K niib bonciɑnn nbɑ be lenŋ nɑ lɔkn k piɑk bonciɑnn k jikt sɑɑ u po, k siɑb yɑɑ ɑ: «U tie niŋɑnɔ e,» k lieb yɑɑ ɑ: «Aɑi, u kpɑnn niib nɑ e,»

¹³ŋɑɑn suɑ din k pɑk u po pɑɑnu ni, k mɑɑn b tiin Suifnbɑ yudɑnm jɑŋmɑɑni e.

¹⁴K jɑɑnm nɑ yuo sinsuuk ni, k Yiesu sɑɑn kuɑ Yennu jɑɑnti ŋɑsɑɑkɑk ni, k piin k tumi niib.

¹⁵K l tien Suifnbɑ bɑktnɔunŋ, k b boi ɑ: «Nlee k nilɔ nɑ mɑntk mɔk yɑn nnɑ, ŋɑɑn k k kuɑ t sɑkul i?»

¹⁶K Yiesu yet’b ɑ: «Mɑɑ wɑnt wɑnnu nbɑ nɑ, l k tie n mɔnŋ mɔnŋ wɑnnu kɑɑ, ŋɑɑn l nyii Yennu wun nbɑ tun’n nɑ buol e.

¹⁷Wun nbɑ luon wun tun Yennu yɑnbuɑtuonɑ, ŋuɑ e sɑɑ bɑnn nɑn lin nbɑ k n piɑk k wɑnt nɑ nyii Yennu buol ɑmi n buol e.

¹⁸Dɑɑnɔ nbɑ piɑk u mɔnŋ mɔnŋ wɑnnu, ŋuɑ luon *yudɑnt k tien u mɔnŋ e. Ŋɑɑn wun nbɑ luon ɑ wun nbɑ tun’ɔ nɑ n lɑ yudɑnt, ŋuɑ e tie dɑɑnɔ nbɑ piɑk mɔmɔnm k fɑɑk kɑɑ u ni.

¹⁹«Muois kɑɑ din tul’i t *senni ii? Ŋɑɑn i suɑ k diɑ l *senni mɑnŋ. K bee k i luon k i kpi’n i?»

²⁰K niib nbɑ nɑ yet’ɔ ɑ: «Nɑlnbiiuk be ɑ ni. Ŋmee yɑɑ wun kpi’ɑ ni?»

²¹K Yiesu jiin yet’b ɑ: «N tun bɑktnɔunŋ tuonjɑɑnyenn k l tien’i kul ɑ bɑktnɔunŋ.

²²K mɑɑn Muois nbɑ din tul’i *punpotu sennu nɑ pɑɑk (ŋɑɑn Muois kɑɑ din piin, i yejɑnm e din piin) k i sɑɑk k poli punɑ *Fuondɑɑl.

²³Tɔn, l i tie k i pot bonjɑbik Fuondɑɑl, ɑ i dɑɑ biil Muois *senni e, nlee k i donn wutuol n pɑɑk ɑ mɑɑ te k bɑɑtɔ pɑɑk Fuondɑɑl nɑ?

²⁴Dɑɑ goli nilɔ nɑn-yel po k bu u buut, ŋɑɑn i tuu bu nɑn senni nbɑ wɑnt biɑnŋ nbɑ nɑ.»

²⁵Ŋɑnn e k Selusɑɑlenm nisiɑb boi b lieb ɑ: «Juɑ nbɑ nɑ kɑɑ, k b yɑbi ɑ bin kpi’u nɑ ɑɑ?

²⁶Gotl mɑn, u piɑk pɑɑnu ni, k suɑ mun biɑ k piɑk siɑl. T yudɑnm nɔk sii bɑnn ɑ ŋuɑ e tie *Klistu nɑ ɑmi?

²⁷Ŋɑɑn t mi juɑ nɑ nbɑ nyii siɑn nbɑ. Klistu nɑ i tɑnŋ i bɑɑl, suɑ kɑn fit bɑnn wɑɑ nyii siɑn.»

²⁸Yiesu nbɑ tumi niib nɑ Yennu jɑɑnti ŋɑsɑɑkɑk ni nɑ, k u tɑn pɑk sɑnpɑɑpo k yet’b ɑ: «I mi min k biɑ mi mɑɑ nyii siɑn. N k bɑɑl n mɔnŋ bɑɑlu kɑɑ. Ŋɑɑn dɑɑnɔ nbɑ tun’n nɑ, ŋuɑ e mɔk bɑlmɔni kul, k i k mi’u,

²⁹ŋɑɑn min mi’u, k mɑɑn n tuu be u buol ni e, k ŋuɑ e tɑn tun’n nnɑ.»

³⁰Ŋɑnn e k b din yɑbi ɑ bin suol’ɔ, ŋɑɑn k suɑ k suol’ɔ, k mɑɑn u suolu yuo dɑɑ din k bɑɑl.

³¹Ŋɑɑn k nibul nɑ ni niib bonciɑnn din tien’ɔ yɑdɑ, k boi b lieb ɑ: «Klistu nɑ i tɑnŋ i bɑɑl, u sii tuun bɑktnɔunŋ tuonjɑɑnɑ bonciɑnn k gɑl juɑ nɑ yɑl ɑɑ?»

³²K Fɑɑliisiɑnnbɑ nbɑ din gbɑt niib nbɑ lɔkn lɔkn k piɑk nnɑ mɑnŋ Yiesu po nɑ, k ŋɑnm nɑn Yennu jɑɑnti yudɑnm din tun Yennu jɑɑnti ŋɑsɑɑkɑk sejenm ɑ bin sɑɑn k sɑɑ suol Yiesu.

³³K Yiesu din yet nibul nɑ ɑ: «N sii be nɑn’i yuo wɑɑnm-nnɑ e, k l puolpo k n ŋmɑt k sɑɑn wun nbɑ tun’n nɑ penŋ.

³⁴I tɑn sɑɑ lon n buol, ŋɑɑn i kɑn lɑ’n, k mɑɑn siɑn nbɑ k n tɑn sii be nɑ, i kɑn fit bɑɑl lenŋ.»

³⁵K Suifnbɑ nɑ boi b lieb ɑ: «U yɑɑ wun tɑn sɑɑn lee, k t kɑn lɑ’u? U yɑɑ wun tɑn sɑɑn Glek doi ni siɑn nbɑ k Suifnbɑ be nɑ, kii sɑɑ kii wɑnt Glek tieb nɑ ɑmi ii?

³⁶Wɑɑ yet ɑ t tɑn sɑɑ lon u buol ŋɑɑn kɑn lɑ’u, ɑ k biɑ tɑn kɑn fit sɑɑn siɑn nbɑ k u sii be nɑ, l pɑɑk tie bee?»

³⁷Tɔn, k jɑɑnm mɑnŋ gbennu dɑɑl din tie dɑjɑɑnn e. L dɑɑl mɑnŋ e k Yiesu fiil set k pɑk sɑnpɑɑpo wɑɑ ɑ: «Wun nbɑ k nyun-nyuklu gbɑt’ɔ, wun bɑɑl n buol ni k tɑn nyu,

³⁸k mɑɑn l diɑn Yennu lolkpel kɑdɑɑɔk ni ɑ: ‹Wun nbɑ tien’n yɑdɑ nɑ, mɑnfuol nyun sii tɔ nyunkpɑnɑ e k nyi u pɑl ni.› »

³⁹Yiesu nbɑ din piɑk nɑ, l din wɑnt Foŋɑnm po e, k bin nbɑ din tien Yiesu yɑdɑ nɑ din tɑn sɑɑ lɑ Foŋɑnm mɑnŋ. L yuo nɑ dinn, Yennu dɑɑ din k tul niib Foŋɑnm mɑnŋ, k mɑɑn u dɑɑ din k donn Yiesu k tul’ɔ u yentsɑɑkɑl.

⁴⁰Niib bonciɑnn nbɑ din be nigbounŋ nɑ ni k gbɑt k u yet nnɑ mɑnŋ, k b yet ɑ: «Juɑ nɑ set tie *Yennu sɔkni nɑn bɑlmɔni e,»

⁴¹k siɑb yɑɑ ɑ: «U tie Klistu e,» k lieb mun boi ɑ: «Nlee k Klistu sɑɑ nyi Gɑɑliile?

⁴²Yennu lolkpel kɑdɑɑɔk k wɑnn ɑ Klistu nɑ tɑn sii tie * Dɑɑfiid yɑɑbuonn ee? K b biɑ tɑn sɑɑ mɑl’ɔ Betlehenm duo nbɑ din tie ŋuɑ Dɑɑfiid duo nɑ ni ee?»

⁴³K niib nɑ ji suol bɔkt k mɑɑn Yiesu pɑɑk.

⁴⁴K siɑb biɑ luon bin suol’ɔ, ŋɑɑn b ni suɑ k suol’ɔ.

⁴⁵L puolpo e k sejenm nɑ ji ŋmɑt Yennu jɑɑnti yudɑnm nɑn Fɑɑliisiɑnnbɑ nɑ buol ni, k b boi’b ɑ: «Bee tien k i k jen nɑn’ɔ?»

⁴⁶K sejenm nɑ jiin yet’b ɑ: «Suɑ dɑɑ k mi k pɑk mɑɑn nɑn juɑ nɑ mɑbuolu nbɑ k u piɑk nɑ.»

⁴⁷K Fɑɑliisiɑnnbɑ nɑ boi’b ɑ: «K i mun biɑ nyik k u kpɑnn’i ni ii?

⁴⁸I tɑn mi lɑ k t yudɑnm nɑn Fɑɑliisiɑnnbɑ suɑ tien’ɔ yɑdɑ ɑɑ?

⁴⁹Ŋɑɑn nigbounŋ nɑ nbɑ k mi Yennu senni nɑ, mɔpol be b pɑɑk.»

⁵⁰K yudɑnm mɑnŋ ni yenɔ e din tie Niikodenm, wun din sɑɑn ɑ wun sɑɑ lɑ Yiesu nɑ, k u yet’b ɑ:

⁵¹«T senni k cɑb’t ɑ tin bu nilɔ buut k biil’ɔ, ŋɑɑn dɑɑ k gbɑt u mɔb ni k bɑnn u biit.»

⁵²K b boi’ɔ: «A mun tie Gɑɑliile nilɔ ee? Gotl Yennu lolkpel kɑdɑɑɔk ni. A sɑɑ lɑ nɑn Yennu sɔkni k mi nyii Gɑɑliile tinŋ ni.»

⁵³L puolpo e k suɑ kul kun.