Read Moba Tuonɑ 7 Bible Online

Tuonɑ 7 - Moba bible

Tuonɑ 7

¹Ŋɑnn e k Yennu mɑnntieb yudɑɑnɔ boi Etiɑnn ɑ: «L set tie mɔni ee?»

²K Etiɑnn yɑɑ ɑ: «Cɑnbɑɑnbɑ nɑn n nɑɑ wɑɑs, gbiintl mɑn. Yuo nbɑ k t yejɑ Ablɑɑhɑɑnm din be Mesopotɑɑmi yɑkl po, l yuo k u din dɑɑ k sɑɑn Hɑlɑn nɑ, k Yennu nbɑ be *yudɑnt ni nɑ dɔkt u pɑɑk

³k yet’ɔ ɑ: ‹Fiit k nyik ɑ tinŋ nɑn ɑ niib, ŋɑɑn sɑɑn siɑn nbɑ k n sɑɑ wɑnn’ɑ nɑ.›

⁴Ŋɑnn e k u fiil k nyik Sɑldeen tinŋ mɑnŋ, ŋɑɑn sɑɑn k sɑɑ kɑl Hɑlɑn duo ni. U bɑɑ kuun puolpo e, k Yennu biɑ te k u fiil, k bɑɑl tinŋ nbɑ k i be nɑ ni.

⁵Ŋɑɑn Yennu dɑɑ din k tul’ɔ tinŋ nɑ nɑn bonmintk ɑ, ɑ wun yent ŋɑɑn senn mɔsonn ɑ u tɑn sɑɑ tul’ɔ tinŋ nnɑ, k ŋuɑ nɑn u yɑɑbuonɑ i yen. Ŋɑɑn l yuo nɑ Ablɑɑhɑɑnm dɑɑ din k mɔk bik.

⁶Nnɑ e k Yennu din yet’ɔ ɑ: ‹A yɑɑbuonɑ tɑn sɑɑ sɑɑn k be tingɑnŋ ni e wɑɑ, k tɑn sii tie dɑɑbɑ lenŋ, k b tɑn sɑɑ lɑ muksuk lenŋ bonciɑnn, k tɑn jɑnŋ binɑ kobiinnɑ.

⁷Ŋɑɑn tinŋ mɑnŋ niib nbɑ k b sii tuun k tien’m nɑ, n tɑn sɑɑ dɑt b tubɑ, k l puolpo, ɑ yɑɑbuonɑ mɑnŋ tɑn sɑɑ nyi tinŋ mɑnŋ ni, k bɑɑl tinŋ nɑ ni, k jiɑnt’n.›

⁸«L puolpo k Yennu *lol lol k tul Ablɑɑhɑɑnm, k biɑ din wɑnn’ɔ lol mɑnŋ nyinn, ɑ ŋuɑ nɑn u yɑɑbuonɑ i poli punɑ. K Ablɑɑhɑɑnm din tɑn mɑl Isɑɑk, k l dɑɑ ŋɑnniin dɑɑl k u pot’ɔ, k Isɑɑk mun din tɑn pot u bijɑ Sɑɑkɔb, k Sɑɑkɔb mun din tɑn pot u bonjɑi piik nɑn bɑnle bin nbɑ tie t yejɑsɑɑkɑb.

⁹K Sɑɑkɔb wɑɑs mɑnŋ din tɑn mɔk punponn nɑn b wɑɑlɔ Suosiɑf, k din tɑn suol’ɔ k kɔi’ɔ, k nisiɑb dɑɑ’u k sɑɑn nɑn’ɔ Ejipt tinŋ ni, ŋɑɑn Yennu din be nɑn’ɔ,

¹⁰k din nyinn’ɔ fɑlɑ kul ɑ ni, k biɑ tul’ɔ yɑn k te k Ejipt kpɑnbɑl Fɑɑlɑɑɔn niɑn’ɔ k jii’u tien’ɔ yudɑɑnɔ Ejipt tinŋ ni, k biɑ te k u tie yudɑɑnɔ u ŋɑɑk ni.

¹¹«L puolpo k kon tɑn bɑɑ Ejipt tinŋ nɑn Kɑɑnɑɑn tinŋ ni kul ɑ, k kon suol niib bonbiil, k t yejɑnm kɔnŋ jiet.

¹²Sɑɑkɔb nbɑ din gbɑt ɑ dii be Ejipt yuo nbɑ, k u tun u wɑɑs nbɑ tie t yejɑnm lenŋ. Ŋɑnn i din tie b sinsinn sɑɑnu.

¹³«B sɑɑnu tɑɑl munle ni e, k Suosiɑf ji din te k u nɑɑ wɑɑs nɑ bɑnn’ɔ. Ŋɑnn e k Fɑɑlɑɑɔn ji din bɑnn Suosiɑf buolu.

¹⁴K Suosiɑf ji din tun’m ɑ bin ŋmɑt kun u cɑnbɑɑ Sɑɑkɔb buol, k sɑɑ jii ŋuɑ nɑn u ŋɑɑtieb kul k jen nɑn’m Ejipt nɑ, k b din tie niib piinlole nɑn bɑnŋmu.

¹⁵«Ŋɑnn e k Sɑɑkɔb nɑn u ŋɑɑtieb mɑnŋ fiil sɑɑn Ejipt k sɑɑ kɑl, k l puolpo, ŋuɑ nɑn u wɑɑs din tɑn kpo gbenn lenŋ

¹⁶k b jii b gbɑnɑnt k sɑɑn nɑn’m Siisenm k sɑɑ pii’b kɑɑɔk nbɑ k Ablɑɑhɑɑnm ponŋ din dɑɑ nɑn likli Hemɔl nibuolu buol ni nɑ.

¹⁷«Yuo nbɑ din tɑn pel nɑn Yennu n gbien u mɔsonn nbɑ k u din senn Ablɑɑhɑɑnm nɑ, l yuo mɑnŋ, t niib nbɑ be Ejipt nɑ ji yɑbt bonciɑnn.

¹⁸L puolpo e k suɑ din dii Ejipt nɑɑn, ŋɑɑn ŋuɑ din k mi Suosiɑf.

¹⁹K kpɑnbɑl mɑnŋ din diɑ t bɑɑ nbɑ diɑbiiuk, k din tuu ton nɑn’m bonciɑnn, k biɑ din tuu miɑ’b ɑ bin nyinn b sɑnpɑnti b ŋei ni k lu’b k bin kpo.

²⁰«Ŋɑnn e k b din mɑl Muois, k u fɑn bonciɑnn, k Yennu biɑ din luon’ɔ, k u be u bɑɑ ŋɑɑk ŋmɑɑli ŋɑntɑ.

²¹U bɑɑ nɑn u nɑɑ nbɑ din tɑn nyinn’ɔ ŋɑɑk ni yuo nbɑ, k kpɑnbɑl nɑ sɑpɑɑmɔ din lɑ’u, k gɑɑl’ɔ k jii’u k wubi’ɔ, k u ji tie nɑn u mɔnŋ bik nɑ.

²²Nnɑ e k b din tumi ŋuɑ Muois, yɑn kul nbɑ k Ejipt-tieb mɔk, k u mɑɑn nɑn tuonɑ din mɔk pɑnŋ.

²³«Muois nbɑ din tɑn lɑ binɑ piinnɑ yuo nbɑ, k dɑsiɑl k u tɑn dukn ɑ wun gɔn u mɔnŋ mɔnŋ buolu Islɑɑeltieb,

²⁴k tɑn lɑ k Ejipt nilɔ buo Islɑɑeltieb ni yenɔ, k u bɑɑl ɑ wun fɑt’ɔ, k tɑn kpii Ejipt nilɔ mɑnŋ.

²⁵U din mi ɑ u nɑɑ wɑɑs nɑ sɑɑ bɑnn ɑ Yennu tɑn sɑɑ te k ŋuɑ e n nyinn’b dɑɑbs ni, ŋɑɑn b din k bɑnn nnɑ.

²⁶K l yent sɑn-nyiɑɔk, k u biɑ lɑ Islɑɑeltieb bɑnle k b kɔn k u luon k wun tɑɑn’m k bin mɑnŋ nɑn b lieb, k yet’b ɑ: ‹Gotl mɑn i tie nɑɑ wɑɑs e, k bee tien k i buo i lieb k tien i lieb dɑni i?›

²⁷K wun nbɑ tul u luɑ dɑnŋ nɑ pii Muois, ŋɑɑn yet’ɔ yɑɑ ɑ: ‹Ŋmee lukt’ɑ ɑ ɑ tien t yudɑɑnɔ ɑmi t bɑlbuulɔ.

²⁸A yɑɑn luon k ɑ kpi’n nɑn fɑɑ won kpii Ejipt nilɔ nɑ ɑmi ii?›

²⁹Muois nbɑ gbɑt nnɑ yuo nbɑ, k u ciɑl nyii Ejipt tinŋ ni, k bɑɑl Mɑɑdiɑn tinŋ ni k be lenŋ, k mɑl bonjɑi bɑnle.

³⁰«Binɑ piinnɑ nbɑ din tɑn gɑl, k u din tɑn sɑɑn muuk ni dɑsiɑl k sɑɑ bɑɑl Siinɑi juɑl buol ni, k lɑ mupieunŋ, k l di k leni kunkonjɑgotuk pɑɑk k *mɑlɑkɑ dɔkt muu mɑnŋ ni.

³¹«Muois nbɑ din lɑ nnɑ mɑnŋ k l tien’ɔ yɑɑl-lituk, k u cɑt nɑkn ɑ wun ŋɑnm got k ji gbɑt k Yonmdɑɑnɔ kunkɔl k u yien’ɔ k yɑɑ ɑ:

³²‹Min e tie ɑ yejɑnm Yennu, Ablɑɑhɑɑnm nɑn Isɑɑk nɑn Sɑɑkɔb Yennu.› Muois nbɑ gbɑt nnɑ yuo nbɑ, k jɑŋmɑɑni ji kuɑ’u, k u ji sie k jekl k ji k mɔk pɑl nɑn wun got.

³³K Yonmdɑɑnɔ yet’ɔ ɑ: ‹Pitl ɑ tɑɑsɑɑt nbɑ k ɑ pil nɑ, k mɑɑn siɑn nbɑ k ɑ sie nɑ tie tinŋɑnŋ e.

³⁴Tɔn, n got k lɑ Ejipt-tieb nbɑ dint n mɔnŋ niib fɑlciɑɔnŋ Ejipt tinŋ ni biɑnŋ nbɑ, k n gbiɑ b fɑbni. Ŋɑnn e k n sik mɑɑ n fɑt nyinn’b. Bɑɑt mɔtɑɑnɑ k n sɑɑ tun’ɑ Ejipt tinŋ ni.› »

³⁵«Muois nbɑ nɑ e k Islɑɑeltieb din yet’ɔ nɑ, k b din yet’ɔ k yɑɑ ɑ: ‹Ŋmee lukt’ɑ ɑ ɑ tien t yudɑɑnɔ ɑmi t bɑlbuulɔ?› ŋɑɑn ŋuɑ nɑ e k Yennu mun din lukt’ɔ ɑ wuu tie b yudɑɑnɔ nɑn b fɑt-tuɑ biɑk, k ŋuɑ Yennu din te k mɑlɑkɑ pɑk nɑn’ɔ ŋɑɑn tun’ɔ. Mɑlɑkɑ mɑnŋ e k Muois din lɑ’u kunkonjɑgotuk pɑɑk muu nɑ ni nɑ.

³⁶Ŋuɑ Muois e din tie dɑɑnɔ nbɑ din nyinn’b Ejipt tinŋ nnɑ, k din biɑ tuun bɑktnɔunŋ tuonjɑɑnɑ Ejipt tinŋ ni, nɑn bɑɑ biɑ din sɑɑ puot Mɔkmunŋ nɑ, nɑn bɑɑ biɑ din be pɑɑnpieonŋ ni binɑ piinnɑ nɑ.

³⁷«L Muois e din yet Islɑɑeltieb ɑ: ‹Yennu tɑn sɑɑ tun sɔkniisuɑ i buol ni nɑn wɑɑ tun’n biɑnŋ nbɑ nɑ, k u sii tie i buolu ni yenɔ.›

³⁸Muois mɑnŋ e din be nɑn t niib lɑknu ni, pɑɑnpieonŋ ni nɑ. Lenŋ e k u din tɑn duo Siinɑi juɑl pɑɑk k sɑɑ be nɑn Yennu mɑlɑkɑ, k mɑlɑkɑ mɑnŋ din piɑk k tien Muois, ɑ Muois n sɔkn tul t yejɑnm. L yuo e k Muois din gɑɑl Yennu mɑnfuol mɑɑn k tul t yejɑnm nɑn tinm.

³⁹«Ŋɑɑn t yejɑnm din k luon k bin sɑk’ɔ. L pɑɑk, k b din yet’ɔ, k mɑɑn b yɑn tunn Ejipt ɑ.

⁴⁰B din yet *Aɑlɔn ɑ wun mɑɑ pɑtɑ, k b i tie b ŋmɑkt dɑnm k bii wɑɑ’b, k biɑ yet’ɔ ɑ: ‹Ŋɑɑn Muois ŋɑnin, wun nbɑ nyinn’t Ejipt nɑ, t k mi lin nbɑ tien’ɔ.›

⁴¹Ŋɑnn e k b mɑɑ pɑtl k nɑn’ɔ nɑɑjɑbik, k mɑnn *mɑlunŋ l pɑɑk k tien jɑɑnm lin nbɑ k b mɑɑ nɑn b mɔnŋ nii nɑ pɑɑk.

⁴²«L pɑɑk, k Yennu ji k goli’b ŋɑɑn cɑb’b, k b ji jiɑntl ŋmɑɑbilɑ, nɑn lɑɑ diɑn biɑnŋ nbɑ *Yennu sɔkniinbɑ kɑdɑɑɔk ni nɑ, ɑ Yennu yet ɑ: ‹Islɑɑeltieb, yɑɑ din kpi bonkobt k mɑnn mɑlunŋ muuk ni binɑ piinnɑ nɑ, i din mɑnn mɑlunŋ mɑnŋ k tien min ee?

⁴³I din tuu jikt pɑtl Molɔk[2] lɑnbounŋ o, k biɑ din tuu jikt ŋmɑɑbil Liefɑn nɑɔnŋ o, k l tie pɑtl, k i jiɑntl’l. L pɑɑk, n sɑɑ bel’i i tinŋ ni k sɑɑn nɑn’i siɑn nbɑ fɔk k gɑl Bɑɑbiilonn.› »

⁴⁴Etiɑnn biɑ piɑk k yɑɑ ɑ: «T yejɑnm din fɑɑ Yennu lɑnbounŋ muuk ni, k l tie *siɑlɑ nɑn Yennu din lol lol nɑn b yejɑnm k l lɑnbounŋ ni, Yennu nbɑ din diɑn u *senni nbɑ tɑnpɑtlɑi ŋɑnle pɑɑk nɑ din be l ni. Yennu e din wɑnn Muois, bɑɑ sii fɑɑ lɑnbounŋ mɑnŋ biɑnŋ nbɑ, k b fɑɑ. L din tie nɑn Muois nbɑ din lɑ lin nbɑ nɑ e.

⁴⁵L puolpo, k t yejɑnm ji din tɑn jii lɑnbounŋ mɑnŋ k tul b wɑɑs, k b gɑɑl k mun jikt k sɑɑ nɑn’n, yuo nbɑ k Suosue din tie b yudɑɑnɔ nɑ, k din bɑɑl nnɑ yuo nbɑ k b din fɑt tinŋ k Yennu din bel nibuolgɑni nbɑ din yen’n l yuo nɑ, k l din biɑl tinŋ nɑ ni dik dik nɑn Dɑɑfiid yuo mun.

⁴⁶Dɑɑfiid mɑnŋ din gbuot Yennu nunm, k din tɑn miɑl Yennu ɑ wun cɑb’ɔ k wun mɑɑ ŋɑɑk k tul Sɑɑkɔb Yennu nɑ.

⁴⁷Ŋɑɑn Sɑɑlomɔn e din tɑn mɑɑ ŋɑɑk mɑnŋ.

⁴⁸«Ŋɑɑn t mi nɑn Yɑbnt Yennu k kɑɑl ŋei nbɑ k niib mɑɑ ni kɑɑ. L tie nɑn Yennu sɔkni nbɑ din yet ɑ:

⁴⁹‹Yonmdɑɑnɔ yet ɑ Sɑnpɑɑk tie n nɑɑngbounŋ o, k tingbounŋ nɑ mun tie n tɑɑkpɑktl. Ŋɑbuolbee k i sɑɑ fit mɑɑ k tul’n i? Liɑ buol e k n sɑɑ fit kuɑ lenŋ i?

⁵⁰Min kɑɑ din nɑn bonɑ nɑ kul ii?› »

⁵¹Etiɑnn biɑ piɑk k yɑɑ ɑ: «I mɑntk tie nigbɑbɑ hei, k i dudukt biɑ fɔk nɑn Yennu bonciɑnn, k i tubɑ k gbiɑ Yennu mɑɑn i k i yet Foŋɑnm tuonɑ. I nɑɑn nɑn i yejɑnm nɑ e.

⁵²Yennu sɔkni lɑnɔ po e k i yejɑnm din k muks’ɔ? B biɑ din kpii bin nbɑ din ponŋ sɔknt ɑ Niŋɑnɔ tɑn sɑɑ bɑɑl nɑ wɑɑ. Tɔn, k mɔtɑɑnɑ yinm e tie dɑnm nbɑ nyii u puol k biɑ tie u kpiilɑ.

⁵³Yinm e biɑ tie dɑnm nbɑ din gɑɑl Yennu senni nbɑ k i din gɑɑl mɑlɑkɑɑnbɑ nuu ni, ŋɑɑn biɑ lek k sɑk’l nɑ.»

⁵⁴K *Suifnbɑ yudɑnm, sɑɑkɑb nɑn *senniwɑntieb nɑ nbɑ gbiint Etiɑnn mɑɑn mɑnŋ k b donn wutuol bonbiil ŋɑɑn gbɑb mɔgbɑbɑ.

⁵⁵Ŋɑɑn Foŋɑnm fiil Etiɑnn ni, k u yɑɑt k got *Yendɔunŋ ni, k lɑ Yennu yentsɑɑkɑl, k Yiesu sie ŋuɑ Yennu niidiitu po,

⁵⁶k u yet ɑ: «Gotl, n lɑ k sɑnpɑɑpo luot k *Nisɑɑlk Bijɑ sie Yennu niidiitu po.»

⁵⁷Ŋɑnn e k Suifnbɑ yudɑnm, sɑɑkɑb nɑn senniwɑntieb nɑ yikn sɑnpɑɑpo, ŋɑɑn pii b tubɑ, k b kul ɑ tɑn lɑkn wuul bɑɑl k kpil’ɔ,

⁵⁸k bel’ɔ k nyinn’ɔ duo mɑnŋ ni, k piin k jɑɑt Etiɑnn tɑnɑ ɑ bin kpi’u, k siɑlɑɑdɑnm jii bin nbɑ jɑɑt tɑnɑ nɑ liɑtfɔkt k bil nɑɑsimɔ nbɑ k b yi’u Sɔul nɑ buol ni, ɑ wuu guu.

⁵⁹B din jɑɑt’ɔ e dik dik dik, k u din tɑn miɑl ɑ: «N Yonmdɑɑnɔ Yiesu, gɑɑt n siek nɑ,»

⁶⁰ŋɑɑn gbɑɑn k yikn sɑnpɑɑpo wɑɑ ɑ: «N Yonmdɑɑnɔ, dɑɑ jikt b biit nɑ k biil’b.» U yet nnɑ e ŋɑɑn ji kpo.