Read Moba 1 Kuolent-tieb 13 Bible Online

1 Kuolent-tieb 13 - Moba bible

1 Kuolent-tieb 13

¹Tɔn, mi i lek i fit piɑk nisɑɑli nɑn *mɑlɑkɑɑnbɑ mɑbuolu kul, ŋɑɑn k k mɔk lonm, n tie nɑn gingɑnn ɑmi gbeklu fuut nɑ e.

²Mi i fit sɔknt Yennu mɑɑn, k bɑnt wuol ni mɑɑn kul, k mɔk bɑnnu, k mɔk yɑdɑ nbɑ sɑɑ fit te k juɑl n fikt k sɑɑn boliel po, ŋɑɑn k k mɔk lonm, n tie yɑnn e.

³Mi i jii n mɔktuk kul k tul nɑndɑnm, k lek jii n gbɑnɑnt cɑb k b juo muu gbɑɑ, ŋɑɑn k k mɔk lonm, n k mɔk nyuɑt.

⁴Wun nbɑ mɔk lonm nɑ, u mɔk suklu e nɑn bulcint niib pɑɑk. U k mɔk *funfunn, k biɑ k mɔk wɑnt-n-mɔnŋ, k biɑ k mɔk dont-n-mɔnŋ.

⁵U k tuun fei tuonn. U mɑntk k luon u mɔnŋ nyuɑt kuukuɑ kɑɑ. U k dont wutuol yiɑn yiɑn. U biɑ k duki bonbiil k jiint biit, biit pɑɑk.

⁶Wun nbɑ mɔk lonm k mɔk pɑlpienn nɑn bonbiil, ŋɑɑn mɔk pɑlpienn nɑn bɑlmɔni.

⁷Wun nbɑ mɔk lonm nyikt cɑbt bont kul, k mɔk yɑdɑ nɑn bont kul, k dɑɑn bont kul, k tuot bont kul.

⁸Lonm k mɔk gbennu. Bɑlsɔknu tɑn sɑɑ tɑb ɑ, k mɑbuolu pɑku n gbenn, k bɑnnu mun n bot.

⁹Setk nɑn mɔni t k mi bonsiɑl kul, k biɑ k sɔkn Yennu mɑɑn nɑ kul,

¹⁰ŋɑɑn yuo nbɑ k lin nbɑ ŋɑn nɑ i tɑnŋ i bɑɑl, lin nbɑ k ŋɑn nɑ sɑɑ gɑl e.

¹¹Mɑɑ din tie bik, n pinpɑkt nɑn n bɑnnu nɑn n dudukt din tie bisuk o, ŋɑɑn mɑɑ ji tɑn biel nilɔ, n ji nyik bisn ni bonɑ e.

¹²Tɑɑ lɑɑt bonɑ bɑnnu nbɑ mɔtɑɑnɑ tie nɑn t goli miɑnu ni nɑ e, ŋɑɑn k k lɑɑt fɑnu, ŋɑɑn t tɑn sɑɑ lɑ’l ninpieee e. Mɑɑ mi lin nbɑ nɑ, l dɑɑ wɑɑl, ŋɑɑn n tɑn sii mi’l fɑnu, nɑn Yennu nbɑ mi’n fɑnu biɑnŋ nbɑ nɑ.

¹³Tɔn, yɑdɑ nɑn dindɑnn nɑn lonm, l bonɑ ŋɑntɑ dɑɑ be mɔtɑɑnɑ, ŋɑɑn lonm e gɑl l kul.