Read Moba Tuonɑ 12 Bible Online

Tuonɑ 12 - Moba bible

Tuonɑ 12

¹L yuo nɑ dinn k kpɑnbɑl *Heluod din jɑk Yiesuweilɑ siɑb nɑn muksuk,

²k din te k b kpii Sɑn ninjɑ Sɑɑk nɑn juk-bɑnjiɑk.

³Kpɑnbɑl Heluod nbɑ bɑnn nɑn wɑɑ tien biɑnŋ nbɑ te k *Suifnbɑ pɑlɑ penn nɑ, k u biɑ lek ŋɑnmt k tie nnɑ, k tɑn suol Piɑl, yosɑu nbɑ k b din mɔk jɑɑnm k di pɑɑnu nbɑ kɑɑ * dɑtinŋ nɑ.

⁴Wɑɑ suol Piɑl yuo nbɑ k u kuɑn’ɔ dɑnsɑlk, k tul’ɔ dɑnsɑlguulɑ. B din tie pɑɑbu munnɑ e k guu’u, k pɑɑbyenn kul ni guulɑ bɑnɑ e guu’u, k Heluod din duki ɑ jɑɑnm mɑnŋ puolpo e wɑɑ, k u sɑɑ nyinn Piɑl ɑ bin n bu u buut niib ni.

⁵K Piɑl dɑɑ be dɑnsɑlk ni, ŋɑɑn k Yiesuweilɑ pɑɑ Yenmiɑlu pɑɑk u po nɑn ninmɔnn.

⁶Tɔn, k Heluod din duki nɑn l i yent sɑn-nyiɑɔk, u sɑɑ nyinn Piɑl k kpi’u, k l dɑɑl nyiɑɔk mɑnŋ k Piɑl lol nɑn jɑlt ŋɑnle, k guɑnt guulɑ bɑnle nɑ sinsuuk ni, k guulɑ mɑnŋ siɑb mun din guu dɑnsɑlk dieok nɑ tɑnmɔb.

⁷L tɑɑkpɑɑk ni k Yonmdɑɑnɔ *mɑlɑkɑ dɔkt, k yentu yent dɑnsɑlk dieok nɑ ni, k u sik k pɑɑpɑɑ Piɑl lokl ni k fiin’ɔ, ŋɑɑn yet’ɔ ɑ: «Fiit yiɑn yiɑn.» K u fiil. Wɑɑ fiil yuo nbɑ, k jɑlt nɑ pit u nii ni k bɑɑ.

⁸K mɑlɑkɑ nɑ yet’ɔ: «Bobnt ɑ gbɑnn, k pil ɑ tɑɑsɑɑt.» K Piɑl tien nnɑ. K u biɑ yet’ɔ ɑ: «Gbɑbn ɑ cincenn kii wɑɑ’n.»

⁹K u bobn u gbɑnn k wɑɑ’u, k b nyii dɑnsɑlk dieok nɑ ni, ŋɑɑn Piɑl din k bɑnn nɑn mɑlɑkɑ nbɑ tuun biɑnŋ nbɑ mɑnŋ, ɑ l tie mɔni e. U din mi ɑ u lɑɑt yelntu e.

¹⁰K b din bɑɑl gɑl sinsinn guulɑ nɑ buol ni, k biɑ tɑn bɑɑl gɑl lieb nɑ buol, k ji sɑɑ bɑɑl kutgɑnjuontk nɑ ni, k gɑnn mɑnŋ luot l tiɑɔnŋ k tul’b, k b nyii nɑn-yel, k tɔkn sɔnu k sɑɑ, k mɑlɑkɑ nɑ tɑɑn lil bot ŋɑɑn nyik’ɔ.

¹¹Ŋɑnn e k Piɑl ji yelnt bɑnn, k yet ɑ: «Mɔtɑɑnɑ e k n ji dɑɑ bɑnn nɑn l set tie mɔni e nɑn Yennu tun u mɑlɑkɑ k u bɑɑl nyinn’n Heluod nuu ni, k biɑ nyinn’n nɑn *Suifnbɑ nbɑ duki ɑ bin tun’n biɑnŋ nbɑ nɑ ni.»

¹²Wɑɑ bɑnn u mɔnŋ po nbɑ tie biɑnŋ nbɑ, k u sɑɑn Sɑn, wun nbɑ k b yi’u Mɑɑlk nɑ, nɑɑ Mɑɑli ŋɑɑk ni, k niib bonciɑnn ponŋ tikl lenŋ k mei Yennu.

¹³K Piɑl kpɑɑ kpɑɑ nɑn-yel po gɑnn, k sɑpɑɑntuontunnɔ, wun nbɑ sɑnn yi Luodɑ nɑ, bɑɑl gɑnn mɑnŋ penŋ ɑ wun gbiint,

¹⁴k ji bɑnn Piɑl kunkɔl, k ciɑl ŋmɑt nɑn pɑlpienn niib nɑ ni, ŋɑɑn tɑɑn ji k luot gɑnn nɑ, k yet’b ɑ: «Piɑl be nɑn-yel po.»

¹⁵K b yet’ɔ ɑ: «Wɑɑtuk o mɔk’ɑ.» Ŋɑɑn k u biɑ ŋɑnmt lek yien ɑ u be, k b yɑɑ ɑ: «L tie u mɑlɑkɑ e.»

¹⁶K Piɑl biɑ lek sie k kpɑɑn gɑnn nɑ, k b tɑn luot gɑnn mɑnŋ k lɑ’u, k l ji yɑɑl ŋɑɑn lit’b.

¹⁷K u donn nuu ɑ bin ŋmin, ŋɑɑn wɑnn’b biɑnŋ nbɑ k Yonmdɑɑnɔ nyinn’ɔ dɑnsɑlk ni, k yet’b ɑ: «Ii sɑɑ mɑn k sɑɑ yet Sɑɑk nɑn Yiesuweilɑ lieb lin nbɑ nɑ po.» L puolpo k u nyik’b ŋɑɑn yɑɑt sɑɑn siɑl po.

¹⁸Ŋɑnn e k l yent sɑn-nyiɑɔk, k mukl muk dɑnsɑlguulɑ nɑ k l k jeln, k mɑɑn b k mi Piɑl nbɑ ji be siɑn.

¹⁹K Heluod tul mɔb ɑ bin lon u buol, k b lon’ɔ k k lɑ’u, k u boi guulɑ mɑnŋ buboit, ŋɑɑn tul mɔb ɑ bin kpi’b. L puolpo e k Heluod din nyii Suude k sik Sesɑɑle, k yɑnn lenŋ wɑɑn ɑ.

²⁰Heluod wutuol din duo bonciɑnn Tiil nɑn Siidɔn tieb pɑɑk. B din tuu lɑɑt jiet Heluod yent ni. L pɑɑk, k b lɑkn lieb ɑ bin sɑɑn lɑ’u. Sinsinn bɑɑ bɑɑl k lɑ Blɑstus, wun nbɑ tie Heluod kɑlɑcigbenŋl nbɑ goli kpɑnbɑl nɑ dieok pɑɑk nɑ, k b mɑlk b mɔb k mɑnŋ nɑn’ɔ, k b tɑn sɑɑn Heluod buol ni k sɑɑ duo’u sindɑnt.

²¹Ŋɑnn e k Heluod din tɑn senn dɑɑl, k tɑn liɑ u kpɑnbɑl liɑtgbenŋɑ, k nyii kɑl u nɑɑngbounŋ pɑɑk ŋɑɑn pɑk tul niib nɑ,

²²k niib nɑ wuus ɑ: «Nilɔ kunkɔl kɑɑ nɑ. U tie yensuɑ e.»

²³L tɑɑkpɑɑk ni k Yonmdɑɑnɔ Yennu mɑlɑkɑ fɑɑ’u k mɑɑn u din k tien Yennu dontl mɑnŋ, k nɑnwubɑ kuɑ muɑ’u k u kpo.

²⁴K Yennu mɑɑn ŋɑnmt yɑt k kuɑ niib ni.

²⁵Yuo nbɑ k Bɑɑlnɑɑbɑɑs nɑn Sɔul din gbenn b tuonɑ nbɑ k b sɑɑn k tun nɑ, k b ji jii Sɑn, wun nbɑ k b biɑ yi’u Mɑɑlk nɑ, k nyii Selusɑɑlenm k ŋmɑt k kun Antiɑɔs.