Read Moba Tuonɑ 9 Bible Online

Tuonɑ 9 - Moba bible

Tuonɑ 9

¹Tɔn, Sɔul lek biɑ din fuɑ kɔnfuɑt, k yien ɑ u sii dint Yonmdɑɑnɔ *puolpoweitieb biɑk nɑn u yɑɑ wun kpi’b nɑ e, k tɑn sɑɑn Yennu mɑnntieb yudɑɑnɔ buol ni,

²ɑ wun gɑɑl kɑdɑɑt, ɑ k sɑɑn Dɑɑmɑɑs k sɑɑ wɑnn *Suifnbɑ jɑɑnti diet yudɑnm, ɑ u sɑɑ lɑ wun nbɑ wɑɑ Yiesu sɔnu mɑnŋ, juɑ ɑmi puo, sie wun suol’b k lol’b k jen nɑn’m Selusɑɑlenm.

³Tɔn, wɑɑ ji din sɑɑ yuo nbɑ e k sɑɑ pel Dɑɑmɑɑs, k yentu nyii sɑnpɑɑpo, k sik yent lint’ɔ.

⁴K u bɑɑ tinŋ ni, k gbɑt k kunkɔl yi’u ɑ: «Sɔul, Sɔul, bee k ɑ muksl’n i?»

⁵K u boi ɑ: «A tie ŋmee e?» K kunkɔl nɑ jiin ɑ: «Min Yiesu e, k ɑ muksl’n.

⁶Ŋɑɑn fiit k sɑɑn duo nɑ ni, k b sɑɑ sɑɑ yet’ɑ fɑɑ ji sɑɑ tien biɑnŋ nbɑ.»

⁷L yuo nɑ, jɑb nbɑ din ciɑnt Sɔul nɑ ji biɑl set silinmm. B din gbiɑ kunkɔl nɑ ŋɑnin, ŋɑɑn k lɑɑt suɑ.

⁸K Sɔul tɑn fiil tinŋ ni, k munt u nuni, ŋɑɑn k k lɑɑt. Ŋɑnn e k b dɑt u nuu k sɑɑn nɑn’ɔ Dɑɑmɑɑs.

⁹Dɑmunjɑɑ ŋɑntɑ k u k fit lɑɑt. L dɑɑ mɑnŋ ni u din k dii ɑmi k nyuu siɑl.

¹⁰K Yiesuweisuɑ din be Dɑɑmɑɑs mɑnŋ, k u sɑnn yi Anɑɑniɑs, k Yonmdɑɑnɔ yiin’ɔ yelntu ni ɑ: «Anɑɑniɑs.» K u jiin ɑ: «Min e nɑ, Yonmdɑɑnɔ.»

¹¹K Yonmdɑɑnɔ yet’ɔ ɑ: «Fiit k sɑɑn tɔkn sɔnu nbɑ yi Sɔnsunsonn nɑ k sɑɑ kuɑ Suudɑ ŋɑɑk ni, k boi juɑ nbɑ nyii Tɑɑls k u sɑnn yi Sɔul nɑ po. U mei Yennu e mɔtɑɑnɑ,

¹²k u lɑ jɑsuɑ yelntu ni, k u sɑnn yi Anɑɑniɑs, k u kuɑ k jii u nii k yii u pɑɑk ɑ wuu jik ii lɑɑt.»

¹³K Anɑɑniɑs jiin ɑ: «N Yonmdɑɑnɔ, niib bonciɑnn e piɑk juɑ nɑ po, k jikt sɑɑ biɑnŋ nbɑ kul k u tuun bonbiil k tien ɑ mɔnŋ niib Selusɑɑlenm.

¹⁴U dɑɑn gɑɑl yiikuo mɑnntieb yudɑnm buol ni, k bɑɑl nnɑ, ɑ wun suol wun nbɑ kul yi ɑ sɑnn.»

¹⁵Ŋɑɑn Yonmdɑɑnɔ yet’ɔ ɑ: «Fin i sɑɑ wɑɑ. Ŋuɑ e tie wun nbɑ k n lukt’ɔ ɑ wuu tuun n tuonn, k te k buolgɑnu nɑn b kpɑnbɑlɑ nɑn Islɑɑeltieb n bɑnn n sɑnn,

¹⁶k n mɔnŋ sɑɑ wɑnn’ɔ muksuk nbɑ kul k u sɑɑ di n pɑɑk.»

¹⁷Ŋɑnn e k Anɑɑniɑs sɑɑn kuɑ ŋɑɑk nɑ ni, k yii u nii Sɔul pɑɑk ŋɑɑn yet’ɔ ɑ: «N nɑɑ bik Sɔul, Yonmdɑɑnɔ Yiesu e tun’n. Ŋuɑ e tie dɑɑnɔ nbɑ k ɑ dɑɑn bɑɑt nnɑ k tɑn lɑ’u sɔnu pɑɑk nɑ, k u tun’n ɑ n tɑn te k ɑ i jik i lɑɑt k biɑ gbie yent nɑn Foŋɑnm.»

¹⁸L tɑɑkpɑɑk ni k siɑl tɑbt u ninbinɑ ni k bɑɑ, k nɑɑn nɑn jɑnwɔkɑ nɑ, k u ji lɑɑt jik, k fiil set, k b wul’ɔ Yennu nyunwulu.

¹⁹Ŋɑnn e k u dii jiet k pɑnŋ jen. Sɔul din lɑkn be nɑn Yiesuweilɑ nɑn dɑɑ ŋɑnle nɑ Dɑɑmɑɑs,

²⁰k din sɑɑn yiɑn ɑ, Suifnbɑ jɑɑnti diet ni, k muɑntl Yiesu po, ɑ Yiesu kpɑn set tie Yennu Bijɑ e.

²¹Bin nbɑ kul din gbɑt u muɑnti mɑnŋ, l din tien’m yɑɑl-lituk o, k b boi ɑ: «Juɑ nɑ kɑɑ dɑɑn muks bin nbɑ yi Yiesu sɑnn Selusɑɑlenm nɑ ɑɑ? U yɑɑn k bɑɑl ɑ wun suol k lol Yiesuweilɑ, k ŋmɑt nɑn’m k sɑɑ tul’b Yennu mɑnntieb yudɑnm kɑɑ nɑ ɑɑ?»

²²Ŋɑɑn k Sɔul muɑnti mɑnŋ biɑ lek ŋɑnmt k puki nɑn yiikuo, k Suifnbɑ nbɑ be Dɑɑmɑɑs nɑ k fit jiin’ɔ siɑl, yuo nbɑ k u wɑnt nɑn Yiesu e set tie *Klistu k bilsuk kɑɑ nɑ.

²³K dɑɑ bonciɑnn tɑn gɑl, k Suifnbɑ nɑ lɑkn lieb k lol lol ɑ bin kpi Sɔul,

²⁴ŋɑɑn suɑ tɑn kumi’ɔ bɑɑ loln u pɑɑk biɑnŋ nbɑ. Yennu nɑn nyiɑɔk k b din guu duo mɑnŋ tɑnmɔi e bonŋɑnn ɑ bin kpi’u, K suɑ tɑn kumi’ɔ bɑɑ loln u pɑɑk biɑnŋ nbɑ,

²⁵ŋɑɑn nyɑyeunŋ k u wei-nɑn-lieb tɑn jii’u k tien’ɔ cibuk ni, k nyinn’ɔ duo mɑnŋ juonfɔnn ni, k sikn’ɔ tinŋ ni.

²⁶Sɔul nbɑ din bɑɑl Selusɑɑlenm, u din yɑbl u mɔnŋ pɑɑk ɑ wun lɑkn nɑn Yiesuweilɑ nɑ, ŋɑɑn k b k tien yɑdɑ nɑn u ji tie Yiesuweilɔ e, k tiin’ɔ jɑŋmɑɑni.

²⁷K Bɑɑlnɑɑbɑɑs din tɑn bɑɑl u sonml, k jii’u k bɑɑl nɑn’ɔ tuomiinbɑ nɑ buol ni, k kɑt wɑnn’b biɑnŋ nbɑ k Sɔul dɑɑn lɑ Yonmdɑɑnɔ sɔnu ni, nɑn wɑɑ pɑk nɑn’ɔ biɑnŋ nbɑ. U biɑ din ŋɑnm k wɑnn’b Sɔul nbɑ din muɑntl Yiesu po nɑn pɑlcienn Dɑɑmɑɑs biɑnŋ nbɑ.

²⁸Ŋɑnn e k Sɔul din lɑkn be nɑn’m, k b din kɑk k lin Selusɑɑlenm kul po, k muɑntl Yonmdɑɑnɔ sɑnn ni nɑn pɑlcienn.

²⁹U biɑ din piɑk nɑn Suifnbɑ nbɑ piɑk Glek mɑɑn nɑ k jikt sɑɑ Yiesu po, ŋɑɑn b din noi nɑn’ɔ, k kol ɑ bin kpi’u.

³⁰Ŋɑɑn yuo nbɑ k Yiesuweilɑ bɑnn nnɑ mɑnŋ, k b jii Sɔul k sik nɑn’ɔ Sesɑɑle, k te k u sɑɑn Tɑɑls.

³¹Ŋɑnn e k Klistu mɔtɑɑɔk niib nbɑ be Suude nɑn Gɑɑliile nɑn *Sɑɑmɑɑli nɑ ji k lɑɑt muksuk u, k ŋɑnmt k tumi Yonmdɑɑnɔ mɑɑn, k tie yentinnɑ, k Foŋɑnm sonml ni k b puki.

³²L puolpo e k Piɑl din yek lin siɑl kul po, k biɑ din tɑn sik ɑ wun gɔn Yennu niib nbɑ be Liidɑ nɑ.

³³Lenŋ e k u din sɑɑ lɑ jɑsuɑ nnɑ, k u sɑnn yi Ene, k u din ponŋ tie gbɑnɑnkpienn dɑɑnɔ e, k din k fit fi u duɑnu ni teee nɑn binɑ ŋɑnniin.

³⁴K Piɑl tɑn yet’ɔ ɑ: «Ene, Yiesu Klistu te k ɑ pɑɑk ɑ. Fiit k ŋɑnm ɑ duɑnu.» L tɑɑkpɑɑk ni k u fiil.

³⁵Liidɑ nɑn Sɑɑlɔn doi niib kul nbɑ din lɑ’u k u pɑɑk nɑ, k b kpɑnt tien Yonmdɑɑnɔ yɑb.

³⁶Puosuɑ mun din be Sope, k u sɑnn yi Tɑɑbiitɑ, ŋɑɑn Glek mɑɑn ni, b din yi’u Dɔlkɑɑs, k l pɑɑk tie pɑmɔnɔ. U din tie Yiesuweilɔ e, k din tuun tuonŋɑnɑ bonciɑnn k tien niib, k biɑ din sonmt tɑlɑs-dɑnm.

³⁷L yuo nɑ dinn k yiɑlu din suol’ɔ k u kpo, k b din jii’u k wul’ɔ, ŋɑɑn jii’u duo nɑn’ɔ dituɑtuk ni k bil’ɔ.

³⁸Sope mun din k fɔk nɑn Liidɑ sɑɑn, k Yiesuweilɑ nbɑ din be Sope din gbɑt nɑn Piɑl be Liidɑ, k b tun jɑb bɑnle u buol ni ɑ bin yet’ɔ ɑ: «T bɑln’mɑ. Kɑkt bɑɑl yiɑn yiɑn nɑ.»

³⁹K u fiil k b jen nɑn’ɔ. Wɑɑ bɑɑl yuo nbɑ, k b jii’u k duo nɑn’ɔ dituɑtuk mɑnŋ ni. K pɑkɔi din be dieok nɑ ni, k b kul ŋɑɑ lint Piɑl ɑ, ŋɑɑn mɔ, k jikt b liɑtɑ nɑn b cincenɑ k wɑnt’ɔ, k yien ɑ: «Dɔlkɑɑs nbɑ tuu be u mɑnfuol ni k nyɑl lin nbɑ k tien’t e nɑ.»

⁴⁰Ŋɑnn e k Piɑl nyinn b kul ɑ dieok nɑ ni, ŋɑɑn gbɑɑn tinŋ ni, k miɑl Yennu ŋɑɑn tɑn ŋmɑnt kpiemɔ nɑ pɑɑk k yiin ɑ: «Tɑɑbiitɑ, fiit.» K u munt u nuni k lɑ Piɑl, k ji fiil k kɑl.

⁴¹K Piɑl dɔnn k suol u nuu k fiin senn’ɔ, ŋɑɑn yiin Yennu niib nɑn pɑkɔi nɑ, k tɑn jii’u k wɑnn’b nɑn u jen u mɑnfuol ni wɑɑ.

⁴²K l lɑbɑɑl din yɑt sɑɑn Sope kul po, k niib bonciɑnn din tien Yonmdɑɑnɔ yɑdɑ.

⁴³K Piɑl ji din biɑl be Sope dɑɑ bonciɑnn, k din be jɑsuɑ nbɑ tie gbɑnfebltuɑ nɑ ŋɑɑk ni e, k b yi’u Siimɔn.