Read Moba Luonmtieb 11 Bible Online

Luonmtieb 11 - Moba bible

Luonmtieb 11

¹L pɑɑk, n luon k n boi k lɑɑn i duki ɑ Yennu yet u mɔnŋ niib ɑmi? Aɑi, u k yet’b kɑɑ. N mɔnŋ tie Islɑɑel nilɔ e, k tie Ablɑɑhɑɑnm yɑɑbuonn, k nyii Bensɑɑmen nɑɑkuuk ni.

²Yennu k lu u niib nbɑ k u dɔnŋ lukt’b nɑ. I mi lɑɑ diɑn Yennu lolkpel kɑdɑɑɔk ni k wɑnt *Elii nbɑ din yien Yennu, Islɑɑeltieb biit po biɑnŋ nbɑ ɑ:

³«N Yonmdɑɑnɔ, b kpii ɑ sɔkniinbɑ kul ɑ, k biil ɑ binbintɑ nɑ. N kuukuɑ e biɑl, k b kol ɑ bin kpi’n.»

⁴Yennu din jiin ɑ biɑ? Yennu din jiin ɑ: «N mɔk niib tusɑ ŋɑnlole bin nbɑ dɑɑ k mi gbɑɑn jiɑnt Bɑɑl nɑ.»

⁵L tie nnɑ e mɔtɑɑnɑ. Niib wɑɑnm-nnɑ e dɑɑ be k Yennu lukt’b u ninkpɑbɑɔnŋ pɑɑk.

⁶Yennu i lukt niib, u ninkpɑbɑɔnŋ pɑɑk e, k u lukt’b, k l k tie b tuonɑ pɑɑk kɑɑ. Yennu i bo i lukt niib b tuonɑ pɑɑk i e, u ninkpɑbɑɔnŋ nɑ bo kii tie bɑlmɔni ninkpɑbɑɔnŋ kɑɑ.

⁷Tɔn, t sɑɑ yet ɑ biɑ? L wɑnt nɑn Islɑɑeltieb k lɑ bɑɑ luon lin nbɑ. Bin nbɑ k Yennu lukt’b nɑ kuukuɑ nɑ lɑ’l, ŋɑɑn bin nbɑ biɑl nɑ tien tubkɑngbɑtɑ dɑnm e.

⁸L tie nɑn lɑɑ diɑn Yennu lolkpel kɑdɑɑɔk ni ɑ: «Yennu din te k b yɑn lib, k te k b ninbinɑ k lɑɑt, k te k b tubɑ k gbiɑ k tɑn tuu dinnɑ.»

⁹K Dɑɑfiid yet Yennu lolkpel kɑdɑɑɔk ni ɑ: «Yennu n te k b jɑɑnm i tie bɑluk k tul’b, ɑ bii bɑɑ kii lɑɑt tubdɑtu,

¹⁰k te k b ninbinɑ n juɑn, k b dɑɑ lɑɑt, k b sii buɑ k b sɑi ni kɑn nɑɑt i »

¹¹N boi biɑk k lɑɑn Islɑɑeltieb din gbiɑt k bɑɑ k ji k fit fiil ɑmi? Aɑi, l k tie nnɑ kɑɑ. Bɑɑ tun biit nɑ pɑɑk, k Yennu fiel bin nbɑ k tie *Suifnbɑ nɑ. Yennu tun nnɑ ɑ ŋɑnm Suifnbɑ nɑ i mɔk *funfunn bin nbɑ k tie Suifnbɑ nɑ pɑɑk.

¹²L i tie k Suifnbɑ biit te k tingbounŋ tieb lɑ piisn, k bɑɑ k tien yɑdɑ nɑ te k bin nbɑ k tie Suifnbɑ lɑ bonŋɑnn, nlee k bonŋɑnn kɑn yɑbt *dulnyɑ ni l i tie k b ŋmɑt k lebt b binbenŋ i?

¹³N piɑk k tien yinm nbɑ k tie Suifnbɑ nɑ e: Yennu nbɑ te k n tie *tuomi i buol ni nɑ, n sii mɔk yugontl n tuonn mɑnŋ pɑɑk.

¹⁴Mi i bo i sɑɑ fit te k n mɔnŋ buolu niib i mɔk funfunn bin nbɑ k tie Suifnbɑ nɑ pɑɑk, pɑsiɑl ŋɑnn e sɑɑ te k b siɑb n lɑ fielu.

¹⁵Yennu nbɑ din yet Suifnbɑ nɑ, l din te k l ji mɑn tingbounŋ nɑ niib nɑn Yennu sinsuuk ni. Yennu i ŋmɑnt k gɑɑl’b k b tie u niib, l ji sii tie nlee? L set sii tie bɑlmɔni e nɑn bi fiil kuun ni k jen mɑnfuol ni wɑɑ.

¹⁶L i tie k b buun pɑɑnu yon, k bɔkt sinsinn yɑl k tien pɑɑnu k l tie Yennu yɑl, lin nbɑ ten nɑ mun biɑ tie Yennu yɑl e. L i tie k tiik jiinɑ tie Yennu yɑl i e, l yiini nɑ mun biɑ tie u yɑl e.

¹⁷Suifnbɑ nɑ tie nɑn ŋɑɑk ni tiik nbɑ k b yi oliifie nbɑ ŋɑn nɑ e, k b kɔnn tiik nɑ yiinsiɑ. Fin nbɑ k tie Suif nɑ, ɑ tie nɑn muuk ni oliifie yiinu nɑ e k b tukn’ɑ b yiɑl ni ŋɑɑk ni oliifie pɑɑk, k mɔtɑɑnɑ ɑ gɑɑn bonŋɑnn nbɑ nyi ŋɑɑk ni oliifie nɑ jiinɑ nɑ ni e.

¹⁸L pɑɑk, ɑ dɑɑ mɔk pɑlbifɑɑnt nɑn sinsinn yiini nɑ. Dɑɑ mɔk pɑlbifɑɑnt, k mɑɑn ɑ tie yiinu kuukuɑ e. Jiinɑ nɑ e diɑ’ɑ, fin kɑɑ diɑ jiinɑ.

¹⁹A sɑɑ jiin k yet ɑ: «Mɔni e, b kɔnn yiini nɑ ɑ bin tukn’n yiini nɑ yiɑl ni e.»

²⁰L set tie mɔni e. Bɑɑ k tien yɑdɑ nɑ pɑɑk e k b kɔnn’b, k fin nbɑ tien yɑdɑ nɑ pɑɑk e k b jii’ɑ tukn’ɑ l pɑɑk. Ŋɑnn, ɑ ji dɑɑ mɔk pɑlbifɑɑnt dudukt l pɑɑk, ŋɑɑn kii mɔk jɑŋmɑɑni.

²¹L i tie k Yennu k ŋɑɑn k tiik nɑ tiɑɔnŋ yiini nbɑ tie Suifnbɑ nɑ n biɑl, i dɑɑ duki nɑn u sɑɑ ŋɑɑn k i biɑl.

²²Gotl Yennu nbɑ mɔk bulcint ŋɑɑn biɑ mɔk ninkuoni biɑnŋ nbɑ. U mɔk ninkuoni k tul bin nbɑ bɑɑ nɑ, ŋɑɑn u wɑnn’ɑ u bulcint. Ŋɑɑn l kpɑɑ tɑlɑs k ɑ biɑl u bulcint ni. Nnɑ i kɑɑ, u sɑɑ kɔnn’ɑ nɑn yiinu nɑ e.

²³Suifnbɑ i nyik bɑɑ k tien yɑdɑ bɑnnu nbɑ nɑ, Yennu sɑɑ jiin tukn’m siɑn k b din tuu be, k mɑɑn u sɑɑ fit k tun nnɑ.

²⁴Fin nbɑ k tie Suif nɑ tie nɑn muuk ni oliifie yiinu nɑ e, k Yennu kɔnn’l k tukn nɑn ŋɑɑk ni oliifie nɑ, ŋɑɑn b tuu k tie nnɑ. L k pɑɑl k wun jii yiini nbɑ k u kɔnn ŋɑɑk ni oliifie nɑ ni, k biɑ tukn nɑn l mɔnŋ oliifie nɑ biɑk.

²⁵N nɑɑ wɑɑs, n luon k yin bɑnn wuol ni lɑbɑɑl, ɑ i dɑɑ duki nɑn i tie yɑndɑnm e. L tie ɑ Suifnbɑ siɑb tie kɑngbɑtɑ e, k l sii be nnɑ e k tɑn bɑɑl yuo nbɑ k bin nbɑ k tie Suifnbɑ kul nbɑ k Yennu lukt’b nɑ, bin tɑn tien Yiesu yɑb.

²⁶Nnɑ e k Islɑɑel kul sɑɑ lɑ fielu, nɑn lɑɑ diɑn Yennu lolkpel kɑdɑɑɔk ni ɑ Yennu yet ɑ: «Fietuɑ sɑɑ nyi *Siiɔn duo ni e, k bɑɑl k tɑn nyinn mɔyetuk Sɑɑkɔb yɑɑbuonɑ sinsuuk ni.

²⁷Ŋɑnn e tie *lol nbɑ k n sɑɑ lol k tul’b, yuo nbɑ k n sɑɑ nyinn b biit.»

²⁸L i tie k t got Suifnbɑ nbɑ yet Yiesu lɑbɑmɑnn bɑnnu nbɑ, b tie Yennu dɑtɑi, ɑ lin bɑɑl nɑn bonŋɑnn k tul’i. Ŋɑɑn l i tie k t biɑ got Yennu nbɑ din lukt’b bɑnnu nbɑ, b tie bin nbɑ k Yennu luon’m, b yejɑnm pɑɑk e,

²⁹k mɑɑn Yennu k gɑɑn lin nbɑ k u tul k biɑ k lebtl u dudukt bin nbɑ k u yiin’m nɑ pɑɑk.

³⁰Siɑn-yuo ni, i din k cɔln Yennu, ŋɑɑn mɔtɑɑnɑ i bɑnn Yennu ninbɑtinu k mɑɑn Suifnbɑ din k cɔln’mɔ.

³¹Nnɑ e biɑk k mɔtɑɑnɑ k b k cɔln ɑ yin fit k lɑ Yennu ninbɑtinu mɑnŋ, ŋɑɑn bɑɑ k cɔln nɑ biɑ sɑɑ te k bin lɑ ninbɑtinu mɑnŋ.

³²K mɑɑn Yennu tien niib kul mɔyetuk dɑɑbɑ ɑ wun fit k wɑnn b kul u ninbɑtinu.

³³Yennu mɔktuk set k mɔk gbennu! K u yɑn nɑn u bɑnnu sumi hɑli! Ŋmee sɑɑ fit bɑnn Yennu nbɑ lol lin nbɑ? Ŋmee sɑɑ fit bɑnn u sɔni?

³⁴L diɑn Yennu lolkpel kɑdɑɑɔk ni ɑ: «Ŋmee mi Yennu dudukt i? Ŋmee sɑɑ kpɑɑn’ɔ?

³⁵Ŋmee mi k tul Yennu siɑl sinsinn ɑ, ŋɑɑn ji tɑn luon wun pɑ l pɑɑk i?»

³⁶Yennu e din nɑn bonsiɑl kul, k u pɑɑk e k l kul be k tie u yɑl. Yudɑnt tie Yennu yɑl e nɑn yuo nbɑ kɑɑ gbennu. * Amenn.