Read Moba Sɑn 9 Bible Online

Sɑn 9 - Moba bible

Sɑn 9

¹L puolpo e k Yiesu din gɑɑl sɑɑ k tɑn lɑ juɑnŋ nnɑ, k u tie juɑnŋ u mɑɑlu ni wɑɑ.

²K u *puolpoweitieb boi’ɔ ɑ: «Cɑnbɑɑ, ŋmee biit e te k b mɑl juɑ nɑ juɑnŋ i? L dɑɑ tie u mɔnŋ biit ɑmi u dɑnm e?»

³K u jiin’m ɑ: «U biit pɑɑk kɑɑ te k u juɑn. L mun biɑ k tie u dɑnm biit pɑɑk kɑɑ. U juɑn ɑ niib n lɑ Yennu tuonɑ u ni e.

⁴Yuo nbɑ k yentu dɑɑ be nɑ, l kpɑɑ tɑlɑs e k tii tuun wun nbɑ tun’n nɑ tuonɑ nɑ, k mɑɑn nyiɑɔk bɑɑt, yuo nbɑ k suɑ kɑn fit tun tuonn.

⁵Mɑɑ dɑɑ be tingbounŋ nnɑ, n tie tingbounŋ nɑ niib yentu e.»

⁶Wɑɑ yet nnɑ mɑnŋ puolpo e k u siil mɔsɑnt tinŋ ni, ŋɑɑn buun tɑnt, k pɔl juɑnŋ nɑ ninbinɑ pɑɑk,

⁷K yet’ɔ ɑ: «Ii sɑɑ Siiloe biɑɔnŋ ni k sɑɑ yibl.» (Siiloe pɑɑk tie «t tun suɑ.») Ŋɑnn e k u sɑɑn k sɑɑ yibl, k nyuɑnt k kun.

⁸Ŋɑnn e k u kuɑnɑnlieb nɑn niib nbɑ tuu lɑɑt’ɔ k u mei likli nɑ boi b lieb ɑ: «Jɑjuɑnŋ nbɑ tuu mei nɑ kɑɑ nɑ ɑɑ?»

⁹K siɑb yɑɑ ɑ: «Ŋuɑ e,» k lieb yɑɑ ɑ: «Aɑi, l k tie ŋuɑ kɑɑ. U nɑɑn’ɔ e.» K juɑ mɑnŋ tiɑɔnŋ yet ɑ: «Min e nɑ.»

¹⁰K b boi’ɔ ɑ: «L tien nlee k ɑ ninbinɑ tɑn nyuɑnt i?»

¹¹K u jiin’m ɑ: «Juɑ nbɑ k b yi’u Yiesu nɑ, ŋuɑ e buun tɑnt k jii k pɔl n ninbinɑ pɑɑk, ŋɑɑn yet’n ɑ mii sɑɑ Siiloe biɑɔnŋ ni k sɑɑ yibl. Ŋɑnn e k n sɑɑn k sɑɑ yibl k nyuɑnt.»

¹²K b boi’ɔ ɑ: «U be lee?» K u jiin k yet’b ɑ: «N k mi.»

¹³Jɑjuɑnŋ nɑ kuɑnɑnlieb nɑn niib nbɑ tuu lɑɑt’ɔ nɑ jii’u k sɑɑn nɑn’ɔ Fɑɑliisiɑnnbɑ buol.

¹⁴Dɑɑl nbɑ k Yiesu din buun tɑnt k nyuɑnt juɑnŋ nɑ, l dɑɑl din tie *Fuondɑɑl e.

¹⁵K Fɑɑliisiɑnnbɑ nɑ biɑ ŋɑnm boi juɑ nɑ, ɑ u tien nlee k nyuɑnt i? K u yet’b ɑ: «Yiesu e buun tɑnt, k jii k pɔl n ninbinɑ pɑɑk, k n yibl k nyuɑnt.»

¹⁶K Fɑɑliisiɑnnbɑ siɑb yet ɑ: «Yiesu k nyii Yennu buol ni kɑɑ, k mɑɑn u k sɑk Fuondɑɑl sennu.» K b siɑb mun boi ɑ: «Nlee k biitdɑɑnɔ sii fit tuun bɑktnɔunŋ tuonjɑɑnɑ nɑ buolu?» K bɔktu bɑɑl Fɑɑliisiɑnnbɑ nɑ sinsuuk ni.

¹⁷L pɑɑk k b biɑ boi juɑ nɑ ɑ: «A sɑɑ pɑk ɑ bee k jiin wun nbɑ nyuɑnt ɑ ninbinɑ nɑ po?» K u biɑ pɑk jiin’m ɑ: «U tie *Yennu sɔkni e.»

¹⁸Ŋɑɑn k l pɑɑl nɑn *Suifnbɑ yudɑnm n tien yɑdɑ nɑn b mɑl’ɔ juɑnŋ e ŋɑɑn k u tɑn nyuɑnt. K b yɑɑ sie k b yiin juɑnŋ nɑ dɑnm,

¹⁹k tɑn boi’b ɑ: «U tie i bijɑ ee? I set yɑɑ ɑ i mɑl’ɔ juɑnŋ ee? K l tien nlee k u ji nyuɑnt mɔtɑɑnɑ nɑ?»

²⁰K b jiin yet’b ɑ: «T mi nɑn u tie t bijɑ ŋɑnin e, k t biɑ mi nɑn t mɑl’ɔ juɑnŋ e.

²¹Ŋɑɑn t k mi lɑɑ tien biɑnŋ nbɑ k u tɑn nyuɑnt, k t biɑ k mi wun nbɑ nyuɑnt’ɔ. U mɔnŋ ji k tie bik kɑɑ. Boin’mɔ mɑn. U sɑɑ fit pɑk u mɔnŋ pɑɑk ɑ.»

²²U dɑnm din yet nnɑ mɑnŋ, k mɑɑn b tiin Suifnbɑ yudɑnm nɑ jɑŋmɑɑni, k mɑɑn yudɑnm mɑnŋ ponŋ tɑɑn mɔb k yet ɑ wun nbɑ yɑɑ ɑ Yiesu e tie *Klistu nɑ, sie k b nyinn’ɔ b Suifnbɑ jɑɑnti dieok ni.

²³L pɑɑk te k u dɑnm din yɑɑ ɑ u k tie bik kɑɑ, ɑ b mɔnŋ n boi’ɔ.

²⁴K l tɑɑl munle ni e k b biɑ ŋɑnm yiin juɑ nbɑ tuu tie juɑnŋ ŋɑɑn tɑn nyuɑnt nɑ, k tɑn yet’ɔ ɑ: «Yennu tuɑnn, pɑkn mɔni e. T mi nɑn Yiesu tie biitdɑɑnɔ e.»

²⁵K juɑ nɑ yet’b ɑ: «Wɑɑ tie biitdɑɑnɔ, ɑmi wɑɑ k tie, n k mi. Ŋɑɑn min ŋɑnin mi bon-yenn e: n tuu tie juɑnŋ e, ŋɑɑn mɔtɑɑnɑ n ji nyuɑnt ɑ.»

²⁶K b ŋɑnm biɑ boi’ɔ ɑ: «U tien nlee k nyuɑnt’ɑ ni?»

²⁷K u jiin’m ɑ: «N ponŋ yet’i wɑɑ, ŋɑɑn k i k gbɑt. Bee k i jin luon k n yet’i ni? I mun luon k i tien u puolpoweitieb ee?»

²⁸Ŋɑnn e k b suki’ɔ, ŋɑɑn yet’ɔ ɑ: «Fin e tie nilɔ mɑnŋ puolpoweituɑ, ŋɑɑn tinm ŋɑnin tie Muois puolpoweitieb e.

²⁹T mi nɑn Yennu din pɑk nɑn Muois, ŋɑɑn nilɔ nɑ ŋɑnin, t k mi wɑɑ nyii siɑn.»

³⁰K juɑ nɑ yet’b ɑ: «lin nbɑ tie pɑluk o nɑ: i k mi wɑɑ nyii siɑn, ŋɑɑn k u yen nyuɑnt n ninbinɑ wɑɑ.

³¹T mi nɑn Yennu k gbiin biitdɑnm, ŋɑɑn u gbiɑ dɑnm nbɑ jiɑntl’ɔ k tuun wɑɑ luon biɑnŋ nbɑ e.

³²Lɑɑ nyii *dulnyɑ piinu ni wɑɑ, t dɑɑ k mi gbɑt ɑ suɑ nyuɑnt wun nbɑ k b mɑl’ɔ juɑnŋ.

³³L i bo i tie k juɑ mɑnŋ k nyii Yennu penŋ, u bo kɑn fit tun siɑl.»

³⁴K b jiin k yet’ɔ ɑ: «Fin nbɑ k b mɑl’ɑ nɑn biit nɑ po, ɑ tie ŋmee k wɑnt tinm i?» ŋɑɑn bel nyinn’ɔ nɑn-yel.

³⁵Yiesu nbɑ gbɑt ɑ b bel’ɔ nɑ, k u tɑn lon’mɔ k lɑ’u, k boi’ɔ ɑ: «A tien *Nisɑɑlk Bijɑ nɑ yɑdɑ ɑɑ?»

³⁶K u jiin boi’ɔ ɑ: «Cɑnbɑɑ, ŋmee tie nisɑɑlk Bijɑ nɑ? Yetl’n wɑɑ tie wun nbɑ, k n tien’ɔ yɑdɑ.»

³⁷K Yiesu yet’ɔ ɑ: «A ponŋ lɑ’u wɑɑ. Ŋuɑ e tie wun nbɑ piɑk nɑn’ɑ nɑ.»

³⁸K juɑ nɑ yet’ɔ ɑ: «N Yonmdɑɑnɔ, n tien’ɑ yɑdɑ wɑɑ,» ŋɑɑn gbɑɑn u tuɑnn k puki’ɔ.

³⁹K Yiesu yet ɑ: «N bɑɑl tingbounŋ nɑ ni ɑ n bu niib buut, ɑ k juɑni n nyuɑnt k bin nbɑ nyuɑn n juɑn.»

⁴⁰K Fɑɑliisiɑnnbɑ siɑb nbɑ be lenŋ nɑ gbɑt k u yet nnɑ, k b boi’ɔ ɑ: «A yɑɑ ɑ t mun tie juɑni ee?»

⁴¹K u jiin’m ɑ: «L i bo i tie k i tie juɑni e, i bo kii mɔk biit, ŋɑɑn yɑɑ yɑɑ ɑ i nyuɑn nɑ, i mɔk biit.»