Read Moba Tuonɑ 11 Bible Online

Tuonɑ 11 - Moba bible

Tuonɑ 11

¹L yuo nɑ k tuomiinbɑ nɑn Yiesuweilɑ nbɑ be Suude lokl kul po nɑ din gbɑt ɑ bin nbɑ k tie *Suifnbɑ mun tɑn gɑɑl Yennu mɑɑn.

²L pɑɑk, Piɑl nbɑ din tɑn duo Selusɑɑlenm nɑ, k Yiesuweilɑ nbɑ pot punɑ nɑ yɑki nɑn’ɔ, k yien’ɔ ɑ:

³«A dɑɑn sɑɑn bin nbɑ tie punjuot ŋɑɑk ni, k biɑ tɑɑn dii nɑn’m ɑ gbɑɑ.»

⁴Ŋɑnn e k Piɑl piin l pinpiik, k kɑt wɑnn’b lin nbɑ kul din tien ɑ:

⁵«N dɑɑn be Sope k mei Yennu e k tɑn lɑ yelntu, k bonsiɑl nnɑ nɑɑn nɑn cincengbenŋl k l nyii sɑnpɑɑpo, k siɑl diɑ l mɔgbɑnɑ ŋɑnnɑ k siknt n buol ni.

⁶K n duɑnt l nuɑk ni, k lɑ bonkobt, bonsusuot, bonfulnkɑ nɑn bon-yuyukt buolu kul ɑ.

⁷Ŋɑnn e k n gbɑt k kunkɔl yet ɑ: ‹Piɑl, fiit, k kpi’b k ŋmɑn.›

⁸Mɑɑ: ‹O, O, O, Yonmdɑɑnɔ, nnɑ kɑɑ. N ponŋ k mi dii t kuɑt.›

⁹K kunkɔl nɑ biɑ ŋɑnm k yet *Yendɔunŋ ni ɑ: ‹Lin nbɑ k Yennu kpint’l ɑ l k kuɑ, dɑɑ yien ɑ l kuɑ.›

¹⁰L dɑɑn tien nnɑ k sɑɑ jɑnŋ tɑɑl muntɑ, k l ŋmɑt duo sɑnpɑɑpo.

¹¹«L tonton nɑ k Sesɑɑle jɑb bɑntɑ nbɑ k b dɑɑn tun’m n penŋ nɑ bɑɑl ŋɑɑk nbɑ k n be nɑ ni.

¹²Ŋɑnn e k Foŋɑnm yet’n ɑ n sɑɑn nɑn’m k dɑɑ bils. K Yiesuweilɑ nbɑ be Sope nɑ, b ni bɑnluob nbɑ be nnɑ nɑ mun ciɑn’n k sɑɑn Sesɑɑle, k t kul ɑ bɑɑl kuɑ Kɔlnɑi ŋɑɑk ni.

¹³K u yet’t biɑnŋ nbɑ k u lɑ k *mɑlɑkɑ bɑɑl set u ŋɑɑk ni k yet’ɔ ɑ: ‹Tumn suɑ Sope, k wun sɑɑ yiin juɑ nbɑ k b yi’u Siimɔn, k u sɑnn biɑ tie Piɑl nɑ,

¹⁴k u sɑɑ pɑk mɑɑn k tul’ɑ, k fin nɑn ɑ ŋɑɑtieb kul ɑ n lɑ fielu.›

¹⁵«Tɔn, mɑɑ piin mɑɑn pɑku yuo nbɑ, k Foŋɑnm sik kuɑ b ni nɑn wɑɑ din sik kuɑ t ni l pinpiik ni biɑnŋ nbɑ nɑ.

¹⁶Ŋɑnn e k n tiɑl Yonmdɑɑnɔ nbɑ din yet ɑ: ‹Sɑn ŋɑnin din wuul niib nɑn nyun e, ŋɑɑn yinm ŋɑnin sɑɑ gbie yent nɑn Foŋɑnm e.›

¹⁷Tɔn, l i tie k Yennu set pi’b u Foŋɑnm mɑnŋ nɑn wɑɑ mun din pi tinm nbɑ tien Yonmdɑɑnɔ Yiesu *Klistu yɑdɑ nɑ i e, k ŋɑnn, n tie ŋmee k sɑɑ yet Yennu nbɑ luon wun tun lin nbɑ?»

¹⁸Bɑɑ din gbɑt nnɑ mɑnŋ yuo nbɑ, k b ji nyik b kpɑyɑkt nɑ, ŋɑɑn donn Yennu sɑnn, k yien ɑ: «Yennu te bin nbɑ k tie Suifnbɑ mun fit mɔ kuɑŋɑɑn k lebt binbenŋ k lɑ mɑnfuol nbɑ kɑɑ gbennu.»

¹⁹Tɔn, muksuk nbɑ din bɑɑl Etiɑnn kpinu puolpo nɑ din te k Yiesuweilɑ fiil Selusɑɑlenm k yɑt, k b siɑb din yɑɑt k sɑɑn Feniisi, nɑn Siipl, nɑn Antiɑɔs, k din muɑntl Yiesu mɑɑn k tien Suifnbɑ kuukuɑ.

²⁰Ŋɑɑn Yiesuweilɑ siɑb nbɑ din tie Siipltieb, nɑn Siilenntieb nɑ, sɑɑn Antiɑɔs, k sɑɑ muɑntl Yonmdɑɑnɔ Yiesu lɑbɑmɑnn k tien bin nbɑ k tie Suifnbɑ,

²¹k Yonmdɑɑnɔ yiikuo din be nɑn’m, k niib bonciɑnn din tien Yonmdɑɑnɔ yɑdɑ k wɑɑ’u.

²²K Klistu mɔtɑɑɔk niib nbɑ din be Selusɑɑlenm nɑ gbɑt lɑbɑɑl mɑnŋ, k tun Bɑɑlnɑɑbɑɑs ɑ wun sɑɑn Antiɑɔs.

²³Wɑɑ din sɑɑ bɑɑl lenŋ yuo nbɑ k lɑ Yennu nbɑ tul’b yetŋɑnm biɑnŋ nbɑ, k u lɑ pɑlpienn bonciɑnn, k din cie b pɑlɑ, k kpɑɑn b kul kpɑɑni ɑ bin jii b mɔnŋ k tul Yonmdɑɑnɔ fɑnnu.

²⁴Bɑɑlnɑɑbɑɑs din tie niŋɑnɔ e, k mɑntk gbie nɑn Foŋɑnm nɑn yɑdɑ, k nigbounŋ bonciɑnn din tien Yonmdɑɑnɔ Yiesu yɑdɑ k tien u weilɑ.

²⁵Ŋɑnn e k Bɑɑlnɑɑbɑɑs din sɑɑn Tɑɑls, ɑ wun sɑɑ lon Sɔul.

²⁶Wɑɑ sɑɑ lɑ’u yuo nbɑ k u jen nɑn’ɔ Antiɑɔs, k b din jii binn munn k tɑɑn nɑn Klistu mɔtɑɑɔk niib, k wɑnt niib bonciɑnn Yennu mɑɑn. L din tie Antiɑɔs e k b din sint k pul Yiesuweilɑ ɑ: «Klistuyɑb.»

²⁷L yuo dinn e k *Yennu sɔkniinbɑ siɑb din nyii Selusɑɑlenm k sik Antiɑɔs.

²⁸B yenɔ sɑnn din yi Agɑɑbuus, k Foŋɑnm ni e k u din fiil k set, k yet ɑ kon bonciɑnn tɑn sɑɑ bɑɑ tingbounŋ nɑ kul po, k kon mɑnŋ din set tɑn bɑɑ yuo nbɑ k Kluod din tie kpɑnbɑlɑ yudɑɑnɔ nɑ.

²⁹Yuo nbɑ k Yiesuweilɑ din gbɑt ɑ kon yɑɑ lin bɑɑ nɑ, k b din dukn dudukt ɑ b sɑɑ tul sonml, k wun nbɑ fit nyɑnn biɑnŋ nbɑ lek, wun tul Yiesuweilɑ nbɑ be Suude nɑ.

³⁰K b din tien nnɑ, k tun Bɑɑlnɑɑbɑɑs nɑn Sɔul nɑn likli nɑ, ɑ bin sɑɑ tul Yiesuweilɑ sɑɑkɑb Suude tinŋ ni.