Read Moba Tuonɑ 21 Bible Online

Tuonɑ 21 - Moba bible

Tuonɑ 21

¹Tɑɑ din tɑt nyik Yiesuweilɑ sɑɑkɑb mɑnŋ nɑ, k t tɔkn bɑɑl Kuos, k l yent k t bɑɑl Luod[10], k biɑ nyii lenŋ k sɑɑn Pɑɑtɑɑlɑ.

²Lenŋ e k t din lɑ ŋɑlunŋ nbɑ sɑɑ Feniisi tinŋ ni. Ŋɑnn e k t kuɑ ŋɑlunŋ mɑnŋ k sɑɑ.

³Tɑɑ tɑn lɑ duo nbɑ k nyun lint k b yi Siipl yuo nbɑ nɑ, k t gɑɑl t gɑnŋ po, k tɑn bɑɑl Siili tinŋ ni, k nyii ŋɑlunŋ nɑ ni, duo nbɑ k b yi Tiil nɑ ni, k ŋɑlunŋ mɑnŋ dɑnm din yɑɑ bin nyinn tiɑt lenŋ.

⁴Lenŋ e k t din lɑ Yiesuweilɑ, k ji biɑl be b buol ni k sɑɑ jɑnŋ dɑɑ ŋɑnlole, k Foŋɑnm din te k b yet Pɔul ɑ u ji dɑɑ sɑɑ Selusɑɑlenm.

⁵Dɑɑ ŋɑnlole nbɑ tɑn gɑl yuo nbɑ nɑ, k ŋɑnm nɑn b puob nɑn b wɑɑs din ciɑn’t, k sɑɑ nyii duo nɑ ni, k diɑn’t, k t kul ɑ gbɑɑn mɔk-kpinŋ k miɑl Yennu.

⁶L puolpo k t cɑb lieb, ŋɑɑn yɑɑn kuɑ ŋɑlunŋ k sɑɑ, k b mun ŋmɑt k kun.

⁷Ŋɑnn e k t nyii Tiil k bɑɑl Tolemɑiis. Lenŋ e k t sɑɑn fuont Yiesuweilɑ, ŋɑɑn biɑl b buol ni dɑyenn kuukuɑ.

⁸L yent sɑn-nyiɑɔk k t nyii Tolemɑiis k bɑɑl Sesɑɑle k sɑɑn kuɑ Fiiliip ŋɑɑk ni, wun nbɑ muɑntl Yiesu lɑbɑmɑnn nɑ, k be. U din tie jɑb bɑnlole nbɑ k b din lukt’b Selusɑɑlenm nɑ yenɔ e.

⁹U din mɔk sɑpɑɑnmunɑ bɑnnɑ, k b mun din tie bin nbɑ sɔknt Yennu mɑɑn.

¹⁰T din be lenŋ k tien nɑn dɑɑ ŋɑnŋɑ nɑ wɑɑ, k *Yennu sɔkni, wun nbɑ k b yi’u Agɑɑbuus, nɑ din nyii Suude k sik,

¹¹k bɑɑl t buol ni, k tɑn jii Pɔul gbɑnn, k lol u mɔnŋ mɔnŋ tɑɑ nɑn u nii, ŋɑɑn yet ɑ: «Foŋɑnm nbɑ yɑɑ biɑnŋ nbɑ e nɑ, ɑ *Suifnbɑ nbɑ be Selusɑɑlenm nɑ tɑn sɑɑ lol gbɑnn nɑ dɑɑnɔ nɑ nnɑ e, ŋɑɑn jii’u k kubn’ɔ bin nbɑ k tie Suifnbɑ nɑ nuu ni.»

¹²Tɑɑ ji din gbɑt nnɑ mɑnŋ, k tinm nɑn Sesɑɑle duo ni Yiesuweilɑ kul ɑ bɑln Pɔul ɑ u ji dɑɑ sɑɑ Selusɑɑlenm.

¹³Ŋɑɑn k u ji din jiin ɑ: «Bee tien k i mɔ k luon k i biil n pɑl i? N k tien siil nɑn bɑɑ sɑɑ lol’n Selusɑɑlenm nɑ pɑɑk kuukuɑ kɑɑ, ŋɑɑn n ponŋ tien siil nɑn k n kpo Yonmdɑɑnɔ Yiesu sɑnn pɑɑk.»

¹⁴Tɑɑ gbɑl nɑn tin tunn u yɑn nɑ, k t ji nyik ŋɑɑn yet ɑ: «T Yonmdɑɑnɔ nbɑ luon lin nbɑ nɑ, n tun.»

¹⁵T weiu mɑnŋ puolpo e, k t ji din tien siil k sɑɑ Selusɑɑlenm.

¹⁶K Yiesuweilɑ nbɑ be Sesɑɑle nɑ, k b siɑb mun din wei’t k sɑɑn. Ŋɑnn e k b din jii’t, k t sɑɑn Minɑɑsɔn ŋɑɑk ni. Minɑɑsɔn mɑnŋ ponŋ din tie Yiesuweikpel e k din tie Siipl nilɔ.

¹⁷Tɑɑ din bɑɑl Selusɑɑlenm yuo nbɑ, k lenŋ Yiesuweilɑ gɑɑl’t nɑn pɑlpienn bonciɑnn.

¹⁸K l yent sɑn-nyiɑɔk, k tinm nɑn Pɔul sɑɑn ɑ t sɑɑ fuont Sɑɑk. Yiesuweilɑ sɑɑkɑb kul ɑ mun din be lenŋ l yuo.

¹⁹Ŋɑnn e k Pɔul fuont’b, ŋɑɑn kɑt wɑnn’b lin nbɑ kul k Yennu tun k tul bin nbɑ k tie Suifnbɑ nɑ, ŋuɑ Pɔul nbɑ din tun lin nbɑ kul Yiesu sɑnn ni nɑ pɑɑk.

²⁰Bɑɑ ji din gbɑt u mɑɑn mɑnŋ nɑ, k b kul ɑ pɑk Yennu k yet Pɔul ɑ: «T nɑɑ bik, ɑ mi Suifnbɑ nbɑ tie tusɑ tusɑ biɑnŋ nbɑ k tien Yiesu yɑdɑ, k b kul ɑ biɑ diɑ Muois *senni kenkenken.

²¹Siɑb kumi’b ɑ ɑ wɑnt Suifnbɑ kul ɑ nbɑ be buolgɑnu tini ni ɑ bin yet Muois *senni, k biɑ yien’m ɑ b dɑɑ poli b wɑɑs punɑ, k biɑ yet’b ɑ b dɑɑ wɑɑ Suifnbɑ kɑɑl.

²²K t sɑɑ tien nlee nɑ? K mɑɑn b lek sɑɑ gbɑt nɑn ɑ bɑɑl nɑ.

²³L pɑɑk, t i yet’ɑ biɑnŋ nbɑ, fɑn tun l biɑnŋ. Jɑb bɑnnɑ e be nnɑ k pol pol nɑn Yennu.

²⁴Tɔn, fin nɑn ŋɑnm i sɑɑ k sɑɑ ŋɑnm i mɔnŋ, k fɑn pɑ b likli ɑ bin fit kuol b yut, k suɑ kul n fit ŋɑnm bɑnn nɑn mɑɑn nbɑ k b tuu piɑk ɑ po nɑ, l set k tie mɔni kɑɑ, ŋɑɑn ɑ mɔnŋ ponŋ wɑɑ Muois senni mɑnŋ nɑn l sɔnu.

²⁵Bin nbɑ k tie Suifnbɑ ŋɑɑn tien Yiesu yɑdɑ nɑ ŋɑnin, t ponŋ diɑn kɑdɑɑɔk k tul’b, k wɑnn’b tɑɑ din juont bɑnnu nbɑ ɑ b dɑɑ mi k di jiet nbɑ k b mɑnn pɑtl, ɑmi k ŋmɑn sɔn, ɑmi bonkobuk nbɑ k b ŋmɑkl k kpii, ŋɑɑn biɑ suol b mɔnŋ nɑn boncuncontuonɑ.»

²⁶Ŋɑnn e k Pɔul din jii jɑb mɑnŋ, k l tɑn yent, k ŋuɑ nɑn ŋɑnm din ŋɑnm b mɔnŋ. L puolpo k Pɔul din sɑɑn Yennu jɑɑnti ŋɑsɑɑkɑk ni k wɑnn dɑɑl nbɑ k ŋɑnmu mɑnŋ sɑɑ gbenn k suɑ kul sɑɑ nɑn piini k pi u mɔnŋ pɑɑk.

²⁷Dɑɑ ŋɑnlole dɑɑl nbɑ tɑn pel yuo nbɑ, k Suifnbɑ nbɑ nyii Asii k bɑɑl Selusɑɑlenm k be Yennu jɑɑnti ŋɑsɑɑkɑk ni nɑ, k b tɑn lɑ Pɔul, k te k niib nɑ kul fiil jil jil jil, k suol’ɔ,

²⁸ŋɑɑn biɑ tiɑn tintiɑni ɑ: «Suifnbɑ, sonm’t mɑn. Ŋuɑ e tie nilɔ nbɑ lin lokl kul po, k wɑnt niib k biil’b nɑn Suifnbɑ nɑn Muois senni nɑn Yennu jɑɑnti ŋɑsɑɑkɑk nɑ, k biɑ tɑn bɑɑl nɑn bin nbɑ k tie Suifnbɑ gbɑɑ Yennu jɑɑnti ŋɑsɑɑkɑk nɑ ni, k tɑn biil buol nbɑ tie Yennu tiɑɔnŋ yɑl nɑ.»

²⁹(B yet nnɑ k mɑɑn b din dɔnŋ lɑ Pɔul nɑn Tlofiinm, wun nbɑ din tie Efes nilɔ nɑ, k b be duo nɑ ni, k b dukn k mi ɑ Pɔul kuɑ nɑn’ɔ Yennu jɑɑnti ŋɑsɑɑkɑk nɑ ni e.)

³⁰L pɑɑk, k duo nɑ niib kul din fiil, k niib kul ɑ ciɑl, k bɑɑl kpil Pɔul, k suol’ɔ k piit nyinn’ɔ Yennu jɑɑnti ŋɑsɑɑkɑk nɑ ni. L tɑɑkpɑɑk ni nɑ, k siɑb luon ŋɑɑk nɑ tɑnmɔi.

³¹B ji yɑɑ bin kpi Pɔul. L yuo nɑ k Luonmtieb sejenm yudɑɑnɔ ji gbɑt ɑ Selusɑɑlenmtieb kul ɑ fiil jil jil jil.

³²K u kɑkt yiɑn ɑ, k jii sejenm nɑn b sɑɑkɑb, k b fɑɑl sik nibul nɑ ni. Niib nɑ nbɑ lɑ’u nɑn sejenm nɑ yuo nbɑ, k b ji nyik Pɔul buot.

³³K sejenm yudɑɑnɔ nɑ sɑɑn suol Pɔul, ŋɑɑn tul mɔb ɑ bin bɑɑn’ɔ jɑlt ŋɑnle, ŋɑɑn boi Pɔul nbɑ tie wun nbɑ nɑn wɑɑ biil lin nbɑ nɑ.

³⁴K nibul nɑ ni, siɑb tiɑn Pɔul pɑɑk jiɑk jiɑk. B bɑlŋmɑtuk mɑnŋ pɑɑk k sejenm yudɑɑnɔ nɑ k fit bɑnn l pɑɑk bonŋɑnn. L pɑɑk, k u tul mɔb ɑ bin jii’u k sɑɑn nɑn’ɔ kɑnŋ ni.

³⁵Bɑɑ bɑɑl kɑnŋ nɑ tɑnmɔb tɑɑŋmɑɑtɑ pɑɑk nɑ, k sejenm nɑ jii’u sɑnpɑɑpo, k mɑɑn nigbounŋ nbɑ din luon bin kpi’u nɑ pɑɑk.

³⁶B ji din wɑɑ b puol k tiɑn tintiɑni ɑ: «Kpin’mɔ mɑn.»

³⁷Sejenm mɑnŋ nbɑ ji din yɑɑ bin kuɑ nɑn’ɔ kɑnŋ ni nɑ, k u boi sejenm yudɑɑnɔ nɑ ɑ: «A sɑɑ sɑk k n pɑk siɑl k tul’ɑ nii?» K u jiin boi’ɔ ɑ: «A gbiɑ Glek mɑɑn ii?

³⁸Fin kɑɑ tie Ejipt nilɔ nbɑ k dɑɑ ŋɑnle nnɑ nbɑ gɑl nɑ ni k u te k niib bɑɑl nɑn kunkɔnn duo nɑ pɑɑk, k u jii nifokpiilt tusɑ ŋɑnnɑ, k sɑɑn nɑn’m k dɑɑn be muuk ni nɑ ɑɑ?»

³⁹K Pɔul jiin ɑ: «N tie Suif nilɔ e, k b mɑl’n Tɑɑls nbɑ be Siiliisi yɑkl ni e, k n tie digbɑngbenŋl ni nilɔ e. N bɑln’mɑ e, ŋɑɑnt k n pɑk k tul niib nɑ.»

⁴⁰Sejenm yudɑɑnɔ nɑ cɑb’ɔ mɔb, k Pɔul ŋmɑnt k set tɑnmɔb tɑɑŋmɑɑtɑ nɑ pɑɑk ŋɑɑn ŋɑk u nuu k tul niib nɑ, ɑ bin ŋmin. Bɑɑ ŋmin yuo nbɑ, k u pɑk nɑn’m Suifnbɑ mɑɑn ni, k yet ɑ: