Read Moba Tuonɑ 15 Bible Online

Tuonɑ 15 - Moba bible

Tuonɑ 15

¹L yuo nɑ k nisiɑb nnɑ din nyii Suude k sik Antiɑɔs, k tɑn wɑnt Yiesuweilɑ nɑ ɑ: «L kpɑɑ tɑlɑs e k i pot i punɑ, nɑn Muois *senni nbɑ senn biɑnŋ nbɑ nɑ. Ŋɑnn i kɑɑ, Yennu kɑn fiel’i.»

²K Pɔul nɑn Bɑɑlnɑɑbɑɑs nɑn ŋɑnm noi nɑn lieb bonciɑnn nɑn ninmɔnn, k Yiesuweilɑ nɑ tɑn dukn k nyinn Pɔul nɑn Bɑɑlnɑɑbɑɑs nɑn b ni siɑb, ɑ bin sɑɑn Selusɑɑlenm, k sɑɑ lɑ tuomiinbɑ nɑ nɑn Yiesuweilɑ *sɑɑkɑb, mɑɑn mɑnŋ po.

³Tɔn, k Antiɑɔs Klistuyɑb nɑ tul’b sɔnu k biɑ cɑb’b sɔnu, k b sɑɑ k sɑɑ gɑl Feniisi nɑn *Sɑɑmɑɑli yɑkɑ po, k muɑntl bɑnnu nbɑ k bin nbɑ k tie *Suifnbɑ nɑ siɑb nyik b bonkpelɑ ŋɑɑn tien Yiesu yɑdɑ, k lɑbɑɑl mɑnŋ din tul Yiesuweilɑ kul pɑlpienn k sɑɑ yɑkl.

⁴Bɑɑ bɑɑl Selusɑɑlenm yuo nbɑ, k *Klistu mɔtɑɑɔk niib nɑn b sɑɑkɑb nɑn tuomiinbɑ nɑ din gɑɑl’b sɑɑɔnŋ. Ŋɑnn e k Pɔul nɑn Bɑɑlnɑɑbɑɑs yet’b lin nbɑ kul k Yennu tun nɑn’m.

⁵Ŋɑɑn k Yiesuweilɑ nɑ siɑb nbɑ tie Fɑɑliisiɑnnbɑ nɑ fiil set, k yet ɑ: «L kpɑɑ tɑlɑs e k bin nbɑ k tie Suifnbɑ nɑ n pot b punɑ, ŋɑɑn biɑ diɑ Muois senni.»

⁶L pɑɑk, k tuomiinbɑ nɑn sɑɑkɑb nɑ lɑkn lieb, ɑ bin dukn mɑɑn mɑnŋ po.

⁷Ŋɑnn e k b din pɑk wei nɑn lieb, k Piɑl tɑn fiil k yet ɑ: «N nɑɑ wɑɑs, i mi nɑn yuo nbɑ din gɑl nɑ, Yennu din lukt’n ɑ n muɑnt Yiesu lɑbɑmɑnn k tul bin nbɑ k tie Suifnbɑ, ɑ bin gbɑt’l k biɑ tien yɑdɑ.

⁸K Yennu nbɑ mi nisɑɑlk pɑl ni nɑ, ŋuɑ e din tul’b Foŋɑnm nɑn wɑɑ kpɑn din tul’t nɑ, k l wɑnn nɑn u mun gɑɑl’b.

⁹U k mɔk luktn tinm nɑn ŋɑnm sinsuuk ni k mɑɑn u wuul b pɑlɑ ni, bɑɑ tien yɑdɑ nɑ pɑɑk.

¹⁰L pɑɑk, bee k i luon k i bikn Yennu, yɑɑ luon k i te k buolgɑnu nbɑ tie Yiesuweilɑ nɑ n diɑ senni nbɑ k tinm nɑn t yejɑnm din k fit diɑ gbɑɑ?

¹¹Ŋɑɑn t tien yɑdɑ nɑn t lɑ fielu Yonmdɑɑnɔ Yiesu ninkpɑbɑɔnŋ pɑɑk nɑn bɑɑ mun lɑ’l bɑnnu nbɑ nɑ.»

¹²Ŋɑnn e k Yiesuweilɑ nɑ kul ɑ din ŋmin, ŋɑɑn ji gbiintl Bɑɑlnɑɑbɑɑs nɑn Pɔul, k b yien’m bɑktnɔunŋ tuonjɑɑnɑ nbɑ k Yennu din tun nɑn’m bin nbɑ k tie Suifnbɑ nɑ sinsuuk ni.

¹³Bɑɑ yet’b gbenn yuo nbɑ, k Sɑɑk yet’b ɑ: «N nɑɑ wɑɑs, gbiintl’n mɑn.

¹⁴Siimɔn yet’t biɑnŋ nbɑ k Yennu sint tin bin nbɑ k tie Suifnbɑ ninbɑtinu, k nyinn niib b ni ɑ bii tie u mɔnŋ niib.

¹⁵K *Yennu sɔkniinbɑ mɑɑn mun biɑ din pɑk nnɑ e, k mɑɑn l diɑn Yennu lolkpel kɑdɑɑɔk ni ɑ:

¹⁶‹L puolpo, n sɑɑ jen k ŋɑnm mɑɑ Dɑɑfiid ŋɑɑk nbɑ din bɑɑ nɑ, n sɑɑ ŋɑnm mɑɑ l dikpinɑ k fiin senn’l,

¹⁷ɑ niib kul nbɑ tenn n fit got Yonmdɑɑnɔ, nnn, bin nbɑ kul k n yiin’m ɑ bii tie n yɑb.

¹⁸Nnɑ e k Yonmdɑɑnɔ, wun nbɑ te k b bɑnn lin nbɑ nɑ yɑɑyuo ni wɑɑ yet.› »

¹⁹K Sɑɑk biɑ yet k pukn ɑ: «L tien n dudukt ni nɑn t dɑɑ jikt lin nbɑ pɑɑl k tien bin nbɑ k tie Suifnbɑ nɑ nbɑ nyik b bonkpelɑ k wɑɑ Yennu sɔnu nɑ pɑɑk.

²⁰Ŋɑɑn l ŋɑn k tin diɑn kɑdɑɑɔk o, k yet’b k b dɑɑ di lin nbɑ k b ponŋ mɑnn pɑtɑ, k biɑ yet’b ɑ bii so b mɔnŋ nɑn boncuncontuonɑ, k puob nɑn jɑb dɑɑ duɑ nɑn lieb yɑnɑ yɑnɑ k biɑ dɑɑ ŋmɑn bonkobuk nbɑ k b ŋmɑkl kpii, k biɑ dɑɑ di sɔn.

²¹K mɑɑn yɑɑyuo ni k tɑn tuu dinnɑ b muɑntl Muois senni digbɑnɑ kul ni, k *Fuondɑɑl kul b tuu lii senni mɑnŋ Suifnbɑ jɑɑnti diet ni.»

²²Ŋɑnn e k tuomiinbɑ mɑnŋ nɑn sɑɑkɑb nɑ nɑn Yiesuweilɑ nɑ kul ɑ dukn k nyinn nisiɑb b ni, ɑ bin tun ŋɑnm nɑn Pɔul nɑn Bɑɑlnɑɑbɑɑs, ɑ bin sɑɑn Antiɑɔs. Ŋɑnm e din tie Suud, wun nbɑ sɑnn din yi Bɑɑlsɑɑbɑɑs nɑ, nɑn Siilɑɑs. Jɑb bɑnle mɑnŋ din tie Yiesuweilɑ yudɑnm nɑ yenm e.

²³K b din tun’m nɑn kɑdɑɑɔk k diɑn ɑ: «Tinm tuomiinbɑ nɑn Yiesuweilɑ sɑɑkɑb nbɑ tie i nɑɑ wɑɑs nɑ, dɑ kɑdɑɑɔk nɑ k fuont yinm t nɑɑ wɑɑs nbɑ k tie Suifnbɑ k be Antiɑɔs nɑn Siili nɑn Siiliisi.

²⁴T gbɑt k t nisiɑb bɑɑl i penŋ, k piɑk’i bɑlsɑi k l dɑɑmi’i k ŋmɑt i yɑn ŋɑɑn t mun k wɑnn’b siɑl ɑ bin tɑn tien nnɑ,

²⁵k l pɑɑk e te k t tɑɑn lieb k suol k lukt nisiɑb t sinsuuk ni, k tuun’m i buol nnɑ, k ŋɑnm nɑn t yuɑsnbɑ, Bɑɑlnɑɑbɑɑs nɑn Pɔul e sɑɑ,

²⁶bin nbɑ yit b mɔnŋ sɑlk Yonmdɑɑnɔ Yiesu Klistu pɑɑk.

²⁷L pɑɑk k t tun Suud nɑn Siilɑɑs ɑ bin wɑnn’i b mɔb ni ɑ lin nbɑ k t diɑn nɑ tie bɑlmɔni.

²⁸K mɑɑn Foŋɑnm nɑn tinm kul dukn nɑn l k ŋɑn k t jinn’i jik-kpiɑsl k gɑl lin nbɑ kpɑɑ tɑlɑs k t diɑn t kɑdɑɑɔk ni,

²⁹ɑ i dɑɑ di jiet nbɑ k b mɑnn pɑtɑ, k biɑ dɑɑ di sɔn, k biɑ dɑɑ ŋmɑn bonkobuk nbɑ k b ŋmɑkl kpii, ŋɑɑn kii so i mɔnŋ nɑn boncuncontuonɑ, k puob nɑn jɑb dɑɑ duɑ nɑn lieb yɑnɑ yɑnɑ. L i tie k i diɑ i mɔnŋ nnɑ, l sii ŋɑn i po. L kul i nɑ.»

³⁰Ŋɑnn e k b tun’m, k b sik Antiɑɔs, k sɑɑ lɑkn tɑɑn Klistu mɔtɑɑɔk niib nɑ kul ɑ, k tul’b kɑdɑɑɔk nɑ.

³¹Niib nɑ nbɑ lii kɑdɑɑɔk mɑnŋ yuo nbɑ, k b lɑ pɑlpienn nɑn b kpɑɑni mɑnŋ pɑɑk.

³²K Suud nɑn Siilɑɑs, bin nbɑ din tie sɔkniinbɑ nɑ, din wei nɑn’m k yet’b Yennu mɑɑn bonciɑnn k cien Yiesuweilɑ mɑnŋ pɑlɑ k tot’b.

³³B weiu mɑnŋ puolpo e, k Yiesuweilɑ nɑ cɑb’b ɑ bii ŋmɑt bin nbɑ tun’m nɑ buol ni nɑn mɑnu.

³⁴(Ŋɑɑn Siilɑɑs ŋɑnin din dukn ɑ wun biɑl Antiɑɔs e.)

³⁵Ŋɑɑn Pɔul nɑn Bɑɑlnɑɑbɑɑs biɑ din wei Antiɑɔs, k ŋɑnm nɑn lieb tumi niib k muɑntl Yonmdɑɑnɔ mɑɑn.

³⁶L din yɑnn wɑɑn k Pɔul yet Bɑlnɑɑbɑɑs ɑ: «Ŋɑɑnt k tin ŋmɑt k sɑɑn gɔn t nɑɑ wɑɑs nbɑ be digbɑnɑ kul nbɑ k t din sɑɑn k sɑɑ muɑnt Yonmdɑɑnɔ mɑɑn nɑ, k lɑɑn bɑɑ be biɑnŋ nbɑ.»

³⁷K Bɑɑlnɑɑbɑɑs luon bin jii Sɑn-Mɑɑlk,

³⁸ŋɑɑn Pɔul din k sɑk ɑ bin jii’u, k mɑɑn u din tɑn nyik k k tuun nɑn’m yuo nbɑ k b din tɑn bɑɑl Pɑnfiili yiɑl ni.

³⁹K mɔniɑɔk din fiil Pɔul nɑn Bɑɑlnɑɑbɑɑs sinsuuk ni, k b bɔkt lieb. K Bɑɑlnɑɑbɑɑs din jii Sɑn-Mɑɑlk, k b kuɑ ŋɑlunŋ k sɑɑn Siipl.

⁴⁰K Pɔul mun din lukt Siilɑɑs, k Yiesuweilɑ nɑ din jii’b k tien’m Yonmdɑɑnɔ ninkpɑbɑɔnŋ ni.

⁴¹Pɔul din sɑɑn, k sɑɑ gɑl Siili nɑn Siiliisi yɑkɑ po, k cien Klistu mɔtɑɑɔk niib pɑlɑ doi nɑ ni.