Read Moba Tuonɑ 2 Bible Online

Tuonɑ 2 - Moba bible

Tuonɑ 2

¹Tɔn, jɑɑnm nbɑ k b yi’l *Pɑntekuot dɑɑl e bɑɑl, k dɑɑl mɑnŋ e k Yiesuweilɑ kul ɑ lɑkn tɑɑn lieb boyenn kuɑ ni.

²L tɑɑkpɑɑk ni k fuut nyii sɑnpɑɑpo k fu nɑɑn nɑn wonpɑɑluk o dɑ nɑ, k bɑɑl sik k gbie ŋɑɑk nbɑ k b kɑl nɑ ni.

³K b lɑ k siɑl nɑɑn nɑn mupieunŋ nɑ, k yɑt k tuɑ tuɑ suɑ kul pɑɑk

⁴k Foŋɑnm gbie k yent suɑ kul ni, k b piin piɑk mɑbuolu buolu nbɑ k Foŋɑnm yɑɑ bii piɑk nɑ.

⁵K *Suifnbɑ nbɑ tie yentinnɑ mun din be Selusɑɑlenm l yuo, bin nbɑ nyii tini kul po tingbounŋ nɑ ni k bɑɑl lenŋ.

⁶Bɑɑ gbɑt fuut mɑnŋ yuo nbɑ, k nibul tikl lenŋ, k l tien’m yɑɑl-lituk, k mɑɑn Yiesuweilɑ mɑnŋ piɑk bɑlgɑni suɑ kul mɑɑn ni k u gbiɑ.

⁷K l tien’m bɑktnɔunŋ nɑn yɑɑl-lituk, k b boi b lieb ɑ: «Niib nɑ kul nbɑ piɑk nɑ k tie Gɑɑliile tieb kɑɑ ɑɑ?

⁸K l tien nlee k t kul ɑ tɑn jiɑ gbiɑ k b piɑk t mɔnŋ mɔnŋ mɑɑn nnɑ?

⁹T siɑb nyii Pɑlt nɑn Medi nɑn Elɑnm nɑn Mesopotɑɑmi nɑn Suude nɑn Kɑɑpɑɑdos nɑn Pɔn nɑn Asii,

¹⁰nɑn Fliiji nɑn Pɑnfiili nɑn Ejipt, nɑn Liibi yɑkɑ po siɑn nbɑ kpiɑ nɑn Siilenn, duo nbɑ kpiɑ nɑn Liibi nɑ, k t ni yenm mun biɑ nyii Luonm,

¹¹k t siɑb tie Suifnbɑ, k lieb mun tie buolgɑnu nbɑ din lebt b jɑɑnti k wɑɑ Suifnbɑ Yennu, k t yenm mun biɑ nyii Klet nɑn Alɑɑbi, ŋɑɑn k t kul ɑ lek gbiɑ k b piɑk t mɔnŋ mɔnŋ mɑɑn ni, k piɑk dont Yennu sɑnn nɑn u bɑktnɔunŋ tuonjɑɑnɑ nbɑ k u tun.»

¹²K l bɑkt ŋɑɑn yɑɑl lit’b k ŋmɑt b yɑn k b boi b lieb ɑ: «Lin nbɑ nɑ pɑɑk tie bee?»

¹³Ŋɑɑn k siɑb mun biɑ lɑɑ k sɑlkt Yiesuweilɑ mɑnŋ ɑ: «B nyuu dɑɑn e k yib.»

¹⁴Ŋɑnn e k Piɑl nɑn u tuomiinbɑ lieb piik nɑn yenɔ kuɑ nɑ fiil k set nibul nɑ tuɑnn po, k Piɑl pɑk sɑnpɑɑpo wɑɑ ɑ: «Yinm Suifnbɑ, nɑn yinm nbɑ kul be Selusɑɑlenm nɑ, gbiintl mɑn fɑnu mɑɑ yɑɑ n pɑk’i lin nbɑ nɑ, k gbɑt l pɑɑk.

¹⁵Yɑɑ duki nɑn jɑb nɑ yib e nɑ, ŋɑɑn b k yib kɑɑ, k mɑɑn l dɑɑ tie sɑn-nyɑyendɑnn e.

¹⁶Lin nbɑ tien nɑ tie lin nbɑ k *Yennu sɔkni Suoel din yet k yɑɑ l tɑn sɑɑ tien nɑ e nɑ, ɑ:

¹⁷‹Yennu yet ɑ: *Dulnyɑ juontu yuo n tɑn sɑɑ tun nnɑ e: n tɑn sii siknt n Siek suɑ kul pɑɑk k i bonjɑbis nɑn i sɑpɑɑnbis tɑn sii sɔknt n mɑɑn k i nɑɑsinm mun tɑn sii lɑɑt yelntu, k i jɑkpelɑ tɑn sii dɑmi dɑmiit.

¹⁸K l yuo mɑnŋ n tɑn sii siknt n Siek mɑnŋ n tuontunnɑ nbɑ tie jɑb nɑn bin nbɑ tie puob pɑɑk k b mun biɑ tɑn sii sɔknt n mɑɑn.

¹⁹N tɑn sii tuun bɑktnɔunŋ tuonjɑɑnɑ sɑnpɑɑpo, nɑn bɑktnɔunŋ nyinɑ tingbounŋ nɑ ni, k sɔn nɑn muu nɑn munyuuk tɑn sii be,

²⁰k yennu tɑn sɑɑ kpint k bɔnn, k ŋmɑɑlk mun tɑn sɑɑ kpint k mɔnn nɑn sɔn nɑ, k l puolpo n dɑɑl sɑɑ bɑɑl k l sii tie dɑjɑɑnn e,

²¹k suɑ kul nbɑ tɑn boi min Yonmdɑɑnɔ po, n sɑɑ fiel’ɔ wɑɑ.› »

²²Ŋɑnn e k Piɑl biɑ ŋɑnm yet ɑ: «Yinm Islɑɑeltieb, gbiintl mɑn lin nbɑ k n yɑɑ n yet’i k jikt sɑɑ Yiesu nbɑ tie Nɑɑsɑɑlet nilɔ nɑ po. I mɔnŋ mɔnŋ mi nɑn Yennu te k u tuun bɑktnɔunŋ tuonjɑɑnɑ nɑn nyinɑ i ni, k l set wɑnt nɑn mɔni nɑn Yennu e tun’ɔ.

²³Yennu mi lin nbɑ yɑɑ lin tɑn tien, k l pɑɑk k u dɔnŋ lol lol k kubn’ɔ i nuu ni, k i te k biitdɑnm kpɑɑ tɑbn’ɔ dɑpunpunn pɑɑk k kpii’u, k l wɑnt nɑn yinm e set kpii’u.

²⁴«Wɑɑ dɑɑn kpo k dɑɑ be kuun nii ni nɑ, k Yennu fɑt’ɔ k fiin’ɔ kuun ni, k mɑɑn kuun k fit diɑ’u.

²⁵K mɑɑn Dɑɑfiid din yet k jikt sɑɑ Yiesu po k yɑɑ ɑ: ‹N din tun lɑɑt Yonmdɑɑnɔ n tuɑnn ni, k mɑɑn u be n niidiitu po, ɑ n dɑɑ jekl.

²⁶L pɑɑk, n mɔk pɑlpienn k piɑk pɑlpienn mɑɑn. Mi i lek i tɑnŋ i kpo gbɑɑ, ŋɑɑn n sii mɔk dindɑnn,

²⁷k mɑɑn ɑ tɑn kɑn nyik n siek k lin kpɑkn kpientinŋ ni. A kɑn ŋɑɑ k min ɑ Niŋɑnɔ gbɑnɑnt n tɑn bɑt,

²⁸k ɑ biɑ te k n bɑnn sɔni nbɑ bɑɑt mɑnfuol ni, k mɑɑ sii be ɑ tuɑnn ni n sii mɔk pɑlpienn nbɑ kɑɑ pɑɑk.› »

²⁹K Piɑl biɑ ŋɑnm yet yɑɑ ɑ: «N nɑɑ wɑɑs, n sɑɑ fit wɑnn’i nɑn bɑlmɔni k jikt sɑɑ t yejɑsɑɑkuɑ Dɑɑfiid po. U din kpo k b pii’u, k u kɑɑɔk dɑɑ be t buol nnɑ nɑ.

³⁰Ŋɑɑn u din tie Yennu sɔkni e, k din mi nɑn Yennu senn mɔsonn k tul’ɔ, k yet yɑɑ ɑ, u tɑn sɑɑ jii u yɑɑbuonn yenɔ kuɑ k din’ɔ u mɔnŋ nɑɑn.

³¹Dɑɑfiid din mi lin nbɑ k Yennu yɑɑ wun tɑn tien. L pɑɑk, k u din pɑk *Klistu kuun fiilu po, k yet ɑ Yennu Nigɑnntuɑ tɑn kɑn kpɑkn kpientinŋ, k u gbɑnɑnt biɑ kɑn bɑt.»

³²«Yiesu nbɑ nɑ e k Yennu dɑɑn fiin’ɔ kuun ni, k t kul ɑ nɑ mun tie u kuun fiilu mɑnŋ siɑlɑɑdɑnm.

³³K Yennu biɑ donn’ɔ ɑ wun kɑl u niidiitu po. Wɑɑ kɑl nɑ k u gɑɑl Foŋɑnm nbɑ k u Bɑɑ din senn mɔsonn ɑ u sɑɑ tul’ɔ nɑ, k mɔtɑɑnɑ k u yɑt Foŋɑnm mɑnŋ t pɑɑk k ŋɑnn e k i gbiɑ k biɑ lɑɑt lin nbɑ tuun t ni nɑ.

³⁴K mɑɑn Dɑɑfiid din k duo *Yendɔunŋ ni u tiɑɔnŋ, ŋɑɑn u din yet ɑ: ‹Yonmdɑɑnɔ Yennu yet n Yonmdɑɑnɔ[1] ɑ Kɑln n niidiitu po

³⁵mɔkmɔk nɑn mɑɑ tɑn sɑɑ jii ɑ dɑtɑi k tien’m ɑ tɑɑkpɑktɑ.› »

³⁶K Piɑl biɑ yet ɑ: «Tɔn, l ŋɑn k Islɑɑeltieb kul n bɑnn nɑn l tie Yiesu nɑ e, wun nbɑ k i dɑɑn te k b kpɑɑ’u dɑpunpunn pɑɑk k kpii’u nɑ, ŋuɑ e k Yennu wɑnn nɑn u tie Klistu k biɑ tie Yonmdɑɑnɔ biɑk.»

³⁷Niib nɑ nbɑ gbɑt nnɑ mɑnŋ, k b pɑlɑ ni biil bonciɑnn, k b boi Piɑl nɑn u lieb nɑ ɑ: «T nɑɑ wɑɑs, k t sɑɑ tien nlee?»

³⁸K Piɑl yet’b ɑ: «Sie k i kul ɑ n mɔ kuɑŋɑɑn k lebt binbenŋ, k tin wul’i Yennu nyunwulu Yiesu Klistu sɑnn ni, k Yennu n nyik i biit k cɑb’i, k sɑɑ tul’i u piini nbɑ tie Foŋɑnm nɑ,

³⁹k mɑɑn u ponŋ din senn mɔsonn k tul yinm nɑn i wɑɑs nɑn bin nbɑ kul be bɑnfɔkl k yɑb bonciɑnn k Yonmdɑɑnɔ Yennu tɑn sɑɑ yiin’m nɑ.»

⁴⁰L puolpo e k Piɑl pɑk mɑɑn bonciɑnn k kpɑɑn’m k biɑ cie b pɑlɑ ɑ: «Nyint i mɔnŋ mɑn mɔtɑɑnɑ nibiit nɑ sinsuuk ni.»

⁴¹Bin nbɑ din sɑk u mɑɑn mɑnŋ k b wul’b Yennu nyunwulu l dɑɑl nɑ, din tie nɑn niib tusɑ ŋɑntɑ nɑ k pukn Klistuweilɑ po.

⁴²K b ŋɑnmt k lek tumi k bɑnt tuomiinbɑ mɑnŋ wɑnnu, k jii b yuo k tɑɑn diɑ lieb nɑn mɔtɑɑɔk, k lɑknt k centl pɑɑnu, k biɑ tiki mei Yennu

⁴³K jijiet ji din mɔk suɑ kul, k mɑɑn tuomiinbɑ nɑ tuun bɑktnɔunŋ tuonjɑɑnɑ bonciɑnn.

⁴⁴K Yiesuweilɑ mɑnŋ kul ɑ biɑ lek diɑ lieb nɑn mɔtɑɑɔk, k centl b bonɑ kul k tien b lieb,

⁴⁵k tuu kɔi bɑɑ mɔk lin nbɑ k jikt l likli k tuol b lieb, k jɑnŋt nɑn suɑ kul nbɑ luon biɑnŋ nbɑ.

⁴⁶Dɑɑl kul b biɑ lek tuu tɑɑn lieb e Yennu jɑɑnti ŋɑsɑɑkɑk ni, k b lɑknt bɑɑ jedikpɑguul b mɔnŋ ŋei ni, k sɑɑ di jiet nɑn lieb nɑn pɑlpienn, k ninfɔksɑi kɑɑ nɑn b lieb.

⁴⁷K yuo kul k b pɑk Yennu, k suɑ kul pɑl mei b pɑɑk. K dɑɑl kul k Yonmdɑɑnɔ biɑ ŋɑnmt k te k niib lɑɑt fielu k puki b pɑɑk.