Read Moba Tuonɑ 4 Bible Online

Tuonɑ 4 - Moba bible

Tuonɑ 4

¹Yuo nbɑ k Piɑl nɑn Sɑn dɑɑ din sie k piɑk tien niib mɑnŋ nɑ, k Yennu mɑnntieb nɑn Yennu jɑɑnti ŋɑsɑɑkɑk sejenm yudɑɑnɔ nɑn *Sɑɑdiuseɑnbɑ kpil bɑɑl Piɑlnbɑ buol ni.

²B wutuol duo nɑn Piɑl nɑn Sɑn, ɑ b wɑnt niib ɑ Yiesu dɑɑn fiil kuun ni k l wɑnt nɑn kpienm tɑn sɑɑ fiil kuun ni k jen b mɑnfuol ni biɑk.

³Ŋɑnn e k b suol’b k kuɑn’m dɑnsɑlk ɑ lin yent ɑ, k mɑɑn yuo ponŋ gɑl ɑ.

⁴Ŋɑɑn k niib bonciɑnn nbɑ din gbɑt Piɑl mɑɑn mɑnŋ tien Yiesu yɑdɑ, k jɑb nbɑ tien u weilɑ nɑ din tien nɑn tusɑ ŋɑnŋmu nɑ.

⁵Lɑɑ tɑn yent sɑn-nyiɑɔk ni, k *Suifnbɑ yudɑnm nɑn sɑɑkɑb nɑn *senniwɑntieb lɑkn b tituk kɑɑnu ni Selusɑɑlenm,

⁶k b lɑkn nɑn juɑ nbɑ tie Yennu mɑnntieb yudɑɑnɔ k b yi’u * Ann nɑ, nɑn *Kɑɑyiif, nɑn Sɑn nɑn Aleksɑndl nɑn mɑnntieb yudɑɑnɔ mɑnŋ ŋɑɑtelieb,

⁷k te k Piɑl nɑn Sɑn fiil k set b sinsuuk ni, ŋɑɑn k b boi’b ɑ: «Pɑnbuolbee k i mɔk i? K ŋmee sɑnn ni e k i fiin wɔbk nbɑ nɑ?»

⁸Ŋɑnn e k Foŋɑnm fiil Piɑl ni, k u yet’b ɑ: «Yinm cɑnbɑɑnbɑ nɑn sɑɑkɑb, gbiintl mɑn.

⁹L i tie k i boi’t dinnɑ nɑ k jikt sɑɑ tuonŋɑnn nbɑ k t tun k tul wɔbk nɑ nɑn wɑɑ lɑ lɑɑfiɑ nɑ pɑɑk i e,

¹⁰ŋɑnn l ŋɑn k i kul ɑ n bɑnn, k Islɑɑeltieb kul n mun bɑnn nɑn Nɑɑsɑɑlet nilɔ Yiesu *Klistu sɑnn pɑɑk e, k juɑ mɑnŋ lɑ lɑɑfiɑ, k sie i nunm ni nɑ. L Yiesu e k i dɑɑn kpɑɑ’u dɑpunpunn pɑɑk k kpii’u nɑ, ŋɑɑn k Yennu fiin’ɔ kuun ni nɑ.

¹¹Ŋuɑ e tie dɑɑnɔ nbɑ k Yennu lolkpel kɑdɑɑɔk piɑk u po nɑ, ɑ: ‹Tɑnn nbɑ k yinm tɑnmɑɑlɑ yet’ɔ nɑ, ŋɑnn e set tie tɑnn nbɑ te k ŋɑɑk mɔk pɑnŋ.›

¹²K suɑ sɑnn ji kɑɑ tingbounŋ nɑ ni k Yennu tul niib ɑ bin lɑ fielu, sie Yiesu kuukuɑ.»

¹³Tituk niib mɑnŋ nbɑ din lɑ Piɑl nɑn Sɑn pɑlcienn nbɑ k b mɔk nɑ, k biɑ bɑnn nɑn Piɑl nɑn Sɑn tie dɑnm nbɑ k mi kɑdɑɑɔk bonŋɑnn k k tie nijɑɑnɑ nɑ, l din yɑɑl ŋɑɑn lit’b e, k b ji bɑnn nɑn b tuu tie Yiesu wei-nɑn-lieb e.

¹⁴Ŋɑɑn bɑɑ lɑ juɑ nbɑ k b won te k u pɑɑk nɑ, k u sie Piɑl nɑn Sɑn buol ni nɑ, b ji din k mɔk mɔb nbɑ sɑɑ pɑk k jiin.

¹⁵Ŋɑnn e k tituk niib din ŋɑɑn k b nyii b lɑknu dieok mɑnŋ ni dɑɑnn, ŋɑɑn k b biɑl fɑɑ nɑn b lieb lɑbɑɑl,

¹⁶k boi b lieb, ɑ: «T sɑɑ tien jɑb nɑ nlee nɑ? K mɑɑn suɑ kul nbɑ be Selusɑɑlenm ponŋ mi yɑɑl-lituk tuonn nbɑ k b tun mɑnŋ nɑ. L pɑɑk nnɑ t ji kɑn fit noi,

¹⁷ŋɑɑn ŋɑɑnt mɑn k tin potn k tul’b, k b ji dɑɑ mi k yi Yiesu sɑnn k tien niib ni, k lɑbɑɑl mɑnŋ ji dɑɑ biɑ yɑt k sɑɑ niib ni.»

¹⁸Ŋɑnn e k b yiin’m, ɑ bin ŋɑnm kuɑ, k tɑn potn k tul’b ɑ b dɑɑ mi k piɑk ɑmi k tumi niib Yiesu sɑnn ni jik.

¹⁹K Piɑl nɑn Sɑn jiin k yet’b ɑ: «I mɔnŋ mɔnŋ n got lɑɑn lɑnn e tokn Yennu buol ni. L ŋɑn k t ji sɑk i mɔb ŋɑɑn nyik Yennu mɔb ɑmi nlee?

²⁰k mɑɑn tinm kɑn fit k nyik pinpɑɔk lin nbɑ po k t lɑ k biɑ gbɑt.»

²¹K tituk niib mɑnŋ lek potn k tul’b nɑn ninmɔnjɑl, ŋɑɑn ŋɑɑ’b yɑnn ɑ bii sɑɑ, k mɑɑn b k lɑ sɔnsɑu nbɑ k b sɑɑ dɑt b tubɑ, k mɑɑn niib nɑ din piɑk Yennu lin nbɑ din tien nɑ pɑɑk,

²²k mɑɑn juɑ nbɑ lɑ lɑɑfiɑ bɑktnɔunŋ tuonn nɑ pɑɑk nɑ binɑ din gɑl nɑn binɑ piinnɑ nɑ wɑɑ.

²³Bɑɑ ŋɑɑ Piɑl nɑn Sɑn yuo nbɑ, k b ŋmɑt b lieb penŋ, k sɑɑ yet’b lin nbɑ k Yennu mɑnntieb yudɑnm nɑn sɑɑkɑb mɑnŋ pɑk’b.

²⁴Bɑɑ mun gbɑt nnɑ mɑnŋ k b kul tɑɑn lieb nɑn dudukyent kuukuɑ, k mei Yennu ɑ: «T Yonmdɑɑnɔ, fin e din nɑn sɑnpɑɑk nɑn tinŋ nɑ, nɑn mɔkgbenŋɑ nɑn lin nbɑ kul be lenŋ,

²⁵k Foŋɑnm mɑnŋ ni e k ɑ din pɑk ɑ tuontunnɔ Dɑɑfiid nbɑ tie t yejɑ nɑ mɔb ni ɑ: ‹Bee te k bin nbɑ k tie Islɑɑeltieb nɑ tuun nɑn jɑpɑɑt i? Bee te k b loln lol yɑnɑ ɑ?

²⁶Tingbounŋ nɑ kpɑnbɑlɑ nɑn yudɑnm tɑɑn lieb k tuok ɑ bin kɔn nɑn Yonmdɑɑnɔ Yennu nɑn u Klistu nɑ.›

²⁷«L tie bɑlmɔni e nɑn *Heluod nɑn Pɔns *Piilɑɑt nɑn bin nbɑ k tie Islɑɑeltieb nɑ nɑn Islɑɑeltieb dɑɑn set lɑkn duo nɑ ni, k lol lolɑ ɑ bin kpi ɑ tuontunŋɑnɔ Yiesu, wun nbɑ k ɑ din gɑnn k senn’ɔ nɑ.

²⁸Ŋɑnn e k b lɑkn, ɑ bin tun lin nbɑ kul k ɑ ponŋ din dukn ɑ yiikuo nɑn ɑ yɑnbuɑt, k yɑɑ l tɑn sɑɑ tien nɑ.

²⁹Tɔn, mɔtɑɑnɑ, Yonmdɑɑnɔ, gbiintl niib nɑ nbɑ fuɑ kɔnfuɑt nɑn ninmɔnn t pɑɑk nɑ, k ŋɑɑn k tinm nbɑ tie ɑ tuontunnɑ nɑ i piɑk ɑ mɑɑn nɑn pɑlcienn bonciɑnn.

³⁰Tɑntl ɑ nuu k te k bɑɑtb n pɑɑk k bɑktnɔunŋ tuonjɑɑnɑ i tuun ɑ tuontunŋɑnɔ Yiesu sɑnn ni.»

³¹K bin nbɑ tien Yiesu yɑdɑ nɑ nbɑ gbenn Yenmiɑlu nɑ yuo nbɑ, k siɑn nbɑ po k b tikl nɑ ji jek, k b kul ɑ gbie nɑn Foŋɑnm, k ji piin piɑk Yennu mɑɑn nɑn pɑlcienn.

³²L yuo nɑ k Yiesuweilɑ mɑnŋ kul ɑ tɑɑn lieb nɑn dudukyent kuukuɑ. B suɑ din k yɑɑ ɑ u yen siɑl u mɔnŋ, ŋɑɑn b din centl b bonɑ k tien b lieb e.

³³L yuo nɑ jik k tuomiinbɑ mɑnŋ din nyint Yonmdɑɑnɔ Yiesu kuun fiilu *siɑlɑ nɑn yiikuo bonciɑnn, k Yennu yetŋɑnm bonciɑnn din be b kul ni.

³⁴K lin nbɑ nɑ suɑ din kɑɑ b ni k pɔt siɑl, k mɑɑn bin nbɑ din mɔk b mɔnŋ mɔnŋ kpɑɑnt nɑn b ŋei din tuu kɔi e, k gɑɑl l likli k bɑɑl nɑn’n,

³⁵k tɑn tien tuomiinbɑ nɑ, k b centl k tien b lieb nɑn bɑɑ luon biɑnŋ nbɑ.

³⁶K jɑsuɑ din be lenŋ k u sɑnn yi Suosiɑf, k u din tie Liefi buolu ni nilɔ, k b din mɑl’ɔ Siipl, k tuomiinbɑ nɑ din yi’u Bɑɑlnɑɑbɑɑs (k l pɑɑk tie wun nbɑ cien pɑlɑ nɑ),

³⁷k u din tɑn kɔi u kpɑɑb, k gɑɑl l likli k bɑɑl nɑn’n, k tɑn tul tuomiinbɑ nɑ.