Read Moba Luonmtieb 9 Bible Online

Luonmtieb 9 - Moba bible

Luonmtieb 9

¹N piɑk bɑlmɔni e. N tie Klistuyuɑ e, n k fɑ fɑɑk. Foŋɑnm e ŋmɑktl n *dudukt k u tie *siɑlɑ nɑn n piɑk mɔni.

²N mɔk pɑlbiil bonciɑnn k l yiɑl’n yuo kul,

³n mɔnŋ nɑɑ wɑɑs nbɑ tie n buolu nɑ pɑɑk. L i bo i sɑɑ fit k n set n niib pɑɑk k Yennu n biil’n k bɔkt min nɑn *Klistu, n bo sɑɑ sɑk nnɑ wɑɑ.

⁴Ŋɑnm e tie Islɑɑeltieb, k Yennu din tien’m u wɑɑs, k din be nɑn’m nɑn *yudɑnt, k tul’b lolɑ, k tul’b *senni, k tul’b jɑɑnti, k biɑ tul’b mɔsonɑ.

⁵B yejɑnm din tie nijɑɑnɑ e k Klistu nbɑ din kpɑnt nisɑɑlk nɑ, u din tie b buolu ni yenɔ e. Ŋuɑ e tie Yennu nbɑ yen bont kul nɑ, u sɑɑ lɑ pɑku k l kii mɔk gbennu. * Amenn.

⁶N k yien ɑ Yennu mɔsonn nɑ ji kɑn tun kɑɑ, k mɑɑn Islɑɑel yɑɑbuonɑ kul kɑɑ tie Islɑɑeltieb nɑn bɑlmɔni.

⁷Ablɑɑhɑɑnm yɑɑbuonɑ kul kɑɑ mun tie u yɑɑbuonɑ nɑn mɔni, k mɑɑn Yennu din yet Ablɑɑhɑɑnm ɑ: «Isɑɑk buolu tɑn sii tie ɑ yɑɑbuonɑ e.»

⁸L pɑɑk, bin nbɑ k Ablɑɑhɑɑnm mɑl’b nifosɑɑlk mɑɑlu nɑ k tie Yennu wɑɑs, ŋɑɑn bin nbɑ tie Yennu mɔsonn mɑɑlu wɑɑs nɑ, ŋɑnm e set tie Ablɑɑhɑɑnm wɑɑs nɑn mɔni.

⁹Yennu mɔsonn nɑ din tie ɑ: «Yuo nbɑ k n tɑn sɑɑ jen nɑ, l yuo e k Sɑɑlɑ sɑɑ mɑl bonjɑk.»

¹⁰Ŋɑɑn l kul kɑɑ nɑ. T yɑɑ Lebekɑ[1] din mɑl wɑɑs bɑnle k b tɑɑ bɑɑ, wun nbɑ tie t yejɑ Isɑɑk.

¹¹Yuo nbɑ k b dɑɑ din k mɑl’b k b k tun lin nbɑ ŋɑn ɑmi lin nbɑ b nɑ, k Yennu din yet ɑ bikpelk nɑ tɑn sii tie wɑɑlɔ po nɑ jiɑmɔ. Yennu din yet nnɑ ɑ wɑɑ lol lin nbɑ nɑ n sɑɑn tuɑnn. Wɑɑ lol lin nbɑ tie wun lukt niib e, k l pɑɑk, l k tie b tuonɑ pɑɑk kɑɑ k b tie u niib, ŋɑɑn l tie wɑɑ lol bɑnnu nbɑ k lukt’b nɑ e.

¹³L tie nɑn lɑɑ diɑn Yennu lolkpel kɑdɑɑɔk ni ɑ: «N din mɔk lonm nɑn Sɑɑkɔb ŋɑɑn nɑn Esɑɑu[2].»

¹⁴K t ji sɑɑ yet ɑ bee? T sɑɑ yet ɑ Yennu k tun lin nbɑ tuok ɑmi? Aɑi, t kɑn yet nnɑ kɑɑ.

¹⁵Yennu din yet Muois ɑ: «Bin nbɑ k n luon k n tin’m ninbɑɑɔk nɑ, ŋɑnm e k n sɑɑ tin’m ninbɑɑɔk. Bin nbɑ k n luon k mii mɔk lonm nɑn suklu b pɑɑk nɑ, ŋɑnm e k n sii mɔk lonm nɑn suklu b pɑɑk.»

¹⁶L pɑɑk, l k tie nisɑɑlk nbɑ luon lin nbɑ ɑmi u tuonɑ pɑɑk kɑɑ, ŋɑɑn l tie Yennu ninbɑɑɔk pɑɑk e.

¹⁷L diɑn Yennu lolkpel kɑdɑɑɔk ni k tul Fɑɑlɑɑɔn ɑ: «Min Yennu dinn’ɑ nɑɑn lin nbɑ nɑ pɑɑk e, ɑ n jii’ɑ k wɑnn’ɑ n yiikuo, k te k n sɑnn n muɑnt lin tingbounŋ nɑ kul.»

¹⁸L pɑɑk, bin nbɑ k Yennu luon k wun tin’m ninbɑɑɔk nɑ, ŋɑnm e k u tiin’m ninbɑɑɔk, k biɑ tien siɑb nikɑngbɑtɑ nɑn wɑɑ luon biɑnŋ nbɑ.

¹⁹Tɔn, pɑsiɑl k i yenɔ n boi’n ɑ: «L i tie nnɑ i e, nlee k Yennu lɑɑt nisɑɑlk biit i? Ŋmee sɑɑ fit k yet lin nbɑ k Yennu senn i?»

²⁰Ŋɑɑn n yuɑk, ɑ tie ŋmee k sɑɑ pɑk jiin Yennu? Bobl kɑn fit boi bobmɑɑlɔ ɑ: «Bee k ɑ mɑɑ’n k n tie nnɑ?»

²¹Bobmɑɑlɔ mɔk yiikuo k sɑɑ jii yɔuk bul k mɑɑ bobl nbɑ ŋɑn k tul kpɑnbɑl nɑn bobl nbɑ tie tɑlɑs-dɑnm yɑl.

²²Tɔn, Yennu din tun k luon wun wɑnn u wutuol k niib kul ɑ n bɑnn u yiikuo. Ŋɑɑn u din mɔk suklu nɑn bin nbɑ k u wutuol sɑɑ bɑɑl b pɑɑk k l bo jɑnŋ nɑn wun biil’b nɑ.

²³Yennu din luon wun wɑnn’t u yudɑnt nbɑ yɑb bɑnnu nbɑ, tinm nbɑ k u tin’t ninbɑɑɔk nɑ, tinm nbɑ k u ponŋ din lukt’t ɑ tin gɑɑl u yudɑnt nɑ.

²⁴Tinm e tie bin nbɑ k u din yiin’t nɑ, k u k yiin’t *Suifnbɑ sinsuuk ni kuukuɑ kɑɑ, ŋɑɑn bin nbɑ k tie Suifnbɑ mun biɑ pukn lenŋ.

²⁵L tie nɑn Ose nbɑ din diɑn Yennu lolkpel kɑdɑɑɔk ni biɑnŋ nbɑ, ɑ Yennu yet ɑ: «Niib nbɑ din k tie n niib nɑ, ŋɑnm e k n sɑɑ jii’b k bii tie n niib, k buolu nbɑ k n din k luon nɑ, ŋɑnm e k n sɑɑ yiin’m buolu nbɑ k n luon’m.

²⁶k siɑn nbɑ k b din yet’b ɑ b k tie n niib nɑ, lenŋ e biɑk k b sɑɑ yiin’m: ‹Yennu nbɑ fo nɑ wɑɑs.› »

²⁷*Yennu sɔkni Esɑɑyi din yikn sɑnpɑɑpo k wɑnn Islɑɑeltieb po k yet ɑ: «Islɑɑeltieb i lek i yɑb nɑn mɔkgbenŋl tɑnbiini nɑ, ŋɑɑn b wɑɑnm-nnɑ e sɑɑ lɑ fielu,

²⁸k mɑɑn Yonmdɑɑnɔ sɑɑ tien k tul tingbounŋ nɑ niib nɑn wɑɑ yet biɑnŋ nbɑ nɑ yiɑn yiɑn k gbenn.»

²⁹L tie nɑn Esɑɑyi nbɑ ponŋ din yet nɑ e ɑ: «T Yɑbnt Yonmdɑɑnɔ i bo i kii ten’t wɑɑs, l bo tɑn sɑɑ tun k tul’t nɑn lɑɑ din tun k tul Suodonm duo ni niib biɑnŋ nbɑ nɑ, k t bo sii tie nɑn Guomuɔl duo ni niib nɑ e.»

³⁰Tɔn, t sɑɑ yet nlee? Bin nbɑ k tie Suifnbɑ nɑ din k kol ɑ bin tien niŋɑnm Yennu buol, ŋɑɑn k Yennu yet ɑ b tie niŋɑnm u tuɑnn, b yɑdɑ nɑ pɑɑk,

³¹ŋɑɑn Islɑɑeltieb nbɑ din kol ɑ bin lɑ senni nbɑ sɑɑ te k Yennu yet ɑ b tie niŋɑnm u tuɑnn nɑ, k b ji kɔnŋ’l.

³²Bee k b din kɔnŋ i? B din k kol ɑ Yennu n yet ɑ b tie niŋɑnm u tuɑnn b yɑdɑ pɑɑk, ŋɑɑn b din kol ɑ wun yet ɑ b tie niŋɑnm u tuɑnn b tuonɑ pɑɑk e. B gbiɑt tɑngbiɑtkɑl e k bɑɑ,

³³tɑnn nbɑ k b diɑn l po Yennu lolkpel kɑdɑɑɔk ni ɑ: «Gotl, min Yennu bil tɑnn *Siiɔn duo ni, lin nbɑ sɑɑ te k niib n gbiɑt k bɑɑ. L tie tɑnjɑgbounŋ o, k b sɑɑ bilnt l pɑɑk k bɑɑ, ŋɑɑn wun nbɑ tien’ɔ yɑdɑ, u kɑn di fei.»