Read Moba Luonmtieb 15 Bible Online

Luonmtieb 15 - Moba bible

Luonmtieb 15

¹Tinm nbɑ k t yɑdɑ cie nɑ, l ŋɑn k tii mɔk suklu k sonm t lieb nbɑ yɑdɑ dɑɑ k cie nɑ, k dɑɑ tuun t mɔnŋ lonm kuukuɑ kɑɑ.

²Ŋɑɑnt mɑn k t kul n yɑbl kii tuun lin nbɑ sɑɑ penn t luɑ pɑl, k lii tie bonŋɑnn k tul’ɔ, k wun fit kii wɑɑ Yiesu *Klistu sɔnu fɑnu.

³K mɑɑn ŋuɑ Klistu din k luon wun tun u mɔnŋ lonm kuukuɑ kɑɑ, nɑn lɑɑ diɑn Yennu lolkpel kɑdɑɑɔk ni ɑ: «Bin nbɑ suki fin nɑ, b sukt mɑnŋ bɑɑ n pɑɑk e.»

⁴Lin nbɑ kul diɑn Yennu lolkpel kɑdɑɑɔk ni nɑ, l diɑn k tul’t ɑ tii tumi e. U mɑɑn mɑnŋ tien’t suklu, k biɑ kuɑnt’t pɑlɑ, ɑ tii mɔk dindɑnn.

⁵Yennu, wun nbɑ k suklu nɑn pɑlcienn nyi u ni, n te k i fit kii be nɑn lieb nɑn mɑnu nɑn Yiesu Klistu nbɑ luon bɑnnu nbɑ nɑ,

⁶k i kul ɑ sii mɔk dudukyenn kuɑ nɑn moyenm k dont Yennu nbɑ tie t Yonmdɑɑnɔ Yiesu Klistu Bɑɑ nɑ.

⁷Ii gɑɑn lieb mɑn nɑn Klistu nbɑ gɑɑl’i nɑ, k Yennu sɑnn n lɑ pɑku.

⁸K mɑɑn n yien’i ɑ Klistu din kpint u mɔnŋ k tie Suifnbɑ nɑ tuontunnɔ e, ɑ wun gbien mɔsonɑ nbɑ k Yennu senn k tul b yejɑnm nbɑ din tie nijɑɑnɑ nɑ k nnɑ e k u wɑnn nɑn Yennu set tie mɔmɔnm dɑɑnɔ e,

⁹k te k bin nbɑ k tie Suifnbɑ nɑ ii dont Yennu sɑnn u ninbɑtinu pɑɑk, nɑn lɑɑ diɑn Yennu lolkpel kɑdɑɑɔk ni ɑ: «N sɑɑ dont ɑ sɑnn bin nbɑ k tie Suifnbɑ nɑ buol, k yin *yɑni k pɑk’ɑ.»

¹⁰L biɑ diɑn k yet ɑ: «Yinm nbɑ k tie Suifnbɑ nɑ, ii mɔk mɑn pɑlpienn, yinm nɑn Yennu niib.»

¹¹L biɑ diɑn ɑ: «Yinm nbɑ k tie Suifnbɑ nɑ, pɑkn mɑn Yonmdɑɑnɔ Yennu. Nibuolu kul, ii pɑk’ɔ mɑn.»

¹²Esɑɑyi mun din diɑn Yennu lolkpel kɑdɑɑɔk ni ɑ: «Jese yɑɑbuonn tɑn sɑɑ bɑɑl, k u sii mɔk yiikuo, k tɑn sii tie bin nbɑ k tie Suifnbɑ nɑ yudɑɑnɔ, k b dindɑnn sii be u ni.»

¹³Yennu nbɑ tul’i dindɑnn nɑ, n tul’i mɑnu nɑn pɑlpienn bonciɑnn yɑɑ tien’ɔ yɑdɑ nɑ pɑɑk k Foŋɑnm n te k i dindɑnn nɑ n ŋɑnm yɑbt.

¹⁴N nɑɑ wɑɑs, n mi n pɑl ni nɑn i pɑlɑ gbien nɑn dudukŋɑnt, k i mɔk minu k sɑɑ fit k kpɑɑn i lieb.

¹⁵Mɑɑ dɑ bon-yenɑ kɑdɑɑɔk nɑ ni nɑ, n dɑ nɑn pɑlcienn ɑ n tiɑl’i lin nbɑ k i ponŋ mi l po nɑ. N dɑ nnɑ k mɑɑn Yennu tin’n ninbɑɑɔk

¹⁶k te k n tie Yiesu Klistu tuontunnɔ, k tul bin nbɑ k tie Suifnbɑ nɑ. Mɑɑ muɑntl Yennu lɑbɑmɑnn nɑ, n tuun Yennu tuonn e, ɑ bin nbɑ k tie Suif nbɑ i tie mɑnnu nbɑ pent Yennu pɑl, k Foŋɑnm ni b jɑnŋ nɑn bii tie Yennu tiɑɔnŋ niib.

¹⁷Mɑɑ tɑɑ nɑn Yiesu Klistu nɑ, n sɑɑ fit kii mɔk yugontl tuonn nbɑ k n tuun k tien Yennu nɑ pɑɑk.

¹⁸K mɑɑn l i tie k n luon mɑn pɑk siɑl po i e, l tie lin nbɑ k Klistu te k n tun, k fit te bin nbɑ k tie Suifnbɑ n sɑk Yennu mɔb. N mɑɑn nɑn n bontitiet

¹⁹nɑn bɑktnɔunŋ tuonɑ nɑn nyinɑ nɑn Foŋɑnm pɑnŋ e te k b sɑk Yennu mɔb. Nnɑ e k n muɑnt Klistu lɑbɑmɑnn siɑn nbɑ kul, lɑɑ nyii Selusɑɑlenm k sɑɑ tuu Iiliili.

²⁰Ŋɑnn e k n lol mɑɑ n muɑnt Klistu lɑbɑmɑnn k tul bin nbɑ k mi gbɑt nɑ kuukuɑ e, k dɑɑ wɑk luɑ fiɑkl pɑɑk,

²¹k mɑɑn Yennu lolkpel kɑdɑɑɔk wɑnt nɑn: «Bin nbɑ k b k muɑnt u mɑɑn k tul’b nɑ, b sɑɑ lɑ’l, k bin nbɑ mun biɑ k gbɑt’l tɑn sɑɑ gbɑt l pɑɑk.»

²²L pɑɑk, bonɑ bonciɑnn tuu guɑl n sɔnu k n k fit bɑɑt k gɔnt’i ni.

²³Ŋɑɑn mɔtɑɑnɑ e k n ji dɑɑ gbenn n tuonɑ nbɑ be yɑkɑ nɑ ni, k mɑɑ ponŋ setk tuu luon binɑ bonciɑnn k n gɔn’i nɑ,

²⁴mɔtɑɑnɑ n sɑɑ gɔn’i wɑɑ, k n gɔnu mɑnŋ puolpo wɑɑnm-nnɑ, n sii luon k yin sonm’n k n sɑɑn Espɑnyɑ tinŋ ni.

²⁵Ŋɑɑn sinsinn n sɑɑ sɑɑn Selusɑɑlenm, Yennu niib nbɑ be lenŋ nɑ sonml pɑɑk e wɑɑ,

²⁶k mɑɑn Yiesuweilɑ nbɑ be Mɑɑseduɑnn nɑn Akɑɑyi tini ni nɑ, lol ɑ bin lɑkn likli k tul Yennu niib nbɑ tie nɑndɑnm k be Selusɑɑlenm nɑ.

²⁷L tie mɔni e nɑn b mɔnŋ lonm e k b tul’b piini nɑ. Setk nɑn mɔni, ŋɑnm nbɑ k tie Suifnbɑ ŋɑɑn din lɑ siek jiet Suifnbɑ buol ni nɑ, l ŋɑn k bin nbɑ k tie Suifnbɑ nɑ n sonm Suifnbɑ b gbɑnɑnt ni nɑn b piini ni mun.

²⁸Mi i gbenn tuonn mɑnŋ k tul’b piini mɑnŋ, n sɑɑ nyi lenŋ k tuɑt gɑl i buol k sɑɑn Espɑnyɑ tinŋ ni wɑɑ.

²⁹N mi nɑn mi i bɑɑl i buol, n sɑɑ bɑɑl nɑn Klistu yetŋɑnm k tul’i

³⁰Tɔn, n nɑɑ wɑɑs, t Yonmdɑɑnɔ Yiesu Klistu sɑnn pɑɑk nɑn Foŋɑnm lonm pɑɑk, n mei’i, ii mei Yennu nɑn ninmɔnn n pɑɑk k sonm’n,

³¹k wuu guun k Suude tinŋ ni niib nbɑ k tien Yiesu Klistu yɑdɑ nɑ, k b dɑɑ tie’n bonbiil, kii biɑ kii mei’ɔ k tuonn nbɑ k n sɑɑ tun k tul Yennu niib nbɑ be Selusɑɑlenm ni n penn b pɑlɑ.

³²Nnɑ e mun, l i tie k Yennu sɑk, n sɑɑ bɑɑl nɑn pɑlpienn, k tɑn foi wɑɑn i buol.

³³Yennu nbɑ tien’t mɑnu nɑ ii be nɑn’i. * Amenn.