Read Moba Tuonɑ 24 Bible Online

Tuonɑ 24 - Moba bible

Tuonɑ 24

¹Tɔn, k dɑɑ ŋɑnŋmu tɑn gɑl, k Yennu mɑnntieb yudɑɑnɔ Anɑɑniɑs, nɑn sɑɑkɑb, nɑn lɔyɑ wun nbɑ k b yi’u Teltulus nɑ, tɑn bɑɑl Sesɑɑle k sɑɑn yudɑɑnɔ Feliiks buol ni, k wɑnn’ɔ bɑɑ tɑɑl Pɔul lin nbɑ nɑ pɑɑk.

²B yiin Pɔul k u bɑɑl b tuɑnn k Teltulus piin k tɑɑl’ɔ k yien ɑ: «Cɑnbɑɑ Feliiks, ɑ pɑɑk e te k t tinŋ nɑ mei, nɑn ɑ minu pɑɑk te k duo nɑ ŋɑn.

³Siɑl kul po t mɔk pɑlpienn nɑn lin nbɑ nɑ yuo kul ɑ, k t tien’ɑ niipuouk bonciɑnn.

⁴N k mɑntk luon k n biil ɑ yuo, ŋɑɑn n bɑln’mɑ e k ɑ di suklu k gbiint t mɑɑn nɑ wɑɑn.

⁵«T lɑ k juɑ nɑ biil bonɑ bonciɑnn, k biɑ jen ɑ, k u tuk *Suifnbɑ b sinsuuk ni, tingbounŋ nɑ kul ni. Ŋuɑ e biɑ tie Nɑɑsɑɑlienbɑ[11] yudɑɑnɔ gbɑɑ,

⁶k u dɑɑn luon k wun kuɑn jɑknt Yennu jɑɑnti ŋɑsɑɑkɑk ni. Ŋɑnn e te k t suol’ɔ k t dɑɑn bo luon ɑ tin bu u buut e nɑn t *senni nbɑ wɑnt biɑnŋ nbɑ nɑ,

⁷ŋɑɑn k sejenm yudɑɑnɔ Liisiɑs bɑɑl, k tɑn kpil t niib nɑn pɑnŋ k fɑt’ɔ t penŋ.

⁸L puolpo e k Cɑnbɑɑ Liisiɑs mɑnŋ biɑ tul mɔb ɑ bin nbɑ tɑɑl’ɔ mɑnŋ n bɑɑl ɑ buol nnɑ. A mɔnŋ sɑɑ fit boi’ɔ buboit k lɑ nɑn tɑɑ tɑɑl’ɔ lin nbɑ nɑ pɑɑk, l tie bɑlmɔni e.»

⁹Ŋɑnn e k Suifnbɑ wɑnn bɑɑ tɑɑl’ɔ lin nbɑ nɑ pɑɑk nɑ k yɑɑ ɑ l tie mɔni.

¹⁰L yuo nɑ k yudɑɑnɔ nɑ wɑnn Pɔul nuu ɑ wun pɑk. K Pɔul yet ɑ: «N mi nɑn fɑɑ tien tinm Suifnbɑ nɑ bɑlbuulɔ, l dii binɑ bonciɑnn. L pɑɑk, l tien’n pɑlpienn nɑn mɑɑ yɑɑ n pɑk n mɔnŋ mɔnŋ pɑɑk ɑ buol nnɑ.

¹¹«L i tie k ɑ luon, ɑ sɑɑ boi k bɑnn nɑn l k gɑl nɑn dɑɑ piik nɑn ŋɑnle nnɑ k n dɑɑn duo Selusɑɑlenm, mɑɑ n sɑɑ jiɑnt Yennu.

¹²K Suifnbɑ dɑɑn k lɑ k n noi mɔnɔsiɑɔk nɑn suɑ Yennu jɑɑnti ŋɑsɑɑkɑk ni, ɑmi k tiki niib k fiint b wutuol Suifnbɑ jɑɑnti diet ni, ɑmi duo mɑnŋ ni biɑk.

¹³B biɑ kɑn fit k wɑnn lin nbɑ k bilsuk kɑɑ, k b tɑɑl’n mɑnŋ.

¹⁴«Min yien’ɑ e nɑn mɑɑ wɑɑ sɔnu nbɑ k Suifnbɑ yien ɑ l sɔnu tie fɑɑk sɔnu nɑ, ŋɑɑn min lek jiɑntl t yejɑnm Yennu e. Lin nbɑ diɑn Muois senni kɑdɑɑt nɑn *Yennu sɔkniinbɑ kɑdɑɑt ni nɑ, n tien l kul ɑ yɑdɑ,

¹⁵k mɔk dindɑnn nɑn niib nɑ mun biɑ mɔk l dindɑnn buolu nnɑ e, nɑn Yennu tɑn sɑɑ fiin bin nbɑ tie niŋɑnm nɑn bin nbɑ tie nibiit kul kuun ni.

¹⁶K l pɑɑk, n yɑbi n mɔnŋ yuo kul, mɑɑ n tun lin nbɑ tuok sɔnu, Yennu nɑn nisɑɑlk buol ni.

¹⁷«Tɔn, mɑɑ din nyii Selusɑɑlenm, l din wei bonciɑnn nɑ, k n ji tɑn ŋmɑt lenŋ mɑɑ n tul n niib likli, ŋɑɑn biɑ pi Yennu piini.

¹⁸Tɔn, sinsinn, mɑɑ dɑɑn ŋɑnm n mɔnŋ k gbenn nɑ, k n dɑɑ be Yennu jɑɑnti ŋɑsɑɑkɑk ni, k dɑɑ pi piini mɑnŋ, k b kuɑ k lɑ’n lenŋ. Niib bonciɑnn kɑɑ dɑɑn ciɑn’n, k fuut mun biɑ dɑɑn kɑɑ.

¹⁹Ŋɑɑn k Suifnbɑ nbɑ dɑɑn nyii Asii tinŋ ni nɑ ŋɑnin dɑɑn be Yennu jɑɑnti ŋɑsɑɑkɑk nɑ ni. L i bo i tie k b lɑ n biit, l bo kpɑɑ tɑlɑs k bin bo bɑɑl k tɑɑl’n.

²⁰Ŋɑnn i kɑɑ, fɑn ŋɑɑn k niib nbɑ be nnɑ nɑ n wɑnn biit nbɑ k b dɑɑn lɑ k n tun, mɑɑ dɑɑn sie b tituk kɑɑnu ni yuo nbɑ nɑ.

²¹B dɑɑn k lɑ n biit, sie bon-yenn kuukuɑ nbɑ k n dɑɑn yet b sinsuuk ni, lin nbɑ k b k luon, k n yɑɑ ɑ: ‹Buut nbɑ k i bu nɑn’n nɑ tie mɑɑ yet yɑɑ ɑ kpienm fiilu be nɑ pɑɑk e.› »

²²Feliiks nbɑ ŋɑnin mi Yiesu weiu po bonŋɑnn nɑ, k u nyik mɑɑn nɑ, ŋɑɑn yɑɑ ɑ: «Sejenm yudɑɑnɔ Liisiɑs i tɑnŋ i bɑɑl yuo nbɑ, n sɑɑ got i mɑɑn mɑnŋ po,»

²³ŋɑɑn yet u sejenm sɑɑkɑyenɔ ɑ u guu Pɔul, k wuu be u yɑmɑ ni, k biɑ cɑb Pɔul yuɑsnbɑ ɑ b i tien’ɔ lin nbɑ k u luon.

²⁴Ŋɑnn e k dɑɑ ŋɑnŋɑ nnɑ tɑn gɑl, k Feliiks tɑn bɑɑl u buut buol nɑn u ŋɑɑpuo Dlusiil[12], k u tie Suif, k Feliiks te k b yiin Pɔul k bɑɑl nɑn’ɔ. K ŋuɑ Feliiks gbiintl, k Pɔul piɑk biɑnŋ nbɑ k nilɔ sɑɑ tien Yiesu *Klistu yɑdɑ.

²⁵Tɔn, Pɔul nbɑ piɑk k wɑnt yentinu nɑn mɔnŋdiɑnu nɑn buut dɑɑl bɑɑlu po yuo nbɑ, k jɑŋmɑɑni ji suol Feliiks, k u yet ɑ: «Mɔtɑɑnɑ, ii dɑɑ kii sɑɑ, ŋɑɑn l i tie k n lɑ yɑɑk, n biɑ sɑɑ ŋɑnm yiin’ɑ.»

²⁶Feliiks biɑ lek din luon nɑn Pɔul tɑn sɑɑ tul’ɔ likli e. L pɑɑk e te k u din tuu tun k yi Pɔul k piɑk nɑn’ɔ.

²⁷Tɔn, l din tie nnɑ e k sɑɑ jɑnŋ binɑ ŋɑnle k l puolpo k Polsius Festus mun gɑɑl Feliiks setu k gɑɑl *yudɑnt mɑnŋ. Feliiks din yɑɑ wun penn Suifnbɑ pɑlɑ, k ŋɑɑn k Pɔul be dɑnsɑlk ni.