Read Moba Tuonɑ 17 Bible Online

Tuonɑ 17 - Moba bible

Tuonɑ 17

¹Tɔn, k b ji din sɑɑ k sɑɑ gɑl Amfiipoliis nɑn Apoloni, k bɑɑl Tesɑɑluoniik. Lenŋ e k *Suifnbɑ jɑɑnti dieok din be.

²K Pɔul din tɑn sɑɑn kuɑ lenŋ, nɑn wɑɑ din tuu kuɑ k tuun biɑnŋ nbɑ nɑ. U din jii fuondɑɑ ŋɑntɑ e k kuɑ lenŋ, k piɑk Yennu mɑɑn nɑn niib nbɑ be nɑ,

³k wɑnn’b ɑ Yennu mɑɑn nbɑ wɑnt bɑnnu nbɑ nɑ pɑɑk e nɑ, *Klistu din sɑɑ bɑɑl k di fɑlɑ, k kpo, k biɑ fiil kuun ni k jen u mɑnfuol ni. Pɔul din yet’b ɑ: «Yiesu nbɑ nɑ e k n piɑk’i u po, ŋuɑ e tie Klistu mɑnŋ.»

⁴K u din tɑn pɑk tunn b siɑb yɑn k b ji bɑɑl tɑɑn ŋuɑ nɑn Siilɑɑs po k wɑɑ’b. K Gleknbɑ bonciɑnn nbɑ jiɑntl Yennu nɑ, nɑn puojɑɑnɑ bonciɑnn, k b mun pukn b po k wɑɑ Pɔul nɑn Siilɑɑs.

⁵Ŋɑɑn Suifnbɑ donn punponn, k lin k tikl niyin-yekɑ nbɑ be nɑ, k tɑɑnm, k te k b muk duo nɑ, k tɑn bɑɑl kpil Sɑɑsɔn ŋɑɑk, k luon Pɔul nɑn Siilɑɑs buol, ɑ bin nyinn’b niib ni.

⁶Bɑɑ k lɑ’b yuo nbɑ, k b suol Sɑɑsɔn nɑn Yiesuweisiɑb, k dɑt’b bɑɑl nɑn’m duo nɑ yudɑnm buol, ŋɑɑn tiɑn yien ɑ: «Niib nɑ lin lɑbi tingbounŋ nɑ k te k mukl muk niib, k mɔtɑɑnɑ k b tɑn bɑɑl t duo nɑ,

⁷k Sɑɑsɔn gɑɑl’b u ŋɑɑk ni, k b lin k wɑnt niib bɑlsɑɑni k biil t kpɑnbɑlɑ yudɑɑnɔ *senni, k yɑɑ ɑ Kpɑnbɑl-luɑ e mun be, ɑ k b yi’u Yiesu.»

⁸Bɑɑ yet nnɑ yuo nbɑ, k l dɑɑmi nibul nɑ nɑn yudɑnm nɑ pɑlɑ ni bonciɑnn.

⁹K yudɑnm nɑ te k Sɑɑsɔn-nbɑ pɑ likli ŋɑɑn k b ŋɑɑ’b.

¹⁰Nyiɑɔk nbɑ tɑn bɔnn yuo nbɑ, k Yiesuweilɑ tun Pɔul nɑn Siilɑɑs ɑ bin sɑɑn Beele. Bɑɑ bɑɑl lenŋ yuo nbɑ k b kuɑ Suifnbɑ jɑɑnti dieok ni.

¹¹Lenŋ niib din mɑn k gɑl Tesɑɑluoniiktieb. B din gɑɑl Yennu mɑɑn nɑ nɑn b pɑlɑ kul, k lii Yennu lolkpel kɑdɑɑɔk dɑɑl kul, ɑ bin lɑɑn Pɔul nbɑ piɑk lin nbɑ mɑnŋ, ɑ l set tie mɔni ɑmi nlee.

¹²Ŋɑnn e k siɑb bonciɑnn tien yɑdɑ, k Glek puojɑɑnɑ bonciɑnn nɑn Glek jɑb bonciɑnn mun din tien yɑdɑ.

¹³Ŋɑɑn Suifnbɑ mɑnŋ nbɑ din be Tesɑɑluoniik nɑ din gbɑt ɑ Pɔul biɑ muɑntl Yennu mɑɑn Beele, k b bɑɑl lenŋ, k fiin nibul nɑ wutuol, ɑ bin kpil’ɔ.

¹⁴L tɑɑkpɑɑk ni k Yiesuweilɑ nɑ te k Pɔul nɑn bin nbɑ ciɑnt’ɔ nɑ nyii k tɔkn sɔnu k bɑɑl mɔkgbenŋl nɑ ni, ŋɑɑn k Siilɑɑs nɑn Tiimuote ŋɑnin din biɑl Beele.

¹⁵Niib nbɑ din ciɑnt Pɔul nɑ din sɑɑn nɑn’ɔ nɑn Atenn e wɑɑ, k b tɑn yɑɑ bin ŋmɑt kun, k Pɔul yet’b ɑ bin sɑɑ yet Siilɑɑs nɑn Tiimuote ɑ bin yɑbl k bɑɑl yiɑn yiɑn nɑ. K niib nɑ ji din ŋmɑt kun Beele.

¹⁶Pɔul nbɑ din dɑɑ be Atenn k guu Siilɑɑs nɑn Tiimuote nɑ, k u lɑ k pɑtɑ gbie nɑn duo nɑ, k l din biil u pɑl ni bonciɑnn.

¹⁷K u tuu kuɑ Suifnbɑ jɑɑnti dieok ni k fɑɑ lɑbɑɑl nɑn Suifnbɑ nɑn buolgɑnu nbɑ jiɑntl Yennu nɑ. K u biɑ din tuu sɑɑn b linlɑknbuol ni dɑɑ kul, k sɑɑ fɑɑ nɑn bin nbɑ bɑɑt lenŋ nɑ lɑbɑɑl.

¹⁸K sɑɑkɑyɑndɑɑnsiɑb nnɑ din be, k b yi b yenm Epiikuuliɑnbɑ[5], k lieb mun Stoisiɑnbɑ[6], k b mun tɑn bɑɑl k fɑɑ lɑbɑɑl nɑn Pɔul. K b siɑb tɑn pɑk nɑn b lieb ɑ: «Bɑlfuouk dɑɑnɔ nbɑ wɑnt u mɔnŋ nɑ mun yien bee nɑ?» K b yenm mun yɑɑ ɑ: «L tɑɑn tie nɑn u piɑk digbɑngɑnɑ yenni po e nɑ.» B din yet nnɑ mɑnŋ, k mɑɑn Pɔul muɑntl Yiesu po nɑn u kuun fiilu po.

¹⁹Ŋɑnn e k b jii Pɔul k bɑɑl nɑn’ɔ b sɑɑkɑb tintɑɑnkɑɑnu buol nbɑ k b din yi Aleopɑɑj nɑ, ŋɑɑn din boi Pɔul ɑ: «T sɑɑ fit bɑnn tumiipɑɑnu nbɑ k ɑ wɑnt nɑ ɑɑ?

²⁰K mɑɑn ɑ piɑk bɑlyeni, k l tie bɑlsɑɑni e t penŋ, k t luon k tin bɑnn l pɑɑk.»

²¹(Atenn niib kul nɑn bin nbɑ din nyii tingɑni k bɑɑl k be nɑ, k b tuu jii b yuo k fɑɑ lɑbɑɑl, k biɑ gbiintl bɑlsɑɑni nbɑ juont bɑɑl nɑ.)

²²Tɔn, k Pɔul fiil b tintɑɑnkɑɑnu mɑnŋ ni, k set b tuɑnn, ŋɑɑn yet’b ɑ: «Atenntieb, n lɑ i benu kul ni k i luon i pɑtɑ bonciɑnn,

²³k mɑɑn mɑɑ kɑk k lin i duo nɑ, n got i pɑtɑ, k biɑ lɑ binbintl k l diɑn l pɑɑk ɑ: ‹Yennu nbɑ k t k mi’u.› N luon k n wɑnn’i wun nbɑ k i puki k tien’ɔ ŋɑɑn k mi’u nɑ.

²⁴Yennu mɑnŋ, ŋuɑ e din nɑn *dulnyɑ nɑn bont kul nbɑ be l ni. Ŋuɑ e tie sɑnpɑɑk nɑn tinŋ Yonmdɑɑnɔ, k k tie dɑɑnɔ nbɑ be puociɑnfei nbɑ k niib mɑɑ ni kɑɑ.

²⁵K nisɑɑlk kɑn fit tun siɑl nɑn u nuu k tul’ɔ k lin pukn’ɔ siɑl, k mɑɑn ŋuɑ e tie dɑɑnɔ nbɑ tien nisɑɑli kul mɑnfuol nɑn bonɑ kul.

²⁶Ŋuɑ e mun te k nibuolu kul nyii yejɑ yenɔ kuɑ ni, k biɑ te k b be tingbounŋ nɑ kul ni, k u mɔnŋ mɔnŋ din senn yuo nbɑ k nibuolu kul sii be, k biɑ tien b binbeboɑ teli.

²⁷U din tien nnɑ mɑnŋ ɑ bin lon’mɔ, ɑ k pɑsiɑl i bin tuln k tɑn nɑkn bɑnn’ɔ, ŋɑɑn ŋuɑ Yennu set k fɔk nɑn t suɑ.

²⁸Nisuɑ din yet ɑ: ‹L tie Yennu pɑɑk e k t be k fo k tuun.› I yɑndɑnm pinpɑkt mun biɑ lek wɑnt nnɑ mɑnŋ e ɑ: ‹T biɑ tie Yennu wɑɑs e.›

²⁹Tɔn, tinm nbɑ tie Yennu wɑɑs nɑ, l k ŋɑn k tin dukn nɑn Yennu tie nɑn *siɑl ɑ bonninnɑɔnŋ nbɑ tie sɑlmɑ ɑmi tɑnn nbɑ k nilɔ ŋɑnm’l nɑn u yɑn ɑmi u dudukt ni.

³⁰Yuo nbɑ gɑl nɑ, Yennu din k ŋmɑnn niib tubɑ nɑn bɑɑ din jɑnŋ nɑn tubdɑtu bɑnnu nbɑ, ŋɑɑn mɔtɑɑnɑ u yet suɑ kul, ɑ wun mɔ kuɑŋɑɑn k lebt binbenŋ,

³¹k mɑɑn ŋuɑ Yennu ponŋ senn dɑɑl nbɑ k u sɑɑ bu tingbounŋ nɑ ŋɑɑtieb kul buut cib cib. U sɑɑ te k suɑ nbɑ k u lukt’ɔ nɑ n bu buut mɑnŋ, k u set fiin’ɔ kuun ni, k l tie nyinn k tul suɑ kul, ɑ u set sɑɑ tun wɑɑ senn lin nbɑ nɑ.»

³²Bɑɑ gbɑt k Pɔul pɑk kuun fiilu po nɑ, k siɑb lɑɑ k sɑlkt’ɔ, ŋɑɑn k siɑb mun yɑɑ ɑ: «T luon k tin ŋɑnm gbiint lin nbɑ k ɑ sɑɑ pɑk nɑ e.»

³³Ŋɑnn e k Pɔul din nyii ŋɑɑn nyik’b.

³⁴Ŋɑɑn siɑb mun din tɑɑ u po k tien yɑdɑ. K b ni mɑnŋ, Deniis din be. Ŋuɑ e din tie dɑɑnɔ nbɑ din tuu be Aleopɑɑj tintɑɑnkɑɑnu ni. K puosuɑ mun din be b ni, k u sɑnn yi Dɑmɑlis. K lieb mun din be k pukn’m.