Read Moba Luonmtieb 16 Bible Online

Luonmtieb 16 - Moba bible

Luonmtieb 16

¹Tɔn, n luon k n wɑnn’i t niipuo Fiebe po. U be Senkle duo ni k sonmt *Klistu mɔtɑɑɔk niib lenŋ.

²Yin gɑɑl’ɔ Yonmdɑɑnɔ Klistu sɑnn pɑɑk nɑn Yennu niib nbɑ bo sii gɑɑn b lieb biɑnŋ nbɑ nɑ, k sonm’ɔ nɑn wɑɑ luon lin nbɑ i buol, k mɑɑn u mun tuu sonmt niib bonciɑnn, nɑn n mɔnŋ.

³Fuont Pliisiil nɑn Akiilɑɑs bin nbɑ tie n tuontunlieb Yiesu Klistu tuonɑ ni nɑ.

⁴B yit b mɔnŋ sɑlk k fit fɑt n mɑnfuol. L k tie n kuukuɑ kɑɑ tien’m niipuouk, ŋɑɑn min nɑn Klistu mɔtɑɑɔk niib nbɑ k tie *Suifnbɑ nɑ, b mun biɑ tien’m niipuouk bonciɑnn.

⁵I biɑ sɑɑ fuont Klistu mɔtɑɑɔk niib nbɑ lɑki k jiɑntl Yennu b ŋɑɑk ni nɑ. Fuont n yɔŋɑnŋ Epɑinet wun nbɑ din tie sinsinn nilɔ nbɑ be Asii tinŋ ni k din tie Klistuyuɑ nɑ.

⁶Fuont Mɑɑli wun nbɑ din tuu tuun bonciɑnn k tien’i nɑ.

⁷Fuont Antloniikus nɑn Juniɑs bin nbɑ tie n ninjɑnm, k min nɑn ŋɑnm din lɑkn kuɑ dɑnsɑlk nɑ. Tuomiinbɑ bɑɑk’b bonciɑnn, k b din sint tien Klistuyɑb k n tɑn wei nɑ.

⁸Fuont n yɔŋɑnŋ Anpliɑtus[3] wun nbɑ k n luon’ɔ Yonmdɑɑnɔ ni nɑ.

⁹Fuont Ulben wun nbɑ tie t tuontunluɑ Klistu tuonɑ ni nɑ, k fuont n yɔŋɑnŋ Sitɑɑkiis mun biɑk.

¹⁰Fuont Apeles wun nbɑ din lɑ biknu ŋɑɑn lek biɑ dɑɑ wɑɑ Klistu nɑn bɑlmɔni nɑ, k fuont Aliistuobuul[4] ŋɑɑtieb.

¹¹Fuont n ninjɑ nbɑ k b yi’u *Heluodiɔn nɑ, k fuont Nɑlsiis ŋɑɑtieb nbɑ tien Yonmdɑɑnɔ yɑdɑ nɑ.

¹²Fuont Tliifenn nɑn Tliifos puob nbɑ tuun Yonmdɑɑnɔ tuonɑ nɑ. Fuont n yɔŋɑnŋ Pelsiit puo nbɑ mun biɑ tun Yonmdɑɑnɔ tuonɑ bonciɑnn nɑ.

¹³Fuont Lufus wun nbɑ mɑntk wɑɑ Yonmdɑɑnɔ sɔnu bonŋɑnn nɑ, k biɑ fuont u nɑɑ wun nbɑ luon’n nɑn wɑɑ luon u mɔnŋ bik biɑnŋ nbɑ nɑ.

¹⁴Fuont Asinkliit nɑn Flegɔn nɑn Helmes nɑn Pɑɑtluobɑɑs nɑn Helmɑɑs nɑn Klistu niib kul nbɑ be nɑn’m nɑ.

¹⁵Fuont Fiilolok nɑn Suli nɑn Nele nɑn u niipuo, nɑn Oliinpɑs nɑn Yennu niib kul nbɑ be nɑn’m nɑ.

¹⁶Ii fuont lieb kii kpɑmi mɑn. Klistu mɔtɑɑɔk niib nbɑ be siɑl kul po fuont’i.

¹⁷N nɑɑ wɑɑs, n kpɑɑn’i e, ii mi mɑn bin nbɑ bɔktl Yiesu niib ŋɑɑn dɔk’b u sɔnu ni k sɑɑk wɑnnu nbɑ k i gɑɑl nɑ. Lɔktl’b mɑn.

¹⁸L nibuolu k wɑɑ t Yonmdɑɑnɔ Klistu, ŋɑɑn b wɑɑ b mɔnŋ puol e. B jikt mɔmɑnt e k kpɑnn bin nbɑ yɑɑ dudukt k cie nɑ.

¹⁹Suɑ kul gbɑt i mɔsɑku po, k lin nbɑ nɑ pɑɑk e k n mɔk pɑlpienn nɑn’i. Ŋɑɑn n luon k yii mɔk yɑn k sɑɑn jiin lin nbɑ ŋɑn nɑn lin nbɑ k mɔk jɑknt nɑ po, k dɑɑ sɑɑk bonbiil.

²⁰L kɑn wei k Yennu nbɑ tien’t mɑnu nɑ sɑɑ te k yin fiil ŋmɑɑ *Sɑɑtɑn yul pɑɑk. T Yonmdɑɑnɔ Yiesu Klistu ii mɔk ninkpɑbɑɔnŋ nɑn’i.

²¹N tuontunluɑ Tiimuote fuont’i, k n ninjɑnm Lusius nɑn Sɑɑsɔn nɑn Suosiipɑɑtl mun biɑ fuont’i.

²²Min Teltius[5] nbɑ dɑ lin nbɑ k Pɔul pɑk kɑdɑɑɔk nɑ ni nɑ fuont’i Yonmdɑɑnɔ sɑnn ni.

²³Gɑius wun nbɑ gɑɑl min Pɔul nɑn Klistuyɑb kul u ŋɑɑk ni nɑ, u mun fuont’i. Elɑst, wun nbɑ tie duo nɑ likguutuɑ nɑ, ŋuɑ nɑn t nɑɑ bik Kɑltus mun fuont’i.

²⁴T Yonmdɑɑnɔ Yiesu Klistu i mɔk ninkpɑbɑɔnŋ nɑn’i.

²⁵Ŋɑɑnt mɑn k tin dont Yennu sɑnn. Ŋuɑ e te k i set wɑɑ’u fɑnu nɑn mɑɑ muɑnt lɑbɑmɑnn k jiin Yiesu Klistu po nɑ pɑɑk. Ŋuɑ e fiit wuol ni mɑɑn nbɑ din bɔl binɑ binɑ nɑ.

²⁶Ŋuɑ *Yennu sɔkniinbɑ gɑɑl k diɑn lolkpel kɑdɑɑɔk ni k l fiit wuol ni, k Yennu nbɑ kɑɑ gbennu nɑ tul mɔb ɑ buolu kul nbɑ k tie Suifnbɑ nɑ n bɑnn’l, k niib kul n fit k tien yɑdɑ k sɑk u mɔb.

²⁷Ŋuɑ Yennu kuukuɑ e tie yɑndɑɑnɔ nɑ. Niib kul n pɑk’ɔ mɔkmɔk nɑn yuo nbɑ kɑɑ gbennu, Yiesu Klistu sɑnn ni. * Amenn.