Read Moba Tuonɑ 18 Bible Online

Tuonɑ 18 - Moba bible

Tuonɑ 18

¹L puolpo e k Pɔul din nyii Atenn k sɑɑn Kuolent.

²Lenŋ e k u din sɑɑ lɑ *Suif nisuɑ, k u sɑnn yi Akiilɑɑs, wun nbɑ k b din mɑl’ɔ Pɔn, k ŋuɑ nɑn u ŋɑɑpuo Pliisiil nyii Itɑɑli k bɑɑl Kuolent, k mɑɑn kpɑnbɑlɑ yudɑɑnɔ Kluod din tul mɔb ɑ Suifnbɑ kul n nyi Luonm. Bɑɑ be Kuolent nɑ, l dɑɑ k wei, k Pɔul din tɑn bɑɑl b ŋɑɑk ni,

³ɑ wuu be nɑn’m, k mɑɑn b kul din jikit bonkobt gbɑnt e tie ŋei[7].

⁴K *Fuondɑɑl kul, u tuu kuɑ yenjiɑntu dieok ni, k gbɑɑ ɑ Suifnbɑ nɑn Gleknbɑ n gbɑt l pɑɑk kii wɑɑ Yiesu lɑbɑmɑnn.

⁵Siilɑɑs nɑn Tiimuote nbɑ din tɑn nyii Mɑɑseduɑnn k bɑɑl yuo nbɑ nɑ, k Pɔul ji din jii u yuo kul k muɑntl Yiesu mɑɑn k tien Suifnbɑ nɑ, k din wɑnt nɑn ninmɔnn ɑ Yiesu e tie *Klistu nɑ.

⁶Ŋɑɑn k b lek din k sɑk mɑɑn mɑnŋ, k suki’ɔ. Ŋɑnn e k u din pit pit u nii nɑn u tɑɑ, ŋɑɑn yet’b ɑ: «L i tie k i tɑn kɔnŋ i mɑnfuol i e, l jii i mɔnŋ mɔnŋ yulɑ pɑɑk e. N nuu kɑɑ jik. Lɑɑ jii dinnɑ k sɑɑ, sie k n nyik ŋɑɑn wɑnn bin nbɑ k tie Suifnbɑ nɑ Yiesu mɑɑn mɑnŋ.»

⁷Ŋɑnn e k u nyik’b ŋɑɑn sɑɑn sɑɑ be suɑ ŋɑɑk ni, k b yi’u Tiitius Sustus. K u din jiɑntl Yennu. U ŋɑɑk mɑnŋ din kpiɑ nɑn Suifnbɑ jɑɑnti dieok o.

⁸K Suifnbɑ jɑɑnti dieok mɑnŋ yudɑɑnɔ Kliispus nɑn u ŋɑɑtieb kul tien Yonmdɑɑnɔ yɑdɑ, k Kuolent-tieb bonciɑnn mun din gbiintl Pɔul mɑɑn k tien yɑdɑ k b wul’b Yennu nyunwulu.

⁹Nyɑyeunŋ o dinn k Pɔul din tɑn lɑ yelntu. K u yelntu mɑnŋ ni k Yonmdɑɑnɔ yet’ɔ ɑ: «Dɑɑ tiin jɑŋmɑɑni, ŋɑɑn kii muɑntl n mɑɑn mɑnŋ k dɑɑ nyikt,

¹⁰k mɑɑn n be nɑn’ɑ, k suɑ kɑɑ k sɑɑ kpil’ɑ k tien’ɑ dɑnŋ, k mɑɑn niib bonciɑnn be duo nɑ ni k tie n yɑb.»

¹¹L pɑɑk, Pɔul din be lenŋ binn nɑn ŋmɑɑli ŋɑnluob, k din wɑnt niib Yennu mɑɑn.

¹²Tɔn, yuo nbɑ k Gɑɑliɔn din tie Akɑɑyi tinŋ nɑ yudɑɑnɔ, k Suifnbɑ din tɑn tɑɑn lieb k lek Pɔul k suol’ɔ, k sɑɑn nɑn’ɔ buut buol,

¹³k sɑɑ yet ɑ: «Juɑ nɑ tumi niib biɑnŋ nbɑ k b sii jiɑntl Yennu k l k tɑɑ nɑn t *senni.»

¹⁴Pɔul nbɑ din yɑɑ wun pɑk yuo nbɑ, k Gɑɑliɔn yet Suifnbɑ mɑnŋ ɑ: «Yinm Suifnbɑ, l i tie k u kpii nilɔ kuo u tun biit nbɑ gbenŋ, l bo sii ŋɑn k i di suklu k gbiint,

¹⁵ŋɑɑn lɑɑ tie mɑɑn nbɑ jii k jiin i mɔnŋ mɑɑn nɑn i sɑnɑ, nɑn i mɔnŋ senni nɑ i e, i mɔnŋ mɔnŋ n got l ni. N k sɑk ɑ n sɑɑ bu l mɑbuolu.»

¹⁶Ŋɑnn e k u bel nyinn’b buut buol mɑnŋ.

¹⁷K b suol Sositenn wun nbɑ tie Suifnbɑ jɑɑnti dieok yudɑɑnɔ k tɑn buo’u buut mɑnŋ buol ni, ŋɑɑn k Gɑɑliɔn bɑkɑ tɑɑn kɑɑ b po.

¹⁸K Pɔul din dɑɑ biɑl Kuolent ŋmɑɑli bonciɑnn. Ŋɑnn e k u din tɑn cɑb Yiesuweilɑ, ŋɑɑn kuɑ ŋɑlunŋ k sɑɑn Siili tinŋ ni k Pliisiil nɑn u sɔlɔ Akiilɑɑs din ciɑn’ɔ. Wɑɑ din tɑn yɑɑ wun kuɑ ŋɑlunŋ nɑ, u din be Senkle k te k b kuol u yut mɔsonn nbɑ k u din senn nɑ pɑɑk.

¹⁹Ŋɑnn e k b din bɑɑl Efes. Lenŋ e k Pɔul din nyik Pliisiil nɑn Akiilɑɑs ŋɑɑn gɑl sɑɑn Suifnbɑ jɑɑnti dieok ni, k fɑɑ lɑbɑɑl nɑn Suifnbɑ,

²⁰k b tɑn miɑl’ɔ ɑ wun biɑl nɑn’m k wei ŋɑɑn k u k sɑk.

²¹Wɑɑ din yɑɑ wun cɑb’b k sɑɑn nɑ, k u yet’b ɑ: «L i tie k Yennu sɑk i e, n biɑ sɑɑ jen i buol nnɑ,» ŋɑɑn biɑ jin kuɑ ŋɑlunŋ k sɑɑn.

²²Wɑɑ tɑn bɑɑl Sesɑɑle yuo nbɑ k u tuɑt gɑl Selusɑɑlenm k sɑɑ fuont Klistu mɔtɑɑɔk niib ŋɑɑn gɑl sik Antiɑɔs biɑk,

²³k sɑɑ wei lenŋ, k biɑ tɑn nyii lenŋ k sɑɑ Gɑɑlɑɑti nɑn Fliiji yɑkɑ po, k sɑɑ cien Yiesuweilɑ kul pɑlɑ.

²⁴Ŋɑnn e k Suif jɑsuɑ nnɑ din be, k u sɑnn yi Apuoluos, k b din mɑl’ɔ Aleksɑndli, k u din tɑn bɑɑl Efes. U din tie wun nbɑ mi mɑɑn e, k din mi Yennu lolkpel kɑdɑɑɔk fɑnu.

²⁵B din ponŋ wɑnn’ɔ Yonmdɑɑnɔ sɔnu e wɑɑ, k u tɑn bɑɑl k din piɑk wɑnt Yiesu po bonŋɑnn nɑn ninmɔnn, ŋɑɑn u din mi Sɑn nbɑ din wuul niib Yennu nyunwulu biɑnŋ nbɑ kuukuɑ e.

²⁶K u din piin piɑk Yennu mɑɑn nɑn pɑlcienn, Suifnbɑ jɑɑnti dieok ni, k Pliisiil nɑn u sɔlɔ Akiilɑɑs nbɑ gbɑt u mɑɑn mɑnŋ nɑ, k b tɑn jii’u k fiit Yennu sɔnu bonciɑnn fɑnu k wɑnn’ɔ.

²⁷L puolpo e k Apuoluos dukn ɑ wun sɑɑn Akɑɑyi. K Yiesuweilɑ nbɑ din be Efes nɑ sonm’ɔ, k diɑn kɑdɑɑɔk k tul Yiesuweilɑ nbɑ be Akɑɑyi nɑ, ɑ u i tɑnŋ i bɑɑl, bin gɑɑl’ɔ sɑɑɔnŋ. Wɑɑ tɑn bɑɑl lenŋ yuo nbɑ, k u set tot bin nbɑ tien yɑdɑ Yennu ninkpɑbɑɔnŋ pɑɑk,

²⁸k mɑɑn ŋuɑ nɑn Suifnbɑ nbɑ din tɑn noi nɑn lieb, k u din jikt Yennu lolkpel kɑdɑɑɔk, k wɑnt’b ɑ Yiesu e set tie Klistu k din pɑk nɑn pɑnŋ k nyɑnn’b niwol ni.