Read Moba 1 Kuolent-tieb 15 Bible Online

1 Kuolent-tieb 15 - Moba bible

1 Kuolent-tieb 15

¹N nɑɑ wɑɑs, n luon k n tiɑl’i lɑbɑmɑnn nbɑ k n din muɑnt k tul’i, k i din gɑɑl k diɑ’l fɑnu nɑ po e.

²L i tie k i diɑ’l fɑnu nɑn mɑɑ din wɑnn’i bɑnnu nbɑ nɑ, i sɑɑ lɑ fielu, ŋɑɑn nnɑ e kɑɑ, i yɑdɑ nɑ sii tie yɑnn e.

³K mɑɑn n din yet’i lɑbɑɑl nbɑ k n mun din gɑɑl nɑ, k l tie bɑljɑɑnn k gɑl mɑɑn kul ɑ. *Klistu din gɑɑl tinm biitdɑnm pɑɑk k kpo, nɑn lɑɑ ponŋ din diɑn Yennu lolkpel kɑdɑɑɔk ni biɑnŋ nbɑ nɑ,

⁴k b din pii’u, k u fiil kuun ni dɑɑ ŋɑntɑ dɑɑl nɑn lɑɑ diɑn Yennu lolkpel kɑdɑɑɔk ni biɑnŋ nbɑ nɑ,

⁵k u din dɔkt Piɑl pɑɑk, k biɑ dɔkt tuomiinbɑ *piik nɑn bɑnle nɑ pɑɑk.

⁶L puolpo biɑk k u dɔkt yonm k wɑnn u *puolpoweitieb nbɑ yɑb gɑl niib kobi ŋɑnŋmu nɑ. B siɑb bonciɑnn dɑɑ be b mɑnfuol ni, k b siɑb mun kpo wɑɑ.

⁷L puolpo e k u biɑ tɑn dɔkt Sɑɑk pɑɑk, k ji tɑn dɔkt tuomiinbɑ kul ɑ pɑɑk.

⁸Lin nbɑ nɑ kul puolpo, k u biɑ dɔkt n pɑɑk, min nbɑ tie nɑn wun nbɑ k b mɑl’ɔ k u k bɑɑl dɑɑl nɑ.

⁹Tuomiinbɑ nɑ kul ŋɑɑn min e tɑn juont, k n bo k jɑnŋ nɑn bii yi’n *tuomi, k mɑɑn mɑɑ din tuu muks Yennu mɔtɑɑɔk niib nɑ pɑɑk.

¹⁰Ŋɑɑn Yennu ninkpɑbɑɔnŋ pɑɑk e k n tie mɑɑ tie lin nbɑ, k wɑɑ din mɔk ninkpɑbɑɔnŋ nɑn’n nɑ, l k tie yɑnn. N tun k gɑl tuomiinbɑ nɑ kul ɑ, ŋɑɑn l k tie ɑ min kɑɑ tun, Yennu ninkpɑbɑɔnŋ nbɑ be n ni nɑ e tun.

¹¹L i tie min i e, ɑmi l i biɑ tie ŋɑnm i e, lin nbɑ k t muɑntl k tien niib nɑ, ŋɑnn e k i mun tien yɑdɑ.

¹²Ŋɑɑn, tii muɑntl mɑɑn nɑ k yɑɑ ɑ Klistu din fiil kuun ni, k nlee k i siɑb sii yien ɑ bin nbɑ kpo nɑ tɑn kɑn fiil i?

¹³L i tie k kuun fiilu kɑɑ i e, l wɑnt nɑn Klistu mun din k fiil kuun ni,

¹⁴k Klistu ii dinŋ ii kii fiil kuun ni e, ŋɑnn ŋɑnin t k mɔk lɑbɑɑl nbɑ k t ji sɑɑ muɑnt, k i mun k mɔk lin nbɑ k i sɑɑ tien yɑdɑ.

¹⁵K biɑ jen ɑ, t tien fɑɑk siɑlɑɑdɑnm e nɑ k tul Yennu, k mɑɑn t ponŋ tien Yennu siɑlɑɑdɑnm ɑ u din fiin Klistu kuun ni, ŋɑɑn kuun fiilu i kɑɑ, u set din k fiin’ɔ kuun ni.

¹⁶K mɑɑn kpienm fiilu i kɑɑ, ŋɑnn ŋɑnin Yennu mun din k fiin Klistu kuun ni.

¹⁷Klistu ii dinŋ ii bo i kii fiil kuun ni, i yɑdɑ tie yɑnn e, k i biɑ dɑɑ be i biit ni.

¹⁸L bo biɑ wɑnt nɑn bin nbɑ tien Klistu yɑdɑ ŋɑɑn kpo nɑ, b bot e.

¹⁹Tɑɑ mɔk dindɑnn nɑn Klistu nɑ, l i tie k l mɔk nyuɑt tingbounŋ nɑ benu ni kuukuɑ i e, ŋɑnn ŋɑnin t bo sii mɔk ninbɑɑɔk k gɑl suɑ kul ɑ.

²⁰Ŋɑɑn l tie bɑlmɔni e, Yennu set din fiin Klistu kuun ni wɑɑ. Ŋuɑ Klistu e tie sinsinn dɑɑnɔ nbɑ fiil kuun ni, k l wɑnt nɑn bin nbɑ kul kpo nɑ mun tɑn sɑɑ fiil kuun ni.

²¹Nilɔ nbɑ din bɑɑl nɑn kuun tingbounŋ nɑ ni nɑ. Nnɑ e mun k nilɔ biɑ bɑɑl nɑn kuun fiilu.

²²K mɑɑn Adɑn pɑɑk e k nifosɑɑli kul kpenn, k nnɑ e mun Klistu pɑɑk nifosɑɑli sɑɑ lɑ mɑnfuol.

²³Suɑ kul nɑn u kuun fiilu yuo. Klistu e fiil sinsinn, k bin nbɑ tie u niib mun tɑn sɑɑ fiil u bɑɑlu dɑɑl mɑnŋ.

²⁴L puolpo k l juontu tɑn sɑɑ bɑɑl, k u tɑn sɑɑ nyɑnn nɑɑndinu kul, nɑn yent nɑn yiikuo kul, ŋɑɑn jii nɑɑn nɑ k tul u Bɑɑ Yennu.

²⁵Klistu tɑn sii yen yent kul mɔkmɔk k tɑn bɑɑl yuo nbɑ k u sɑɑ nyɑnn u dɑtɑi kul k ŋmɑɑ’b tɑɑl.

²⁶Dɑtɑɑk nbɑ k u tɑn sɑɑ juont k biil tie kuun e.

²⁷L diɑn Yennu lolkpel kɑdɑɑɔk ni ɑ: «U jii bont kul k tien u tɑɑpɑɔnŋ ni.» Ŋɑɑn lɑɑ yet ɑ: «bont kul» nɑ, Yennu nbɑ tien bont kul Klistu tɑɑpɑɔnŋ ni nɑ kɑɑ lenŋ.

²⁸K bont kul i tɑnŋ i be Klistu nuu ni, ŋɑnn ŋɑnin u mɔnŋ tɑn sɑɑ tien u mɔnŋ Yennu, wun nbɑ te k bont kul be Klistu nuu ni nɑ, nuu ni. Nnɑ e k Yennu sii tie bont kul sɑɑk ɑ Kpɑnbɑl.

²⁹Nisiɑb te k b wuul’b Yennu nyunwulu kpienm pɑɑk. L nyuɑt tie bee? Mɔni, l i tie k kpienm kɑɑ fiilu i e, bee pɑɑk e k niib mɑnŋ te k b wuul’b Yennu nyunwulu kpienm pɑɑk i?

³⁰K t mun ii? Bee k t kuɑnt t mɔnŋ ninbɔnŋ ni yuo kul i?

³¹N nɑɑ wɑɑs, n tuokt kuun dɑɑl kul. Yudɑnt nbɑ k n mɔk nɑ, tɑɑ be nɑn t Yonmdɑɑnɔ Klistu bɑnnu nbɑ nɑ pɑɑk e te k n piɑk nnɑ.

³²K min nɑn Efes duo ni bonkob-biit kɔn, k mi i tie nifosɑɑlk nbɑ kɑn fiil kuun ni e, l nyuɑt tie lɑnn e k tul’n i? Kpienm i kii fi kuun ni, «Ŋɑɑnt mɑn k tii di kii nyu ŋɑɑn kii mi nɑn t won sɑɑ kpo.»

³³I dɑɑ sɑɑk k suɑ n kpɑnn’i ni. «Niŋɑnm nɑn nibiit i tɔki nɑn lieb l sɑɑ biil niŋɑnm mɑnŋ binbenŋɑnŋ.»

³⁴Ŋɑɑnt k i yɑɑn jen, k ji dɑɑ tuun biit. I siɑb k mi Yennu. Ŋɑnn e k n dɑ nɑ k yɑɑ n din’i fei.

³⁵Suɑ sɑɑ boi ɑ: «Nlee k bin nbɑ kpo nɑ tɑn sɑɑ fiil kuun ni? B gbɑnɑnt tɑn sii tie nlee?»

³⁶Jɑtuk nɑ, lin nbɑ k ɑ bul, l kɑn fit piɑ l yuo, sie k l kpo dɑɑnn k tɑn ji fit piɑ.

³⁷Fi i yɑɑ ɑ bul bonbuolk, l kii tie nɑn lin nbɑ sɑɑ piɑ nɑ kɑɑ. L i tie dii ɑmi lin nbɑ kul, ɑ buul bonbuolk nɑ e.

³⁸Ŋɑɑn Yennu e sɑɑ te k bonbuolk mɑnŋ n kpɑɑt nɑn wɑɑ luon lii tie biɑnŋ nbɑ nɑ, k bonbuolk kul mɔk l mɔnŋ nɑɑɔnŋ o.

³⁹Gbɑnɑnt bont kul k tɑɑ nɑɑɔnŋ, nifosɑɑli gbɑnɑnt tie yonm e, k bonkobt yɑl mun tie yonm k nuɑni yɑl mun tie yonm k jɑni yɑl tie yonm.

⁴⁰Sɑnpɑɑpo bonɑ mɔk b gbɑnɑnt b kuɑ e, k tingbounŋ nɑ ni bonɑ mun mɔk l gbɑnɑnt l kuɑ. Sɑnpɑɑpo bonɑ gbɑnɑnt fɑnt be l kuɑ e, k tingbounŋ nɑ bonɑ gbɑnɑnt fɑnt mun be l kuɑ,

⁴¹yennu fɑnt be l kuɑ e, k ŋmɑɑlk mun mɔk fɑnt l kuɑ, k ŋmɑɑbilɑ mɔk fɑnt l kuɑ, k ŋmɑɑbilɑ sinsuuk ni mɔk fɑnt kuɑt kuɑt.

⁴²L sii tie nnɑ e kuun fiilu ni. Gbɑnɑnt nbɑ k b pii tinŋ ni tuu tɑn puɑk e, ŋɑɑn gbɑnɑnt nbɑ fiil kuun ni kɑn mi puɑk.

⁴³Gbɑnɑnt nbɑ k b pii’l nɑ tie gbɑnɑnbiiuk k k mɔk pɑnŋ, ŋɑɑn l tɑn sɑɑ fiil nɑn fɑnt e nɑn pɑnŋ.

⁴⁴Gbɑnɑnt nbɑ k b pii’l nɑ tie tingbounŋ nɑ yɑl e, ŋɑɑn gbɑnɑnt nbɑ sɑɑ fiil nɑ tie Foŋɑnm nbɑ tien mɑnfuol nɑ yɑl e. Gbɑnɑnt nbɑ tie tingbounŋ nɑ yɑl be, k l pɑɑk k Foŋɑnm nbɑ tien mɑnfuol nɑ gbɑnɑnt mun be.

⁴⁵Setk nɑn mɔni, l diɑn Yennu lolkpel kɑdɑɑɔk ni ɑ: «Sinsinn nilɔ Adɑn nɑ din kpɑnt nilɔ nbɑ fo,» ŋɑɑn Adɑn nbɑ juont k bɑɑl nɑ tie Foŋɑnm nbɑ tien’t mɑnfuol e.

⁴⁶Gbɑnɑnt nbɑ k Foŋɑnm tien’l mɑnfuol nɑ kɑɑ bɑɑl sinsinn, ŋɑɑn lin nbɑ tie tingbounŋ yɑl nɑ e bɑɑl sinsinn, k l puolpo k gbɑnɑnt nbɑ k Foŋɑnm tien mɑnfuol nɑ tɑn wei.

⁴⁷Sinsinn nilɔ nɑ din nyii tɑnt ni e, k nilɔ nbɑ wei nɑ nyii *Yendɔunŋ ni.

⁴⁸Tingbounŋ nɑ tieb tie nɑn juɑ nbɑ nyii tɑnt ni nɑ e, k bin nbɑ tie Yendɔunŋ ni yɑb tie nɑn juɑ nbɑ nyii Yendɔunŋ ni nɑ.

⁴⁹T kul ɑ mɔk wun nbɑ din nyii tɑnt ni nɑ nɑɑɔnŋ o, nnɑ e mun k t sii mɔk juɑ nbɑ nyii Yendɔunŋ ni nɑɑɔnŋ.

⁵⁰N nɑɑ wɑɑs, n yien’i e nɑn lin nbɑ tie nɑnt nɑn sɔn nɑ kɑn fit kuɑ Yendɔunŋ ni, k lin nbɑ kpenn kɑn fit lɑ mɑnfuol nbɑ kɑɑ gbennu.

⁵¹N yɑɑ n yet’i wuol ni mɑɑn e. T siɑb kɑn kpo, ŋɑɑn t kul sɑɑ lebt ɑ.

⁵²L dɑɑl mɑnŋ, kɑtkɑɑk i tɑnŋ i bui, t kul sɑɑ lebt yonm e yiɑn yiɑn ɑ nɑn ninbinn kɑbintu nɑ. Kɑtkɑɑk sɑɑ bui, k kpienm n fiil nɑn gbɑnɑnt nbɑ kɑn mi kpo, k t kul sɑɑ lebt ɑ.

⁵³K mɑɑn l kpɑɑ tɑlɑs nɑn gbɑnɑnt nbɑ puɑkt nɑ tɑn sɑɑ kpɑnt gbɑnɑnt nbɑ k puɑkt e, k gbɑnɑnt nbɑ kpenn nɑ tɑn sɑɑ kpɑnt gbɑnɑnt nbɑ k kpenn e.

⁵⁴Yuo nbɑ k lin nbɑ puɑkt nɑ kpɑnt lin nbɑ k puɑkt, k lin nbɑ kpenn kpɑnt lin nbɑ k kpenn, l yuo nɑ lin nbɑ diɑn Yennu lolkpel kɑdɑɑɔk ni nɑ n gbie ɑ: «Kuun ji bot ɑ, u nyɑnn kuun gbenn ɑ.»

⁵⁵L biɑ diɑn ɑ: «Kuun, ɑ nyɑnnu nɑ be lee? Kuun, ɑ juol nbɑ tie nɑn nɑnŋ juol[2] nɑ, juol nbɑ k ɑ diɑ k dint niib fɑlɑ nɑ be lee?»

⁵⁶Kuun lɑɑt u pɑnŋ biit buol e, k biit mun lɑɑt u pɑnŋ *senni buol.

⁵⁷Ŋɑɑn Yennu yen niipuouk. Ŋuɑ e tul’t nyɑnnu t Yonmdɑɑnɔ Yiesu Klistu ni.

⁵⁸L pɑɑk, n nɑɑ wɑɑs, ii be mɑn nɑn pɑnŋ k dɑɑ bɑɑ i yɑdɑ ni. I jii i mɔnŋ kii tuun Yonmdɑɑnɔ tuonɑ nɑn ninmɔnn, k mɑɑn i mi nɑn tuonɑ nbɑ k i tuun k tien Yonmdɑɑnɔ nɑ, l tɑn kɑn bɑɑ yɑnn.