Read Moba 1 Kuolent-tieb 9 Bible Online

1 Kuolent-tieb 9 - Moba bible

1 Kuolent-tieb 9

¹N k yen n mɔnŋ ii? N k tie *tuomi kɑɑ ɑɑ? N din k lɑ t Yonmdɑɑnɔ Yiesu uu? N tuonɑ nbɑ k n tuun k tien Yonmdɑɑnɔ nɑ pɑɑk kɑɑ k i mun tie Klistuyɑb ii?

²Siɑb i kii sɑk ɑ n tie tuomi, ŋɑɑn yinm ŋɑnin, l kpɑɑ tɑlɑs yin sɑk, k mɑɑn yɑɑ tɑɑn nɑn *Klistu nɑ, ŋɑnn e tie nyinn nɑn n set tie tuomi e.

³Niib i piɑk k biil n sɑnn, n sɑɑ jiin nnɑ e k nyi lenŋ.

⁴T k mɔk yiikuo nbɑ k t sii di k nyu t tuonn nɑ pɑɑk ii?

⁵T biɑ k mɔk yiikuo nbɑ k sɑɑ jii puo nbɑ tie Klistuyuɑ kii lin nɑn’ɔ, nɑn tuomiinbɑ siɑb nɑn Yonmdɑɑnɔ ninjɑnm nɑn Piɑl nbɑ tie biɑnŋ nbɑ nɑ ɑɑ?

⁶Kuo, i duki ɑ l tie min nɑn Bɑɑlnɑɑbɑɑs kuukuɑ e sii tuun tuonn k dint t mɔnŋ ii?

⁷Seje lɑnnɔ e tuun tuonn ŋɑɑn pɑ u mɔnŋ i? K ŋmee sii ko tilonti nbɑ k b yi *fiinyɑnbɑ nɑ ni ŋɑɑn kɑn di l luɑnɑ? Ami ŋmee sii kpɑɑl bonkobt ŋɑɑn kɑn nyu b biin i?

⁸I dɑɑ duki nɑn n bikn nɑn nisɑɑlk binbenŋ kɑɑ k yet nnɑ. K mɑɑn Muois *senni nɑ mun biɑ yet ŋɑnn e.

⁹L diɑn Muois senni nɑ ni ɑ: «Nɑɑb i ŋmɑɑn dii k pini dibin, fɑɑ dɑɑ bobnt u mɔb » Yennu bɑkɑ be nei ni ee?

¹⁰Ami u k mɑntk yien tinm kɑɑ ɑɑ? Mɔmɔnm, l diɑn k tien tinm e. Wun nbɑ ko nɑn wun nbɑ buo tun nnɑ e k mɔk dindɑnn, k tɑn sɑɑ cent dii mɑnŋ.

¹¹T din bul lin nbɑ tie siek yɑl i sinsuuk ni, k mɔtɑɑnɑ t i luon tin jɑɑn lin nbɑ k i mɔk nɑ siɑl i e, l k ŋɑn ii?

¹²Siɑb i mɔk yiikuo k sɑɑ gɑɑl bonɑ i buol, k tinm ŋɑnin k mɔk l yiikuo k cie ŋɑnm ii? Ŋɑɑn t k jii yiikuo nɑ k tun nɑn’n tuonn, ŋɑɑn t di fɑlɑ bonsiɑl kul ni, k mɑɑn t k luon k tin te k Klistu lɑbɑmɑnn nɑ n jil puol.

¹³I ponŋ mi nɑn bin nbɑ tuun Yennu jɑɑnti ŋɑsɑɑkɑk ni nɑ, b jiet nyi b tuonn mɑnŋ ni e, k bin nbɑ mɑnn *mɑlunŋ k tien Yennu, binbintl pɑɑk nɑ mun gɑɑn b yɑl lenŋ e.

¹⁴Nnɑ e mun k Yonmdɑɑnɔ tul mɔb ɑ bin nbɑ muɑntl u lɑbɑmɑnn nɑ, b jiet mun sii nyi lenŋ e.

¹⁵Ŋɑɑn n k jii yiikuo nɑ k tun nɑn tuonn, k biɑ k dɑ nɑ ɑ i tul’n siɑl. Mi i kpo, l sɔ nɑn suɑ n te k n *yudɑnt n ŋmɑt puol.

¹⁶L k tie ɑ n mɔk pɑlbifɑɑnt mɑɑ muɑntl lɑbɑmɑnn nɑ pɑɑk kɑɑ, k mɑɑn l kpɑɑ tɑlɑs k n muɑnt’l. Mi i kii muɑnt lɑbɑmɑnn nɑ, bonbiil sii tie n yɑl e.

¹⁷Mi i bo i lukt tuonn mɑnŋ n tiɑɔnŋ u e, n bo sɑɑ lɑ nyuɑt, ŋɑɑn min kɑɑ lukt n mɔnŋ, l tie Yennu e guun’n tuonn mɑnŋ.

¹⁸Lɑnn e tie n nyuɑt i? N nyuɑt tie mɑɑ fit k muɑntl lɑbɑmɑnn nɑ yɑnn nɑ e, k k jii yiikuo nbɑ k n mɔk’l lɑbɑmɑnn muɑntu ni nɑ k gɑɑn siɑl.

¹⁹N yen n mɔnŋ e, n k tie suɑ dɑɑbl kɑɑ, ŋɑɑn n jii n mɔnŋ k kpɑnt dɑɑbl k tul suɑ kul, ɑ niib bonciɑnn n lɑ fielu.

²⁰*Suifnbɑ buol ni, n jii n mɔnŋ k tien nɑn ŋɑnm nɑ e ɑ bin lɑ fielu. Bin nbɑ mun wɑɑ senni nɑ, n jii n mɔnŋ k tien nɑn b yenɔ nɑ e, ɑ k bin nbɑ wɑɑ senni nɑ n lɑ fielu, ŋɑɑn n mɔnŋ k be senni nɑ yiikuo ni.

²¹Bin nbɑ k mɔk senni nɑ, n jii n mɔnŋ k tien nɑn b yenɔ nɑ e, ɑ bin lɑ fielu. Nɑ k wɑnn nɑn n k sɑɑk Yennu senni nɑ, ŋɑɑn n be Klistu senni yiikuo nɑ ni.

²²Bin nbɑ yɑdɑ wɑɑl nɑ k n kpint n mɔnŋ k tien nɑn b yenɔ nɑ e ɑ bin lɑ fielu. N lebt n mɔnŋ bonsiɑl kul ni k tul niib kul, k luon b siɑb n lɑ fielu.

²³Lɑbɑmɑnn nɑ pɑɑk e k n tie lin nbɑ nɑ kul ɑ n tɑn lɑ nyuɑt.

²⁴I k mi nɑn l i tie nɑntɑɑl, nɑntɑtinnɑ kul tuu tiin e, ŋɑɑn yenɔ kuɑ e tuu tɑn di k gɑɑl piini ii? L pɑɑk, yɑbt mɑn k tin bɑnnu nbɑ k i sɑɑ di k gɑɑl piini mɑnŋ.

²⁵Nɑntɑtinnɑ kul so b mɔnŋ e bont kul ni, ɑ bin gɑɑl piini nbɑ k wɑ nɑn lin gbenn, ŋɑɑn tinm so t mɔnŋ ɑ t tɑn gɑɑl piini nbɑ kɑɑ gbennu.

²⁶Ŋɑnn e tien k n tiin ɑ n sɑɑ bɑɑl l pɑɑk. Ŋɑnn e tien k n k gbɑɑ yɑnn.

²⁷N muks n gbɑnɑnt k u sɑɑk’n, k mɑɑn n k luon min nbɑ muɑntl lɑbɑmɑnn nɑ k tien niib nɑ n tɑn kɔnŋ piini nɑ.