Read Moba Sɑn 8 Bible Online

Sɑn 8 - Moba bible

Sɑn 8

¹Ŋɑɑn k Yiesu din duo *Oliifienbɑ jɑgbɑɑk pɑɑk.

²K l yent sɑn-nyɑpob ni, k u ŋmɑt kuɑ Yennu jɑɑnti ŋɑsɑɑkɑk ni, k niib bonciɑnn tikl bɑɑl kuɑ lint’ɔ, k u kɑl k tumi’b.

³Ŋɑnn e k *senniwɑntieb nɑn Fɑɑliisiɑnnbɑ bɑɑl nɑn puo nbɑ tun * boncuncontuonn, k te k u set Yiesu tuɑnn po,

⁴ŋɑɑn yet Yiesu ɑ: «Wɑntuɑ, t lɑ puo nɑ, k u tuun boncuncontuonn e, k t suol’ɔ l yuo nɑ.

⁵T *senni ni, Muois din senn ɑ l puobuolu ŋɑn k bin jɑɑt’ɔ tɑnɑ e k kpi’u. Fin ŋɑnin sɑɑ yet ɑ bee?»

⁶B din yet nnɑ, k luon bin kpɑl Yiesu e, k ji fit tɑɑl’ɔ. K Yiesu tibn ŋɑɑn jii u niibil k diɑn tinŋ ni.

⁷Bɑɑ biɑ lek sie k boi’ɔ buboit yuo nbɑ nɑ, k u tibt k yet’b ɑ: «Wun nbɑ k mi k tun biit, l dɑɑnɔ n sint jɑɑ’u tɑnsinsinn,»

⁸ŋɑɑn ŋɑnm tibn k diɑn tinŋ ni.

⁹Bɑɑ gbɑt k u yet nnɑ mɑnŋ, k b piin yɑt yenɔ yenɔ, k nikpelɑ nɑ dɔnŋ yɑt, ŋɑɑn k Yiesu biɑl, ŋuɑ nɑn puo nɑ, k u biɑ dɑɑ sie u tuɑnn po.

¹⁰K u tibt boi’ɔ: «Puo, b sɑɑn lee? Suɑ k biɑl ɑ wun bu ɑ buut biil’ɑ ni ii?»

¹¹K u jiin ɑ: «Cɑnbɑɑ, suɑ k biɑl.» K Yiesu yet’ɔ ɑ: «N mun kɑn bu ɑ buut k biil’ɑ. Ii kun. A ji dɑɑ mi k tuun biit.»

¹²Yiesu biɑ ŋɑnm piɑk nɑn niib Yennu jɑɑnti ŋɑsɑɑkɑk ni, ɑ: «Min e tie tingbounŋ nɑ yentu, k dɑɑnɔ nbɑ wɑɑ’n, ŋuɑ ji kɑn mi sonm bunbɔnn ni ŋɑɑn u sii mɔk yentu nbɑ tien niib mɑnfuol.»

¹³K Fɑɑliisiɑnnbɑ nɑ biɑ yet’ɔ ɑ: «Fɑɑ piɑk k wɑnt ɑ mɔnŋ po nɑ, l tie yɑnn e.»

¹⁴K Yiesu jiin yet’b: «Mi i lek i piɑk k wɑnt n mɔnŋ po i e, ŋɑɑn mɑɑ yet lin nbɑ, l tie mɔni e, k mɑɑn min mi mɑɑ nyii siɑn nbɑ, k biɑ mi mɑɑ sɑɑ siɑn nbɑ. Yinm ŋɑnin k mi mɑɑ nyii siɑn. I biɑ k mi mɑɑ sɑɑ siɑn.

¹⁵Yinm goli nilɔ nɑn-yel po e k bu u buut, ŋɑɑn min ŋɑnin k bu suɑ buut.

¹⁶Mi i ponŋ i yɑɑ n bu nilɔ buut i e, n sɑɑ bu u buut nɑn bɑlmɔni e, k mɑɑn n k bu buut n kuukuɑ kɑɑ, ŋɑɑn n Bɑɑ nbɑ tun’n nɑ e be nɑn’n.

¹⁷Tɔn, l ponŋ diɑn i senni ni ɑ niib bɑnle *siɑlɑ i jɑnŋ nɑn liel, ŋɑnn i tie bɑlmɔni.

¹⁸N piɑk wɑnt n mɔnŋ po, k n Bɑɑ wun nbɑ tun’n nɑ mun biɑ piɑk wɑnt n po nnɑ e.»

¹⁹K b boi’ɔ ɑ: «A Bɑɑ mɑnŋ be lee?» K Yiesu pɑk jiin’m ɑ: «I k mi’n, k tɑn boi n Bɑɑ. I i bo i mi’n i e, i mun biɑ bo sii mi n Bɑɑ mɑnŋ.»

²⁰Yiesu din pɑk mɑɑn nɑ yuo nbɑ k u din tumi niib, k b din be Yennu jɑɑnti ŋɑsɑɑkɑk ni siɑn nbɑ k b sent Yennu piini likli lɑkl nɑ, ŋɑɑn suɑ k suol’ɔ, k mɑɑn u suolu yuo dɑɑ k bɑɑl.

²¹K Yiesu biɑ ŋɑnm pɑk yet’b ɑ: «N sɑɑ yɑɑt ɑ, k i tɑn sɑɑ lon’n, ŋɑɑn i tɑn sɑɑ kpo i biit ni. I biɑ tɑn kɑn fit sɑɑn mɑɑ sɑɑ siɑn.»

²²Ŋɑnn e k *Suifnbɑ nɑ yet ɑ: «U yɑɑ wun kpi u mɔnŋ ee? Ŋɑnn e te k u yɑɑ ɑ t kɑn fit sɑɑn wɑɑ sɑɑ siɑn ii?»

²³K Yiesu jiin ɑ: «Yinm tie tinŋ nnɑ yɑb e, ŋɑɑn min tie sɑnpɑɑpo yuɑ e. Yinm nyii tingbounŋ nɑ ni e, ŋɑɑn min k nyii tingbounŋ nɑ ni kɑɑ.

²⁴L pɑɑk e te k n yet’i mɑɑ i sɑɑ kpo i biit ni. L i tie k i k tien yɑdɑ nɑn n tie mɑɑ tie wun nbɑ nɑ, i set sɑɑ kpo i biit ni.»

²⁵K b boi’ɔ ɑ: «Fin ŋmee?» K u jiin’m ɑ: «Pinpiik ni n din yet’i mɑɑ tie wun nbɑ wɑɑ.

²⁶N bo sii fit piɑk mɑɑn bonciɑnn k biil’i, ŋɑɑn wun nbɑ tun’n nɑ e tie bɑlmɔni dɑɑnɔ, k n piɑk yien tingbounŋ nɑ niib lin nbɑ k n gbiɑ u buol nɑ.»

²⁷Niib nɑ din k mi nɑn u piɑk u Bɑɑ po e.

²⁸L pɑɑk k Yiesu yet’b ɑ: «Yuo nbɑ k i sɑɑ jii *Nisɑɑlk Bijɑ k donn’ɔ sɑnpɑɑpo nɑ, l yuo e k i tɑn sɑɑ bɑnn nɑn n tie mɑɑ tie wun nbɑ, k i biɑ sɑɑ bɑnn nɑn n k tuun siɑl nɑn n mɔnŋ mɔnŋ yiikuo, ŋɑɑn n biɑ yien lin nbɑ k n Bɑɑ wɑnn’n ɑ n tɑn yet e.

²⁹K wun nbɑ tun’n nɑ e be nɑn’n. U k nyikt n kuukuɑ, k mɑɑn yuo kul n tuun lin nbɑ gbuot u nunm e.»

³⁰Niib bonciɑnn nbɑ din gbɑt Yiesu nbɑ pɑk nnɑ mɑnŋ, k b tien’ɔ yɑdɑ.

³¹Ŋɑnn e k Yiesu yet Suifnbɑ nbɑ tien’ɔ yɑdɑ nɑ: «L i tie k i sɑɑk n mɑɑn, i set tie n *puolpoweitieb nɑn bɑlmɔni e,

³²k i biɑ sɑɑ bɑnn bɑlmɔni, k bɑlmɔni mɑnŋ sɑɑ nyinn’i dɑɑbs ni.»

³³K b yet’ɔ ɑ: «T tie Ablɑɑhɑɑnm yɑɑbuonɑ e, k t k mi k tien suɑ dɑɑbɑ. Nlee k ɑ yɑɑ ɑ t tɑn sɑɑ nyi dɑɑbs ni?»

³⁴K Yiesu jiin k yet’b ɑ: «Bɑlmɔni e k n yien’i nɑ, suɑ kul nbɑ tuun biit, u tie biit dɑɑbl e.

³⁵Dɑɑbl k tie ŋɑɑk yuɑ kɑɑ, ŋɑɑn ŋɑɑk bik ŋɑnin tie ŋɑɑk yuɑ e yuo kul.

³⁶L i tie Bijɑ nɑ nyint’i dɑɑbs ni e, i set sɑɑ nyi dɑɑbs ni nɑn bɑlmɔni wɑɑ.

³⁷N mi nɑn i tie Ablɑɑhɑɑnm yɑɑbuonɑ e, ŋɑɑn k i lek yɑbi ɑ i kpi’n, k mɑɑn n mɑɑn mɑnŋ k kuɑ i tubɑ ni.

³⁸Mɑɑ tuu be n Bɑɑ penŋ k lɑɑt lin nbɑ, ŋɑnn e k n piɑk, ŋɑɑn yinm tuun lin nbɑ k i bɑɑ yet’i ɑ yii tuun nɑ e.»

³⁹K b jiin’ɔ yɑɑ ɑ: «T bɑɑ tie Ablɑɑhɑɑnm e.» K Yiesu yet’b ɑ: «L i tie k i bo tie Ablɑɑhɑɑnm wɑɑs nɑn mɔni e, i bo sii tuun Ablɑɑhɑɑnm tuonbuolu nɑ e,

⁴⁰ŋɑɑn k mɔtɑɑnɑ k i yɑbi ɑ i kpi’n, nɑn mɑɑ tie nilɔ nbɑ yien’i bɑlmɔni nbɑ k n gbɑt Yennu penŋ nɑ. Ablɑɑhɑɑnm din k tien nnɑ.

⁴¹Ŋɑɑn yinm tuun i bɑɑ nbɑ tuun biɑnŋ nbɑ e.» K b jiin yet’ɔ ɑ: «Tinm k tie kpen-k-ŋmiɑ[6] kɑɑ. T mɔk bɑɑ yenɔ kuɑ e, k ŋuɑ e tie Yennu.»

⁴²K Yiesu yet’b: «L i bo i tie k Yennu mɔnŋ tie i bɑɑ, i bo sii luon’n ɑ, k mɑɑn n nyii ŋuɑ Yennu penŋ e k bɑɑl nnɑ. N biɑ k bɑɑl nɑn n mɔnŋ mɔnŋ yiikuo kɑɑ, ŋɑɑn ŋuɑ e tun’n.

⁴³Bee tien k i k bɑnn n mɑɑn nɑ pɑɑk i? K mɑɑn yɑɑ k fit gbɑt n mɑɑn mɑnŋ nɑ.

⁴⁴I tie i bɑɑ *Sɑɑtɑn wɑɑs e, k luon k i tuun i bɑɑ mɑnŋ yɑnbuɑtuonɑ. Sinsinn u ponŋ din tie nikpiiluk o, k biɑ fɔk nɑn bɑlmɔni, k mɑɑn bɑlmɔni kɑɑ u ni nɑn wɑɑn ɑ. U i fɑɑl fɑɑk yuo nbɑ, l ponŋ tie u binbenŋ e, k mɑɑn wɑɑ tie fɑɑk dɑɑnɔ nɑ. Fɑi kul nyi u buol e.

⁴⁵Ŋɑɑn mɑɑ yien’i bɑlmɔni nɑ e te k i k tien’n yɑdɑ.

⁴⁶I ŋmee sɑɑ fit wɑnn n biit i? Mi i yet’i bɑlmɔni i e, bee tien k i k tien’n yɑdɑ?

⁴⁷Wun nbɑ tie Yennu yuɑ, ŋuɑ e gbiintl lin nbɑ k Yennu piɑk, ŋɑɑn i k tie Yennu yɑb. Ŋɑnn e tien k i k gbiintl’l.»

⁴⁸Ŋɑnn e k Suifnbɑ nɑ jiin k yet Yiesu ɑ: «Tɑɑ yet k yɑɑ ɑ tie *Sɑɑmɑɑli nilɔ, k nɑlnbiiuk biɑ be ɑ ni nɑ, l k tokn ii?»

⁴⁹K Yiesu jiin ɑ: «Nɑlnbiiuk kɑɑ n ni. Min bɑɑkt n Bɑɑ, ŋɑɑn k yinm ŋɑnin siɑn’n.

⁵⁰Ŋɑɑn n k luon nibɑɑkl k tien n mɔnŋ. Yenɔ e be k u luon bin tien’n nibɑɑkl, k ŋuɑ e tie buut dɑɑnɔ.

⁵¹Bɑlmɔni e k n yien’i nɑ, dɑɑnɔ nbɑ sɑɑk n mɑɑn, u kɑn mi k kpo.»

⁵²K Suifnbɑ nɑ yet’ɔ ɑ: «Mɔtɑɑnɑ t set bɑnn nɑn nɑlnbiiuk be ɑ ni. Ablɑɑhɑɑnm din kpo wɑɑ, k *Yennu sɔkniinbɑ mun din kpo wɑɑ, ŋɑɑn k ɑ yɑɑ ɑ dɑɑnɔ nbɑ sɑɑk ɑ mɑɑn kɑn mi k kpo.

⁵³T cɑnbɑɑ Ablɑɑhɑɑnm nbɑ din kpo nɑ, ɑ duki mi ɑ ɑ cie’u ee? Yennu sɔkniinbɑ mun biɑ din kpo wɑɑ. Fin duki mi ɑ ɑ tie ŋmee?»

⁵⁴K Yiesu jiin’m ɑ: «Mi i bo i dontl n mɔnŋ i e, l bo sii tie yɑnn e. Wun nbɑ dontl’n tie n Bɑɑ e. ŋuɑ e tie dɑɑnɔ nbɑ k i yɑɑ ɑ u tie i Yennu nɑ.

⁵⁵I k mi’u, ŋɑɑn min ŋɑnin mi’u. L i bo i tie k n yɑɑ ɑ n k mi’u, n bo sɑɑ tien fɑɑk dɑɑnɔ nɑn yinm nɑ wɑɑ. Ŋɑɑn n mi’u, k biɑ sɑɑk u mɑɑn.

⁵⁶I cɑnbɑɑ Ablɑɑhɑɑnm din mɔk pɑlpienn bonciɑnn, k mɑɑn u yɑɑ wun tɑn lɑ yuo nbɑ k n sɑɑ sik tingbounŋ nɑ ni, k u set tɑn lɑ l yuo mɑnŋ ɑ, k l mɑnŋ’ɔ.»

⁵⁷K Suifnbɑ nɑ boi’ɔ: «A dɑɑ k bɑɑl binɑ piinŋmu, ŋɑɑn tɑn lɑ Ablɑɑhɑɑnm ii?»

⁵⁸K Yiesu jiin yet’b ɑ: «Bɑlmɔni e k n yien’i nɑ, bɑɑ din tɑn mɑɑl Ablɑɑhɑɑnm nɑ, ŋɑɑn suɑ k N Tie e.»

⁵⁹Ŋɑnn e k b ji tɔki tɑnɑ ɑ bin jɑɑt’ɔ k kpi’u, k u bɔl k nyii Yennu jɑɑnti ŋɑsɑɑkɑk ni.