Read Moba 1 Kuolent-tieb 2 Bible Online

1 Kuolent-tieb 2 - Moba bible

1 Kuolent-tieb 2

¹N nɑɑ wɑɑs, mɑɑ din bɑɑl i buol ni nɑ, n din k muɑntl Yennu mɑɑn nɑ k tien’i nɑn mɔbonpɑɑlɑ ɑmi minu nbɑ gɑl’i kɑɑ.

²K mɑɑn, mɑɑ din be nɑn’i nɑ, n din k lol k n bɑnn siɑl sie Yiesu *Klistu, wun nbɑ k b din kpɑɑ’u dɑpunpunn pɑɑk nɑ kuɑ.

³L pɑɑk, k n din bɑɑl i buol ni k tie tɑtmɔ, k jɑŋmɑɑni suol’n k n jekl.

⁴N din k tumi’i k biɑ din k muɑntl lɑbɑmɑnn nɑn minu nbɑ sɑɑ mɑnŋ niib kɑɑ wɑɑ k bin sɑk’l, ŋɑɑn n din pɑk e k Foŋɑnm nɑ wɑnn u yiikuo,

⁵ɑ yɑɑ tien yɑdɑ nɑ, l k tie nisɑɑlk yɑn pɑɑk kɑɑ, ŋɑɑn l tie Yennu yiikuo pɑɑk e.

⁶Mɔmɔnm, n muɑntl nɑn yɑn e k tien bin nbɑ k b yɑdɑ cie Klistuyɑb ni nɑ. Ŋɑɑn l k tie tingbounŋ nɑ niib yɑn ɑmi tingbounŋ nɑ pɑnŋ dɑnm nbɑ k b pɑni sɑɑ tien yɑnn nɑ kɑɑ.

⁷Yɑn nbɑ k n piɑk l po nɑ tie Yennu wuol ni yɑn nbɑ wuon k nilɔ k mi, lin nbɑ k Yennu din ponŋ dɔnŋ lukt ɑ wun don’t, k suɑ k *dulnyɑ dɑɑ din k nɑn nɑ.

⁸Tingbounŋ nɑ ŋɑɑyudɑnm ni suɑ kɑɑ k mi yɑn nɑ. B i din i bo i mi’l, b din bo kɑn kpɑɑ Yonmdɑɑnɔ wun nbɑ yen *yudɑnt kul ɑ nɑ dɑpunpunn pɑɑk,

⁹ŋɑɑn l diɑn Yennu lolkpel kɑdɑɑɔk ni ɑ: «Lin nbɑ k nilɔ k lɑ, k biɑ k gbɑt, k biɑ k dukn l po nɑ, ŋɑnn e k Yennu tien siil k guun bin nbɑ luon’ɔ nɑ.»

¹⁰Ŋɑɑn k Yennu te k t bɑnn’l Foŋɑnm ni, k mɑɑn Foŋɑnm nɑ mi bont kul nɑn Yennu wuol ni mɑɑn gbɑɑ.

¹¹Nifosɑɑlk siek nbɑ be u ni nɑ kuukuɑ e mi nifosɑɑlk dudukt. Nnɑ e mun suɑ k mi Yennu dudukt sie u Siek nɑ kuukuɑ.

¹²Siek nbɑ k t gɑɑl nɑ, l k tie tingbounŋ nɑ siek kɑɑ, ŋɑɑn l tie Yennu Siek nbɑ sɑɑ te k tin bɑnn piini nbɑ k u tul’t e.

¹³L pɑɑk e k t piɑk nɑn mɔbonɑ nbɑ k tie nisɑɑlk yɑn wɑnnu, ŋɑɑn t piɑk mɔbonɑ nbɑ k Yennu Siek wɑnt’t, k biɑ wɑnt Yennu bɑlmɔni nɑ k tien niib nbɑ k u Siek be b ni nɑ,

¹⁴ŋɑɑn wun nbɑ k mɔk Yennu Siek mɑnŋ, l dɑɑnɔ k gɑɑn lin nbɑ nyii Siek mɑnŋ buol, k mɑɑn l sii tie jɑti e k tul’ɔ, k u kɑn fit bɑnn l pɑɑk, k mɑɑn l bɑnnu nyi Siek mɑnŋ buol ni e.

¹⁵Wun nbɑ mɔk Yennu Siek nɑ sɑɑ fit bu bonn kul buut, ŋɑɑn ŋuɑ ŋɑnin suɑ kɑn fit bu u buut.

¹⁶nɑn lɑɑ diɑn Yennu lolkpel kɑdɑɑɔk ni ɑ: «Ŋmee sɑɑ fit bɑnn Yonmdɑɑnɔ dudukt i? Ŋmee sɑɑ fit kpɑɑn’ɔ?» Ŋɑɑn tinm ŋɑnin mɔk Klistu dudukt.