Read Moba Luonmtieb 5 Bible Online

Luonmtieb 5 - Moba bible

Luonmtieb 5

¹L pɑɑk, Yennu nbɑ jii’t k t tie niŋɑnm u tuɑnn t yɑdɑ pɑɑk nɑ e, k mɑnu ji be tinm nɑn Yennu sinsuuk ni t Yonmdɑɑnɔ Yiesu *Klistu pɑɑk.

²Yiesu ni e k t fit cɑt nɑkn Yennu k lɑ u ninkpɑbɑɔnŋ t yɑdɑ nɑ pɑɑk k ninkpɑbɑɔnŋ mɑnŋ ni k t be k wɑki. T ji mɔk pɑlpienn nbɑ kɑɑ pɑɑk k mɑɑn t mɔk dindɑnn nɑn t tɑn sii mɔk Yennu *yudɑnt.

³Nɑn l kul nɑ, t biɑ mɔk pɑlpienn t fɑldinu ni, k mɑɑn t mi nɑn fɑldinu bɑɑt nɑn gbɑnkul e,

⁴k gbɑnkul mun bɑɑt nɑn pɑlcienn, k pɑlcienn mɑnŋ mun bɑɑt nɑn dindɑnn,

⁵k dindɑnn mɑnŋ ni t tɑn kɑn di fei, k mɑɑn Yennu jii lonm nbɑ k u mɔk nɑ k tien t pɑlɑ ni, Foŋɑnm nbɑ k u tul’t nɑ ni.

⁶Setk nɑn mɔni, yuo nbɑ k t dɑɑ din k mɔk sonml nɑ, Klistu din gɑɑl biitdɑnm pɑɑk k kpo, k l tie yuo nbɑ k Yennu din senn e.

⁷L pɑɑl nɑn nilɔ n gɑɑl nipiemɔ pɑɑk k kpo, ŋɑɑn pɑsiɑl ɑ sɑɑ lɑ suɑ wun gɑɑl niŋɑnɔ pɑɑk k kpo,

⁸ŋɑɑn Yennu wɑnn nɑn u set luon’t bonciɑnn k mɑɑn tɑɑ din tie biitdɑnm nɑ Klistu din gɑɑl t pɑɑk k kpo.

⁹L i tie k Yennu yet ɑ t tie niŋɑnm u tuɑnn, Yiesu sɔn pɑɑk i e, nnɑ e mun k Yiesu mun sɑɑ fɑt’t Yennu wutociɑɔnŋ nɑ ni wɑɑ.

¹⁰T din tuu tie Yennu dɑtɑi e, ŋɑɑn mɔtɑɑnɑ jik, l ji ŋɑnm tinm nɑn ŋuɑ sinsuuk ni, bilsuk ji kɑɑ nɑn u sɑɑ fiel’t, k mɑɑn u Bijɑ nɑ kuun pɑɑk, k mɔtɑɑnɑ lɑɑ ŋɑnm tinm nɑn Yennu sinsuuk ni nɑ, u ji sɑɑ fiel’t Yiesu mɑnfuol pɑɑk ɑ.

¹¹Ŋɑɑn l kul kɑɑ nɑ. T biɑ mɔk pɑlpienn Yennu nbɑ sonm’t bonciɑnn biɑnŋ nbɑ nɑ, k mɑɑn t Yonmdɑɑnɔ Yiesu Klistu ŋɑnm tinm nɑn ŋuɑ sinsuuk ni.

¹²Tɔn, niyenɔ kuɑ e din te k biit bɑɑl tingbounŋ nɑ ni, k u biit nɑ pɑɑk e te k kuun be. L pɑɑk e te k kuun kpi niib kul, k mɑɑn nisɑɑlk kul tun biit ɑ.

¹³Biit din be tingbounŋ nɑ ni e wɑɑ k Yennu din tɑn tul Muois *senni nɑ, ŋɑɑn senni i kɑɑ, suɑ kɑn tɑɑl nilɔ k yet ɑ u biil senni mɑnŋ.

¹⁴Lɑɑ nyii Adɑn yuo ni k tɑn tuu Muois yuo, k kuun mɔk yiikuo suɑ kul pɑɑk, k kpi dɑnm kul nɑn bin nbɑ din k biil Yennu sennu nɑn Adɑn nbɑ din biil bɑnnu nbɑ nɑ. Tɔn, Adɑn din tie wun nbɑ din yɑɑ wun wei puol nɑ ninnɑɔnŋ o.

¹⁵Ŋɑɑn b bɑnle nɑ k jɑn, k mɑɑn Yennu piini nbɑ k u pi’t yɑnn nɑ k tie nɑn Adɑn biit nɑ kɑɑ. L tie mɔni e nɑn niib bonciɑnn kpo niyenɔ kuɑ biit pɑɑk e, ŋɑɑn Yennu ninkpɑbɑɔnŋ yɑb, k u piini nbɑ k u tien niib bonciɑnn yɑnn k l nyii niyenɔ kuɑ ni, wun nbɑ tie Yiesu Klistu nɑ mun biɑ cie nnɑ.

¹⁶Bɔktu be Yennu piini nɑn niyenɔ kuɑ Adɑn biit sinsuuk ni, k mɑɑn niyenɔ kuɑ Adɑn biit mɑnŋ puolpo e k Yennu din bu u buut k yet ɑ u biit mɑnŋ ŋɑn nɑn tubdɑtu, ŋɑɑn ŋuɑ Yiesu piini nbɑ k u pi’t yɑnn nɑ tie nyikcɑbu, biit bonciɑnn puolpo e.

¹⁷Niyenɔ kuɑ mɑnŋ biit pɑɑk e k kuun kpi suɑ kul, k l nyii niyenɔ mɑnŋ buol e, ŋɑɑn lin nbɑ wei niyenɔ kuɑ Yiesu Klistu tuonn nɑ gɑl nnɑ wɑɑ. Niib kul nbɑ lɑ Yennu ninkpɑbɑɔnŋ nbɑ yɑb, nɑn u piini nbɑ tie nyikcɑbu piini nɑ, b sɑɑ di nɑɑn kii mɔk mɑnfuol Yiesu Klistu pɑɑk.

¹⁸Ŋɑnn e k niyenɔ kuɑ mɑnŋ biit pɑɑk e te k suɑ kul ŋɑn nɑn tubdɑtu, nnɑ e mun, niyenɔ kuɑ tuonŋɑnn pɑɑk e te k Yennu yi niib niŋɑnm k b lɑ mɑnfuol.

¹⁹Niyenɔ kuɑ nbɑ k b yi’u Adɑn nɑ mɔyetuk pɑɑk e te k niib bonciɑnn tien biitdɑnm. L mun tie nnɑ e nɑn niyenɔ kuɑ nbɑ k b yi’u Klistu nɑ mɔsɑku pɑɑk k niib bonciɑnn tien niŋɑnm Yennu buol.

²⁰Senni nɑ bɑɑl ɑ lin te k biit n yɑbt, ŋɑɑn k biit nbɑ din yɑbt nɑ, Yennu ninkpɑbɑɔnŋ mun din yɑbt k gɑl nnɑ.

²¹L pɑɑk, biit nbɑ din te k nisɑɑli kpenn biɑnŋ nbɑ nɑ, nnɑ e mun k Yennu ninkpɑbɑɔnŋ pɑɑk te k u yet ɑ b tie niŋɑnm u buol, k tul’b mɑnfuol nbɑ kɑɑ gbennu, t Yonmdɑɑnɔ Yiesu Klistu pɑɑk.