Read Moba Tuonɑ 23 Bible Online

Tuonɑ 23 - Moba bible

Tuonɑ 23

¹Ŋɑnn e k Pɔul got tituk kɑɑnu dɑnm mɑnŋ silll, k tɑn yet ɑ: «N nɑɑ wɑɑs, mɑɑ din be biɑnŋ nbɑ k tɑn tuu mɔtɑɑnɑ, n mi nɑn l fɑn nɑn Yennu.»

²Wɑɑ yet nnɑ, k mɑnntieb yudɑɑnɔ Anɑɑniɑs yet bin nbɑ sie k kpiɑ Pɔul nɑ ɑ bin fɑɑ Pɔul mɔb pɑɑk.

³K Pɔul yet’ɔ ɑ: «Yennu sɑɑ fɑɑ fin kpinkpɑnni dɑɑnɔ nɑ wɑɑ. A kɑl lenŋ k bu n buut nɑn t *senni nbɑ wɑnt biɑnŋ nbɑ nɑ, ŋɑɑn fɑɑ yɑɑ bin buo’n nɑ, ɑ mɔnŋ biil *senni mɑnŋ ɑ.»

⁴K bin nbɑ sie k kpiɑ Pɔul nɑ yet’ɔ ɑ: «A tɑn suki Yennu mɑnntieb yudɑɑnɔ ɔɔ?»

⁵K u jiin ɑ: «N nɑɑ wɑɑs, n k mi nɑn u tie mɑnntieb yudɑɑnɔ e. L diɑn Yennu lolkpel kɑdɑɑɔk ni ɑ: ‹L k ŋɑn k ɑ pɑk bɑlbiiuk k jiin ɑ yudɑɑnɔ po.› »

⁶Tɔn, Pɔul nbɑ ji bɑnn nɑn tituk kɑɑnu mɑnŋ siɑb tie *Sɑɑdiuseɑnbɑ, k lieb mun tie Fɑɑliisiɑnnbɑ nɑ, k u yet sɑnpɑɑpo wɑɑ niib nɑ ni ɑ: «N nɑɑ wɑɑs, n tie Fɑɑliisiɑn e, Fɑɑliisiɑn bik e tie’n. K n mɔk dindɑnn nɑn kpienm tɑn sɑɑ fiil ɑ. L pɑɑk e te k b bu n buut nɑ.»

⁷Wɑɑ pɑk nnɑ mɑnŋ yuo nbɑ, k mɔniɑɔk ji fiil Fɑɑliisiɑnnbɑ nɑn Sɑɑdiuseɑnbɑ mɑnŋ sinsuuk ni, k tintɑɑnu tɑn bɔkt.

⁸(Sɑɑdiuseɑnbɑ nɑ yɑɑ ɑ kpienm fiilu kɑɑ, k *mɑlɑkɑɑnbɑ kɑɑ, k sei biɑ kɑɑ, ŋɑɑn Fɑɑliisiɑnnbɑ ŋɑnin tien l kul ɑ yɑdɑ wɑɑ.)

⁹Ŋɑnn e k b tintiɑni nɑ ŋɑnmt k do k puki, k *senniwɑntieb nɑ siɑb, bin nbɑ tie Fɑɑliisiɑnnbɑ nɑ, fiil pɑk nɑn ninmɔnn ɑ: «T k lɑ juɑ nɑ biit. Pɑsiɑl siek ɑmi mɑlɑkɑ e pɑk tul’ɔ.»

¹⁰K mɔniɑɔk nɑ din ŋɑnm k fiil bonciɑnn, k sejenm yudɑɑnɔ nɑ mi ɑ b tɑn sɑɑ mɑnn kpet k dɑt Pɔul k pɑt pɑt’ɔ. L pɑɑk, k u tul mɔb ɑ sejenm n sɑɑn k sɑɑ nyinn Pɔul tituk kɑɑnu dɑnm mɑnŋ ni, k sɑɑn nɑn’ɔ kɑnŋ nɑ ni.

¹¹L puolpo k nyiɑɔk tɑn bɔnn, k Yonmdɑɑnɔ bɑɑl Pɔul penŋ, k tɑn yet’ɔ ɑ: «Ii mɔk pɑlcienn. A ponŋ tul’n *siɑlɑ Selusɑɑlenm ɑ, k l biɑ kpɑɑ tɑlɑs e nɑn k ɑ biɑ tun Luonm duo ni nnɑ.»

¹²L din tɑn yent sɑn-nyiɑɔk, k Suifnbɑ tikl, k kɑl lol lol, ŋɑɑn biɑ pol pol, ɑ b kɑn di siɑl i ɑmi k nyu siɑl, sie k bin tɑn kpi Pɔul ɑ.

¹³Bin nbɑ din lol lol mɑnŋ din yɑb gɑl nɑn niib piinnɑ nɑ.

¹⁴Ŋɑnn e k b fiil sɑɑn Yennu mɑnntieb yudɑnm nɑn sɑɑkɑb buol k yet’b ɑ: «T pol pol nbɑ pɑɑl e, ɑ t kɑn di siɑl ɑmi k nyu siɑl, sie k tin tɑn kpii Pɔul ɑ.

¹⁵L pɑɑk, yinm nɑn tituk kɑɑnu dɑnm nɑ n tun *tuomi Luonmtieb sejenm yudɑɑnɔ nɑ penŋ, k wun nyinn Pɔul k bɑɑl nɑn’ɔ i buol nnɑ, k lii tie nɑn i luon k i boi’ɔ buboit e, k bɑnn u mɑɑn mɑnŋ po cib cib nɑ. T dɑɑn tien siil, ɑ tin kpi’u k suɑ u dɑɑ k bɑɑl nnɑ»

¹⁶Ŋɑɑn k Pɔul niipuo bijɑ mun gbɑt b lolɑ mɑnŋ, k sɑɑn kɑnŋ nɑ ni, k sɑɑ yet Pɔul l bɑnnu.

¹⁷Pɔul nbɑ gbɑt nnɑ mɑnŋ, k u yiin sejenm sɑɑkɑyenɔ, k tɑn yet’ɔ ɑ: «Jiin nɑɑsimɔ nɑ, k sɑɑn nɑn’ɔ ɑ yudɑɑnɔ penŋ, k mɑɑn u mɔk siɑl e k yɑɑ wun yet’ɔ.»

¹⁸K sejenm sɑɑkɑyenɔ nɑ jii’u k sɑɑn nɑn’ɔ b yudɑɑnɔ nɑ penŋ, k yet’ɔ ɑ: «Pɔul, wun nbɑ k t diɑ’u dɑnsɑlk nɑ, yet ɑ n bɑɑl nɑn nɑɑsimɔ nɑ ɑ penŋ, k mɑɑn u mɔk siɑl e k luon k wun yet’ɑ.»

¹⁹K sejenm yudɑɑnɔ nɑ suol u nuu suon nnɑ, k sɑɑn nɑn’ɔ kpinŋ, k sɑɑ boi’ɔ: «A mɔk bɑl-lɑni e k luon k ɑ yet’n ii?»

²⁰K u yet’ɔ ɑ: «*Suifnbɑ tɑɑn mɔb k luon k bin won boi’ɑ wonn k ɑ nyinn Pɔul k sik nɑn’ɔ b tituk ni, k lii tie nɑn b luon k bin bo boi’ɔ buboit e, k bɑnn u po cib cib nɑ.

²¹Ŋɑɑn ɑ dɑɑ fiin b po, k mɑɑn Suifnbɑ siɑb yɑb, k gɑl nɑn jɑb piinnɑ nɑ wɑɑ, bin nbɑ sɑɑ bɔl k guu ɑ bin kpi’u. B kul ɑ pol pol e, k yɑɑ ɑ b kɑn di jiet ɑmi k nyu siɑl, sie k bin tɑn kpi’u wɑɑ. B kpɑn tien siil e wɑɑ ŋɑɑn ji guu ɑ mɔb.»

²²Ŋɑnn e k sejenm yudɑɑnɔ nɑ yet nɑɑsimɔ nɑ ɑ: «I mi k ɑ yet suɑ nɑn ɑ kumi’n l lɑbɑɑl,» ŋɑɑn te k u ŋmɑt.

²³Ŋɑnn e k sejenm yudɑɑnɔ nɑ yiin u sɑɑkɑb nɑ ni bɑnle k tɑn yet’b ɑ: «Jiin mɑn sejenm kobiinle, nɑn tɑnjɑklɑ piinlole, ŋɑɑn jii kpɑntuɑlɑ kobiinle mun k tien siil k sɑɑn Sesɑɑle. Ii nyi gɔtonm yuo nyiɑɔk nɑ, k sɑɑn.

²⁴Jiin tɑɑnm k tul Pɔul k wun jɑk, ŋɑɑn tenn tɑɑnlei kii diɑ, kii sɑɑ nɑn’ɔ suon nnɑ, k sɑɑ bɑɑl yudɑɑnɔ Feliiks penŋ, k u dɑɑ lɑɑt dɑnŋ,»

²⁵k u diɑn kɑdɑɑɔk k tul’b, k l wɑnt ɑ nnɑ:

²⁶«Min Kluod Liisiɑs e diɑn kɑdɑɑɔk nɑ, k tien Cɑnbɑɑ yudɑɑnɔ Feliiks, n fuont’ɑ.

²⁷«Suifnbɑ e dɑɑn suol juɑ nɑ, k dɑɑn bo sɑɑ kpi’u wɑɑ, ŋɑɑn k n gbɑt ɑ u tie Luonm nilɔ e. L pɑɑk, k n jii sejenm, k sɑɑn k sɑɑ fɑt’ɔ.

²⁸N dɑɑn luon k n bɑnn lin nbɑ pɑɑk e k b tɑɑl’ɔ mɑnŋ. L pɑɑk, k n jii’u k bɑɑl nɑn’ɔ b tituk kɑɑnu dɑnm buol,

²⁹k tɑn bɑnn nɑn l tie b mɔnŋ senni pɑɑk e k b tɑɑl’ɔ mɑnŋ. Ŋɑɑn l k tie bisiɑt kɑɑ k l bo jɑnŋ nɑn u kuun, ɑmi dɑnsɑlkuɑnu.

³⁰«Ŋɑnn e k b bo kumi’n ɑ Suifnbɑ loln lolɑ ɑ bin kpi’u. L pɑɑk, k n yɑɑ ɑ sejenm n jii’u k bɑɑl ɑ penŋ yiɑn yiɑn, ŋɑɑn k n biɑ yet bin nbɑ tɑɑl’ɔ mɑnŋ, ɑ bin bɑɑl ɑ buol, k tɑn wɑnn’ɑ lin nbɑ k b tɑɑl’ɔ l pɑɑk nɑ.»

³¹Ŋɑnn e k sejenm nɑ jii Pɔul nɑn b yudɑɑnɔ nbɑ tul’b mɔb biɑnŋ nbɑ nɑ, k sɑɑ nɑn’ɔ, k sɑɑ bɑɑl duo nbɑ yi Antiipɑɑtliis nɑ, l nyiɑɔk mɑnŋ.

³²K l yent sɑn-nyiɑɔk, k sejenm nbɑ sonm tɑɑtinŋ nɑ ji ŋmɑt kun Selusɑɑlenm, kɑnŋ nɑ ni, ŋɑɑn cɑb tɑnjɑklɑ nɑ ɑ bin sɑɑn nɑn’ɔ.

³³K b jii’u k sɑɑn nɑn’ɔ Sesɑɑle, k sɑɑ jii kɑdɑɑɔk nɑ k tul yudɑɑnɔ Feliiks nɑ, ŋɑɑn biɑ jii Pɔul k kubn’ɔ.

³⁴K yudɑɑnɔ mɑnŋ gɑɑl kɑdɑɑɔk nɑ k lii, ŋɑɑn boi Pɔul ɑ u nyii tinlɑnŋ e? Wɑɑ bɑnn nɑn Pɔul nyii Siiliisi nɑ,

³⁵k u yet’ɔ ɑ: «Bin nbɑ tɑɑl’ɔ mɑnŋ i bɑɑl yuo nbɑ, n sɑɑ bu ɑ buut.» Ŋɑnn e k u tul mɔb ɑ guutieb ii diɑ’u kpɑnbɑl *Heluod ŋɑɑk ni.