Read Moba 1 Kuolent-tieb 3 Bible Online

1 Kuolent-tieb 3 - Moba bible

1 Kuolent-tieb 3

¹N nɑɑ wɑɑs, l tie mɔni e, n din k fit pɑk k tul’i nɑn mɑɑ din bo sɑɑ pɑk k tul niib nbɑ mɔk Siek nɑ. N din pɑk k tul’i nɑn mɑɑ bo sɑɑ pɑk k tul tingbounŋ nɑ tieb nɑ e, k i binbenŋ biɑ tie nɑn wɑɑs binbenŋ nɑ e *Klistu sɔnu ni.

²N muɑnt’i biin e, k l k tie jekpɑklɑ kɑɑ, k mɑɑn i k jɑnŋ nɑn’n. Nɑn mɔtɑɑnɑ i biɑ lek dɑɑ k jɑnŋ nɑn’n,

³k mɑɑn i binbenŋ biɑ dɑɑ tie nɑn tingbounŋ nɑ niib binbenŋ nɑ e. *Funfunn nɑn mɔniɑɔk i be i sinsuuk ni, i k wɑɑ tingbounŋ nɑ tieb binbenŋ kɑɑ ɑɑ?

⁴Suɑ i yet ɑ u tie Pɔul yuɑ e, k luɑ mun yet ɑ u tie Apuoluos yuɑ e, ŋɑnn i k tuun nɑn tingbounŋ nɑ tieb binbenŋ nɑ kɑɑ ɑɑ?

⁵Setk nɑn mɔni, ŋmee tie Apuoluos k ŋmee mun tie Pɔul i? T kpɑn tie Yennu tuontunnɑ nbɑ din wɑnn’i bɑnnu nbɑ k i sɑɑ tɔkn k tien Yiesu yɑdɑ e. T kul nɑ tuun tuonɑ nbɑ k Yonmdɑɑnɔ tul’t ɑ tii tuun e.

⁶Min din bul bonbuoli e k Apuoluos mun mɑɑnt nyun, ŋɑɑn Yennu e te k l piɑ k kpɑɑt.

⁷Wun nbɑ bul nɑn wun nbɑ mɑɑnt nyun ŋɑnin tie yɑnn e, ŋɑɑn Yennu k tie yɑnn, k mɑɑn ŋuɑ e te k l kpɑɑt.

⁸Bɔktu kɑɑ wun nbɑ buul nɑn wun nbɑ mɑɑnt nyun nɑ sinsuuk ni. Yennu e sɑɑ tul’b nyuɑt bɑɑ tun lin nbɑ nɑ pɑɑk.

⁹T lɑkn tie Yennu tuontunnɑ e. I tie Yennu kpɑɑb nɑ e, k biɑ tie Yennu ŋɑɑk nɑ.

¹⁰Yennu nbɑ mɔk ninkpɑbɑɔnŋ nɑn’n nɑ, k n tie nɑn tɑnmɑɑŋɑnɔ nɑ, k fɔkn fiɑkl, k suɑ mun mɑɑ k tuɑnt l pɑɑk. Ŋɑɑn wun nbɑ kul mɑɑ k tuɑnt l pɑɑk wun suol u mɔnŋ.

¹¹K mɑɑn fiɑkl ponŋ be. Ŋɑnn e tie Yiesu Klistu, k fiɑksiɑl ji kɑɑ k suɑ ji sɑɑ fit piin.

¹²Siɑb sɑɑ jii sɑlmɑ e, ɑmi likli kut, ɑmi tɑncincienɑ, k mɑɑ fiɑkl mɑnŋ pɑɑk. k siɑb mun sɑɑ jii dɑɑt e, ɑmi muɑt, ɑmi kɑkɑ, k cɑɑn fiɑkl mɑnŋ pɑɑk.

¹³Ŋɑɑn *dulnyɑ cincɑɑtdɑɑl mɑnŋ ni e, k suɑ kul tuonɑ nbɑ tie biɑnŋ nbɑ tɑn sɑɑ nyi pɑɑnu. Muu e tɑn sɑɑ fiit wɑnn’l, k bikn suɑ kul tuonɑ k wɑnn lɑɑ tɑn sii tie biɑnŋ nbɑ.

¹⁴L i kii dii lin nbɑ k nilɔ mɑɑ tuɑn fiɑkl mɑnŋ pɑɑk nɑ, ŋɑnn ŋɑnin u sɑɑ lɑ nyuɑt ɑ.

¹⁵Ŋɑɑn wun nbɑ yɑl dii muu, u sɑɑ kɔnŋ l nyuɑt ɑ, ŋɑɑn u mɔnŋ ŋɑnin sɑɑ lɑ fielu wɑɑ, k l sii tie nɑn u ciɑl e k nyii muu ni nɑ.

¹⁶I k mi nɑn i tie Yennu jɑɑnti ŋɑsɑɑkɑk e, k Foŋɑnm be i ni ii?

¹⁷L pɑɑk, wun nbɑ biil Yennu jɑɑnti ŋɑsɑɑkɑk, Yennu mun sɑɑ biil l dɑɑnɔ wɑɑ, k mɑɑn Yennu jɑɑnti ŋɑsɑɑkɑk tie u tiɑɔnŋ tiɑɔnŋ yɑl e, k yinm e tie u jɑɑnti ŋɑsɑɑkɑk mɑnŋ.

¹⁸Suɑ dɑɑ kpɑnn u mɔnŋ. Suɑ i be i sinsuuk ni k duki nɑn u mɔk yɑn tingbounŋ niib nunm ni, l ŋɑn wun kpɑnt u mɔnŋ wɑɑtɔ kii mɔk yɑn nɑn bɑlmɔni.

¹⁹Lin nbɑ k tingbounŋ nɑ tieb dukn k l tie yɑn nɑ, l tie jɑti e Yennu buol nɑn lɑɑ diɑn Yennu lolkpel kɑdɑɑɔk ni ɑ: «Yennu so yɑndɑnm b yɑn nbɑ tie bɑluk nɑ ni,»

²⁰k biɑ diɑn liel buol ɑ: «T Yonmdɑɑnɔ mi nɑn yɑndɑnm dudukt tie yɑnn e.»

²¹L pɑɑk, suɑ dɑɑ mɔk dont-n-mɔnŋ nisɑɑlk pɑɑk. Bonsiɑl kul tie i yɑl e.

²²Min Pɔul nɑn Apuoluos nɑn Piɑl nɑn tingbounŋ nɑ, nɑn mɑnfuol nɑn kuun, nɑn mɔtɑɑnɑ nɑn yuo nbɑ bɑɑt nɑ, yinm e yen lin nbɑ nɑ kul ɑ,

²³k Klistu mun yen’i, k Yennu mun yen Klistu.