Read Moba Tuonɑ 14 Bible Online

Tuonɑ 14 - Moba bible

Tuonɑ 14

¹Pɔul nɑn Bɑɑlnɑɑbɑɑs nbɑ din bɑɑl Ikoniunm, k b sɑɑn *Suifnbɑ jɑɑnti dieok ni, k pɑk bɑnnu nbɑ te k Suifnbɑ bonciɑnn nɑn bin nbɑ k tie Suifnbɑ bonciɑnn tien yɑdɑ.

²Ŋɑɑn k Suifnbɑ nbɑ din tie nikɑngbɑtɑ din te k bin nbɑ k tie Suifnbɑ nɑ mɔk dudukbiit k jikt sɑɑ Yiesuweilɑ po.

³K Pɔul nɑn Bɑɑlnɑɑbɑɑs nɑ ji din jii yuo bonciɑnn k be lenŋ, k ŋɑnmt piɑk nɑn pɑlcienn k jikt sɑɑ Yonmdɑɑnɔ po, k u cɑb’b ɑ bii fit kii tuun bɑktnɔunŋ tuonjɑɑnɑ, k l din wɑnt nɑn bɑɑ piɑk u ninkpɑbɑɔnŋ po nɑ, l mɑɑn mɑnŋ set nyii u buol e.

⁴K duo nɑ niib din bɔkt, k siɑb din sie Suifnbɑ puol, k lieb nɑ mun sie tuomiinbɑ nɑ puol.

⁵Ŋɑnn e k Suifnbɑ nɑn buolgɑnu nɑ lɑkn lieb nɑn b duo mɑnŋ yudɑnm, k duki ɑ bin tien tuomiinbɑ biɑsn k jɑɑt’b tɑnɑ,

⁶k bɑɑ ji tɑn bɑnn nɑn b yɑɑ bin jɑɑt’b tɑnɑ nɑ, k b ciɑl sɑɑn Liistl nɑn Delb, nɑn digbɑnbis nbɑ kpiɑ kpiɑ, Liikɑoni yent ni.

⁷Bɑɑ din sɑɑ bɑɑl lenŋ yuo nbɑ mɑnŋ, k b muɑntl lɑbɑmɑnn.

⁸K jɑsuɑ nnɑ din be Liistl k tie wɔbk. B din mɑl’ɔ k u tie wɔbk e, k k mi sonm,

⁹k u gbiintl Pɔul muɑnti nɑ. K Pɔul got’ɔ silll, k tɑn bɑnn nɑn u mɔk yɑdɑ nbɑ sɑɑ lɑ lɑɑfiɑ wɑɑ,

¹⁰k u yet’ɔ sɑnpɑɑpo wɑɑ ɑ: «Fiit k set ɑ tɑɑ pɑɑk.» K u tɑb nɑɑt k fiil k ji sonm.

¹¹Nibulciɑɔnŋ nɑ nbɑ din lɑ Pɔul nbɑ tun lin nbɑ mɑnŋ nɑ, k b ji piin yikn b mɔnŋ mɔnŋ mɑɑn ni ɑ: «T yenni sik t buol ni k kpint k nɑɑn nɑn nisɑɑli nɑ.»

¹²K b tɑɑn yi Bɑɑlnɑɑbɑɑs sɑnn ɑ Suus, k Pɔul mun k b yi’u ɑ Helmes, k mɑɑn ŋuɑ din tie bɑlpɑklɔ.

¹³K b yennu Suus mɑnntuɑ nyii pociɑnfiek ni, (puociɑnfiek mɑnŋ din sie duo nɑ tuɑnn po e,) k u tɑn bɑɑl nɑn nɑɑjɑi nɑn tipuut duo nɑ tɑnmɔb ni, k ŋuɑ nɑn nibul nɑ tikl ɑ bin mɑnn *mɑlunŋ k tul tuomiinbɑ mɑnŋ.

¹⁴Bɑɑlnɑɑbɑɑs nɑn Pɔul nbɑ din gbɑt nnɑ, k b pɑlɑ biil, k b pɑt pɑt b liɑtfɔkt, k ciɑl kuɑ nibul nɑ ni, ŋɑɑn yikn ɑ:

¹⁵«Bee k i tie nnɑ? T mun tie nisɑɑli e nɑn yinm nɑ. T muɑntl lɑbɑmɑnn, k yien’i ɑ yin nyik bon-yɑnɑ mɑnŋ, ŋɑɑn kii wɑɑ Yennu nbɑ fo nɑ wun nbɑ din nɑn sɑnpɑɑk nɑn tinŋ nɑn mɔkgbenŋl nɑn lin nbɑ kul be l ni.

¹⁶Yɑɑyuo ni e wɑɑ k u din ŋɑɑn k nibuolu kul din tuun b yɑmɑ ni mɔkmɔk nɑn mɔtɑɑnɑ.

¹⁷Ŋɑɑn yuo kul u tuun bonŋɑnɑ. U te k sɑɑk nyi sɑnpɑɑpo k bɑɑ k tien’i, k biɑ tien’i dii dijɑɑn-yuo, k gbuont’i jiet, k i lɑɑt pɑlpienn.»

¹⁸Tuomiinbɑ mɑnŋ nbɑ din pɑk nnɑ mɑnŋ, ŋɑɑn l lek din pɑɑl nɑn bin tiɑ nigbounŋ mɑnŋ k b dɑɑ mɑnn mɑlunŋ k tien’m.

¹⁹L puolpo e k Suifnbɑ siɑb din nyii Antiɑɔs nbɑ be Piisiidi tinŋ ni, nɑn Ikoniunm, k bɑɑl k pɑk tunn nigbounŋ nɑ yɑn. Ŋɑnn e k nibul nɑ jɑɑt Pɔul tɑnɑ, k ji fuul’ɔ nyinn’ɔ duo nɑ ni, k mɑɑn b mi ɑ u kpo e.

²⁰Ŋɑɑn Yiesuweilɑ nbɑ bɑɑl k set lint’ɔ, k u tɑn fiil, k ŋɑnm nɑn ŋuɑ ŋmɑt duo nɑ ni biɑk. K l yent sɑn-nyiɑɔk, k Pɔul nɑn Bɑɑlnɑɑbɑɑs fiil k sɑɑn Delb.

²¹K b sɑɑn k sɑɑ muɑnt Yiesu bɑlŋɑnni Delb, k dɑk niib bonciɑnn, k b tien Yiesuweilɑ. L puolpo k b ŋmɑt sɑɑ Liistl nɑn Ikoniunm nɑn Antiɑɔs nbɑ be Piisiidi tinŋ ni nɑ.

²²B cien Yiesuweilɑ pɑlɑ doi mɑnŋ ni, k yien’m ɑ bii kpɑnŋ i diɑ b yɑdɑ mɑnŋ nnɑ, k wɑnt’b ɑ: «Sie k t fɑbl k dii fɑlɑ bonciɑnn ɑ k tɑn kuɑ Yennu nɑɑn ni.»

²³K jiɑnti kul ni k b tuu lukt *Klistu mɔtɑɑɔk niib *sɑɑkɑb, k din mei Yennu k loln mɔi, k jikt Yiesuweilɑ nɑn b sɑɑkɑb nɑ k kubnt’b Yonmdɑɑnɔ nuu ni, wun nbɑ k b ponŋ tien’ɔ yɑdɑ nɑ.

²⁴Bɑɑ din gɑl Piisiidi tinŋ ni nɑ puolpo e, k b bɑɑl Pelj nbɑ be Pɑnfiili tinŋ ni nɑ,

²⁵k din pɑk Yiesu mɑɑn lenŋ k ji fit yen sik Atɑɑli.

²⁶Lenŋ e k b din kuɑ ŋɑlunŋ ni, k ŋmɑt sɑɑn Antiɑɔs, siɑn nbɑ k Yiesuweilɑ din miɑl Yennu ninbɑtinu po ɑ wun sonm’b b tuonn ni. K mɔtɑɑnɑ b tun tuonn mɑnŋ k gbenn ɑ.

²⁷Bɑɑ bɑɑl Antiɑɔs mɑnŋ ni nɑ, k b tikl Klistu mɔtɑɑɔk niib nɑ, k tɑn yet’b lin nbɑ kul k Yennu tun nɑn’m, nɑn wɑɑ luot sɔnu biɑnŋ nbɑ k tul bin nbɑ k tie Suifnbɑ ɑ bin tien Yiesu yɑdɑ k tien u weilɑ.

²⁸Ŋɑɑn k b ji din biɑl lenŋ k wei bonciɑnn nɑn Yiesuweilɑ mɑnŋ.