Read Moba 1 Kuolent-tieb 1 Bible Online

1 Kuolent-tieb 1 - Moba bible

1 Kuolent-tieb 1

¹Min Pɔul nbɑ k Yennu yiin’n u tiɑɔnŋ lonm pɑɑk ɑ n tien Yiesu *Klistu *tuomi nɑ, nɑn t nɑɑ bik Sositenn dɑ kɑdɑɑɔk nɑ

²k tien Yennu mɔtɑɑɔk niib nbɑ be Kuolent duo ni. T dɑ kɑdɑɑɔk mɑnŋ k tien yinm nbɑ kul k Yennu yiin’i Yiesu Klistu ni, ɑ i tien u tiɑɔnŋ niib k tɑɑn nɑn bin nbɑ kul jiɑntl t Yonmdɑɑnɔ Yiesu Klistu. Ŋuɑ e tie b Yonmdɑɑnɔ nɑn t Yonmdɑɑnɔ.

³T Bɑɑ Yennu nɑn Yonmdɑɑnɔ Yiesu Klistu nɑ ii mɔk ninkpɑbɑɔnŋ nɑn’i k biɑ tul’i mɑnu.

⁴N tien Yennu niipuouk yuo kul i pɑɑk nɑn wɑɑ tin’i ninbɑɑɔk Yiesu Klistu ni nɑ.

⁵Yɑɑ tɑɑn nɑn Klistu nɑ pɑɑk, i lɑ piini kul mɑntk mɑɑn nɑn minu piini.

⁶Klistu *siɑlɑ nbɑ k t din tien nɑ, i gɑɑl’l fɑnu wɑɑ.

⁷L pɑɑk Yennu piini nɑn yenn kuɑ dɑɑ puɑl’i, yinm nbɑ guu yuo nbɑ k t Yonmdɑɑnɔ Yiesu Klistu tɑn sɑɑ jen nɑ.

⁸Ŋuɑ e sɑɑ tul’i pɑnŋ nɑn Yonmdɑɑnɔ Yiesu Klistu jenu dɑɑl mɑnŋ k suɑ tɑn dɑɑ fit tɑɑl’i.

⁹Yennu i yɑɑ u sɑɑ tun lin nbɑ, u tuun ŋɑnn e. Ŋuɑ e yiin’i ɑ yinm nɑn u Bijɑ t Yonmdɑɑnɔ Yiesu Klistu i mɔk mɔtɑɑɔk nɑn lieb.

¹⁰N nɑɑ wɑɑs, n bɑln’mi e, t Yonmdɑɑnɔ Yiesu Klistu sɑnn ni, ɑ yin tɑɑn mɔb, k bɔktu dɑɑ be i sinsuuk ni, k yii tɑɑ mɔyenm kuɑ nɑn dudukyenn kuɑ.

¹¹N nɑɑ wɑɑs, Kloe[1] ŋɑɑtesiɑb yet’n ɑ i mɔk mɔniɑɔk nɑn lieb i sinsuuk ni.

¹²Lin nbɑ k n yien nɑ tie ɑ i yenɔ yɑɑ ɑ u tie Pɔul yuɑ e, k luɑ mun yɑɑ ɑ u tie Apuoluos yuɑ e, k luɑ mun biɑ yɑɑ ɑ u tie Piɑl yuɑ e, k luɑ mun biɑ yɑɑ ɑ u tie Klistuyuɑ e.

¹³Klistu mɑnŋ bɔkt bɔkt ee? B din kpɑɑ Pɔul dɑpunpunn pɑɑk i pɑɑk ii? B wul’i Yennu nyunwulu Pɔul sɑnn ni ee?

¹⁴N tien Yennu niipuouk nɑn mɑɑ k wul i suɑ Yennu nyunwulu nɑ, sie Kliispus nɑn Gɑius.

¹⁵L pɑɑk, suɑ kɑn fit yet ɑ b wul’ɔ Yennu nyunwulu n sɑnn ni.

¹⁶(L tie mɔni e, n biɑ wul Sitefɑɑnɑɑs ŋɑɑtieb Yennu nyunwulu e, ŋɑɑn n ji k tiɑn mɑɑ wul wun nbɑ k pukn.)

¹⁷K mɑɑn Klistu k tun’n ɑ n tɑn wul niib Yennu nyunwulu kɑɑ, ŋɑɑn u tun’n ɑ n tɑn muɑnt u lɑbɑmɑnn nɑ e k tul niib. L k tie ɑ n jikt nisɑɑlk minu kɑɑ k yien’m. Mi i bo i tuun nnɑ, l bo sɑɑ te k Klistu dɑpunpunn pɑɑk kuun nɑ ji k mɔk yiikuo.

¹⁸Klistu kuun dɑpunpunn pɑɑk lɑbɑɑl nɑ tie jɑtmɑɑn k tul bin nbɑ buol Yennu sɔnu ni, ŋɑɑn l tie Yennu yiikuo k tul tinm nbɑ wɑɑ fielu sɔnu nɑ.

¹⁹L diɑn Yennu lolkpel kɑdɑɑɔk ni ɑ u yet ɑ: «N sɑɑ biil yɑndɑnm minu nɑ k te k bɑntieb bɑnnu nɑ n biɑl yɑnn.»

²⁰Tɔn, k tingbounŋ nɑ yɑndɑnm nɑn bin nbɑ mi kɑdɑɑɔk fɑnu nɑn mɔnɔdɑnm nɑ sɑɑ pɑɑk bee? Yennu sɑɑ wɑnn nɑn tingbounŋ nɑ ni yɑn tie jɑti e.

²¹K mɑɑn Yennu nbɑ mɔk yɑn nɑ te k tingbounŋ nɑ tieb yɑn kɑn fit te k niib n bɑnn’ɔ. L pɑɑk, k u te k bin nbɑ tien yɑdɑ nɑ lɑɑt fielu, lɑbɑɑl nbɑ k t muɑntl k tien niib, k niib duki nɑn l tie jɑti lɑbɑɑl nɑ pɑɑk.

²²*Suifnbɑ luon bin lɑ bɑktnɔunŋ tuonɑ e wɑɑ, k Gleknbɑ mun luon yɑn,

²³ŋɑɑn tinm ŋɑnin muɑntl k wɑnt’b ɑ Klistu din kpo dɑpunpunn pɑɑk e, k mɑɑn mɑnŋ mɔk fei Suifnbɑ nunm ni, k biɑ tie jɑtmɑɑn k tien bin nbɑ k tie Suifnbɑ.

²⁴Ŋɑɑn Suifnbɑ nɑn bin nbɑ k tie Suifnbɑ nbɑ k Yennu lukt’b nɑ ŋɑnin mi nɑn Klistu kuun lɑbɑɑl nɑ tie Yennu yiikuo nɑn u yɑn e.

²⁵Lin nbɑ k Yennu tun k nisɑɑlk jii’l k l tie jɑti nɑ, l mɔk yɑn k gɑl nisɑɑlk yɑn, k lin nbɑ k Yennu tien k nisɑɑlk duki ɑ l k mɔk pɑnŋ nɑ, ŋɑɑn l mɔk pɑnŋ k gɑl nisɑɑlk yɑl.

²⁶N nɑɑ wɑɑs, duknt mɑn yɑɑ din tie biɑnŋ nbɑ yuo nbɑ k Yennu din yiin’i nɑ. I sinsuuk ni, i wɑɑnm-nnɑ e din mɔk yɑn, k i wɑɑnm-nnɑ e din mɔk yiikuo, k i wɑɑnm-nnɑ e din tie nijɑɑnɑ wɑɑs.

²⁷Ŋɑɑn Yennu e lukt jɑtbont tingbounŋ nɑ ni, ɑ wun te k yɑndɑnm n di fei, k biɑ lukt lin nbɑ k mɔk pɑnŋ tingbounŋ nɑ ni, ɑ wun te k pɑnŋ dɑnm n di fei.

²⁸Yennu e lukt lin nbɑ k tingbounŋ nɑ ni niib duki nɑn l k mɔk nyuɑt nɑ, lin nbɑ k b duki nɑn l k ŋɑn nɑ, k biɑ k tie siɑl nɑ, ɑ wun biil lin nbɑ k tingbounŋ nɑ ni niib duki nɑn l mɔk nyuɑt nɑ.

²⁹U tien nnɑ e ɑ suɑ dɑɑ fuɑ bɑlɑ u buol.

³⁰Ŋuɑ Yennu e tɑɑn’i nɑn Yiesu Klistu k Klistu mɑnŋ tien’t yɑn. U pɑɑk e k Yennu yet ɑ t tie niŋɑnm u buol k te k t tie u tiɑɔnŋ niib k biɑ nyinn’t t biit dɑɑbs ni.

³¹L pɑɑk, nɑn lɑɑ diɑn Yennu lolkpel kɑdɑɑɔk ni ɑ: «Wun nbɑ fuɑ bɑlɑ, wuu fuɑ bɑlɑ mɑnŋ Yonmdɑɑnɔ pɑɑk »