Read Moba Tuonɑ 5 Bible Online

Tuonɑ 5 - Moba bible

Tuonɑ 5

¹Jɑsuɑ nnɑ din be k u sɑnn yi Anɑɑniɑs, k u ŋɑɑpuo sɑnn mun din yi Sɑɑfiilɑ, k u mun din tɑn kɔi u kpɑɑb k gɑɑl l likli,

²ŋɑɑn pɑɑt likli mɑnŋ pɑɑk k bɔl k u ŋɑɑpuo mi l po, ŋɑɑn jii lin nbɑ tenn nɑ, k bɑɑl nɑn’n k tɑn tul tuomiinbɑ mɑnŋ.

³K Piɑl boi’ɔ ɑ: «Anɑɑniɑs, ɑ tien nlee k *Sɑɑtɑn kuɑ yent’ɑ, k ɑ fɑɑl fɑɑk k luon k ɑ kpɑnn Foŋɑnm, k pɑɑt likli nbɑ k ɑ dɑɑn kɔi ɑ kpɑɑb nɑ pɑɑk i?

⁴Fɑɑ dɑɑn dɑɑ k kɔi ɑ kpɑɑb mɑnŋ nɑ, l dɑɑn k tie ɑ yɑl kɑɑ ɑɑ? K fɑɑ biɑ dɑɑn kɔi’l nɑ, l likli mɑnŋ biɑ dɑɑn k be ɑ yent ni kɑɑ ɑɑ? K bee tien k ɑ dukn ɑ pɑl ni k tun lin nbɑ nɑ? A k fɑɑl fɑɑk mɑnŋ k pɑɑn nilɔ kɑɑ, ŋɑɑn ɑ fɑɑl k pɑɑn Yennu e.»

⁵Anɑɑniɑs nbɑ gbɑt nnɑ mɑnŋ yuo nbɑ, k u bɑɑ k kpo l yuo nɑ. K jɑŋmɑɑnciɑɔnŋ kuɑ bin nbɑ kul gbɑt u kuun mɑnŋ po.

⁶K nɑɑsinm fiil k jii’u k pɔbn’ɔ cincenn ni, k nyii nɑn’ɔ k sɑɑ pii’u.

⁷Ŋɑnn e k l yɑnn nɑn kut muntɑ nnɑ nɑ, k u ŋɑɑpuo bɑɑl k kuɑ, ŋɑɑn dɑɑ k bɑnn lin nbɑ tien.

⁸K Piɑl biɑ boi’ɔ ɑ: «Yetl’n, l set tie bɑlmɔni e nɑn fin nɑn ɑ sɔlɔ kpɑɑb likli nbɑ k i gɑɑl nɑ kul i nɑ ɑɑ?» K u jiin ɑ: «Nnn, l kul i nɑ.»

⁹K Piɑl boi’ɔ ɑ: «Bee k fin nɑn ɑ sɔlɔ tɑɑn mɔb, k lol lol ɑ i bikn Yonmdɑɑnɔ Foŋɑnm i? Tɔn, nɑɑsinm nbɑ jii ɑ sɔlɔ k sɑɑn k sɑɑ pii’u nɑ, ŋɑnm e kuɑ tɑnmɔb nnɑ, k b mun biɑ sɑɑ jii’ɑ nnɑ e.»

¹⁰L tɑɑkpɑɑk ni, k u bɑɑ k kpo, k nɑɑsinm nɑ kuɑ k lɑ k u kpo wɑɑ, k b biɑ jii’u k nyii nɑn’ɔ k sɑɑ pii’u k kpiɑn’ɔ nɑn u sɔlɔ.

¹¹L yuo nɑ k jɑŋmɑɑnciɑɔnŋ suol Yiesuweilɑ kul nɑn bin nbɑ kul gbɑt mɑɑn mɑnŋ po.

¹²L yuo nɑ k tuomiinbɑ nɑ tuun bɑktnɔunŋ tuonjɑɑnɑ niib nɑ ni bonciɑnn. K Yiesuweilɑ kul ɑ tuu tɑɑn lieb Sɑɑlomɔn bɑlntl buol.

¹³Bin nbɑ k tie Yiesuweilɑ nɑ din k mɔk pɑl nbɑ k b sɑɑ lɑkn nɑn’m, ŋɑɑn niib din piɑk dont Yiesuweilɑ nɑ bonciɑnn.

¹⁴Jɑb nɑn puob bonciɑnn din tien Yonmdɑɑnɔ yɑdɑ k pukn Yiesuweilɑ nɑ po.

¹⁵Ŋɑnn e k niib din nyi nɑn bɑɑtb, k duɑnt’b liɑni nɑn dunduɑni pɑɑk sɑnjokpini ni, ɑ Piɑl i tɑnŋ i bɑɑl k gɑɑl yuo nbɑ, k u yun-yunŋ n lek bɑɑ b pɑɑk.

¹⁶K niib nbɑ din be Selusɑɑlenm digbɑnbis ni mun jikt bɑɑtb, nɑn bin nbɑ k nɑlnbiit dɑɑmi’b nɑ, k bɑɑt nɑn’m, k b kul ɑ din lɑɑt lɑɑfiɑ.

¹⁷L pɑɑk, k Yennu mɑnntieb yudɑɑnɔ nɑn u wei-nɑn-lieb kul, bin nbɑ tie *Sɑɑdiuseɑnbɑ nɑ, din fiin punponn bonciɑnn nɑn tuomiinbɑ nɑ, k din te k b sɑɑn

¹⁸k sɑɑ suol tuomiinbɑ mɑnŋ k kuɑn’m dɑnsɑlk.

¹⁹Ŋɑɑn l nyiɑɔk mɑnŋ e k Yennu *mɑlɑkɑ sik k luot dɑnsɑlk tɑnmɔi, k nyinn tuomiinbɑ mɑnŋ, ŋɑɑn yet’b ɑ:

²⁰«Ii sɑɑ mɑn Yennu jɑɑnti ŋɑsɑɑkɑk ni, k sɑɑ set, ŋɑɑn muɑnt k tul niib mɑɑn nbɑ tien niib mɑnfuol nɑ kul ɑ.»

²¹Bɑɑ gbɑt u mɑɑn mɑnŋ, k b sɑɑn k sɑɑ kuɑ Yennu jɑɑnti ŋɑsɑɑkɑk mɑnŋ ni, sɑn-nyɑpob ni, k ji piin k wɑnt niib mɑɑn mɑnŋ. K Yennu mɑnntieb yudɑɑnɔ nɑn u wei-nɑn-lieb nɑ din yiin Islɑɑeltieb yudɑnm kul ɑ, k lɑk’m tituk kɑɑnu, k b tɑn tun sejenm ɑ bin nyinn tuomiinbɑ mɑnŋ dɑnsɑlk ni k bɑɑl nɑn’m nɑ.

²²Ŋɑɑn b sɑɑn dɑnsɑlk mɑnŋ ni k sɑɑ got k k lɑ’b k ŋmɑt tituk mɑnŋ ni k sɑɑ yet’b ɑ:

²³«Tɑɑ bɑɑl dɑnsɑlk ni yuo nbɑ, t lɑ k tɑnmɔi kpɑl e kenkenken ɑ, k dɑnsɑlguulɑ nɑ be tɑnmɔi ni k guu, k t luot tɑnmɔi nɑ, ŋɑɑn k k lɑ suɑ dɑnsɑldieok mɑnŋ ni.»

²⁴Yennu jɑɑnti ŋɑsɑɑkɑk sejenm yudɑɑnɔ nɑn Yennu mɑnntieb yudɑnm nbɑ gbɑt nnɑ mɑnŋ, k l tien’m yɑɑl-lituk nɑn tuomiinbɑ nɑ botu mɑnŋ pɑɑk k b ji bils lin nbɑ sɑɑ tien,

²⁵k tɑn suɑ k jɑsuɑ nnɑ kuɑ, k yet’b ɑ: «Gotl mɑn, jɑb nbɑ k i won kuɑn’m dɑnsɑlk wonn nɑ, b sie Yennu jɑɑnti ŋɑsɑɑkɑk ni k tumi niib.»

²⁶L yuo nɑ k sejenm yudɑɑnɔ nɑ jii u jɑb, k b sɑɑn k sɑɑ nyinn tuomiinbɑ mɑnŋ k jen nɑn’m, ŋɑɑn b k nyinn’b nɑn pɑnŋ kɑɑ, k mɑɑn b tiin jɑŋmɑɑni ɑ niib nɑ tɑn sɑɑ mɑnn jɑɑt’b tɑnɑ.

²⁷Bɑɑ bɑɑl nɑn’m yuo nbɑ, k b te k b sɑɑn set tituk niib nɑ sinsuuk ni, k Yennu mɑnntieb yudɑɑnɔ piin k boi’b buboit,

²⁸k yet’b ɑ: «T dɑɑn tul’i mɔb nɑn ninmɔnn, k yɑɑ ɑ i dɑɑ wɑnt niib wɑnnu juɑ mɑnŋ sɑnn ni, ŋɑɑn i tun bee nɑ? I jii i wɑnnu mɑnŋ k yɑt Selusɑɑlenm kul po, k ji luon ɑ i tien’t Yiesu kpiilɑ.»

²⁹K Piɑl nɑn tuomiinbɑ lieb nɑ jiin k yet’b ɑ: «Sie k tii lek ii sɑɑk Yennu mɔb k gɑl nilɔ mɔb.

³⁰Yiesu mɑnŋ e k i dɑɑn ponŋ kpɑɑ tɑbn’ɔ dɑpunpunn pɑɑk k kpii’u nɑ, ŋɑɑn Yennu nbɑ tie t yejɑnm Yennu nɑ, ŋuɑ e fiin Yiesu kuun ni,

³¹k jii’u donn’ɔ k kɑɑn’ɔ u niidiitu po, k tien’ɔ Yudɑɑnɔ nɑn Fietuɑ, ɑ k Islɑɑeltieb n lɑ yɑɑk k fit mɔ kuɑŋɑɑn k lebt binbenŋ, k biɑ fit lɑ nyikcɑbu.

³²Tinm nɑn Foŋɑnm e tie Yiesu kuun fiilu mɑnŋ siɑlɑɑdɑnm, k Yennu jii u Siek mɑnŋ k tul wun nbɑ sɑɑk u mɔb.»

³³Yudɑnm mɑnŋ nbɑ gbɑt nnɑ mɑnŋ, k b wutuol fiil bonciɑnn, k b ji yɑɑ bin kpi tuomiinbɑ mɑnŋ.

³⁴Ŋɑɑn Fɑɑliisiɑnsuɑ nnɑ din be, k u sɑnn yi Gɑɑmɑɑliɑl, k u din tie *senniwɑntuɑ e, k niib kul din tie’u nibɑɑkl, k u din fiil k set tituk kɑɑnu dɑnm sinsuuk ni k yet ɑ bin nyinn tuomiinbɑ mɑnŋ nɑn-yel po wɑɑn.

³⁵Ŋɑnn e k u yet’b ɑ: «Islɑɑeltieb, ii mi mɑn nɑn yɑɑ yɑɑ i tien niib nɑ lin nbɑ nɑ fɑn.

³⁶Siɑn yuo nbɑ din gɑl, k Teudɑɑs din wɑnt u mɔnŋ nɑn u tie nijɑɑnsuɑ e k niib nɑn kobi ŋɑnnɑ nɑ din tie u puolpo juɑmu, ŋɑɑn niib nbɑ din tɑn kpii’u nɑ, u juɑmu nɑ kul ɑ din yɑt e, k u jɑgbeln nɑ gbenn.

³⁷Ŋɑnn tɑn gɑl nnɑ, k Suudɑ, wun nbɑ din tie Gɑɑliile nilɔ mun din nyii k set nikɑnt yuo nɑ, k wɑnt u mɔnŋ, k din tunn niib bonciɑnn yɑn k b wɑɑ’u, k b mun din tɑn kpii’u, k u juɑmu nɑ kul yɑt.

³⁸Mɔtɑɑnɑ lɑɑ, kpɑn ŋɑɑnt jɑb mɑnŋ mɑn k dɑɑ tie’b siɑl, k l i tie k b dudukt nɑn b tuonɑ nɑ i tie nisɑɑlk yɑl i e, l tɑn sɑɑ gbenn ɑ.

³⁹Ŋɑɑn l i tie k l tie Yennu yɑl i e, i kɑn fit k nyɑnn’b. I sɑɑ lɑ k i mɑnn kpet k kɔn nɑn Yennu e gbɑɑ.» Ŋɑnn e k tituk niib mɑnŋ ji sɑk Gɑɑmɑɑliɑl mɔb nɑ,

⁴⁰k yiin tuomiinbɑ mɑnŋ k kuɑn’m, k te k b buo’b gbɑnn, ŋɑɑn ŋɑɑ’b, ŋɑɑn tul’b mɔb ɑ: «Ii mi mɑn k i ji kii piɑk Yiesu sɑnn mɑnŋ ni.»

⁴¹Ŋɑnn mɑnŋ e k tuomiinbɑ mɑnŋ nyii tituk kɑɑnu nɑ ni nɑn pɑlpienn, Yennu nbɑ lɑ k b jɑnŋ nɑn fei dinu, Yiesu sɑnn pɑɑk nɑ.

⁴²K dɑɑl kul k b sɑɑ Yennu jɑɑnti ŋɑsɑɑkɑk ni, ŋɑɑn biɑ lin niib ŋei ni, k wɑnt niib ɑ Yiesu tie *Klistu e k biɑ muɑntl u lɑbɑmɑnn nɑ, k k nyikt.