Read Moba Tuonɑ 3 Bible Online

Tuonɑ 3 - Moba bible

Tuonɑ 3

¹Dɑsiɑl yenlekl dinn k Piɑl nɑn Sɑn din tɑn sɑɑ Yennu jɑɑnti ŋɑsɑɑkɑk ni Yenmiɑlyuo.

²Ŋɑnn e k b sɑɑ yɑɑ bin kuɑ Yennu jɑɑnti ŋɑsɑɑkɑk tɑnmɔb nbɑ k b din yi Tɑnmɔŋɑnŋ nɑ, k lɑ jɑsuɑ nnɑ k u kɑl lenŋ, k ponŋ tie wɔbk u mɑɑlu ni wɑɑ, k dɑɑl yejɑ ŋɑɑk kul k b din tuu jii’u k bɑɑl nɑn’ɔ tɑnmɔb mɑnŋ buol ni, ɑ wuu mei likli niib nbɑ bɑɑt Yennu jɑɑnti ŋɑsɑɑkɑk mɑnŋ ni nɑ.

³Yuo nbɑ k u lɑ Piɑl nɑn Sɑn k b yɑɑ bin kuɑ nɑ, k u miɑl’b likli.

⁴K b jiɑnt k goli’ɔ silll, k Piɑl tɑn yet’ɔ ɑ: «Ii goli’t.»

⁵Ŋɑnn e k u ji nul u ninbinɑ k goli’b, k dɑɑn nɑn u sɑɑ gɑɑl siɑl e b penŋ.

⁶Ŋɑɑn k Piɑl yet’ɔ ɑ: «N lek k mɔk likli k biɑ k mɔk sɑlmɑ k sɑɑ tul’ɑ ni, ŋɑɑn mɑɑ mɔk lin nbɑ e k n yɑɑ n tul’ɑ. Mi i tul’ɑ mɔb Yiesu *Klistu nbɑ tie Nɑɑsɑɑlet nilɔ nɑ sɑnn ni, fiit kii sonm,»

⁷ŋɑɑn suol u niidiitu k fiin’ɔ. L tɑɑkpɑɑk ni k juɑ nɑ tɑɑ kɑkt yiɑn ɑ,

⁸k u tɑb k fiil set, k ji piin sonm k lin, k tɑn wei’b k kuɑ Yennu jɑɑnti ŋɑsɑɑkɑk mɑnŋ ni, k yuuk k mobt nɑn pɑlpienn, k pɑk Yennu.

⁹K niib kul lɑ’u k u sonm k pɑk Yennu.

¹⁰Bɑɑ ji din bɑnn nɑn ŋuɑ e tie miɑtɔ nbɑ tuu kɑɑl k mei niib likli Yennu jɑɑnti ŋɑsɑɑkɑk tɑnmɔb nbɑ k b yi’l Tɑnmɔŋɑnŋ nnɑ, k l ji yɑɑl ŋɑɑn lit’b nɑn lin nbɑ tien k tul’ɔ nɑ pɑɑk.

¹¹K wɔbk mɑnŋ puul wɔb Piɑl nɑn Sɑn, k l tien niib nɑ kul ɑ bɑktnɔunŋ bonciɑnn, k b ciɑl sɑɑn lɑkn b buol ni. Bɑɑ lɑkn siɑn nɑ k b yi’l Sɑɑlomɔn bɑlntl.

¹²Piɑl nbɑ lɑ niib nɑ yuo nbɑ k u yet ɑ: «Yinm Islɑɑeltieb, bee k l yɑɑl ŋɑɑn lit’i ni i? K bee k i bɑli tinm nnɑ ɑ? Tɑɑ te k jɑwɔbk nɑ fiil sonm nɑ, i duki mi ɑ l tie t mɔnŋ yiikuo ɑmi t mɔnŋ yentinu pɑɑk e?

¹³Yennu nbɑ tie Ablɑɑhɑɑnm nɑn Isɑɑk nɑn Sɑɑkɔb nɑn t yejɑlieb Yennu nɑ, ŋuɑ e tie dɑɑnɔ nbɑ donn u tuontunnɔ Yiesu k tul’ɔ u mɔnŋ *yudɑnt. Yiesu mɑnŋ e k i jii’u k tien’ɔ t yudɑnm nii ni ɑ bin kpi’u nɑ, k *Piilɑɑt din ponŋ bikn sinsinn ɑ wun ŋɑɑ’u, ŋɑɑn k i yet’ɔ Piilɑɑt buol ni.

¹⁴Ŋuɑ e lek tie Yennu nilɔ, k biɑ jen ɑ tie Niŋɑnɔ, ŋɑɑn k i lek yet’ɔ, ŋɑɑn biɑ miɑl Piilɑɑt ɑ wun nyinn nikpiiluk k tul’i.

¹⁵Yinm e te k b kpii Mɑnfotultuɑ mɑnŋ, ŋɑɑn k Yennu fiin’ɔ kuun ni, k tinm e tie lin nbɑ nɑ siɑlɑɑdɑnm.

¹⁶Wɔbk nɑ tie wun nbɑ k i ponŋ tuu mi’u k biɑ lɑɑt’ɔ e, ŋɑɑn k u tɑn pɑɑk nɑ, k mɑɑn wɑɑ tien Yiesu mɑnŋ sɑnn yɑdɑ nɑ pɑɑk. Wɑɑ tien Yiesu yɑdɑ nɑ pɑɑk e te k u pɑɑk cɑin k sie i nunm nnɑ.

¹⁷«Tɔn, n nɑɑ wɑɑs, n mi nɑn yinm nɑn i yudɑnm nbɑ dɑɑn te k b kpii Yiesu nɑ, i dɑɑn k bɑnn yɑɑ tun lin nbɑ mɑnŋ pɑɑk.

¹⁸Ŋɑɑn nnɑ e k Yennu tɑn te k lin nbɑ k u din pɑk k tul u sɔkniinbɑ kul, k b mun pɑk tul niib nɑ n tɑn tien mɔni, ɑ l kpɑɑ tɑlɑs e k u Klistu n lek di fɑlɑ.

¹⁹«L pɑɑk, i mɔ kuɑŋɑɑn k lebt binbenŋ mɑn kii wɑɑ Yennu sɔnu, k wun nyik cɑb i biit,

²⁰k u sɑɑ tul’i fuon k biɑ tɑn sɑɑ tun Yiesu Klistu i buol ni, wun nbɑ k u ponŋ lukt’ɔ k tul’i nɑ,

²¹ŋɑɑn mɔtɑɑnɑ Yiesu mɑnŋ lek dɑɑ sii be *Yendɔunŋ ni, nɑn Yennu nbɑ tɑn sɑɑ ŋɑnm bonɑ kul ɑ, nɑn wɑɑ din te k u sɔknŋɑnm nbɑ din be yɑɑyuo ni nɑ nbɑ din yet biɑnŋ nbɑ nɑ.

²²«Muois mun din yet ɑ: ‹Yonmdɑɑnɔ Yennu sɑɑ tul’i u sɔkniisuɑ, nɑn mɑɑ tie sɔkni biɑnŋ nbɑ k u sii tie i mɔnŋ nilɔ. Gbiintl’ɔ mɑn k tun lin nbɑ kul k u sɑɑ pɑk tul’i.

²³Dɑɑnɔ nbɑ k gbɑt sɔkni mɑnŋ mɑɑn, Yennu sɑɑ nyinn l dɑɑnɔ i sinsuuk ni k wun kpo.›

²⁴«*Yennu sɔkni Sɑɑmuel nɑn sɔkniinbɑ kul nbɑ din wei u pɑɑk nɑ, din piɑk k jikt sɑɑ lin nbɑ yɑɑ lin tɑn tien t yuo nɑ ni po.

²⁵Yennu mɔsonn nbɑ k u din senn k tul u sɔkniinbɑ mɑnŋ, l mɔsonn tie i yɑl e, k *lol nbɑ k u din lol nɑn t yejɑnm nɑ, yuo nbɑ k u din yet Ablɑɑhɑɑnm ɑ: ‹A yɑɑbuonyenɔ ni e k tingbounŋ nɑ tieb kul ɑ tɑn sɑɑ lɑ n yetŋɑnm,› k l lol mun biɑ tie i yɑl e.

²⁶Yennu nbɑ din lukt u Tuontunnɔ mɑnŋ nɑ, k u tun’ɔ i buol ni sinsinn, ɑ yin lɑ yetŋɑnm k mɑɑn wɑɑ nyinn’i biit sɔni ni nɑ pɑɑk.»