Read Moba Tuonɑ 1 Bible Online

Tuonɑ 1 - Moba bible

Tuonɑ 1

¹Cɑnbɑɑ Teofiil: N sinsinn diɑni nɑ ni, n din diɑn lin nbɑ kul k Yiesu din piin k tuun nɑn lin nbɑ k u din wɑnt niib nɑ, u tuonn pinpiin-yuo nɑ ni,

²mɔkmɔk nɑn Yennu nbɑ din tɑn donn’ɔ *Yendɔunŋ ni. Ŋɑɑn sinsinn dɑɑnn, wɑɑ din dɑɑ k duo nɑ, Foŋɑnm yiikuo ni e k u din wɑnn wɑɑ din gɑnn bin nbɑ k tien’m u tuomiinbɑ nɑ, bɑɑ sii tuun biɑnŋ nbɑ.

³U kuun puolpo e k u din jii dɑɑ piinnɑ k wɑnt’b nɑn u set be, bɑnnu nbɑ k bilsuk kɑɑ nɑn u set jen u mɑnfuol ni wɑɑ, k b din tuu tun lɑɑt’ɔ, k u piɑk nɑn’m k jikt sɑɑ Yennu nɑɑn po.

⁴Yosɑu yɑɑnn k u din tɑn lɑkn be nɑn’m k di jiet, k din tɑn tul’b mɔb ɑ: «I dɑɑ nyi Selusɑɑlenm, ŋɑɑn kii be kii guu piini nbɑ k n Bɑɑ senn mɔsonn ɑ u sɑɑ tul’i nɑ, mɑɑ din ponŋ yet’i lin nbɑ po nɑ.

⁵Sɑn din wuul niib nɑn nyun e, ŋɑɑn dɑɑ ŋɑnlele nɑ ni Yennu sɑɑ wuul’i Foŋɑnm ni.»

⁶Tuomiinbɑ nbɑ din lɑkn nɑn Yiesu yuo nbɑ, k b din tɑn boi’ɔ ɑ: «Yonmdɑɑnɔ, yuo nbɑ nɑ e k ɑ yɑɑ ɑ fɑt tinm Islɑɑeltieb yent k jiin’t ɑmi nlee?»

⁷K Yiesu yet’b ɑ: «L k lɑ’i nɑn k i bɑnn jinjɑnŋyuo nbɑ k n Bɑɑ senn yɑɑ lin tɑn tien. Ŋuɑ e mɔk u mɔnŋ yiikuo k senn l yuo.

⁸Ŋɑɑn yuo nbɑ k Foŋɑnm sɑɑ sik i pɑɑk, i sɑɑ lɑ yiikuo, k tɑn sii tie n siɑlɑɑdɑnm Selusɑɑlenm, nɑn Suude tinŋ kul ni, nɑn *Sɑɑmɑɑli tinŋ ni, nɑn tingbounŋ nɑ lokl kul po.»

⁹Wɑɑ pɑk mɑɑn mɑnŋ k gbenn yuo nbɑ, k b lɑ k u do sɑnpɑɑpo, k b goli’ɔ, k sɑnpɑgbɑnn sɑɑ dɔkn u pɑɑk k u bot, k b ji k lɑ’u.

¹⁰Bɑɑ lek biɑ sie k kpɑɑ b ninbinɑ k goli sɑnpɑɑpo nɑ, l tɑɑkpɑɑk ni k suɑ jɑb bɑnle sie k liɑ tɑpieni,

¹¹k boi’b ɑ: «Yinm Gɑɑliile tieb, bee k i sie nnɑ k goli sɑnpɑɑpo nnɑ? Yiesu nɑ nbɑ nyii i buol ni k duo Yendɔunŋ ni biɑnŋ nbɑ nɑ, u biɑ tɑn sɑɑ nyi Yendɔunŋ mɑnŋ ni k jen sik nɑn yɑɑ goli’ɔ k u do sɑnpɑɑpo biɑnŋ nbɑ nɑ e.»

¹²L yuo nɑ k Yiesu tuomiinbɑ nɑ nyii *Oliifienbɑ jɑgbɑɑk nɑ pɑɑk k ŋmɑt Selusɑɑlenm. Lenŋ mɑnŋ nɑn Selusɑɑlenm din fɔk nɑn *Fuondɑɑl sɔnu nɑ e.

¹³Bɑɑ bɑɑl Selusɑɑlenm yuo nbɑ k b sɑɑn kuɑ ŋɑɑk nbɑ k b tuu be nɑ ni k duo dituɑtuk pɑɑk. Bin nbɑ din kuɑ mɑnŋ din tie Piɑl nɑn Sɑn nɑn Sɑɑk nɑn Andle nɑn Fiiliip nɑn Tuomɑ nɑn Bɑɑltelemi nɑn Mɑɑtieo nɑn Sɑɑk wun nbɑ din tie Alfe bijɑ, nɑn Siimɔn wun nbɑ yɑɑ ninbinn din mɔn nɑn k Suifnbɑ n yent b mɔnŋ nɑ, nɑn Suud wun nbɑ tie suɑ nnɑ k b yi’u Sɑɑk nɑ bijɑ,

¹⁴k b kul ɑ tuu tun lɑknt nɑn b lieb k din pukn puosiɑb nɑn Yiesu nɑɑ, Mɑɑli, nɑn Yiesu ninjɑnm, k b mei Yennu nɑn dudukyent kuukuɑ k k nɑk.

¹⁵Ŋɑnn e k dɑsiɑl nnɑ, k bin nbɑ din tien Yiesu yɑdɑ nɑ nɑn kobk nɑn piinle nɑ tɑɑn tikl kɑl, k Piɑl tɑn fiil k set k yet ɑ:

¹⁶«N nɑɑ wɑɑs, lin nbɑ k Foŋɑnm din te k Dɑɑfiid din sint yet k jikt sɑɑ Suudɑ nbɑ dɑɑn wɑnn niib k b suol Yiesu nɑ po, k l diɑn Yennu lolkpel kɑdɑɑɔk ni nɑ, l kpɑɑ tɑlɑs e k lin tɑn tun nnɑ k gbie.

¹⁷Suudɑ din tie t ni yenɔ k biɑ tuun tuonn nbɑ k t tuun.»

¹⁸(Suudɑ nbɑ din kɔi Yiesu k gɑɑl likli nbɑ nɑ e, k u jii k dɑɑ kpɑɑb, l kpɑɑb ni e k u din jɔnn u mɔnŋ k bɑɑ k put puol, k u nuɑt kul nyii.

¹⁹K Selusɑɑlenmtieb kul gbɑt nnɑ mɑnŋ, k pul kpɑɑb mɑnŋ sɑnn b mɔnŋ mɑɑn ni ɑ Akeldɑmɑ, k l pɑɑk tie «Sɔn Kpɑɑb.»)

²⁰«Tɔn, l diɑn *yɑni kɑdɑɑɔk ni ɑ: ‹Ŋɑɑnt k u ŋɑɑk n set lɑngbounŋ k suɑ dɑɑ kuɑ lenŋ.› K l biɑ diɑn ɑ: ‹L ŋɑn k suɑ n gɑɑl u tuonn yiɑl nɑ.›

²¹«L pɑɑk ɑmi l tie k tin gɑnn niyenɔ e k pukn’ɔ t po, ɑ wuu mun i tie Yiesu kuun fiilu siɑlɑɑdɑɑnɔ, k l ŋɑn k wuu tie tinm nbɑ din tuu tun lin nɑn Yonmdɑɑnɔ Yiesu yuo nbɑ k Sɑn din wul’ɔ Yennu nyunwulu mɔkmɔk k tɑn bɑɑl yuo nbɑ k Yiesu nyii t buol ni k duo Yendɔunŋ ni nɑ ni yenɔ.»

²³Ŋɑnn e k b gɑnn jɑb bɑnle k b tie Suosiɑf wun nbɑ k b din yi’u Bɑɑlsɑɑbɑɑs nɑ (b biɑ din yi ŋuɑ e Sustus nɑ), nɑn Mɑɑtiɑs,

²⁴ŋɑɑn ji miɑl Yennu ɑ: «Yonmdɑɑnɔ, fin nbɑ mi suɑ kul pɑl ni, wɑnt’t jɑb bɑnle nɑ ni, wun nbɑ k ɑ gɑnn,

²⁵k wun tien *tuomi k gɑɑl tuonn nɑ yiɑl nbɑ k Suudɑ nyik ŋɑɑn sɑɑn sɑɑ be *siɑn nbɑ ŋɑn nɑn’ɔ nɑ.»

²⁶L puolpo k b tɔ tiɑtiɑ, ɑ bin gɑnn b bɑnle mɑnŋ ni yenɔ, k Mɑɑtiɑs dii, k b jii’u k pukn’ɔ tuomiinbɑ piik nɑn yenɔ kuɑ nɑ ni.