Read Moba Luonmtieb 13 Bible Online

Luonmtieb 13 - Moba bible

Luonmtieb 13

¹L tie k nilɔ kul n sɑk yudɑnm mɔi, k mɑɑn suɑ k mɔk u mɔnŋ yiikuo k l k nyii Yennu buol. Yennu e te k bin nbɑ mɔk yiikuo nɑ mɔk yiikuo.

²Wun nbɑ k sɑɑk yudɑnm *senni nɑ, l wɑnt nɑn u biɑ k sɑɑk lin nbɑ k Yennu senn nɑ, bin nbɑ kul tuun nnɑ, b bɑɑt nɑn tubdɑtu e b mɔnŋ pɑɑk.

³Bin nbɑ tuun tuonbiit nɑ e tiin yudɑnm jɑŋmɑɑni, ŋɑɑn bin nbɑ tuun lin nbɑ ŋɑn, b k tiin yudɑnm jɑŋmɑɑni. Fi i kii luon fii tiin yudɑɑnɔ, l ŋɑn fii tuun lin nbɑ ŋɑn, k wun pɑk’ɑ,

⁴K mɑɑn u tie Yennu tuontunnɔ e k tuun lin nbɑ ŋɑn k tien’ɑ. Ŋɑɑn fi i tuun bonbiil, fii tiin’ɔ, k mɑɑn u k mɔk yiikuo nbɑ k u sɑɑ dɑt ɑ tubl yɑnn. U tie Yennu tuontunnɔ e k sie Yennu pɑɑk k dɑɑl wun nbɑ tuun biit nɑ tubɑ.

⁵L pɑɑk, l kpɑɑ tɑlɑs k ɑ gɑɑl yudɑnm mɔi, k l k tie ɑ mɑntk tiin tubdɑtu nɑ kuukuɑ kɑɑ, ŋɑɑn ɑ mi ɑ pɑl ni nɑn l tie lin nbɑ ŋɑn e.

⁶L pɑɑk e te k t pɑ lɑnpo, k mɑɑn Yennu e senn yudɑnm nɑ, ɑ yuo kul bin jii’l k diɑ tingbounŋ nɑ bonŋɑnn.

⁷L pɑɑk, tuln’m lin nbɑ tie b yɑl. L i jɑnŋ nɑn bin gɑɑl niib lɑnpo, ɑmi lin nbɑ k i mɔk pɑɑk lɑnpo, yin pɑ k tul’b. L i jɑnŋ nɑn k i bɑɑk nilɔ, yin bɑɑk’ɔ. L i biɑ kii jɑnŋ nɑn i cɔln nilɔ, yin cɔln’mɔ.

⁸Dɑɑ mɔk suɑ pɑnn. Yɑɑ sii mɔk pɑnn nbɑ tie ii luon mɑn i lieb. Wun nbɑ luon u luɑ, l dɑɑnɔ gbien Yennu senni nɑ kul ɑ.

⁹Yennu senni nɑ yet ɑ: «Dɑɑ conm. Dɑɑ kpi *ɑ luɑ. Dɑɑ jɑɑn. Dɑɑ mɔk niɑɔnŋ ɑ luɑ bont pɑɑk.» Senni nbɑ nɑ nɑn lin nbɑ biɑl nɑ kul tɑɑn k wɑnt nɑn: «I luon ɑ luɑ nɑn fɑɑ luon ɑ mɔnŋ biɑnŋ nbɑ nɑ.»

¹⁰K fi i luon ɑ luɑ, ɑ kɑn tun bonbiil k tul’ɔ. Ŋɑnn e niib lomu tie Yennu senni gbienu.

¹¹Ii tie nnɑ mɑn k mɑɑn yɑɑ mi yuo nɑ nbɑ tie biɑnŋ nbɑ nɑ. Yuo nɑ bɑɑl ɑ, k i sɑɑ fiil i guɑn ni, k mɑɑn t fielu dɑɑl pel ɑ, k k fɔk nɑn lɑɑ din fɔk biɑnŋ nbɑ yuo nbɑ k t din sint tien yɑdɑ nɑ.

¹²Nyiɑɔk gɑl ɑ, k yennu ni e bɑɑt. Ŋɑɑnt mɑn k tin lu tuonɑ nbɑ tuun bunbɔnn ni ŋɑɑn jii jɑtiɑt nbɑ k t sɑɑ fit kɔn nɑn’n yieonŋ ni.

¹³L luon k tin diɑ t mɔnŋ fɑnu nɑn lɑɑ luon tii be yieonŋ ni yennu ni bɑnnu nbɑ nɑ. T suol t mɔnŋ nɑn boncuncontuonɑ, nɑn dɑyibu, nɑn kunkɔnɑ nɑn *funfunn.

¹⁴I jii Yonmdɑɑnɔ Yiesu *Klistu binbenŋ k lii tie i yɑl, k dɑɑ ŋɑɑnt k gbɑnɑnt lonbiit n te k i tuun biit.