Read Moba Tuonɑ 8 Bible Online

Tuonɑ 8 - Moba bible

Tuonɑ 8

¹K Sɔul din sɑk bɑɑ din sɑk ɑ bin kpi’u. L dɑɑl mɑnŋ e k muksbiil din bɑɑl *Klistu mɔtɑɑɔk niib nbɑ din be Selusɑɑlenm nɑ pɑɑk k b kul ɑ din nyii yɑt k sɑɑn Suude nɑn *Sɑɑmɑɑli yɑkɑ po, ŋɑɑn nyik tuomiinbɑ nɑ kuukuɑ lenŋ.

²K yentinsiɑb din jii Etiɑnn, k sɑɑn sɑɑ pii’u, ŋɑɑn mɔ yikn k fɑbn bonciɑnn u pɑɑk.

³K Sɔul ŋɑnin din luon wun biil Klistu mɔtɑɑɔk niib e, k din lin kuɑ ŋɑɑk ŋɑɑk, k so Yiesuweilɑ, jɑb nɑn puob, k nyint’b k sɑɑ kuɑnt’b dɑnsɑli.

⁴Yiesuweilɑ nbɑ din nyii k yɑt nɑ ji din sɑɑ lokl kul po e k muɑntl Yiesu mɑɑn mɑnŋ,

⁵k Fiiliip nyii k sik Sɑɑmɑɑli tinŋ digbɑnsɑɑkɑl ni, k sɑɑ muɑnt Klistu po k tul lenŋ niib.

⁶Nibulciɑɔnŋ nbɑ gbɑt Fiiliip mɑɑn k biɑ lɑ bɑktnɔunŋ tuonɑ nbɑ k u tuun nɑ, k b mɑntk gbiintl u mɑɑn mɑnŋ fɑnu nɑn dudukyent.

⁷Nɑlnbiit din nyii bɑɑtb bonciɑnn ni k yikn sɑnpɑɑpo, k gbɑnɑnkpienɑ nɑn wɔbi bonciɑnn biɑ din pɑɑk. K nigbounŋ nɑ mun din tikl k gbiint Fiiliip muɑnti mɑnŋ, k biɑ lɑ nɑn u bɑktnɔunŋ tuonɑ nbɑ k u tuun. U din nyinn nɑlnbiit niib bonciɑnn ni, k b yikn sɑnpɑɑpo k nyi, k u biɑ te k gbɑnɑnkpienɑ dɑnm nɑn wɔbi bonciɑnn pɑɑk. L pɑɑk din tien k b mɑntk gbiintl u mɑɑn fɑnu nɑn dudukyent.

⁸K pɑlpienn din be duo mɑnŋ ni bonciɑnn.

⁹Jɑsuɑ nnɑ ponŋ din be duo mɑnŋ ni, k u sɑnn din yi Siimɔn, k u tuu tɑn diɑ u linŋin k tuun bɑktnɔunŋ tuonɑ, k l din bɑktl niib kul nbɑ be duo mɑnŋ yɑkl po, k u din yi u mɔnŋ ɑ u tie nijɑɑnn e.

¹⁰Niib kul nbɑ din tie nijɑɑnɑ nɑn tɑli din bɑɑkt’ɔ, k b din tuu yɑɑ ɑ: «Juɑ nɑ tie Yennu yiikuo e, lin nbɑ k b yi’l Yiikuociɑɔnŋ nɑ.»

¹¹B din gbiintl u mɑɑn mɑnŋ fɑnu fɑnu k mɑɑn u din tuu te k l bɑktl’b nɑn u bɑktnɔunŋ k l wei wɑɑ.

¹²Ŋɑɑn bɑɑ din tien yɑdɑ nɑn lɑbɑmɑnn nbɑ k Fiiliip din muɑntl k jikt sɑɑ Yennu nɑɑn nɑn Yiesu sɑnn po nɑ, k jɑb nɑn puob din te k b wul’b Yennu nyunwulu.

¹³Siimɔn mɔnŋ mun din tien Fiiliip mɑɑn yɑdɑ, k u wul’ɔ. K u tien Fiiliip wei-nɑn-luɑ, k lɑɑt bɑktnɔunŋ tuonjɑɑnɑ nbɑ k u tuun nɑ, k l tuu yɑɑl ŋɑɑn lit’ɔ.

¹⁴K tuomiinbɑ nbɑ din be Selusɑɑlenm gbɑt ɑ Sɑɑmɑɑliitieb gɑɑl Yennu mɑɑn mɑnŋ, k b din tun Piɑl nɑn Sɑn.

¹⁵Bɑɑ bɑɑl Sɑɑmɑɑli yuo nbɑ nɑ, k b miɑl Yennu bin nbɑ tien Yiesu yɑdɑ nɑ pɑɑk, ɑ bin gɑɑl Foŋɑnm,

¹⁶k mɑɑn Foŋɑnm mɑnŋ dɑɑ din k sik b suɑ ni. B kpɑn din gɑɑl Yennu nyunwulu Yonmdɑɑnɔ Yiesu sɑnn ni kuukuɑ e.

¹⁷Ŋɑnn e k Piɑl nɑn Sɑn yii b nii b pɑɑk k b gɑɑl Foŋɑnm.

¹⁸Siimɔn nbɑ din lɑ k tuomiinbɑ nɑ nbɑ yiin b nii niib pɑɑk k Yennu tul’b Foŋɑnm nɑ, k u yɑɑ ɑ wun tul tuomiinbɑ nɑ likli,

¹⁹ŋɑɑn yet’b ɑ: «Cɑbn’n mun yiikuo nɑ mɑn k n mun tuu yii n nii suɑ pɑɑk k wun gɑɑl Foŋɑnm mɑnŋ.»

²⁰Ŋɑɑn k Piɑl yet’ɔ yɑɑ ɑ: «A sɑɑ kpo yiɑk e nɑn ɑ likli mɑnŋ, k mɑɑn ɑ duki mi ɑ ɑ sɑɑ gɑɑl Yennu piini nɑn likli e.

²¹A lek kɑn tun siɑl t tuonn nɑ ni, k mɑɑn ɑ pɑl k be fɑnu nɑn Yennu

²²Mɔ kuɑŋɑɑn k lebt binbenŋ kii mei Yonmdɑɑnɔ k pɑsiɑl i u sɑɑ nyik cɑb’ɑ nɑn ɑ dudukbiit mɑnŋ,

²³k mɑɑn n lɑ nɑn ɑ gbie nɑn nuɑntont e, k biit kun’ɑ wɑɑ.»

²⁴Ŋɑnn e k Siimɔn jiin k yet’b ɑ: «Miɑt Yonmdɑɑnɔ k tul’n mɑn k lin nbɑ k i yet nɑ dɑɑ bɑɑt n pɑɑk.»

²⁵Piɑl nɑn Sɑn din pɑk *siɑlɑ Yonmdɑɑnɔ po k tul niib, k biɑ muɑnt u mɑɑn ŋɑɑn ŋmɑt k sɑɑn Selusɑɑlenm. Bɑɑ din sɑɑ nɑ e, k b din muɑntl Yiesu lɑbɑmɑnn Sɑɑmɑɑli digbɑnbis bonciɑnn ni.

²⁶Ŋɑnn e k Yonmdɑɑnɔ *mɑlɑkɑ tɑn bɑɑl yet Fiiliip ɑ: «Fiit sɑɑn gɑnŋ po k tɔkn sɔnu nbɑ nyi Selusɑɑlenm k siik Gɑɑsɑ nɑ.» L sɔnu pɑɑk din k pɑ siɑl.

²⁷K Fiiliip fiil k sɑɑ k sɑɑ cet Etiopi kɑlɑcijɑɑnn nnɑ k u din tie nijɑɑnn k biɑ tie likli kɑlɑcinbɑ yudɑɑnɔ Etiopi puo nbɑ din tie kpɑnbɑl k b yi’u Kɑndɑɑs nɑ buol ni. Kɑlɑcijɑɑnn nɑ ponŋ din sɑɑn Selusɑɑlenm k sɑɑ jiɑnt Yennu,

²⁸k ji kun k kɑl u toluk ni k tɑɑni dɑɑl’ɔ, k u lii *Yennu sɔkni Esɑɑyi kɑdɑɑɔk ni. Wɑɑ din kɑl k sɑɑ yuo nbɑ, k u lii *Yennu sɔkni Esɑɑyi kɑdɑɑɔk ni.

²⁹Foŋɑnm yet Fiiliip ɑ: «Ii sɑɑ nɑkn toluk nɑ.»

³⁰K u ciɑl sɑɑn nɑkn lenŋ, k gbɑt k juɑ nɑ lii Yennu sɔkni Esɑɑyi kɑdɑɑɔk ni, k u boi’ɔ ɑ: «Cɑnbɑɑ, ɑ bɑnn lin nbɑ k ɑ lii nɑ pɑɑk ii?»

³¹K u jiin ɑ: «Nlee k n sɑɑ bɑnn l pɑɑk, k l k tie k suɑ wɑnn’n kɑɑ?» K u bɑln Fiiliip ɑ wun kuɑ toluk nɑ k kɑl nɑn’ɔ.

³²Yennu lolkpel kɑdɑɑɔk mɑɑn nbɑ k kɑlɑcijɑɑnn mɑnŋ din lii nɑ, ŋɑnn i nɑ ɑ: «U din tie nɑn pieok nbɑ k b sɑɑ ɑ bin sɑɑ kpi’u nɑ e, k u ŋmin nɑn pebik nbɑ k b tuu pot pot u kobt k u ŋmin nɑ, k u k yɑɑt u mɔb

³³U din sikn u mɔnŋ, k b yet bin bu u buut bonŋɑnn. Ŋmee sɑɑ fit pɑk siɑl k jiin u yɑɑbuonɑ po? K mɑɑn b gbenn u mɑnfuol tingbounŋ nnɑ wɑɑ.»

³⁴K kɑlɑcijɑɑnn nɑ boi Fiiliip ɑ: «Yetl’n, ŋmee k sɔkni nɑ yien nɑ? U yien u mɔnŋ ɑmi suɑ ee?»

³⁵K Fiiliip piin siɑn nbɑ k kɑlɑcijɑɑnn mɑnŋ lii nɑ k sɑɑ, k piɑk Yiesu lɑbɑmɑnn.

³⁶Bɑɑ tɔk sɔnu mɑnŋ yuo nbɑ, k b lɑ nyun nnɑ duɑ, k kɑlɑcijɑɑnn nɑ yet’ɔ ɑ: «Gotl, nyun e nɑ. Bee yɑɑ lin tien k ɑ kɑn wul’n Yennu nyunwulu?»

³⁷K Fiiliip yet’ɔ ɑ: «L i tie k ɑ tien Yiesu yɑdɑ nɑn ɑ pɑl kul ɑ, n sɑɑ wul’ɑ wɑɑ.» K u jiin ɑ: «N tien yɑdɑ nɑn Yiesu Klistu tie Yennu Bijɑ e.»

³⁸K kɑlɑcijɑɑnn mɑnŋ te k tɑɑni nɑ set, k ŋuɑ nɑn Fiiliip sik nyun nɑ ni, k Fiiliip wul’ɔ Yennu nyunwulu.

³⁹B tɑn nyii nyun nɑ ni k duo, k Foŋɑnm jii Fiiliip k yɑɑt nɑn’ɔ, k kɑlɑcijɑɑnn nɑ ji k lɑ’u, ŋɑɑn ŋɑnm suol u sɔnu k kun nɑn pɑlpienn.

⁴⁰K Fiiliip ji din sɑɑ be Asot ɑ, k din lin digbɑnɑ kul k muɑntl Yiesu lɑbɑmɑnn mɔkmɔk nɑn wɑɑ din tɑn bɑɑl Sesɑɑle.