Read Moba Luonmtieb 8 Bible Online

Luonmtieb 8 - Moba bible

Luonmtieb 8

¹Tɔn, mɔtɑɑnɑ Yennu kɑn bu k biil bin nbɑ be Yiesu *Klistu ni,

²k mɑɑn mɑɑ tɑɑn nɑn Yiesu Klistu nɑ, Foŋɑnm *senni nbɑ tien mɑnfuol nɑ, fɑt’n biit nɑn kuun senni ni wɑɑ.

³Senni nɑ k fit tun nnɑ, k mɑɑn tinm nisɑɑli k fit diɑ’l fɑnu. Ŋɑnn e k Yennu din tun u mɔnŋ Bijɑ tingbounŋ nɑ ni, ɑ wun gɑɑl binbenŋ nbɑ nɑɑn nɑn tinm biitdɑnm binbenŋ nɑ, k tɑn gɑɑl t pɑɑk k kpo t biit pɑɑk. K u kuun mɑnŋ pɑɑk, Yennu biil biit nbɑ be tinm nisɑɑli pɑlɑ ni nɑ pɑnŋ.

⁴Yennu din tun nnɑ, ɑ senni nbɑ boi’t lin nbɑ nɑ, n tun t ni, tinm nbɑ ji k tuun t tiɑɔnŋ gbɑnɑnt lonm, ŋɑɑn tuun Foŋɑnm nbɑ luon bɑnnu nbɑ nɑ.

⁵Bin nbɑ wɑɑ b tiɑɔnŋ nisɑɑlk binbenŋ nɑ jiit b dudukt k tie binbenŋ mɑnŋ ni, ŋɑɑn bin nbɑ wɑɑ Foŋɑnm nɑ jiit b dudukt k tie lin nbɑ k Foŋɑnm luon nɑ ni e.

⁶Dudukt nbɑ wɑɑ nisɑɑlk binbenŋ nbɑ luon lin nbɑ nɑ, juontl nɑn kuun e, ŋɑɑn dudukt nbɑ wɑɑ Foŋɑnm nbɑ luon lin nbɑ nɑ, juontl nɑn mɑnfuol nɑn mɑnu e.

⁷Wun nbɑ yɑɑ dudukt be nisɑɑlk binbenŋ yiikuo ni, l dɑɑnɔ tie Yennu dɑtɑɑk, k k sɑɑk Yennu senni, k set kɑn fit k sɑk’l.

⁸Bin nbɑ be b nisɑɑlk binbenŋ ni nɑ kɑn fit penn Yennu pɑl.

⁹Foŋɑnm i set be i ni, i k wɑɑ nisɑɑlk binbenŋ kɑɑ, ŋɑɑn i wɑɑ Foŋɑnm nbɑ luon lin nbɑ nɑ e. Wun nbɑ k mɔk Klistu Siek mɑnŋ u ni, l dɑɑnɔ k tie Klistuyuɑ.

¹⁰I gbɑnɑnt nbɑ lek sɑɑ kpo biit pɑɑk nɑ, ŋɑɑn Yiesu i be i ni, Foŋɑnm tien’i mɑnfuol, k mɑɑn Yennu yet ɑ i tie niŋɑnm e u buol.

¹¹L i tie k Yennu Siek nbɑ fiin Yiesu kuun ni nɑ be i ni, ŋuɑ nbɑ fiin Yiesu Klistu kuun ni nɑ sɑɑ tul i gbɑnɑnt nbɑ tɑn sɑɑ kpo wɑɑ nɑ mɑnfuol, Siek nbɑ be i ni nɑ pɑɑk.

¹²L pɑɑk, n nɑɑ wɑɑs, l luon k t mɑbn t mɔnŋ k dɑɑ wɑɑ nisɑɑlk binbenŋ nbɑ luon bɑnnu nbɑ.

¹³K mɑɑn, l i tie k i wɑɑ nisɑɑlk binbenŋ, i sɑɑ kpo wɑɑ, ŋɑɑn l i tie k i jii Foŋɑnm yiikuo k kpi i gbɑnɑnt biit, i sɑɑ lɑ mɑnfuol ɑ.

¹⁴Bin nbɑ k Foŋɑnm ŋmɑktl’b sɔnu nɑ, ŋɑnm e tie Yennu wɑɑs.

¹⁵K mɑɑn Foŋɑnm nbɑ k u tul’i nɑ, u k te k i tie dɑɑbɑ nɑn jɑŋmɑɑndɑnm kɑɑ, ŋɑɑn u te k i tie Yennu wɑɑs e, k yi Yennu ɑ: «Abbɑ! n Bɑɑ.»

¹⁶Foŋɑnm mɑnŋ e te k t mɔnŋ sei mi bonŋɑnn nɑn t tie Yennu wɑɑs.

¹⁷Tɑɑ set tie u wɑɑs nɑ pɑɑk, t sɑɑ lɑ u bonŋɑnɑ nbɑ k u bil k guun u niib nɑ wɑɑ. T biɑ sɑɑ lɑkn nɑn Klistu k gɑɑl’l ɑ, k mɑɑn l i tie k tinm nɑn Klistu libn dii fɑlɑ, tinm nɑn ŋuɑ mun tɑn sɑɑ libn lɑ *yudɑnt ɑ.

¹⁸N mi nɑn fɑlɑ nbɑ k t di mɔtɑɑnɑ nɑ, l kɑn fit yekn nɑn yudɑnt nbɑ k Yennu sɑɑ wɑnn’t nɑ.

¹⁹*Dulnyɑ bonɑ kul nbɑ k Yennu nɑn nɑ, guu nɑn ninmɔnn e nɑn yuo nbɑ k Yennu tɑn sɑɑ nyinn u wɑɑs yienin ni,

²⁰k mɑɑn dulnyɑ bonɑ kul din biil ɑ, k ji k mɔk nyuɑt, l din k tun l tiɑɔnŋ kɑɑ, l din tie Yennu lonm e k l tien nnɑ, ŋɑɑn k dindɑnn biɑ lek be dulnyɑ mɑnŋ pɑɑk.

²¹Dɑsiɑl be k dulnyɑ bonɑ mɑnŋ tɑn sɑɑ nyi kuun dɑɑbs ni, k kuun ji kɑn diɑ’l, k l mun tɑn sii yen l mɔnŋ nɑn Yennu wɑɑs nbɑ sii yen b mɔnŋ nɑn yudɑnt bɑnnu nbɑ nɑ e.

²²T mi nɑn l yiɑl dulnyɑ bonɑ mɑnŋ k tɑn tuu mɔtɑɑnɑ nɑn puo nbɑ tuu mɔ mɑtyiɑlu k kuli biɑnŋ nbɑ nɑ.

²³L k tie dulnyɑ bonɑ nɑ kuukuɑ kɑɑ k l yiɑl, ŋɑɑn tinm nbɑ mɔk Foŋɑnm nbɑ tie Yennu sinsinn piini nɑ mun kuli e t pɑlɑ ni, k guu yuo nbɑ k Yennu tɑn sɑɑ te k t tien u wɑɑs, k te k t gbɑnɑnt n nyi dɑɑbs ni.

²⁴Tɑɑ lɑ fielu nɑ e k t mɔk dindɑnn nɑ. Tɔn, nilɔ i lɑ lin nbɑ k u bo mɔk dindɑnn l pɑɑk nɑ, ŋɑnn ŋɑnin, l ji k tie dindɑnn. Ŋmee ji sii mɔk dindɑnn nɑn lin nbɑ k u ponŋ lɑ’l pɑɑk i?

²⁵Ŋɑɑn t i mɔk dindɑnn nɑn lin nbɑ k t k lɑɑt pɑɑk, ŋɑnn ŋɑnin, t ji tuu guu nɑn suklu e.

²⁶Nnɑ e mun k Foŋɑnm nɑ bɑɑl ɑ wun sonm tinm nbɑ k mɔk pɑnŋ nɑ k mɑɑn t k mi biɑnŋ nbɑ k t sii mei Yennu. Ŋɑɑn Foŋɑnm mɔnŋ e mei Yennu k tien’t k kuli bɑnnu nbɑ k t mɔbonɑ kɑn fit wɑnn l pɑɑk.

²⁷K Yennu nbɑ lɑɑt nisɑɑlk pɑl ni mi Foŋɑnm nɑ dudukt nbɑ tie, k mɑɑn Foŋɑnm nɑ mei Yennu u tiɑɔnŋ niib pɑɑk, k l wɑɑ nɑn ŋuɑ Yennu nbɑ luon biɑnŋ nbɑ nɑ.

²⁸Bin nbɑ k Yennu yiin’m nɑ, u mɔk lin nbɑ pɑɑk k u yinm e, k b mɔk lonm nɑn’ɔ, k t mi nɑn lin nbɑ kul tuun nɑ, u te k l tien bonŋɑnn k tien ŋɑnm e.

²⁹U ponŋ din senn nɑn bin nbɑ k u lukt’b nɑ, ɑ bii tie nɑn u Bijɑ nɑ, k u Bijɑ nɑ n tien Bikpelk, wɑɑs bonciɑnn sinsuuk ni.

³⁰K Yennu yiin bin nbɑ k u senn nɑ, k bin nbɑ k u yiin’m nɑ k u yet ɑ b tie niŋɑnm u buol, k bin nbɑ k u yet ɑ b tie niŋɑnm u buol nɑ, k u donn’b.

³¹T i got lin nbɑ nɑ kul, t sɑɑ yet ɑ nlee? L i tie k Yennu be t po, ŋmee ji be k sɑɑ biil’t i?

³²Yennu nbɑ k minn’t u mɔnŋ Bijɑ nɑ, ŋɑɑn jii’u k tul t kul nɑ, nlee k u ji kɑn tul’t lin nbɑ kul biɑl i?

³³Ŋmee sɑɑ tɑɑl bin nbɑ k Yennu lukt’b nɑ? Ŋuɑ Yennu e yet ɑ b tie niŋɑnm u buol.

³⁴Ŋmee be k sɑɑ bu b buut k biil’b i? Suɑ kɑɑ, k mɑɑn Yiesu Klistu nbɑ din kpo k fiil kuun ni k biɑ be Yennu niidiitu po k tie t sindɑntinnɔ nɑ.

³⁵Ŋmee sɑɑ fit nyinn’t Yiesu Klistu lonm ni? T fɑlɑ ɑmi mɑɑn ɑmi muksuk ɑmi kon ɑmi nɑmu ɑmi bonbiil ɑmi kuun e? Aɑi.

³⁶L tie nɑn lɑɑ diɑn biɑnŋ nbɑ Yennu lolkpel kɑdɑɑɔk ni nɑ ɑ: «A pɑɑk e k t be kuun fɑlɑ ni sɑn-nyiɑɔk ni wɑɑ k tɑn tuu dɑɑjuouk, k t tie nɑn pei nbɑ k b tuu tie siil ɑ bin kpi’b nɑ e.»

³⁷Ŋɑɑn bonɑ kul ni t mɔk nyɑnnu kul, wun nbɑ mɔk lonm nɑn’t nɑ pɑɑk.

³⁸K mɑɑn, n mi fɑnu nɑn siɑl kɑɑ k sɑɑ fit bɔkt tinm nɑn Klistu lonm, kuun ɑmi mɑnfuol ɑmi *mɑlɑkɑɑnbɑ ɑmi nɑlnbiit ɑmi lin nbɑ tie mɔtɑɑnɑ ɑmi lin nbɑ tɑn sɑɑ tien ɑmi

³⁹lin nbɑ be sɑnpɑɑpo ɑmi tinpuɑl ni ɑmi. Siɑl kɑɑ nɑɔnŋ kul ni k sɑɑ fit bɔkt tinm nɑn Yennu lonm nbɑ k t lɑ t Yonmdɑɑnɔ Yiesu Klistu ni nɑ.