Read Moba 2 Kuolent-tieb 6 Bible Online

2 Kuolent-tieb 6 - Moba bible

2 Kuolent-tieb 6

¹Tinm nbɑ tuun Yennu tuonɑ u sonml pɑɑk nɑ, t bɑln’mi e, i dɑɑ te k u ninkpɑbɑɔnŋ nɑ tie yɑnn.

²K mɑɑn Yennu yet ɑ: «Yuo nbɑ din tɑn jɑnŋ nɑn mɑn wɑnn n lonm nɑ, n din gbiint ɑ miɑlu nɑ. K yuo nbɑ din tɑn jɑnŋ nɑn niib n lɑ fielu nɑ, n din sonm’ɑ wɑɑ.» Gbiintl mɑn, yuo jɑnŋ nɑn yin gɑɑl Yennu lonm o nɑ. Dinnɑ e tie dɑɑl nbɑ k niib sɑɑ lɑ fielu Yennu buol ni.

³Tinm k tuun bonsiɑl k sɑɑ guɑl suɑ Yiesu *Klistu sɔnu ni, ɑ k suɑ n tɑn mɑnn yet ɑ t tuonɑ nɑ mɔk biit.

⁴Tinm ŋɑnin, t binbenŋ kul nbɑ tie biɑnŋ nbɑ nɑ e wɑnt niib nɑn t set tie Yennu tuontunnɑ e. T lɑɑt fɑlɑ, nɑn muksuk, nɑn mɑɑn, ŋɑɑn lek di suklu l kul nɑ ni,

⁵k b buo’t lɑnbɑnɑ, k kuɑnt’t dɑnsɑli, k nibul tuu wol’t. K t lek gubn k gɑɑl wɑhɑlɑ kul: k k lɑɑt yɑɑk k guɑnt, nɑn kon.

⁶Tɑɑ tie niŋɑnm k mɔk bɑnnu nɑn suklu nɑn bulcint, k gbie nɑn Foŋɑnm, k luon niib nɑ e wɑnt nɑn t tie Yennu tuontunnɑ.

⁷T yien niib Yennu mɑɑn nbɑ tie bɑlmɔni nɑ, k mɔk ŋuɑ Yennu pɑnŋ, k biɑ mɔk yentinu binbenŋ nbɑ tie jɑtiɑt nbɑ be t niidiitu ni nɑn niigɑnŋ ni nɑ.

⁸Nisiɑb tien’t nibɑɑkl, k nisiɑb mun suki’t. Nisiɑb biil t sɑnɑ, k nisiɑb mun piɑk’t. Nisiɑb yien ɑ t lin kpɑnn niib e, ŋɑɑn k t piɑk bɑlmɔni e.

⁹Niib yɑɑ ɑ b k mi’t ŋɑɑn niib kul mi’t, k yɑɑ ɑ t tie kpienm e ŋɑɑn k t fo, k ŋmɑni t tubɑ ŋɑɑn k k kpi’t.

¹⁰Niib tien’t pɑlbiil, ŋɑɑn k t mɔk pɑlpienn nbɑ kɑɑ pɑɑk e yuo kul ɑ. T tie tɑli e, ŋɑɑn tinm e te k niib bonciɑnn tie mɔktɑ. T k mɔk siɑl, ŋɑɑn t set mɔk mɔktuk kul ɑ.

¹¹Yinm Kuolent duo tieb, t ponŋ yet’i t nuɑk ni mɑɑn kul ɑ.

¹²L k tie tinm kɑɑ k luon’i ni, ŋɑɑn yinm e k luon’t.

¹³N piɑk tien’i nɑn nilɔ nbɑ bo sɑɑ pɑk u tiɑɔnŋ wɑɑs biɑnŋ nbɑ nɑ e. Ii luon’t mɑn nɑn tɑɑ luon’i biɑnŋ nbɑ nɑ.

¹⁴I dɑɑ yuɑkt nɑn niib nbɑ k tien Yiesu yɑdɑ nɑ, k mɑɑn b k tie i yuɑsnbɑ kɑɑ. Lin nbɑ ŋɑn Yennu buol nɑn lin nbɑ bi sɑɑ fit lɑkn k be nɑn lieb ɑɑ? Yentu sɑɑ fit tɑɑn nɑn bunbɔnn ɑɑ?

¹⁵Klistu nɑn *Sɑɑtɑn sɑɑ fit tɑɑn mɔb ɑɑ? Nisuɑ nbɑ wɑɑ Yiesu sɔnu nɑn wun nbɑ k wɑɑ’l, b sɑɑ fit tɑɑn binbenyenŋ ɑɑ?

¹⁶Yennu jɑɑnti ŋɑsɑɑkɑk nɑn puociɑnfiek tie yonm oo? Aɑi. Tinm e tie jɑɑnti ŋɑsɑɑkɑk k tul mɑnfodɑɑnɔ Yennu, nɑn Yennu nbɑ din yet nɑ ɑ: «N sii be nɑn’m, kii sonm b sinsuuk ni. N sii tie b Yennu e, k b mun sii tie n niib.»

¹⁷L pɑɑk k Yonmdɑɑnɔ Yennu biɑ yet ɑ: «Bɔktl i mɔnŋ mɑn k nyi b sinsuuk ni mɑn. I dɑɑ tuun nɑn lin nbɑ mɔk jɑknt, k n sɑɑ gɑɑl’i.

¹⁸N sii tie i Bɑɑ e, k i tie n bonjɑbis nɑn n sɑpɑɑnbis. Min, Yonmdɑɑnɔ Yennu nbɑ mɔk yiikuo kul nɑ yien’i nnɑ.»