Read Moba Tuonɑ 20 Bible Online

Tuonɑ 20 - Moba bible

Tuonɑ 20

¹L kpikpiluk puolpo e, k Pɔul ji din yiin Yiesuweilɑ nɑ, k tɑn cie b pɑlɑ, ŋɑɑn ji cɑb’b, k yɑɑt k sɑɑn Mɑɑseduɑnn tinŋ ni,

²k din lin Mɑɑseduɑnn tinŋ yɑkɑ po, k biɑ pɑk Yiesuweilɑ nbɑ be lenŋ nɑ Yennu mɑɑn bonciɑnn k kuɑnt’b pɑlɑ, ŋɑɑn gɑl sɑɑn Gleknbɑ tinŋ ni.

³U ji be lenŋ k sɑɑ jɑnŋ ŋmɑɑli ŋɑntɑ, k l puolpo, k u ji tie siil ɑ wun kuɑ ŋɑlunŋ k sɑɑn Siili, ŋɑɑn tɑn bɑnn nɑn *Suifnbɑ loln lolɑ k guu’u. L pɑɑk k u dukn ɑ l ŋɑn wun ŋmɑt k sɑɑn gɑl Mɑɑseduɑnn tinŋ ni.

⁴Piilus bik Suopɑɑtel, wun nbɑ nyii Beele nɑ, nɑn Aliistɑɑlk nɑn Sekundus, bin nbɑ nyii Tesɑɑluoniik nɑ, nɑn Gɑius, wun nbɑ nyii Delb nɑ, nɑn Tiikiik nɑn Tlofiinm, bin nbɑ nyii Asii tinŋ ni nɑ, nɑn Tiimuote, ŋɑnm e din sɑɑn nɑn Pɔul.

⁵K b gɑl tuɑnn k ji sɑɑ guu’t Tloɑs.

⁶Jɑɑnm nbɑ k b din tuu di pɑɑnu nbɑ kɑɑ * dɑtinŋ nɑ dinu puolpo e, k t ji din kuɑ ŋɑlunŋ, k nyii Fiiliip, k sɑɑ Tloɑs. K dɑɑ ŋɑnŋmu dɑɑl k t bɑɑl b buol Tloɑs, k biɑl lenŋ k jɑnŋ dɑɑ ŋɑnlole.

⁷Tɔn, k *Fuondɑɑl dɑɑjuouk k t tikl lieb, k tɑɑn nɑn Yiesuweilɑ nbɑ be lenŋ nɑ, ɑ t di Yiesu mɔtɑɑɔk dinu. K Pɔul piɑk nɑn niib nɑ dik dik dik nɑn tɑnsuuni, k mɑɑn lɑɑ sɑɑ yent k wun gɑl nɑ pɑɑk.

⁸T din tikl dituɑtuk nnɑ ni e, k b din juo fitɑ bonciɑnn lenŋ.

⁹Nɑɑsinsuɑ nnɑ mun din be k u sɑnn yi Eotiik, k u din kɑl dituɑtuk nɑ tɑkɑlbonn pɑɑk, k Pɔul piɑk mɔkmɔk, k u kɑl tikntl, k ji tɑn guɑn k libt nyii dituɑtuk muntɑ nɑ ni, k tɑn bɑɑ tinŋ ni, k b sik jii’u, k suɑ k u kpo wɑɑ.

¹⁰K Pɔul nyii dituɑtuk nɑ ni, k sonm sik tɑn fɑbn u pɑɑk k diɑ’u, ŋɑɑn yet ɑ: «I dɑɑ te k i pɑlɑ biil. U fo.»

¹¹L puolpo k u ŋmɑt k duo dituɑtuk nɑ ni, k sɑɑ dii jiet. L puolpo biɑk k u piɑk nɑn lɑɑ tɑn yent k u ji nyik’b, ŋɑɑn yɑɑn yɑɑt gɑl.

¹²Ŋɑɑn k b ji jii nɑɑsimɔ nɑ ŋɑnin, k u mɔk mɑnfuol, k b kun nɑn’ɔ nɑn pɑlpienn, k l k tie wɑɑnm-nnɑ.

¹³L puolpo k t biɑ kuɑ ŋɑlunŋ, k dɔnŋ gɑl sɑɑn Asuos. Lenŋ e k t din yɑɑ t jii Pɔul, k mɑɑn ŋuɑ din yet’t ɑ tin cet’ɔ, k mɑɑn u din luon wun sonm tɑɑtinŋ e k bɑɑl lenŋ.

¹⁴Wɑɑ din bɑɑl Asuos yuo nbɑ, k u lɑ’t, k t ji jii’u k kuɑn’ɔ ŋɑlunŋ nɑ ni, k sɑɑn Miitiilenn.

¹⁵K t biɑ tɑn tuɑt lenŋ k l yent k t bɑɑl Kio[8]. K l biɑ yent k t bɑɑl Sɑɑmuos[9], k dɑɑl nbɑ wɑɑ nɑ k t bɑɑl Miile.

¹⁶Pɔul din k luon ɑ wun sɑɑn Efes, k mɑɑn u din k luon k wun wei Asii tinŋ ni, ŋɑɑn u din luon yiɑn yiɑn, k mɑɑn u din luon ɑ l i sɑɑ fit, wun bɑɑl Selusɑɑlenm dɑjɑɑnn nbɑ k b yi *Pɑntekuot nɑ.

¹⁷Ŋɑnn e k Pɔul din tun *tuomi ɑ bin nyi Miile duo ni, ɑ k sɑɑn Efes k sɑɑ yiin *Klistu mɔtɑɑɔk niib sɑɑkɑb nɑ.

¹⁸Bɑɑ bɑɑl yuo nbɑ, k u yet’b ɑ: «I mi n binbenŋ nbɑ tuu be biɑnŋ nbɑ, mɑɑ din sint bɑɑl Asii tinŋ nnɑ k jikt sɑɑ.

¹⁹N din tuun Yennu tuonɑ nɑn sikn-n-mɔnŋ bonciɑnn, nɑn nyin-nyuut, k biɑ lɑ biknu Suifnbɑ lolɑ pɑɑk.

²⁰I biɑ mi nɑn mɑɑ din muɑntl Yennu mɑɑn k biɑ wɑnt niib ni nɑn i ŋei ni nɑ, n din pɑk’i lin nbɑ kul sɑɑ sonm’i, k k nyik k biɑ k tenn siɑl.

²¹N kpɑɑn Suifnbɑ nɑn bin nbɑ k tie Suifnbɑ kul ɑ bin mɔ kuɑŋɑɑn k lebt binbenŋ kii wɑɑ Yennu sɔnu, k tien t Yonmdɑɑnɔ Yiesu yɑdɑ.

²²«Tɔn, k mɔtɑɑnɑ Foŋɑnm e mɑb’n k n yɑɑ n sɑɑn Selusɑɑlenm, ŋɑɑn n k mi lin nbɑ sɑɑ sɑɑ tien’n lenŋ.

²³Ŋɑɑn mɑɑ mi lin nbɑ kuukuɑ tie nnɑ e. Mɑɑ lin duo kul nɑ ni, Foŋɑnm e tuu wɑnt’n nɑn ninmɔnn ɑ dɑnsɑlk nɑn fɑlɑ tɑn sii tie n yɑl e.

²⁴Ŋɑɑn n k yi n mɑnfuol k l tie siɑl, k mɑɑn min ŋɑnin luon k n tun tuonɑ nbɑ k Yonmdɑɑnɔ Yiesu tul’n nɑ e k gbenn k l tuonɑ tie k mii muɑntl lɑbɑmɑnn nbɑ wɑnt Yennu ninkpɑbɑɔnŋ po e.

²⁵«N din lin i kul ɑ sinsuuk ni, k muɑntl Yennu nɑɑn lɑbɑɑl. Tɔn, k mɔtɑɑnɑ, n mi nɑn i ji kɑn mi k lɑ’n biɑk.

²⁶L pɑɑk e te k n yet’i dinnɑ dɑɑl nɑ, ɑhuo, wun nbɑ kɔnŋ mɑnfuol nbɑ kɑɑ gbennu nɑ, n nuu kɑɑ lenŋ jik,

²⁷k mɑɑn n k mi k fɔlnt k ŋmɑt puolpo nɑn k n muɑnt Yennu nbɑ luon lin nbɑ nɑ kul k wɑnn’i.

²⁸L pɑɑk, i diɑ i mɔnŋ mɑn bonŋɑnn, nɑn Yiesuweilɑ nbɑ k Foŋɑnm kubn i nuu ni ɑ yii tie b yudɑnm kii goli’b. Ii guu Klistu mɔtɑɑɔk niib nbɑ k Yennu te k b tie u yɑb u Bijɑ kuun pɑɑk.

²⁹N mi nɑn mi i kɑɑ, nibiit tɑn sɑɑ bɑɑl i sinsuuk ni, k biil Yiesuweilɑ siɑb, nɑn kinkɑtɑ nbɑ tuu so pei biɑnŋ nbɑ nɑ.

³⁰Nisiɑb tɑn sɑɑ nyi i mɔnŋ mɔnŋ sinsuuk ni gbɑɑ, k fɑ fɑi k jiin bɑlmɔni wɑnnu po, ɑ bin tunn Yiesuweilɑ yɑn k te k bii wɑɑ’b.

³¹L pɑɑk, ii guu mɑn k dɑɑ tɑnmt mɑɑ din kpɑɑn i kul nɑn nyin-nyuut, k k nyik yennu nɑn nyiɑɔk, k tɑn jɑnŋ binɑ ŋɑntɑ nɑ ni.

³²«Mɔtɑɑnɑ, n jikt’i k tie’i Yennu nuu ni, k biɑ mi nɑn yɑɑ bɑnn u mɑɑn nbɑ wɑnt u ninkpɑbɑɔnŋ po, l mɑɑn mɑnŋ sɑɑ fit cie i pɑlɑ, k biɑ tul’i fɑɑl nbɑ tie bin nbɑ kul tie u yɑb nɑ yɑl.

³³N din k luon suɑ likli ɑmi u sɑlmɑ ɑmi u tiɑt.

³⁴I mɔnŋ biɑ mi nɑn n din diɑ n nii nɑ e k tuun, k min nɑn n wei-nɑn-lieb di k biɑ gbɑb.

³⁵Mɑɑ din tuun nnɑ mɑnŋ pɑɑk e wɑnt nɑn sie k tii tuun bonciɑnn k fit k sonm tɑlɑs-dɑnm, k dɑɑ tɑnmt Yonmdɑɑnɔ nbɑ din yet lin nbɑ nɑ ɑ: ‹Pɑlpienn sii tie dɑɑnɔ nbɑ piin piini yɑl e, k gɑl wun nbɑ gɑɑn.› »

³⁶Pɔul nbɑ gbenn mɑɑn mɑnŋ yuo nbɑ, k b kul ɑ lɑkn gbɑɑn k miɑl Yennu.

³⁷Mɔni suol’b, k b kul ɑ mɔ, ŋɑɑn jii b nii k kokn kokn Pɔul.

³⁸B pɑlɑ mɑntk din biil nɑn wɑɑ yɑɑ ɑ b ji kɑn lɑ’u nɑ pɑɑk. Ŋɑnn e k b din ciɑn’ɔ k u kuɑ ŋɑlunŋ.